1, 2. (a) Kico por parce imposibel pa hopi hende, pero kico Bijbel ta garantisa nos? (b) Ki relacion intimo Abraham a haya chens di disfruta di dje, y pakico?

CON lo bo sinti bo si e Creador di shelo y tera bisa bo cu bo ta su amigo? Pa hopi hende, esei lo ta duro pa kere. Al fin y al cabo, ki mishi un simpel ser humano bira amigo di Yehova Dios? Toch Bijbel ta garantisa nos cu un relacion intimo asina ta realmente posibel.

² Abraham mes tawata un di e personanan di antiguedad cu tawatin un relacion intimo asina cu Dios. Yehova a referi na e patriarca ei como “mi amigo.” (Isaias 41:8) Si, Yehova a consider’e un amigo personal. Abraham a haya chens di experencia e relacion intimo ei pa motibo cu el a “kere Dios.” (Santiago 2:23) Awe tambe Yehova ta busca oportunidad pa ‘mustra su afecto’ na hende cu ta sirbie motiva pa amor. (Deuteronomio 10:15) Su Palabra ta haci e siguiente apelacion: “Hala serca Dios y e lo hala serca boso.” (Santiago 4:8) Den e palabranan aki nos ta haya tanto un invitacion como un promesa.

3. Ki invitacion Yehova ta extende na nos, y kico e ta priminti nos en conexion cu esei?

³ Yehova ta invita nos pa hala serca dje. E ta cla y dispuesto pa acepta nos como su amigo. Na mes momento, e ta priminti nos cu si nos dal e pasonan necesario pa hala serca dje, e di su banda tambe lo haci mescos. E lo hala serca nos. Di e manera ei nos lo por haya algo sumamente precioso: “comunion intimo [cu] SEÑOR.” * (Salmo 25:14)  “Comunion intimo” ta duna e idea di combersacion confidencial cu un amigo special.

4. Con lo bo describi un amigo intimo, y den ki sentido Yehova ta un amigo asina pa esnan cu ta hala serca dje?

⁴ Abo tin un amigo intimo di confiansa? Un amigo asina ta un persona cu ta interesa den bo. Bo ta confi’e pasobra el a demostra cu e ta leal na bo. Bo goso ta bira mas completo ora bo comparti bo alegria cu ne, y e solo echo cu e por scucha bo ora bo tin problema ta alivia bo pena. Asta ora ta parce cu ningun otro hende no ta compronde bo, e si t’ei pa bo. Mescos tambe, ora bo hala serca Dios, bo ta bin haya un Amigo special cu di berdad ta aprecia bo, cu tin interes profundo den bo y cu ta compronde bo completamente. (Salmo 103:14; 1 Pedro 5:7) Bo ta confi’e bo sintimentonan di mas intimo pasobra bo sa cu e ta fiel na esnan cu ta fiel na dje. (Salmo 31:5) Un cos si, nos lo no por tawatin e privilegio di tin Dios como nos amigo intimo si no ta pasobra e a haci esaki posibel.

5. Con Yehova a haci posibel pa nos hala serca dje?

⁵ Riba nos mes, como pecadonan hamas nos lo por hala serca Dios. (Salmo 5:4) “Ma Dios ta demostra su mes amor pa cu nos den esaki, cu tempo nos tawata pecado ainda, Cristo a muri pa nos”, segun apostel Pablo. (Romanonan 5:8) Si, Yehova a haci areglo pa Hesus “duna su bida como prijs di rescate pa hopi.” (Mateo 20:28) Fe den e sacrificio di rescate ei ta permiti nos hala serca Dios. Siendo cu Dios a “stima nos prome”, el a pone e base pa nos bira su amigo.—1 Huan 4:19.

6, 7. (a) Con nos por sa cu Yehova no ta un Dios misterioso, imposibel pa conoce? (b) Den ki maneranan Yehova a revela su mes?

⁶ Yehova a dal un paso mas: El a revela su mes na nos. Pa un persona por ta bo amigo intimo, bo tin cu conoc’e bon, y aprecia su cualidadnan y forma di actua. Pues si  Yehova tawata un Dios misterioso y imposibel pa conoce, hamas nos lo por a hala serca dje. Sinembargo, en bes di sconde su mes, e kier pa nos conoc’e. (Isaias 45:19) Ademas, loke e ta revela tocante su mes ta disponibel pa tur hende, asta pa hende cu mundo ta considera insignificante.—Mateo 11:25.

⁷ Con Yehova a revela su mes na nos? Den su obranan di creacion nos por mira cierto aspectonan di su personalidad, manera su poder enorme, su sabiduria infinito y su amor inmenso. (Romanonan 1:20) Pero no ta mediante su creacion so Yehova a revela su mes na nos. E Gran Comunicador a manifesta su mes tambe mediante un revelacion por escrito den su Palabra, Bijbel.

