1, 2. Ki vision profeta Isaias a haya, y kico esaki ta siña nos di Yehova?

E ESENA cu Isaias a haya su dilanti—un vision di Dios—a yen’e cu asombro y respet pa Dios. E tawata asina real cu mas despues Isaias a skirbi cu ta como si fuera el a “mira Señor” riba Su trono halto. E cola di Yehova su mantel a yena e tempel inmenso na Herusalem.—Isaias 6:1, 2.

² Loke Isaias a tende tambe a yen’e cu asombro y respet pa Dios: un cantamento sumamente poderoso cu a sagudi asta e fundeshi di e tempel. E cantamento tawata bin di e serafinnan, criaturanan spiritual di alto rango. Cu bosnan harmonioso y potente nan a resona palabranan di puro mahestuosidad: “Santo, santo, santo, ta e SEÑOR di ehersitonan, henter tera ta yen di su gloria.” (Isaias 6:3, 4) E echo cu nan a canta e palabra “santo” tres bes a duna esaki un enfasis special, y cu bon motibo, pasobra e santidad di Yehova ta supremo. (Revelacion 4:8) Tur caminda den Bijbel e santidad di Yehova ta ser resalta. Centenares di versiculo ta asocia su nomber cu e palabranan “santo” y “santidad.”

3. Con opinionnan eroneo di e santidad di Yehova ta pone hopi hende aleha for di Dios en bes di hala serca dje?

³ Claramente anto, un di e prome cosnan cu Yehova kier pa nos siña tocante dje ta cu e ta santo. Toch, ta net e idea ei ta pone cu hopi hende awe ta aleha nan mes for di dje. Algun hende ta comete e fayo di pensa cu ser santo kiermen ser husto den nan mes bista of djis duna e impresion di ta deboto na Dios. Otronan cu ta lucha cu un punto di bista negativo di nan mes kisas ta haya cu e santidad di Dios ta intimida nan na luga di atrae nan. Kisas nan tin miedo cu hamas nan lo por ta digno di hala serca e Dios santo aki. Pesei, hopi di nan ta aleha for di Dios pa motibo cu e ta santo.  Esaki ta masha lamentabel pasobra e santidad di Dios ta juist un motibo fuerte pa hala serca dje. Pakico nos por bisa asina? Prome cu nos contesta e pregunta ei, laga nos analisa kico realmente kiermen ser santo.

4, 5. (a) Kico kiermen ser santo, y kico e no ta nifica? (b) Den ki dos aspecto importante Yehova ta “separa”?

⁴ E echo cu Dios ta santo no ta nifica cu e ta satisfecho cu su mes so, of cu e ta orguyoso of cu e ta desprecia otronan. Al contrario, e ta odia e cualidadnan ei. (Proverbionan 16:5; Santiago 4:6) Pues, kico e palabra “santo” kiermen realmente? Den e Hebreo di Bijbel, e palabra ta bin for di un verbo cu ta nifica “separa.” Den contexto religioso, “santo” ta aplica na loke ta separa for di un uzo comun of cu ta ser considera sagrado. Ademas, e palabra santidad ta pone bo pensa hopi riba limpiesa y puresa. Con e palabra aki ta aplica na Yehova? E ta indica cu Dios ta “separa” for di hende imperfecto, hopi leu for di nos?

⁵ Sigur cu no. Como e “Santo di Israel”, Yehova a describi su mes como esun cu a biba “meimei” di su pueblo, aunke nan tawata pecado. (Isaias 12:6; Oseas 11:9) Pues e echo cu e ta santo no ta nifica cu e ta leu for di hende. Den ki sentido anto e ta “separa”? Den dos aspecto importante. Na prome luga, e ta separa for di henter su creacion den sentido cu ta e so ta e Haltisimo. Su puresa, su limpiesa, ta na un grado absoluto y infinito. (Salmo 40:5; 83:18) Na di dos luga, Yehova ta totalmente separa for di tur loke ta pecaminoso. Y esei ta un pensamento cu ta duna nos consuelo. Pakico?

6. Pakico e echo cu Yehova ta completamente separa for di pica ta un consuelo pa nos?

⁶ Nos ta biba den un mundo den cua berdadero santidad ta masha scars. Henter sosiedad humano aleha for di Dios ta contamina den un manera of otro, mancha pa pica y imperfeccion. Nos tur tin cu lucha contra e pica cu ta den  nos. Y nos tur ta core e peliger di cai den gara di pica si nos baha nos vigilancia. (Romanonan 7:15-25; 1 Corintionan 10:12) Yehova si no ta core e peliger ei. E ta completamente separa for di pica, y hamas lo e haya ni e minimo mancha di pica. Esaki ta confirma e impresion cu nos tin di Yehova como e Tata ideal, pasobra esei ta nifica cu e ta completamente confiabel. Distinto di hopi tata humano pecaminoso, hamas Yehova lo bira corupto, inmoral of abusado. Door di su santidad, algo asina ta absolutamente imposibel. Yehova a yega di asta hura pa su propio santidad, ya cu no tin nada mas confiabel cu esei. (Amos 4:2) Esei no ta trankilisa nos?

