1, 2. Con amplio e bondad di Dios ta, y con Bijbel ta enfatisa e cualidad aki?

BOU di e bunita rayonan di un solo cu ta baha, un grupo di amigo di hopi tempo ta disfruta di un picknick. Nan ta hari y papia cu otro segun cu nan ta admira e bista. Leu for di einan, un cunukero ta wak su cunucu y ta smile, satisfecho di mira cu nubia scur a forma y e prome gotanan di awa a cai caba riba e tera seco di su plantacion. Otro caminda, un pareha ta bira loco di contento ora nan ta mira nan yiu titubia y dal su prome pasonan.

² Sea cu e hendenan ei sa of no, nan tur ta beneficiando di e mesun cos: e bondad di Yehova Dios. Hopi bes bo por tende hende religioso bisa: “Dios ta bon.” Bijbel ta bis’e cu hopi mas enfasis. E ta bisa: “Ki grandi ta bo bondad!” (Salmo 31:19) Pero ta parce cu masha poco hende awendia sa kico e palabranan ei ta nifica. Kico e bondad di Yehova Dios ta encera exactamente, y ki efecto e cualidad di Dios aki tin riba cada un di nos?

3, 4. Kico ta bondad, y dicon e miho manera di describi bondad ta como un muestra di Dios su amor?

³ Den hopi idioma moderno, “bondad” ta un palabra un tiki vago. Pero Bijbel si no ta splica bondad como algo vago. Bondad ta encera principalmente birtud y excelencia moral. Pesei, den e sentido ei nos por bisa cu bondad ta bisto den tur faseta di Yehova su personalidad. Tur su cualidadnan, incluso su poder, husticia y sabiduria, ta completamente bon. Ma probablemente nos por describi bondad miho como un di e maneranan cu Yehova su amor ta sali na cla. Dicon?

 ⁴ Bondad ta un cualidad cu ta ser demostra cu accion. Apostel Pablo a mustra cu un hende bondadoso ta asta mas deseabel cu un hende husto. (Romanonan 5:7) Bo por conta cu un hende husto lo pega fielmente na loke lei ta exigi, pero un hende bon ta bai asta mas leu. E ta tuma iniciativa; e mes ta busca maneranan pa haci bon pa otro. Manera nos ta bai mira, sin duda Yehova ta bon den e sentido ei. Y claramente, su bondad ta producto di su amor infinito.

5-7. Dicon Hesus a nenga pa nan yam’e “Bon Maestro”, y ki berdad profundo el a reafirma asina?

⁵ Yehova ta incomparabel den su bondad tambe. Poco prome cu Hesus a muri, un homber a acerc’e pa puntr’e algo, y a dirigi su mes na dje como “Bon Maestro.” Hesus a responde: “Pakico bo ta yama mi bon? Ni un hende no ta bon, sino Dios so.” (Marco 10:17, 18) Ma loke el a responde por zona straño. Dicon Hesus mester a corigi e homber? Acaso Hesus no tawata un “Bon Maestro”?

⁶ Evidentemente, e homber a uza e expresion “Bon Maestro” como un titulo pa labia Hesus. Cu modestia, Hesus a dirigi e gloria na su Tata den shelo, esun cu ta supremamente bon. (Proverbionan 11:2) Ademas, e contesta di Hesus a hala atencion na un berdad profundo. Ta Yehova so ta sirbi como e criterio di loke ta bon. Ta e so tin e derecho soberano di dicidi kico ta bon y kico ta malo. Adam cu Eva a purba tuma e derecho ei pa nan mes door di rebela y come for di e palo di conocemento di bon y malo. Hesus ta completamente diferente. Humildemente e ta laga su Tata so fiha e normanan di loke ta bon y malo.

⁷ Ademas, Hesus tawata sa cu ta Yehova ta e fuente di tur loke ta berdaderamente bon. E ta e Dunador di “tur bon regalo y tur don perfecto.” (Santiago 1:17) Ban wak con Yehova su bondad ta bira bisto door di su generosidad.

