1-3. Ora nos imita Yehova door di mustra amor, kico nos ta experencia?

“TA MAS bendiciona pa duna cu pa ricibi.” (Echonan 20:35) E palabranan aki di Hesus ta hala atencion na un berdad importante: Amor sin egoismo ta un recompensa riba su mes. Aunke nos ta haya hopi felicidad ora nos ricibi amor, tin asta mas felicidad den duna of demostra amor na otronan.

² Ningun hende no por compronde esei miho cu nos Tata celestial. Manera nos a mira caba den e capitulonan anterior di e seccion aki, Yehova ta e ehempel maximo di amor. Ningun otro persona a yega di demostra amor na un manera mas grandi, ni durante un periodo di tempo mas largo cu ne. Pues, acaso mester straña nos cu Yehova ta ser yama “e Dios felis”?—1 Timoteo 1:11, NW.

³ Nos Dios amoroso kier pa nos purba ta manera e, principalmente den loke ta toca mustra amor. Efesionan 5:1 y 2 ta bisa nos: “Sea imitadonan di Dios, manera yiunan stima; y cana den amor.” Ora nos imita Yehova door di mustra amor manera e, nos ta experencia e felicidad mayor cu dunamento ta produci. Ademas, nos ta sinti e satisfaccion di sa cu nos ta agradando Yehova, pasobra su Palabra ta anima nos fuertemente pa “stima otro.” (Romanonan 13:8) Pero tin mas motibo pa nos “cana den amor.”

4, 5. Dicon ta importante pa nos mustra amor abnega na nos compañeronan creyente?

⁴ Dicon ta importante pa nos mustra amor na nos compañeronan creyente? Den poco palabra, pasobra amor ta esencia di cristianismo berdadero. Sin amor nos no por tin un relacion fuerte cu nos rumannan cristian, y, asta mas importante ainda, nos lo no nifica absolutamente nada den Yehova  su bista. Wak con e Palabra di Dios ta resalta e berdadnan aki.

⁵ Riba Hesus su ultimo anochi di bida na tera, el a bisa su siguidonan: “Un mandamento nobo mi ta duna boso, pa boso stima otro, y mescos cu ami a stima boso, pa boso tambe stima otro. Na esaki tur hende lo sa cu boso ta mi disipel, si boso tin amor un pa otro.” (Huan 13:34, 35) Cu e palabranan, “mescos cu ami a stima boso”, Hesus a ordena nos pa mustra amor mescos cu ne. Na Capitulo 29 nos a mira cu Hesus a pone un ehempel maestral di amor abnega, door di duna mas importancia na necesidad y interes di otro hende cu na esnan di su mes. Nos tambe mester mustra amor sin egoismo, y nos mester hacie na un manera asina bisto, cu asta hende cu no ta forma parti di e congregacion cristian por mir’e. Asina mes: amor abnega entre rumannan ta e caracteristica cu ta identifica nos como berdadero siguidonan di Cristo.

6, 7. (a) Con nos sa cu Yehova su Palabra ta duna hopi importancia na mustramento di amor? (b) Pablo su palabranan registra na 1 Corintionan 13:4-8 ta enfoca riba ki aspecto di amor?

⁶ Kico ta pasa si nos falta amor? Apostel Pablo a bisa: “[Si] mi no tin amor, mi a bira manera un gong cu ta zona of un cimbal cu ta resona.” (1 Corintionan 13:1) Un cimbal ta produci un zonido fastioso ora dal riba dje. Kico di un gong? Un traduccion ta uza e expresion “un gong cu ta haci bochincha.” Esta apropiado e ilustracionnan aki ta! Un hende sin amor ta manera un instrumento musical cu ta saca un zonido duro y iritante, cu ta core cu hende en bes di atrae nan. Con un hende asina por disfruta di un relacion pega cu otro hende? Tambe Pablo a bisa: “Si mi tin tur fe pa kita seronan di nan luga, ma mi no tin amor, mi no ta nada.” (1 Corintionan 13:2) Imagina bo, un hende sin amor ta “un don nadie cu no ta sirbi pa nada”, ni maske cuanto obra e efectua! (The Amplified Bible) No ta keda bisto cu Yehova su Palabra ta duna hopi importancia na mustramento di amor?

 ⁷ Pero con nos por demostra e cualidad aki den nos trato cu otro hende? Pa por contesta esei, laga nos analisa loke Pablo a bisa na 1 Corintionan 13:4-8. Den e versiculonan aki, e enfasis no ta riba e amor di Dios pa nos ni nos amor pa Dios. Mas bien Pablo ta enfoca aki riba con nos mester demostra amor na otro. El a describi cierto cosnan cu amor ta, y algun otro cu e no ta.