8. Pakico nos por bisa cu Bijbel mes ta un prueba di e amor cu Yehova tin pa nos?

⁸ Bijbel mes ta un prueba di e amor cu Yehova tin pa nos. Den su Palabra, e ta revela su mes cu terminonan cu nos por compronde—un prueba cu no solamente e ta stima nos, sino tambe cu e kier pa nos conoc’e y stim’e. Loke nos ta lesa den e buki precioso aki ta permiti nos contempla “e bunitesa di Señor” y ta motiva nos pa hala serca dje. (Salmo 27:4) Laga nos analisa algun di e maneranan alentador den cua Yehova ta revela su mes den su Palabra.

9. Menciona algun pasashi di Bijbel cu ta papia di e cualidadnan spesifico di Dios.

⁹ E Scritura ta haci hopi mencion direct di e cualidadnan di Dios. At’aki un par di ehempel. “Señor ta stima husticia.” (Salmo 37:28) Dios ta “excelente den poder.” (Job 37:23) E ta “e Dios fiel.” (Deuteronomio 7:9) E ta “sabi di curason.” (Job 9:4) E ta un “Dios, yen di compasion y gracia, kende no ta rabia lihe y kende ta abunda den misericordia y berdad.” (Exodo 34:6) “Abo, Señor, ta bon, y cla pa pordona.” (Salmo 86:5) Y manera e capitulo anterior a  menciona, esun cu ta destaca mas ta: “Dios ta amor.” (1 Huan 4:8) Segun cu bo ta reflexiona riba e bunita cualidadnan aki, bo no ta sinti bo atrai na e Dios incomparabel aki?

10, 11. (a) Pa yuda nos compronde su personalidad miho, kico Yehova a inclui den su Palabra? (b) Ki ehempelnan di Bijbel ta yuda nos visualisa con Dios ta desplega su poder?

¹⁰ Ademas di bisa nos kico ta su cualidadnan, debi na su gran amor Yehova a inclui den su Palabra ehempelnan concreto di con el a desplega esakinan. E relatonan ei ta pinta cuadronan mental bibo cu ta yuda nos mira e varios fasetanan di su personalidad na un manera mas cla. Esei, na su turno, ta yuda nos hala serca dje. Laga nos wak un ehempel.

¹¹ Bijbel ta papia di “e grandesa di [Dios] su forsa.” (Isaias 40:26) Pero ta mucho mas impactante pa lesa con el a libra Israel door di Lama Cora y despues sostene e nacion 40 aña largo den e desierto. Bo por visualisa con e awanan bruto ta parti den dos. Bo por mira con e nacion—kisas un 3.000.000 hende—ta cana riba fondo seco di e lama entre dos enorme muraya di awa na cada banda. (Exodo 14:21; 15:8) Bo por mira evidencia di con Dios a cuida nan y proteha nan den desierto. Nan a haya awa for di baranca. Yehova a laga cuminda, cu a parce manera simiña blanco, aparece riba suela. (Exodo 16:31; Numbernan 20:11) Aki Yehova ta revela no solamente cu e tin poder sino cu e ta uz’e tambe na fabor di su pueblo. No ta un consuelo pa sa cu ta un Dios poderoso ta tende nos oracionnan, uno cu “ta nos  refugio y fortalesa, un pronto ausilio den tempo di angustia”?—Salmo 46:1.

12. Con Yehova ta yuda nos “mir’e” den terminonan cu nos por compronde?

¹² Yehova, kende ta un spirito, a bai mas aleu ainda pa yuda nos conoc’e. Como hende nos por mira solamente loke ta visibel pa wowo humano; e region di spirito ta invisibel pa nos. Si Dios a describi su mes den terminonan spiritual, lo ta mescos cu ora bo purba splica un hende cu a nace ciego e detayenan di bo aparencia, manera colo di bo wowo of tocante bo purunchinan. Mas bien, Yehova tawatin e bondad di yuda nos “mir’e” den terminonan cu nos por compronde. Tin biaha e ta uza idioma figurativo pa compara su mes cu cosnan cu nos conoce. E ta asta describi su mes como si fuera e tin cierto caracteristicanan humano. *

13. Ki cuadro mental Isaias 40:11 ta crea, y ki sintimento esei ta duna bo?

¹³ Ripara con Isaias 40:11 ta describi Yehova: “Manera un wardado di carne e lo cuida su tou, e lo cohe e lamchinan den su brasa, y tene nan serca di su curason [“pecho”, NW].” Aki Bijbel ta compara Yehova cu un wardado di carne cu ta cohe lamchi den “su brasa.” Esaki ta laga nos mira cu Dios ta capas pa proteha y sostene su sirbidonan, asta esnan mas vulnerable. Nos por sinti nos proteha den su brasa fuerte, pasobra si nos ta leal na dje, lo e no bandona nos nunca. (Romanonan 8:38, 39) E Gran Wardador ta carga e lamchinan na “su pecho”—un expresion cu ta referi na e plooinan na e parti ariba di paña di un wardado,  cu ta forma manera un saco, y den cua e sa carga un lamchi cu a caba di nace. Esei ta duna nos e siguransa anto cu Yehova ta stima nos y ta cuida nos cu ternura. Nos deseo natural ta di ta serca dje, no ta berdad?