8. Con Yehova a mustra bondad na henter humanidad?

⁸ Tur hende cu a yega di biba a beneficia di Yehova su bondad. Salmo 145:9 ta bisa cu Yehova ta “bon pa tur.” Kico ta algun ehempel di e bondad aki? Bijbel ta bisa: “E no a laga su mes sin testimonio, door cu el a haci bon y a manda awasero for di shelo y tempo di bon cosecha pa boso, y a satisface boso curason cu cuminda y alegria.” (Echonan 14:17) Bo a yega di sinta come un bon cuminda, anto sinti cu el a lanta bo animo? Wel, si no ta pasobra Yehova den su bondad a diseña e tera aki di tal manera cu e ta keda recycle awa constantemente pa nos tin awa fresco, y pa tin ‘temponan di bon cosecha’ pa duna nos cuminda na abundancia, lo no tawatin cuminda mes. Y no ta na hende cu ta stim’e so Yehova ta dirigi tal bondad, sino na tur hende. Hesus a  bisa: “E ta haci su solo sali riba mal hende y riba bon hende, y ta laga awa yobe riba hende husto y riba hende inhusto.”—Mateo 5:45.

9. Con apel ta ilustra Yehova su bondad?

⁹ Hopi hende no ta para keto y aprecia tur e generosidad abundante cu humanidad ta disfruta di dje debi na e accion constante di solo, awasero y tempo di cosecha. Tuma por ehempel un apel. E ta un fruta comun den mayoria regionnan di mundo cu no ta ni friu ni cayente. Pero e ta bunita, dushi pa come y yen di awa refrescante y nutriente vital. Bo tawata sa cu tin mas cu 7.500 tipo di apel na mundo? Tin apel cora, oraño, geel, berde, y nan tamaño ta  varia di un poco mas grandi cu un cherry te grandura di un grapefruit. Si bo tene un simiña di apel den bo man, e por parce insignificante. Pero ta for di dje un di e palonan di mas bunita ta crece. (Cantica di Salomon 2:3) Tur lente palonan di apel ta haya un corona precioso di flor, y tur herfst nan ta produci fruta. Como promedio, un palo di apel ta keda produci suficiente fruta pa yena 20 caha di 19 kilo, y e ta haci esaki tur aña, tin biaha pa 75 aña largo!

10, 11. Con nos sentidonan ta demostra e bondad di Dios?

¹⁰ Den su bondad infinito, Yehova a duna nos un curpa “maraviyoso”, cu sentidonan cu ta permiti nos contempla su obranan y disfruta di nan. (Salmo 139:14) Corda bek riba e esenanan describi na cuminsamento di e capitulo aki. Kico ta deleita nos bista na momentonan asina? E cara contento di un mucha. Un cortina di awasero cu ta baha riba un cunucu. E colonan cora, oraño y biña den shelo ora solo ta baha. Hende su wowo ta diseña pa capta mas cu 300.000 diferente colo! Y nos sentido di oido por capta variacionnan di tono masha leve den stem di un hende cu nos ta stima, biento cu ta supla suave door di palonan, y un baby cu ta hari, loco di contento. Con bin nos ta capas pa disfruta di imagen- y zonidonan asina? Bijbel ta bisa: “Horea cu ta tende y wowo cu ta mira, SEÑOR a traha tur dos.” (Proverbionan 20:12) Pero esakinan ta apenas dos di nos sentidonan.

¹¹ Nos sentido di olfato ta otro evidencia di Yehova su bondad. Hende su nanishi por distingui como 10.000 holo diferente. Pensa riba djis un par di nan: e holo di bo cuminda faborito riba candela, di awasero, flor of lama. Y bo sentido di tacto ta permiti bo sinti biento caricia bo cara, e abraso tierno di un hende cu bo ta stima, y e suavidad di un fruta. Ora bo dal un hap den dje, bo sentido di smak ta drenta den wega. Un variedad di sabor ta deleita bo paladar segun cu bo lenga ta detecta e variacionnan leve di smak  forma door di e composicion kimico complica di e fruta. Si, nos tin tur motibo pa sclama asin’aki tocante Yehova: “Ki grandi ta bo bondad, cu bo a warda pa esnan cu tin temor di bo!” (Salmo 31:19) Pero, ta den ki sentido Yehova a “warda” bondad pa hende cu ta tem’e?

12. Ki tipo di percuracion di Yehova ta mas importante, y dicon?

¹² Hesus a bisa: “Ta para skirbi: ‘Hende lo no biba di pan so, ma di tur palabra cu ta sali for di boca di Dios.’” (Mateo 4:4) Si, loke Yehova ta percura pa nos den sentido spiritual por yuda nos asta mas cu percuracionnan material, pasobra nan por dura pa semper. Na Capitulo 8 di e buki aki nos a mira cu den e ultimo dianan aki Yehova a uza su poder pa restaura pa crea un paradijs spiritual. Un parti principal di e paradijs ei ta e abundancia di alimento spiritual cu tin disponibel awor.