8. Con pasenshi por yuda nos den nos trato cu otronan?

⁸ “Amor tin pasenshi.” Pasenshi ta encera cu nos ta soporta otro. (Colosensenan 3:13) Esei ta necesario? Ya cu nos ta criaturanan imperfecto cu ta sirbiendo scouder cu scouder, ta completamente realistico pa spera cu de bes en cuando nos rumannan cristian ta pone nos cunsumi, y viceversa. Pero pasenshi y tolerancia por yuda nos soporta ora nos trapa otro  su ded’i pia den nos trato di tur dia—sin cu e pas di e congregacion mester sufri.

9. Den ki maneranan nos por mustra bondad na hende?

⁹ “Amor ta cariñoso [of, “bondadoso”, NW].” Bondad ta ser expresa door di yuda hende y door di papia cu nan cu consideracion. Amor ta motiva nos pa busca manera pa mustra bondad, principalmente na hende den mas necesidad. Por ehempel, kisas un ruman spiritual di edad ta solitario y tin mester di un bishita di animacion. Kisas un mama soltero, of un ruman mohe den un famia caminda no ta tur hende ta comparti e mesun fe, tin mester di yudansa. Un persona enfermo of cu ta pasando den un mal momento por tin mester pa un amigo leal bis’e un par di palabra di consuelo. (Proverbionan 12:25; 17:17) Ora nos tuma iniciativa pa mustra bondad na maneranan asina, nos ta demostra cu nos amor ta berdadero.—2 Corintionan 8:8.

10. Con amor ta yuda nos apoya y papia e berdad asta ora no ta facil?

¹⁰ “Amor . . . ta regociha den e berdad.” Un otro traduccion ta bisa: “Amor . . . ta tuma parti pa e berdad gososamente.” Amor ta motiva nos pa “papia berdad un cu otro.” (Zacarias 8:16) Por ehempel, si un ser stima di nos a cai den pica serio, nos amor tanto pa Yehova como pa esun cu a comete e eror lo yuda nos actua na harmonia cu Dios su normanan, en bes di gaña tocante e malecho. Ta cierto si cu tin bes ta duro pa nos enfrenta e berdad. Pero ya cu nos tin interes di nos ser stima na pecho, nos kier pa e haya e disiplina amoroso di Dios y reacciona faborablemente na dje. (Proverbionan 3:11, 12) Ademas, como cristiannan amoroso, nos kier “comporta nos mes den tur cos na un manera honorabel [“honesto”, NW].”—Hebreonan 13:18.

11. Ya cu amor ‘ta tapa tur cos’, kico nos mester purba haci tocante e deficiencianan di nos compañeronan creyente?

¹¹ ‘Amor ta tapa tur cos.’ Prome Pedro 4:8 ta bisa: “Amor ta cubri un multitud di pica.” Si, un cristian cu ta laga amor  gui’e lo no ta ansioso pa saca na cla tur imperfeccion y deficiencia di su rumannan cristian. Den hopi caso, e eror- y fayonan di nos compañeronan creyente ta relativamente chikito, di manera cu nos por uza e mantel di amor pa tapa nan cu ne.—Proverbionan 10:12; 17:9.

12. Con apostel Pablo a mustra cu e tawata confia Filemon, y kico nos por siña for di Pablo su ehempel?

¹² ‘Amor ta kere tur cos.’ E traduccion di Moffatt ta bisa aki cu amor “ta semper cla pa confia.” Nos no ta sospecha nada malo di nos compañeronan creyente sin bon motibo ni duda den nan intencionnan constantemente. Amor ta yuda nos “confia” nos rumannan. * Nos por haya un ehempel di esaki den Pablo su carta na Filemon. Pablo a skirbi Filemon pa anim’e pa e ricibi Onesimo cu bondad. Onesimo tawata un esclabo di dje cu a hui. El a bira un cristian, y awor e kier a bolbe serca Filemon. Na luga di purba forsa Filemon, Pablo a apela na dje a base di amor. El a mustra confiansa cu Filemon lo actua na e manera corecto, bisando: “Teniendo confiansa den bo obediencia, mi ta skirbi bo, como cu mi sa cu lo bo haci asta mas cu loke mi ta bisa.” (Versiculo 21) Ora amor motiva nos pa expresa nos mes cu confiansa asina tocante nos rumannan, esei mes ta un motivacion pa nan saca nan miho cualidadnan na cla.