7. Pakico nos por bisa cu santidad ta un caracteristica fundamental di Yehova?

⁷ Santidad ta un caracteristica fundamental di Yehova. Kico esei kiermen? Tuma por ehempel e palabranan “hende” y “imperfecto.” Bo no por describi e prome sin pensa riba e di dos. Imperfeccion ta un parti integral di nos y ta influencia tur loke nos ta haci. Awor considera dos palabra full diferente: “Yehova” y “santo.” Santidad ta un parti integral di Yehova. Den tur sentido e ta limpi, puro y recto. Nos no por conoce Yehova manera e ta realmente sin compronde cabalmente e nificacion profundo di e palabra “santo.”

8, 9. Kico ta mustra cu Yehova ta yuda hende imperfecto bira santo den un sentido relativo?

⁸ Siendo cu Yehova ta personifica e cualidad di santidad, nos por bisa corectamente cu e ta e fuente di tur loke ta santo. E no ta tene e cualidad precioso aki egoistamente pa su mes; e ta compartie generosamente. Por ehempel, ora Dios a papia cu Moises pa medio di un angel na e mata cu tawata na candela, asta e suela ei banda a bira santo door di e presencia di Yehova!—Exodo 3:5.

 ⁹ Hende imperfecto por bira santo cu yudansa di Yehova? Si, den un sentido relativo. Dios a duna su pueblo Israel e perspectiva di bira “un nacion santo.” (Exodo 19:6) El a bendiciona e nacion ei cu un sistema di adoracion cu tawata santo, limpi y puro. Pesei mes diferente biaha e Lei di Moises a toca e tema di santidad. Por cierto, e sumo sacerdote tawata bisti un plachi di oro dilanti riba su turbante caminda tur hende por a mir’e briya den claridad. Riba dje tawatin graba: “Santidad ta pertenece na Yehova.” (Exodo 28:36, NW) Pues, e adoracion y asta henter e forma di biba di e Israelitanan mester tawata caracterisa pa un norma halto di limpiesa y puresa. Yehova a bisa nan: “Boso sea santo, pasobra ami SEÑOR boso Dios ta santo.” (Levitico 19:2) Tanten cu e Israelitanan a biba segun e siñansanan di Dios te caminda imperfeccion a permiti nan, den un sentido relativo, nan tawata santo.

10. Relaciona cu santidad, ki contraste a existi entre Israel di antiguedad y e nacionnan rond di nan?

¹⁰ E enfasis aki riba santidad tawata na contraste skerpi cu e adoracion di e nacionnan rond di Israel. E nacionnan pagano ei tawata venera falsedad; diosnan inexistente, cu tawatin aspecto violento, golos y promiscuo of inmoral. Nan tawata impuro den tur sentido di palabra. Hende cu a adora e diosnan ei a bira impuro. Pesei Yehova a spierta su sirbidonan pa keda leu for di adoradonan pagano y nan practicanan religioso sushi.—Levitico 18:24-28; 1 Reinan 11:1, 2.

11. Con e santidad di e organisacion celestial di Yehova ta bisto den (a) e angelnan? (b) e serafinnan? (c) Hesus?

¹¹ Asta den su miho temponan, Israel di antiguedad, e nacion scohi di Yehova, tawata djis un refleho suak di e santidad di e organisacion celestial di Dios. Bijbel ta referi na e miyones di criaturanan spiritual cu ta sirbi Dios lealmente como su “miriadanan santo.” (Deuteronomio 33:2, NW; Hudas 14) Nan ta refleha perfectamente e bunitesa radiante y puro di Dios su santidad. Y no lubida e serafinnan  cu Isaias a mira den su vision. Loke nan a canta ta indica cu e criaturanan spiritual poderoso aki ta hunga un papel importante den e proclamacion di Yehova su santidad den henter universo. Pero tin un criatura spiritual cu ta mas halto cu tur: e Yiu unigenito di Dios. Hesus ta e refleho supremo di Yehova su santidad. Pesei mes e merece e nomber “Esun Santo di Dios.”—Huan 6:68, 69.

12, 13. (a) Pakico Bijbel ta bisa corectamente cu e nomber di Dios ta santo? (b) Pakico e nomber di Dios mester ser santifica?

