1, 2. Na ki ocasion Hesus a rabia, y pakico?

HESUS tawata mustra rabia, y cu bon motibo. Kisas bo no por ni imagina bo cu Hesus tawata den e estado ei pasobra e tawata un homber hopi manso. (Mateo 21:5) Claro cu e tawatin un dominio perfecto riba su mes, ya cu su rabia tawata un indignacion husto. * Pero ta kico a proboca e homber pacifico aki asina tanto? Un inhusticia flagrante.

² Hesus tawata stima e tempel na Herusalem. Den henter mundo, e tawata e unico luga sagrado dedica na e adoracion di su Tata celestial. Hudiunan for di hopi pais tawata biaha distancianan grandi pa bin rindi adoracion einan. Asta e paganonan cu tawata teme Dios tawata bin, yegando te riba e patio di e tempel reserva pa nan. Pero na cuminsamento di Hesus su ministerio, el a drenta e area di tempel y topa un esena masha mahos. E luga tawata parce mas un plasa cu un cas di adoracion! Tawatin yen di comerciante y cambiado di placa. Pero ta den kico e inhusticia a sinta? Pa e hendenan aki, e tempel di Dios tawata djis un luga pa probecha di hende, asta pa horta nan. Con asina?—Huan 2:14.

3, 4. Ki abuso tawata tuma luga na e cas di Yehova, y ki accion Hesus a tuma pa corigi e asunto?

³ E lidernan religioso a bin cu un regla cu ta un moneda spesifico so por a uza pa paga e belasting di tempel. Bishitantenan tawatin cu cambia placa pa haya e monedanan ei. E cambiadonan di placa a pone nan mesanan ei mes den e tempel,  y nan tawata cobra comision riba cada transaccion. Otro negoshi hopi lucrativo tambe tawata esun di bende animal. E bishitantenan cu kier a ofrece sacrificio por a cumpra un animal serca cualkier comerciante den e stad, pero e chens tawata grandi cu e oficialnan di tempel lo a haya nan ofrenda inadecua. Sinembargo, e ofrendanan cumpra ei mes den e area di tempel si a ser acepta sigur. Pues e bishitantenan tawata na merced di comerciantenan cu tin bes tawata cobra prijsnan exorbitante. * Piyo cu ganashi bruto, esaki tawata puro ladronicia!

⁴ Hesus no por a tolera e tipo di inhusticianan ei, pasobra tawata trata aki di cas di su Tata! Pesei el a traha un zwiep di cabuya y a core cu e trupa di baca y carne for di e tempel. Despues el a bai na e cambiadonan di placa y bolter nan mesanan. Imagina con tur e monedanan a keda plama riba e flur di marmer! Cu firmesa el a manda e bendedonan di paloma: “Kita e cosnan aki for di einan”! (Huan 2:15, 16) Aparentemente, ningun hende a tribi di lanta contra e homber cu curashi aki.

5-7. (a) Con Hesus su bida den shelo a influencia su sentido di husticia, y kico nos por siña door di studia su ehempel? (b) Con Cristo a combati e inhusticianan cu tawatin di aber cu e nomber y soberania di Yehova?

⁵ Claro cu e comerciantenan a bin bek. Mas o menos tres aña despues, Hesus a bolbe trata cu e mesun inhusticia. E biaha aki el a cita e palabranan di condena cu Yehova a dirigi contra esnan cu a haci Su cas “un cueba di ladron.” (Mateo 21:13; Yeremias 7:11) Si, ora Hesus a mira con nan tawata haci ganashi  bruto riba custia di e pueblo y profana e tempel di Dios, el a haya e mesun sintimento cu su Tata. Y esei no ta nada straño pasobra pa miyones di aña Hesus a siña di su Tata celestial. Door di esei el a bin haya e mesun sentido di husticia cu Yehova tawatin. El a bira un ehempel bibo di e dicho: “E Yiu ta pinto pinto su Tata.” Pues e miho manera pa haya un idea cla di Yehova su cualidad di husticia ta di medita riba e ehempel di Hesucristo.—Huan 14:9, 10.

⁶ E Yiu unigenito di Yehova tawata presente ora Satanas a acusa Yehova Dios inhustamente di ta un mentiroso y a cuestiona e rectitud di Su gobernacion. Ki un calumnia! Tambe e Yiu a tende con mas despues Satanas a insinua cu ningun hende lo no sirbi Yehova pa motibo di amor sin egoismo. E acusacionnan falso aki sigur a aflihi e curason husto di e Yiu. Lo mester tawata algo emocionante p’e ora el a haya sa cu e lo a hunga un papel clave den refuta e falsedadnan ei! (2 Corintionan 1:20) Con e lo a haci esei?