13. Con nos por mustra cu nos ta spera cu cos lo bai bon pa nos rumannan?

¹³ ‘Amor ta spera tur cos.’ Mescos cu amor tin confiansa, e tin bon speransa tambe. Nos amor ta motiva nos pa spera cu cos lo bai bon pa nos rumannan. Por ehempel, si un ruman “dal un paso robes prome cu e realisa”, nos lo spera pa e reacciona bon na e esfuersonan amoroso haci pa yud’e mehora. (Galationan 6:1, NW) Ademas nos ta keda carga speransa cu esnan cu ta suak den fe lo recupera. Nos ta carga pasenshi cu  hende asina, haciendo loke nos por pa yuda nan bira fuerte den fe. (Romanonan 15:1; 1 Tesalonicensenan 5:14) Asta si un hende cu nos ta stima tuma un mal rumbo, nos no ta perde speransa cu un dia e lo bolbe na su sano huicio y bin bek na Yehova mescos cu e yiu perdi di e ilustracion di Hesus.—Lucas 15:17, 18.

14. Den ki manera nos perseverancia por ser poni na prueba den e congregacion, y con amor por yuda nos reacciona na e manera corecto?

¹⁴ ‘Amor ta soporta tur cos.’ Door di soporta cu perseverancia nos por keda firme apesar di decepcion y dificultad grandi. Y no ta di pafo di e congregacion so pruebanan di perseverancia ta bin; tin bes nan ta bin di paden tambe. Debi na imperfeccion, tin bes cu nos rumannan ta laga nos na caya. Un comentario sin consideracion por haci nos tristo. (Proverbionan 12:18) Kisas tin un asunto den e congregacion cu no a ser trata na e manera corecto na nos opinion. Of e conducta di un ruman respeta por molestia nos y pone nos pensa: ‘Con por ta cu un cristian ta actua asina?’ Ora nos enfrenta situacionnan asina, kico nos lo haci? Hala for di e congregacion y stop di sirbi Yehova? No si nos tin amor! Si, amor ta yuda nos pa e fayonan di un ruman no ciega nos di manera cu ya nos no por mira nada bon mas den dje, of asta den henter e congregacion. Amor ta permiti nos keda fiel na Dios y apoya e congregacion apesar di loke otro hende imperfecto bisa of haci.—Salmo 119:165.

15. Kico ta yaluci incorecto, y con amor ta yuda nos evita e emocion destructivo ei?

¹⁵ ‘Amor no ta yalurs.’ Yaluci incorecto por pone nos cuminsa sinti envidia debi na loke otro hende tin—nan pertenencianan, nan bendicionnan of nan habilidadnan. E tipo di yaluci ei ta un emocion egoista y destructivo, y si nos no control’e, e por afecta e pas di e congregacion. Kico lo yuda nos resisti e “tendencia envidioso” ei? (Santiago 4:5, NW)  Den un solo palabra, amor. E cualidad precioso aki por yuda nos alegra cu esnan cu ta parce di tin cierto bentahanan den bida cu nos mes no tin. (Romanonan 12:15) Amor ta yuda nos pa no cunsumi ora un hende ricibi elogio pa un habilidad excepcional cu e tin, of debi na un gran logro.

16. Si nos ta stima nos rumannan di berdad, pakico nos lo evita di gaba tocante loke nos ta haciendo den Yehova su sirbishi?

¹⁶ “Amor no ta gaba, y no ta arogante.” Amor ta pone cu nos no ta bai gaba cu nos talento- y logronan. Ki nodi tin pa nos cana gaba constantemente tocante nos logronan den sirbishi of nos privilegionan den e congregacion? Si nos gaba asina, esei por desanima otronan y pone nan sinti nan mes inferior na comparacion cu nos. Amor ta pone cu nos no ta gaba tocante loke Dios ta permiti nos haci den su ministerio. (1 Corintionan 3:5-9) Con cu bai bin, amor “no ta arogante”, of, manera The New Testament in Modern English ta bisa, e no “tin idea.” Amor ta pone cu nos no ta haya un punto di bista mucho halsa tocante nos mes.—Romanonan 12:3.

17. Con amor ta motiva nos pa mustra consideracion pa otro hende, y pues, ki sorto di conducta nos lo evita?

¹⁷ “Amor . . . no ta comporta su mes indecente.” Un hende cu actua indecente ta comporta su mes na un manera cu no ta pas y cu ta ofende otronan. E manera di trata ei no ta amoroso, pasobra e ta mustra un falta total di interes pa sintimento y bienestar di otronan. Na contraste, amor ta pone nos actua cu gracia y mustra consideracion pa otro. Amor ta promove bon manera, conducta cu Dios ta aproba y respet pa nos compañeronan creyente. Pues, amor lo no permiti nos participa den “conducta bergonsoso”—y de echo, ni actua na un manera cu lo shock of ofende nos rumannan cristian.—Efesionan 5:3, 4, NW.