14. Pakico nos por bisa cu Yehova ta revela e aspectonan mas intimo di su personalidad pa medio di Hesus?

¹⁴ Den su Palabra, Yehova ta revela e aspectonan mas intimo di su personalidad pa medio di su Yiu stima, Hesus. No tin ningun hende cu por refleha e pensamento y sintimentonan di Dios miho cu Hesus, of splica na un manera mas bibo con Dios ta. Al fin y al cabo, e Yiu primogenito ei a existi hunto cu su Tata prome cu Dios a crea otro criaturanan spiritual y e universo fisico. (Colosensenan 1:15) Hesus a conoce Yehova intimamente. Pesei e por a bisa: “Ningun no sa ken e Yiu ta, sino e Tata so, y ken e Tata ta, sino e Yiu so, y esun na kende e Yiu kier revel’e.” (Lucas 10:22) Tempo cu Hesus tawata  riba tera como hende, el a revela su Tata den dos manera importante.

15, 16. Den ki dos maneranan Hesus a revela su Tata?

¹⁵ Na prome luga, e siñansanan di Hesus ta yuda nos conoce su Tata. Hesus a papia di Yehova na un manera cu ta conmove nos curason. Por ehempel, pa splica cu Dios ta misericordioso y cu e ta ricibi bek e pecadonan cu repenti, Hesus a compara Yehova cu un Tata pordonado cu ta sinti su mes asina profundamente conmovi ora e mira su yiu perdi bolbe bek, cu e ta core bai top’e, bras’e y dun’e un sunchi tierno. (Lucas 15:11-24) Tambe Hesus a describi Yehova como un Dios cu ta atrae hende husto pasobra e ta stima nan como persona. (Huan 6:44) E sa asta ki ora un paharito ta cai na tera. Hesus a splica nan: “No tene miedo; boso bal mas cu un cantidad di mofi.” (Mateo 10:29, 31) Nos no ta sinti nos atrai na un Dios bondadoso asina?

¹⁶ Na di dos luga, Hesus ta yuda nos conoce Yehova pa medio di su ehempel. Hesus a imita su Tata na un manera asina perfecto cu e por a bisa: “Esun cu a mira mi a mira e Tata.” (Huan 14:9) Pues, ora nos lesa den e Evangelionan tocante Hesus—e sintimentonan cu el a manifesta y e manera cu el a trata cu otro hende—den un sentido nos ta mirando un refleho bibo di su Tata. Yehova no por a duna nos un revelacion mas cla di su cualidadnan cu esei. Pakico?

17. Ilustra kico Yehova a haci pa yuda nos haya un idea con e ta.

¹⁷ Pa ilustra esaki, imagina cu bo ta purba splica kico ta bondad. Lo bo por purba definie cu palabra. Pero si bo por mustra riba un persona cu na e momento ei ta haciendo un acto di bondad y bisa, “Esei ta un ehempel di bondad”, e palabra “bondad” ta haya mas nificacion y ta bira mas facil pa compronde. Yehova a haci algo paresido pa yuda nos haya un idea di con e ta. Ademas di describi su mes cu palabra, el a duna nos e ehempel bibo di su Yiu. Den Hesus nos ta mira e cualidadnan di Dios na accion. Ta como si  fuera Yehova ta bisa nos pa medio di e Evangelionan cu ta describi Hesus: “Ta asina mi ta.” Con e registro inspira ta describi Hesus tempo cu e tawata riba tera?

18. Con Hesus a manifesta e cualidadnan principal di poder, husticia y sabiduria?

¹⁸ Den Hesus nos ta haya un bunita expresion di e cuater cualidadnan principal di Dios. E tawatin poder riba enfermedad, hamber y asta morto. Pero distinto di hombernan egoista cu ta haci mal uzo di nan poder, nunca el a uza e poder di haci milager pa beneficia su mes of pa causa daño na otro hende. (Mateo 4:2-4) El a stima husticia. Ora el a mira comerciantenan deshonesto probecha di hende pober, su sentido di husticia a pon’e bira masha indigna. (Mateo 21:12, 13) El a trata hende pober y oprimi na un manera imparcial. El a yuda nan “haya sosiego” pa nan alma. (Mateo 11:4, 5, 28-30) Hesus, kende tawata “mas cu Salomon”, a manifesta un sabiduria incomparabel den su siñansanan. (Mateo 12:42) Pero nunca Hesus a gaba tocante su sabiduria. Su palabranan a alcansa curason di e pueblo comun, pasobra su siñansanan tawata cla, simpel y practico.