¹² Kico nos por bisa di e nomber di Dios? Manera nos a mira den e prome capitulo, e nomber ei no ta djis un titulo of un etiket. E ta representa Yehova Dios cu tur su cualidadnan. Pesei, Bijbel ta bisa nos cu su “nomber ta santo.” (Isaias 57:15) E Lei di Moises a stipula castigo di morto pa ken cu a profana e nomber di Dios. (Levitico 24:16) Mira tambe kico Hesus a menciona na prome luga den su oracion: “Nos Tata cu ta den shelo, bo nomber sea santifica.” (Mateo 6:9) Santifica un cos ta nifica apart’e como algo sagrado, mustra respet profundo p’e; apoya su santidad. Pero pakico mester santifica e nomber di Dios cu riba su mes caba ta asina puro?

¹³ E motibo ta pasobra e nomber santo di Dios a ser ataca, difama y calumnia. Satanas a gaña riba Yehova den Eden y a insinua cu E ta un Soberano inhusto. (Genesis 3:1-5) For di e momento ei, Satanas—gobernante di e mundo impuro aki—a haci tur loke ta posibel pa plama mentira tocante Dios. (Huan 8:44; 12:31; Revelacion 12:9) Religionnan a pinta Dios como un tirano desinteresa den hende of cruel, cu ta respalda hende den nan gueranan sangriento. Hopi bes nan a atribui Dios su obranan maraviyoso di creacion na casualidad of evolucion. Si, e nomber di Dios a ser difama na un manera baho. Pesei mester santific’e y dun’e bek e gloria cu e tin derecho ariba. Nos ta anhela pa mira Dios  su nomber santifica y su soberania vindica, y pa nos lo ta un goso pa contribui na e realisacion di e proposito magnifico ei.

14. Pakico Dios su spirito ta ser cualifica como santo, y pakico blasfemia contra e spirito santo ta algo asina serio?

¹⁴ Algo mas cu tin relacion estrecho cu Yehova y cu casi semper ta ser cualifica como santo, ta su spirito, of forsa activo. (Genesis 1:2) Yehova ta uza e forsa iresistibel aki pa cumpli cu su proposito. Tur loke Dios haci, e ta haci na un manera santo, puro y limpi, y pesei su forsa activo ta ser yama apropiadamente spirito santo, of spirito di santidad. (Lucas 11:13; Romanonan 1:4) Blasfemia contra e spirito santo, loke ta encera bai deliberadamente contra e proposito di Yehova, ta un pica impordonabel.—Marco 3:29.

15. Pakico ta na su luga cu e santidad di Yehova ta inspira temor di Dios den nos, y kico e temor ei ta encera?

¹⁵ No ta dificil pa mira anto pakico Bijbel ta haci un conexion entre e santidad di Dios y e temor di Dios cu hende mester tin. Por ehempel, Salmo 99:3 ta bisa: “Laga nan alaba bo nomber grandi y temibel; santo e ta.” No ta trata aki di un miedo insaludabel, sino mas bien di un sintimento profundo di debocion na Dios, di respet den su forma mas eleva. Ta bon pa nos sinti asina p’e, pasobra e santidad di Dios ta hopi superior na nos. E ta radiantemente puro y glorioso. Toch, e no mester stroba nos di hala serca dje. Al contrario, un punto di bista balansa di e santidad di Dios lo hala nos mas serca dje. Pakico?

16. (a) Ki relacion tin entre santidad y bunitesa? Duna un ehempel. (b) Con e visionnan cu ta describi Yehova ta enfatisa limpiesa, puresa y lus?

¹⁶ Na prome luga, Bijbel ta relaciona santidad cu bunitesa. Na Salmo 96:6 nos ta lesa tocante e luga santo di Dios: “Fortalesa y bunitesa ta den su santuario.” Bunitesa ta algo cu ta  atrae nos. Por ehempel, wak e plachi na pagina 33. E paisahe ei no ta atrae bo? Kico ta hacie asina atractivo? Ripara con puro e awa ta mustra. Asta e aire mester ta limpi, pasobra shelo ta blou y tin un claridad radiante. Awor, si e mesun esena ei cambia—e coriente di awa yena cu sushi, e palonan y e barancanan keda tur susha door di hende cu ta pasa pinta riba nan, y e aire bira contamina—lo e no atrae nos mas; nos lo haya asco di dje, no ta berdad? Di naturalesa nos ta relaciona bunitesa cu limpiesa, puresa y lus. Nos por uza e mesun palabranan ei pa describi e santidad di Yehova. Nada straño anto cu e visionnan cu ta describi Yehova ta fasina nos! E bunitesa di nos Dios santo ta manera lus briyante, manera piedra precioso cu ta lombra, manera candela of metalnan precioso di mas puro y briyante.—Ezekiel 1:25-28; Revelacion 4:2, 3. 

17, 18. (a) Na prome instante, ki efecto e vision tawatin riba Isaias? (b) Con Yehova a uza un serafin pa consola Isaias, y kico e acto di e serafin a nifica?