18. Dicon un hende cu amor no ta exigi pa tur cos bai manera e kier?

¹⁸ “Amor . . . no ta busca su propio interes.” Aki e Revised Standard Version ta bisa: “Amor no kier pa tur cos bai manera e kier.” Un hende cu amor no ta exigi pa tur cos bai manera e  kier, como si fuera semper su opinion ta esun corecto. E no ta manipula otro hende door di uza su capasidad di persuadi pa domina hende cu tin un otro punto di bista. Un actitud cabesura asina ta revela un cierto grado di orguyo, y Bijbel ta bisa: “Orguyo ta bini prome cu destruccion.” (Proverbionan 16:18) Si nos ta stima nos rumannan di berdad, nos lo respeta nan punto di bista, y te caminda ta posibel nos lo mustra cu nos ta dispuesto pa cede. Un actitud asina ta cuadra cu e palabranan aki di Pablo: “No laga ningun hende busca su mes interes, sino esun di su prohimo.”—1 Corintionan 10:24.

19. Con amor ta yuda nos reacciona bon ora hende ofende nos?

¹⁹ “Amor . . . no ta wordo proboca, e no ta warda rencor.” Amor no ta bira proboca facil door di loke otro hende bisa of haci. Claro cu nos lo por cunsumi si un hende ofende nos. Pero asta si nos rabia pa un motibo valido, amor lo no laga nos keda rabia. (Efesionan 4:26, 27) Nos lo no tene un lista di e biahanan cu hende a bisa of haci cos cu a ofende nos, manera un boekhouder ta tene cuenta den buki pa nada no ser lubida. En bes di esei, amor ta motiva nos pa imita nos Dios amoroso. Manera nos a mira den Capitulo 26, Yehova ta pordona ora tin base. Y ora e pordona nos, e ta lubida, esta, e no ta uza e picanan ei contra nos despues. Nos no ta contento cu Yehova no ta keda carga rencor?

20. Con nos mester reacciona si un compañero creyente cai den malecho y sufri e consecuencianan?

²⁰ “Amor . . . no ta regociha den inhusticia.” Aki The New English Bible ta bisa: “Amor . . . no ta disfruta di otro hende su pica.” E traduccion di Moffatt ta bisa: “Nunca amor no ta gosa ora un otro hende comete un fayo.” Amor no ta sinti ningun placer den inhusticia, pues, nos no ta minimisa seriedad di ningun forma di inmoralidad. Y con nos ta reacciona si un compañero creyente cai den pica y sufri e consecuencianan? Amor lo no permiti nos gosa y como si fuera bisa: ‘Dushi p’e! Masha bon!’ (Proverbionan 17:5) Pero si un  ruman cu a faya ta dal paso concreto pa recupera di su caida spiritual, e ora ei si nos ta gosa.

21-23. (a) Kico Pablo tawata kiermen ora el a bisa cu “amor nunca no ta faya”? (b) Kico nos ta bai trata den e ultimo capitulo?

²¹ “Amor nunca no ta faya.” Kico Pablo tawata kiermen cu e palabranan aki? Den e contexto ei e tawata papiando di e donnan di spirito cu tawatin entre e prome cristiannan. E donnan ei a sirbi como señal di cu Dios su aprobacion tawata riba e congregacion resien forma. Sinembargo, no ta tur cristian por a haci curacion, profetisa ni papia den lenga. Pero esei no tawata un problema; e donnan milagroso ei lo a caba toch un dia. Sinembargo, tawatin algo cu si lo permanece,  algo cu tur cristian por desaroya, algo mas excelente y permanente cu cualkier don milagroso. De echo, Pablo a yam’e “un caminda mas excelente ainda.” (1 Corintionan 12:31) Kico e “caminda mas excelente” aki tawata anto? E caminda di amor.

²² Si, e amor cristian cu Pablo a describi ‘no ta faya nunca’, esta, nunca lo e no yega na su fin. Te dia djawe, amor abnega di ruman ta sigui identifica siguidonan berdadero di Hesus. Acaso nos no ta mira evidencia di e amor ei den congregacionnan di adoradonan di Yehova rond mundo? E amor ei lo dura pa semper, pasobra Yehova ta priminti su sirbidonan fiel bida eterno. (Salmo 37:9-11, 29) Laga nos sigui haci nos best pa “cana den amor.” Asina nos lo experimenta e felicidad mayor cu dunamento ta produci. Y mas ainda, nos lo por sigui biba—y stima—pa henter eternidad, mescos cu nos Dios amoroso Yehova.

²³ Den e ultimo capitulo aki di e seccion tocante amor, nos a trata con nos por mustra amor pa otro. Pero ya cu nos ta beneficia di Yehova su amor na asina tanto diferente manera—y no di su amor so, sino tambe di su poder, husticia y sabiduria—ta na su luga pa nos puntra nos mes: ‘Con mi por mustra Yehova cu mi ta stim’e di berdad?’ Den nos ultimo capitulo nos lo trata e pregunta aki.