⁷ Manera nos a mira den Capitulo 14, Hesucristo a duna e contesta final y decisivo riba Satanas su acusacion cu a cuestiona e integridad di Yehova su criaturanan. Cu esei Hesus a pone e base pa e vindicacion final di e soberania di Yehova y e santificacion di Su nomber. Como e Agente Principal di Yehova, Hesus lo establece husticia dibino den henter universo. (Echonan 5:31) Su bida riba tera tambe a refleha husticia dibino. Yehova a bisa di dje: “Lo mi pone mi spirito riba dje, y e lo proclama husticia na e paganonan.” (Mateo 12:18) Con Hesus a cumpli cu e palabranan ei?

8-10. (a) Con e tradicionnan oral di e lidernan religioso Hudiu a promove desprecio pa hende cu no tawata Hudiu y tambe pa hende mohe? (b) Den ki manera e leinan oral a pone Yehova su lei di sabat bira un carga?

⁸ Hesus a stima e Lei di Yehova y a biba di acuerdo cu ne. Pero  e lidernan religioso di su tempo a troce e Lei ei y a aplic’e incorectamente. Hesus a bisa nan: “Ai di boso, escribanan y Farizeonan, hipocritanan! . . . Boso a neglisha loke ta mas importante di e Lei: husticia, misericordia y fieldad.” (Mateo 23:23) Definitivamente, e maestronan ei di e Lei di Dios no a aclara kico ta “husticia.” Mas bien, nan a tapa husticia dibino. Con asina? Laga nos wak un par di ehempel.

⁹ Yehova a manda su pueblo keda separa for di e nacionnan pagano rond di nan. (1 Reinan 11:1, 2) Sinembargo, algun lider religioso fanatico a anima e pueblo pa trata tur hende cu no tawata Hudiu cu desprecio. E Mishna a bai asina leu di inclui e regla aki: “No mag di laga tou di bestia den e posadanan di e paganonan pasobra nos ta sospecha cu nan ta practica bestialidad.” E prehuicio ei contra tur pagano tawata inhusto y completamente contrario na e spirito di e Lei di Moises. (Levitico 19:34) Otro leinan cu nan a traha tawata denigrante pa hende mohe. Por ehempel, e lei oral a bisa cu un mohe mester a cana tras di su casa y no banda di dje. E lei a bisa cu un homber no por a papia cu hende mohe den publico, ni cu su mes casa. Hende mohe, mescos cu catibo, no tawatin mag di duna testimonio den corte. Tawatin asta un oracion formal den cua hombernan a gradici Dios cu nan no a nace como hende mohe.

¹⁰ E lidernan religioso a dera e Lei di Dios bou di un monton di regla cu hende a traha. Tuma por ehempel e lei di sabat. Unico cos cu e lei ei a prohibi hende di haci ta di traha riba sabat. E Israelitanan mester a aparta e dia ei pa rindi adoracion, pa refresca nan mes spiritualmente y pa sosega. Pero e Farizeonan a pone e lei ei bira un carga. Nan a haya cu ta nan mester a dicidi kico exactamente ta “trabou.” Nan a cataloga 39 diferente actividad como trabou, manera cosecha y yag. E categorianan aki a lanta yen di pregunta. Si un hende a mata un purga riba sabat, ta yag el a yag? Si riba caminda el a piki un man yen di grano pa e come, ta cosecha el a cosecha? Si el a cura un persona cu tawata enfermo, ta traha el a traha?  E preguntanan ei a wordo contesta cu reglanan rigido y detaya.

11, 12. Con Hesus a expresa su rechaso contra e tradicionnan no biblico di e Farizeonan?

¹¹ Den un ambiente asina, con Hesus mester a yuda hende compronde kico ta husticia? Tanto den su siñansanan como den e manera cu el a biba, el a tuma un posicion firme contra e lidernan religioso ei. Considera prome algun di su siñansanan. El a condena directamente e gran cantidad di regla cu nan a traha door di bisa: Boso a haci “e palabra di Dios bira sin balor door di boso tradicion.”—Marco 7:13.