¹⁷ Pero e santidad di Dios mester pone nos sinti nos inferior na comparacion? Claro cu e contesta ta si. Al fin y al cabo, nos ta inferior na Yehova, anto hopi! Pero esei mester ta motibo pa aleha for di dje? Wak con Isaias a reacciona ora el a tende e serafinnan proclama e santidad di Yehova. “E ora ei mi a bisa: ‘Ai di mi, pasobra mi ta [“silencia”, NW]! Pasobra mi ta un homber di lip impuro, y mi ta biba meimei di un pueblo di lip impuro; pasobra mi wowo a mira e Rei, e SEÑOR di ehersitonan.’” (Isaias 6:5) Si, e santidad infinito di Yehova a recorda Isaias con pecado y imperfecto e tawata. Na principio, e homber fiel ei a keda turdi. Pero Yehova no a lag’e den e estado ei.

¹⁸ Mesora un serafin a consola e profeta. Con? E spirito poderoso a bula bai na e altar, coi un carbon for di dje y laga esaki mishi cu lip di Isaias. Lo bo pensa cu esei ta mas un dolor cu un consuelo. Pero corda cu tawata trata aki di un vision yen di nificacion simbolico. Isaias, como un Hudiu  fiel, tawata sa cu tur dia nan tawata ofrece sacrificio na e altar di e tempel pa expiacion, esta, pordon di pica. Y e serafin a recorda e profeta amorosamente cu aunke berdad e tawata imperfecto, “di lip impuro”, toch e por a haya un posicion puro dilanti Dios. * Yehova tawata dispuesto pa mira un homber imperfecto y pecado como santo—por lo menos den un sentido relativo.—Isaias 6:6, 7.

19. Con nos por ta santo den un sentido relativo apesar di nos imperfeccion?

¹⁹ Awe ta mescos. Tur e sacrificionan ofreci riba e altar na Herusalem tawata solamente un sombra di algo mayor: e sacrificio perfecto cu Hesucristo a ofrece na aña 33 di nos era. (Hebreonan 9:11-14) Si nos repenti sinseramente di nos picanan, corigi nos erornan y eherce fe den e sacrificio ei, nos lo ricibi pordon. (1 Huan 2:2) Nos tambe por haya un posicion limpi dilanti Dios. Pues, apostel Pedro ta corda nos: “Ta para skirbi: ‘Boso lo ta santo, pasobra ami ta santo.’ ” (1 Pedro 1:16) Ripara cu Yehova no a bisa cu nos mester ta mes santo cu ne. Nunca e ta spera loke ta imposibel for di nos. (Salmo 103:13, 14) Mas bien, Yehova ta bisa nos pa nos ta santo pasobra e ta santo. “Manera yiunan stima”, nos ta trata na imit’e te asina leu cu imperfeccion ta permiti nos. (Efesionan 5:1) Pues nos tin cu haci esfuerso continuo pa bira santo. Segun cu nos ta crece spiritualmente, nos ta trata tur dia pa “perfecciona nos santidad.”—2 Corintionan 7:1.

20. (a) Pakico ta importante pa compronde cu nos por ta limpi den bista di nos Dios santo? (b) Ora Isaias a haya sa cu su picanan a ser pordona, ki efecto esei tawatin riba dje?

²⁰ Yehova ta stima loke ta recto y puro. E ta odia pica. (Habacuk 1:13) Pero e no ta odia nos. Tanten cu nos ta mira pica manera e ta mir’e—odia loke ta malo, stima loke ta bon—y purba sigui den e pasonan perfecto di Cristo Hesus, Yehova ta pordona nos picanan. (Amos 5:15; 1 Pedro 2:21) Ora nos compronde cu nos por ta limpi den bista di nos Dios santo, esei tin un efecto profundo riba nos. Corda cu na principio e santidad di Yehova a recorda Isaias cu e tawata impuro. Isaias a sclama: “Ai di mi!” Pero unabes el a compronde cu su picanan a ser pordona, su actitud a cambia. Ora Yehova a pidi un boluntario pa cumpli cu un asignacion, aunke Isaias no tawata sa mes kico esei a encera, el a responde mesora: “At’ami aki! Manda ami!”—Isaias 6:5-8.

21. A base di kico nos tin e confiansa cu nos por cultiva e cualidad di santidad?

²¹ Nos ta crea den e imagen di e Dios santo, dota cu cualidadnan moral y e capasidad pa compronde cosnan spiritual. (Genesis 1:26) Nos tur tin e potencial pa cultiva santidad. Segun cu nos ta sigui haci esei, Yehova lo ta contento pa yuda nos. Den e proceso ei nos lo hala mas y mas serca nos Dios santo. Ademas, segun cu nos ta studia Yehova su cualidadnan den e siguiente capitulonan, nos lo mira cu tin hopi motibo di peso pa nos hala serca dje!