13, 14. (a) Kico profeta Ezekiel a mira den un vision, y kico e ta nifica pa nos awe? (b) Ki percuracionnan Yehova ta haci disponibel pa su sirbidonan fiel por haya bida?

¹³ Den un di e gran profecianan di restauracion den Bijbel, profeta Ezekiel a ricibi un vision di un tempel restaura y glorioso. Tawatin awa ta core sali for di dje. E awa aki tawata bira mas y mas hancho, y mas y mas profundo, te bira un “riu.” Unda cu e riu a pasa el a trece bendicion. Na canto di dje tawatin palo ta crece cu tawata duna alimento y curacion. Y e riu a asta debolbe bida y productividad na Lama Morto, cu su awanan salo y sin bida! (Ezekiel 47:1-12) Pero, kico tur esei ta nifica?

¹⁴ E vision a nifica cu Yehova tawata bai restaura su areglo pa adoracion puro, loke e tempel di Ezekiel a simbolisa. Mescos cu e riu den e vision, Dios su percuracionnan pa nos haya bida ta basha sali na un manera cada bes mas abundante. For di momento cu adoracion puro a ser  restaura na 1919, Yehova a bendiciona su pueblo cu percuracionnan cu ta duna bida. Con? Wel, miyones di hende a siña conoce berdadnan vital pa medio di Bijbel, literatura biblico, reunion y asamblea. Yehova ta uza tal medionan pa siña hende tocante e percuracion di mas importante cu el a haci pa nos haya bida—e sacrificio di rescate di Cristo, cu ta haci posibel pa ken cu ta stima y teme Dios di berdad, por haya un posicion limpi dilanti Yehova, y e speransa di biba pa semper. * Pesei, atrabes di e ultimo dianan aki, maske mundo ta sufri hamber spiritual, Yehova su pueblo si ta disfrutando di un bankete spiritual.—Isaias 65:13.

15. Con hende fiel ta bai sinti Yehova su bondad durante e Reinado di Mil Aña di Cristo?

¹⁵ Pero e riu cu Ezekiel a mira den e vision no ta stop di core ora e sistema mundial bieu aki yega su fin. Al contrario, durante e Reinado di Mil Aña di Cristo e ta bai core na un manera asta mas abundante. E ora ei, pa medio di e Reino Mesianico, Yehova ta bai uza e balor completo di e sacrificio di Hesus pa pocopoco humanidad por yega na perfeccion. Esta felis nos lo ta na e tempo ei pa motibo di Yehova su bondad!

16. Con Bijbel ta mustra cu Yehova su bondad ta encera otro cualidadnan, y cua ta algun di nan?

¹⁶ Yehova su bondad ta encera mas cu generosidad so. Dios a bisa Moises: “Ami mes lo laga tur mi bondad pasa bo dilanti, y lo proclama e nomber di SEÑOR bo dilanti.” Despues e relato ta conta: “SEÑOR a pasa su dilanti y a proclama: ‘SEÑOR, SEÑOR Dios, yen di compasion y gracia, kende no ta rabia lihe y kende ta abunda den misericordia y berdad.’ ” (Exodo 33:19; 34:6) Pues, e bondad di Yehova ta encera varios otro cualidad excelente. Laga nos papia riba djis dos di nan.

17. Kico ta gracia, y con Yehova ta trata simpel hende imperfecto cu gracia?

¹⁷ “Gracia.” E cualidad aki ta bisa nos hopi tocante Yehova su manera di trata cu su criaturanan. Na luga di ta bruto, friu of tiranico, manera sa ta e caso hopi bes cu hende poderoso, Yehova ta suave y bondadoso. Por ehempel, Yehova a bisa Abram: “Awor hisa bo cara [“por fabor”, NW] y, for di e luga caminda bo ta, mira panort, pasuit, pariba y pabou.” (Genesis 13:14) Hopi traduccion ta laga e expresion “por fabor” afo. Pero expertonan di Bijbel ta remarca cu den e texto original na Hebreo tin un variacion chikito di un di e palabranan, cu ta cambia e declaracion aki di manera cu e no ta un ordo, sino un peticion cortes. Y tin mas luga den Bijbel caminda esei ta e caso. (Genesis 31:12, NW; Ezekiel 8:5, NW) Imagina bo, e Soberano di Universo ta uza “por fabor” papiando cu simpel ser humano! Den e mundo aki, yen di hende bruto, agresivo y cu mal manera, no ta dushi pa mira con nos Dios Yehova ta trata hende cu gracia?