¹² Hesus a mustra na un manera energico cu e Farizeonan a kiboca nan mes tocante e lei di sabat—cu realmente nan no a capta mes henter e intencion tras di e lei ei. El a splica cu e Mesias ta “Señor di sabat” y pesei tin tur derecho di cura hende riba sabat. (Mateo 12:8) Pa enfatisa e punto ei, el a haci milager di curacion abiertamente riba sabat. (Lucas 6:7-10) E curacionnan ei tawata un bista delanta di con lo e restaura salu di hende na tur parti di tera durante su Reinado di Mil Aña. E Mil Aña ei mes lo ta e sabat mayor, durante cua hende fiel lo descansa finalmente di siglonan di pasa trabou bou di e carga di pica y morto.

13. Ki lei a drenta na vigor como resultado di Cristo su ministerio riba tera, y ki diferencia tawatin entre e lei aki y su predecesor?

¹³ Tambe Hesus a aclara kico ta husticia ora el a establece un lei nobo, “e lei di Cristo”, cu a drenta na vigor despues cu el a completa su ministerio riba tera. (Galationan 6:2) Distinto di su predecesor, esta e Lei di Moises, e lei nobo aki tawata basa principalmente riba principio y no riba un serie di mandamento skirbi. El a inclui si algun mandamento direct. Un di nan Hesus a yama “un mandamento nobo.” Hesus a siña tur su siguidonan pa stima otro mescos cu e a stima nan. (Huan 13:34, 35) Si, amor abnega lo mester tawata e marca di identificacion di tur esnan cu ta biba segun “e lei di Cristo.”

14, 15. Con Hesus a mustra cu el a reconoce e limitenan di su autoridad, y pakico esaki ta trankilisa nos?

¹⁴ Hesus no a limita su mes na siña tocante amor. El a biba “e lei di Cristo.” Cu su bida el a mustra kico e lei aki ta nifica. Laga nos analisa tres manera den cua e ehempel di Hesus a mustra claramente kico ta husticia.

¹⁵ Na prome luga, Hesus a haci sigur pa e no comete ningun inhusticia. Talbes bo a ripara cu hopi inhusticia ta tuma luga ora hende imperfecto bira arogante y surpasa e limitenan corecto di nan autoridad. Nunca Hesus a haci esei. Na un ocasion, un homber a acerca Hesus y a bis’e: “Maestro, bisa mi ruman homber pa parti e herencia cu mi.” Kico Hesus a contest’e? “Homber, ta ken a pone mi como hues of referee riba boso?” (Lucas 12:13, 14) Esei no ta remarcabel? Hesus su inteligencia, su discernimento y asta e nivel di autoridad cu Dios a dun’e a surpasa esun di cualkier hende riba tera; toch, el a nenga di envolve su mes den e asunto ei, ya cu e no tawata autorisa pa haci esei. Den e aspecto aki semper Hesus tawata modesto, asta durante e miles y miles di añanan prome cu el a biba como hende riba tera. (Hudas 9) E echo cu Hesus humildemente ta laga na Dios pa determina loke ta husto ta bisa hopi di dje.

16, 17. (a) Con Hesus a duna muestra di husticia den su obra di predica e bon nobo di e Reino di Dios? (b) Con Hesus a mustra cu husticia berdadero ta compaña pa misericordia?

¹⁶ Na di dos luga, Hesus a duna muestra di husticia den e manera cu el a predica e bon nobo di e Reino di Dios. E no a haci distincion di persona. Mas bien, el a haci esfuerso sinsero pa alcansa tur clase di hende, sea rico of pober. Na contraste, e Farizeonan a menosprecia hende pober y comun yamando nan ‘am-ha·’á·rets, of “hende di tera”, un palabra di desprecio. Hesus tawatin curashi pa corigi e inhusticia ei. Ora el a siña hende e bon nobo—of, ora el a come cu hende, alimenta nan,  cura nan of asta resusita nan—el a respalda e husticia di e Dios cu kier alcansa “tur hende.” *—1 Timoteo 2:4.

¹⁷ Na di tres luga, Hesus su sentido di husticia tawata compaña pa un sentido profundo di misericordia. El a haci hopi esfuerso pa yuda hende pecado. (Mateo 9:11-13) E tawata cla pa saca man pa hende indefenso. Por ehempel, Hesus no a join e lidernan religioso cu tawata promove desconfiansa den tur pagano. Den su misericordia el a yuda y siña algun di esakinan, aunke su mision principal tawata pa e Hudiunan. E tawata dispuesto pa haci un milager pa un oficial di ehersito Romano, bisando: “Mi no a haya ningun hende na Israel cu un fe asina grandi.”—Mateo 8:5-13.

18, 19. (a) Den ki maneranan Hesus a defende e dignidad di hende mohe? (b) Con e ehempel di Hesus ta yuda nos mira e conexion entre curashi y husticia?