19, 20. (a) Pakico nos por bisa cu Hesus tawata un ehempel sublime di amor? (b) Segun cu nos ta lesa y medita riba e ehempel di Hesus, kico nos mester corda semper?

¹⁹ Hesus tawata un ehempel sublime di amor. Durante henter su ministerio, el a desplega amor den su hopi fasetanan, manera empatia y compasion. E no por a mira sufrimento di otro hende sin sinti duele, y na varios ocasion esaki a impuls’e pa haci algo pa nan. (Mateo 14:14) Aunke Hesus a cura hende malo y a alimenta esnan cu tawatin hamber, el a expresa compasion den un manera mucho mas vital. El a yuda otro hende conoce, acepta y stima e berdad tocante e Reino di Dios, cu lo trece bendicionnan permanente pa humanidad. (Marco 6:34; Lucas 4:43) Pero e manera mas importante cu Hesus a demostra su amor sin  egoismo ta ora el a entrega su alma boluntariamente na fabor di otro hende.—Huan 15:13.

²⁰ No ta nada straño anto cu hende di tur edad y antecedente a sinti nan atrai na e homber tierno y yen di sintimento aki. (Marco 10:13-16) Sinembargo, segun cu nos ta lesa y medita riba e ehempel bibo di Hesus, laga nos corda semper cu den e Yiu aki nos ta mira un refleho cla di su Tata.—Hebreonan 1:3.

21, 22. Kico ta nifica busca Yehova, y kico e buki aki ta contene pa yuda nos haci esei?

²¹ Door di revela su mes asina cla den su Palabra, Yehova no ta laga duda cu e kier pa nos hala serca dje. Na mes momento, e no ta obliga nos cuminsa un relacion cu ne y busca su aprobacion. Ta nos tin e responsabilidad di busca Yehova “mientras cu e por wordo haya.” (Isaias 55:6) Busca Yehova ta encera conoce su cualidadnan y su forma di trata manera Bijbel ta revela. E buki cu bo ta lesando aki ta diseña pa yuda bo haci esei.

²² Lo bo ripara cu e buki aki ta dividi den seccionnan cu ta coresponde cu Yehova su cuater cualidadnan principal: poder,  husticia, sabiduria y amor. Cada seccion ta cuminsa cu un resumen di e cualidad. E siguiente capitulonan ta analisa con Yehova ta manifesta e cualidad ei den su varios aspectonan. Cada seccion ta contene tambe un capitulo cu ta mustra con Hesus a sirbi como ehempel di e cualidad en cuestion, y tambe un capitulo cu ta siña nos con nos por refleh’e den nos bida.

23, 24. (a) Splica kico ta e meta di e cuadro special “Pregunta pa Medita Ariba.” (b) Con meditacion ta yuda nos hala mas y mas serca Dios?

²³ Cuminsando cu e capitulo aki, tin un cuadro special titula “Pregunta pa Medita Ariba.” Wak por ehempel e cuadro na pagina 24. E intencion no ta pa uza e textonan y preguntanan como un repaso di e capitulo. Mas bien, nan t’ei pa yuda bo medita riba otro aspectonan importante relaciona cu e tema. Con bo por haci bon uzo di e rasgo aki? Busca cada un di e textonan cita y lesa e versiculonan atentamente. Despues lesa e pregunta cu tin tras di cada texto. Medita riba e contestanan. Tambe bo por haci algun investigacion. Ademas, puntra bo mes: ‘Kico e informacion aki ta siña mi tocante Yehova? Ki efecto e tin riba mi bida? Con mi por uz’e pa yuda otro hende?’

²⁴ E analisis ei por yuda nos hala mas y mas serca Yehova. Pakico? Bijbel ta relaciona meditacion cu nos curason. (Salmo 19:14) Ora nos reflexiona cu gratitud riba loke nos ta siña tocante Dios, e informacion ta baha den nos curason figurativo, caminda e ta influencia nos moda di pensa, stimula nos sintimentonan y finalmente move nos na accion. Nos amor pa Dios ta bira mas profundo, y e amor ei ta duna nos e deseo di agrad’e como nos miho Amigo. (1 Huan 5:3) Pa cuminsa un relacion asina cu Yehova, nos mester conoce su cualidadnan y forma di actua. Pero prome cu esei, laga nos analisa un aspecto di su personalidad cu ta duna nos un motibo combencente pa hala serca dje: su santidad.