18. Den ki sentido Yehova ta “abunda den . . . berdad”, y ki siguransa e palabranan ei ta duna nos?

¹⁸ “Abunda den . . . berdad.” Deshonestidad a bira un cos normal den mundo awendia. Pero Bijbel ta recorda nos: “Dios no ta hende, cu e lo gaña.” (Numbernan 23:19) Tito 1:2 ta asta bisa cu “Dios . . . no por gaña.” E ta mucho bon p’e haci un cos asina. Pesei, Yehova su promesanan ta completamente confiabel; su palabranan ta cumpli sigur. Yehova ta asta ser yama e “Dios di berdad.” (Salmo 31:5, BPK) Y Dios no ta djis keda sin papia falsedad so; e ta comunica berdad na abundancia tambe. E no ta un persona cu gusta tene tur cos secreto. Generosamente e ta ilumina  su sirbidonan fiel cu su suministro interminabel di sabiduria. * Asta e ta siña nan con pa biba di acuerdo cu e berdad cu e ta haci disponibel, pa asina nan por sigui ‘cana den berdad.’ (3 Huan 3) Awor, en general, ki efecto Yehova su bondad tin riba cada un di nos individualmente?

19, 20. (a) Con Satanas a purba debilita e confiansa cu Eva tawatin den Yehova su bondad, y cu ki resultado? (b) E echo cu Yehova ta bon mester tin ki sorto di efecto riba nos, y dicon?

¹⁹ Ora Satanas a tenta Eva den Hofi di Eden, el a cuminsa na debilita Eva su confiansa den Yehova su bondad na un manera sutil. Yehova a bisa Adam: “Di tur palo di e hofi bo mag come libremente.” Di tur e miles di palonan cu lo tawata dorna e hofi, ta for di uno so Yehova a nenga Adam di come. Pero wak con Satanas a formula su prome pregunta na Eva: “Di berdad Dios a bisa: ‘Bo no mag come di [“tur”, NW] palo di e hofi?’” (Genesis 2:9, 16; 3:1) Satanas a troce Yehova su palabranan pa pone Eva pensa cu Yehova tawata neng’e algo cu lo tawata bon p’e. Lamentablemente, su tactica a duna resultado. Eva, mescos cu asina tanto otro hende homber y mohe despues, a cuminsa duda den Dios su bondad, siendo cu ta e a duna Eva tur loke Eva tawatin.

²⁰ Nos sa bon cuanto tristesa y miseria e tipo di pensamentonan ei ta trece cu nan. Pesei, laga nos tuma na pecho loke Yeremias 31:12 ta bisa: “Nan . . . lo ta radiante pa motibo di e bondad di SEÑOR.” En berdad, Yehova su bondad mester haci nos radiante di goso. Nunca nos no tin motibo pa duda kico ta motiva nos Dios, pasobra e ta abunda den bondad. Nos por confia completamente den dje, pasobra ta cos bon so e kier pa esnan cu ta stim’e, y nada malo.

21, 22. (a) Di ki manera asina bo tin deseo di demostra bo aprecio pa Yehova su bondad? (b)  Cua cualidad nos ta bai trata den e siguiente capitulo, y den ki sentido e ta diferente for di bondad?

 ²¹ Ademas, ora nos haya chens pa papia cu otro hende tocante Dios su bondad, nos ta hacie cu goso. Wak kico Salmo 145:7 ta bisa tocante Yehova su pueblo: “Cu animo nan lo papia di e recuerdo di bo gran bondad.” Tur dia di nos bida nos ta saca beneficio di un manera of otro di Yehova su bondad. Pakico nos no ta forma un custumber di gradici Yehova tur dia pa su bondad, siendo mas spesifico posibel? Si nos pensa riba e cualidad ei, gradici Yehova tur dia p’e, y conta hende tocante dje, esei lo yuda nos imita nos bon Dios. Y segun cu nos ta busca manera pa haci bon mescos cu Yehova, nos lo hala mas serca dje. Tempo cu apostel Huan tawata bieu caba, el a skirbi: “Ruman stima, no imita loke ta malo, sino loke ta bon. Esun cu haci bon ta di Dios.”—3 Huan 11.

²² Yehova su bondad tin di aber cu otro cualidadnan tambe. Por ehempel, Dios ta “abundante den bondad amoroso”, of, amor leal. (Exodo 34:6, NW) E cualidad aki ta mas spesifico cu bondad, pasobra Yehova ta demostra e cualidad aki particularmente na su sirbidonan fiel. Den e siguiente capitulo nos lo mira di ki manera e ta hacie.