¹⁸ Mescos tambe, Hesus no a apoya e ideanan tocante hende mohe cu tawata comun den su tempo. Mas bien, cu curashi el a haci loke tawata husto. Den bista di e Hudiunan, mohenan Samaritano tawata mes impuro cu e paganonan. Pero Hesus no a basila pa predica na e mohe Samaritano banda di e pos di Sicar. Por cierto, e mohe aki tawata e prome persona na ken Hesus a identifica su mes abiertamente como e Mesias priminti. (Huan 4:6, 25, 26) Mientras cu e Farizeonan a bisa cu no mester a siña hende mohe e Lei di Dios, Hesus si a dedica hopi tempo y energia pa siña hende mohe. (Lucas 10:38-42) Y aunke pa tradicion e testimonio di hende mohe no tawata confiabel, Hesus a honra varios hende mohe cu e privilegio di ta e promenan pa mir’e despues di su resureccion. Asta el a bisa nan pa bai informa su disipelnan masculino di e suseso importantisimo aki!—Mateo 28:1-10.

 ¹⁹ Si, Hesus a aclara pa e nacionnan kico ta husticia. Den hopi caso el a haci esei exponiendo su mes na hopi peliger. Su ehempel ta yuda nos mira cu pa bo defende loke ta berdadero husticia, bo mester tin curashi. Cu bon motibo el a wordo yama “e Leon cu ta di e tribu di Huda.” (Revelacion 5:5) Corda cu leon ta un simbolo di husticia cu curashi. Pero den futuro cercano, Hesus lo efectua husticia na un escala asta mas grandi. Den e sentido mas completo, lo e establece “husticia riba tera.”—Isaias 42:4.

20, 21. Den nos tempo, con e Rei Mesianico a promove husticia na tur parti di tera y den e congregacion cristian?

²⁰ For di dia Hesus a bira e Rei Mesianico na 1914, el a promove husticia riba tera. Con asina? El a asumi e responsabilidad pa e profecia di Mateo 24:14 cumpli. E siguidonan di Hesus riba tera ta siñando hende di tur parti di mundo e berdad tocante e Reino di Yehova. Mescos cu ne, nan ta predica na un manera imparcial y husto, y nan ta trata na duna tur hende—hoben y bieu, rico y pober, homber y mohe—un oportunidad pa conoce Yehova, e Dios di husticia.

²¹ Tambe Hesus ta promoviendo husticia den e congregacion cristian, di cua e ta e Cabes. Manera a wordo profetisa, e ta duna “donnan den hende”, esta, ancianonan fiel cu ta hiba delantera den e congregacion. (Efesionan 4:8-12, NW) Ora di pastorea e tou precioso di Dios, e hombernan aki ta sigui e ehempel di Hesucristo den promove husticia. Semper nan ta tene na mente cu Hesus kier pa su carnenan haya un trato husto—sin importa e posicion, prominencia of recursonan material di esakinan.

22. Kico Yehova ta pensa di e inhusticianan cu ta reina den e mundo djawe, y kico el a encarga su Yiu pa haci tocante esaki?

²² Pero den futuro cercano Hesus lo establece husticia riba tera den un manera nunca bisto. Inhusticia ta reina tur caminda  den e mundo corupto aki. Cada mucha cu muri di hamber ta victima di un inhusticia impordonabel, specialmente ora nos pensa riba tur e placa y tempo cu ta ser malgasta na produccion di arma di guera y pa satisface e caprichonan egoista di buscadonan di placer. E miyones di mortonan innecesario tur aña ta solamente un di e tantisimo formanan di inhusticia cu ta proboca e indignacion husto di Yehova. El a nombra su Yiu pa hiba un guera husto contra henter e mundo malbado aki pa pone un fin definitivo na tur inhusticia.—Revelacion 16:14, 16; 19:11-15.

23. Despues di Armagedon, con Cristo lo promove husticia pa tur eternidad.

²³ Sinembargo, e husticia di Yehova ta rekeri mas cu solamente e destruccion di e malbadonan. Tambe el a nombra su Yiu pa goberna como “Prins di Pas.” Despues di e guera di Armagedon, e reinado di Hesus lo establece pas riba tera, y lo e goberna pa medio di “husticia.” (Isaias 9:6, 7) Na e tempo ei Hesus lo tin e deleite di deshaci di tur e inhusticia cu a causa asina tanto miseria y sufrimento na mundo. Pa tur eternidad, lo e defende e husticia perfecto di Yehova fielmente. Ta masha importante anto pa nos trata na imita e husticia di Yehova awor. Laga nos mira con nos por haci esei.