1-3. Con Hesus su exbiciñanan a reacciona riba su siñansa, y kico nan no a reconoce den dje?

E HENDENAN a keda babuca. Hesus, un homber hoben, tawata nan dilanti, instruyendo den sinagoga. E no tawata un desconoci pa nan pasobra el a lanta den nan stad, y pa hopi aña el a traha den e comunidad como carpinte. Podise algun di nan tawata biba den casnan cu Hesus mes a yuda construi, of kisas nan tawata cultiva nan terenonan cu herment di ara y yugo cu Hesus a traha cu su propio mannan. * Pero con nan lo a reacciona riba e siñansa di e excarpinte aki?

² Mayoria hende cu a scuch’e a keda asombra, y nan a puntra: “Di unda e homber aki a haya e sabiduria aki?” Pero tambe nan a remarca: “Esaki no ta e carpinte, yiu homber di Maria?” (Mateo 13:54-58; Marco 6:1-3) Lamentablemente, Hesus su exbiciñanan a mir’e como un simpel homber mescos cu nan, cu a lanta hunto cu nan. Apesar cu el a papia cu sabiduria, nan a rechas’e. Nan no a realisa mes cu e sabiduria cu Hesus a trece dilanti no tawata di dje.

³ Ma ta di unda Hesus a sali cu e sabiduria aki? “Mi siñansa no ta di mi”, el a bisa, “ma di esun cu a manda mi.” (Huan 7:16) Apostel Pablo a splica cu Hesus “a bira pa nos sabiduria for di Dios.” (1 Corintionan 1:30) E sabiduria di Yehova ta ser revela pa medio di su Yiu Hesus. Y Hesus a haci esei te na e grado cu e por a bisa: “Ami y e Tata ta un.” (Huan 10:30)  Laga nos analisa tres area den cua Hesus a manifesta e “sabiduria for di Dios.”

4. (a) Kico tawata e tema di Hesus su mensahe, y pakico esei tawata sumamente importante? (b) Pakico Hesus su conseho tawata semper practico y na bienestar di su oyentenan?

⁴ Laga nos cuminsa na para keto un rato na Hesus su siñansa. E tema di su mensahe tawata “e bon noticia tocante reino.” (Lucas 4:43, BPK) Esei tawata sumamente importante pa motibo di e papel cu e Reino lo hunga den vindica e soberania di Yehova y trece bendicionnan eterno pa humanidad. Den Hesus su siñansa, tambe el a ofrece conseho sabi pa bida di tur dia, demostrando asina cu t’e ta e “Consehero Maraviyoso” cu Bijbel a papia di dje. (Isaias 9:6) Y, si bo pensa bo bon, kico otro su consehonan por ta cu no ta maraviyoso? E tawatin un conocemento a fondo di Dios su Palabra y boluntad, un comprondemento penetrante di naturalesa humano, y un amor profundo pa humanidad. Pesei, semper su recomendacionnan tawata practico y na bienestar di su oyentenan. Hesus a papia “palabranan di bida eterno.” Si, hende cu ta sigui su conseho lo haya salbacion.—Huan 6:68.

5. Kico tawata algun di e topiconan cu Hesus a trata den e Sermon Riba Sero?

⁵ E Sermon Riba Sero ta un ehempel sobresaliente di e sabiduria inigualabel den e siñansa di Hesus. Kisas lo tuma apenas 20 minuut pa duna e sermon of discurso aki, manera e ta registra na Mateo 5:3–7:27. Pero e balor di su consehonan ta eterno; nan ta mes relevante awe cu dia nan a ser duna. Hesus a trata un gran variedad di topico, manera con bo por mehora bo relacion cu otro hende (5:23-26, 38-42; 7:1-5, 12), con bo por keda moralmente limpi (5:27-32), y con bo por haya un proposito den bida (6:19-24; 7:24-27). Pero Hesus no  a limita su mes na bisa so kico ta sabi pa haci; el a mustra esei tambe door di splica, rasona y duna prueba.

6-8. (a) Ki motibonan combencente pa evita ansiedad Hesus ta duna? (b) Kico ta mustra cu Hesus su conseho ta refleha sabiduria djariba?

⁶ Tuma por ehempel Hesus su conseho sabi riba con pa trata cu precupacion tocante cos material, cu nos por haya na Mateo capitulo 6. “[“Stop di ansha”, NW] boso mes pa boso bida, kico boso lo come of kico boso lo bebe; tampoco pa boso curpa, kico boso lo bisti”, Hesus ta conseha nos. (Versiculo 25) Cuminda y paña ta necesidadnan basico, y ta masha normal pa precupa tocante con nos ta haci yega na e cosnan ei. Pero Hesus ta bisa nos pa “stop di ansha” cu e cosnan ei. * Pakico?

⁷ Scucha con Hesus ta rasona na un manera combencente. Ya cu ta Yehova a duna nos bida y un curpa, lo e no ta capas pa percura cuminda pa sostene nos bida y paña pa nos bisti na curpa? (Versiculo 25) Si Dios ta duna parhanan cuminda y ta bisti e flornan cu bunitesa, cu mas motibo ainda lo e percura pa hende cu ta ador’e! (Versiculo 26, 28-30) En realidad, no tin sentido pa ansha mucho tampoco. Ansiedad no por alarga nos bida ni sikiera un tiki. * (Versiculo 27) Con nos por evita ansiedad? Hesus ta conseha nos: Sigui pone e adoracion di Dios na prome luga den bida. Esnan cu ta haci esei por tin e siguransa cu nan Tata celestial lo “añadi” tur nan necesidadnan diario. (Versiculo 33) Por ultimo, Hesus ta duna un sugerencia sumamente practico: biba pa awe. Pakico cuminsa ansha cu e cosnan di mañan tambe for di awe? (Versiculo 34) Ademas, pakico worry demasiado cu cosnan cu kisas lo no  pasa nunca? Aplicacion di e conseho sabi ei por libra nos di hopi dolor di curason den e mundo yen di stress aki.

⁸ Ta bon cla anto cu e conseho cu Hesus a duna ta mes practico awe cu tempo el a ser duna casi 2.000 aña pasa. Esei no ta evidencia di sabiduria djariba? Asta e miho consehonan di conseheronan humano despues di tempo kisas no ta aplicabel mas, y nan ta ser revisa of remplasa. En cambio, e siñansanan di Hesus si a pasa e prueba di tempo; ainda nan ta valido y beneficioso. Pero esei no mester sorprende nos, pasobra e Consehero Maraviyoso aki a papia “e palabranan di Dios.”—Huan 3:34.

9. Kico algun solda a bisa tocante e siñansa di Hesus, y pakico nan no tawata exagerando?

⁹ Un di dos area den cua Hesus a refleha e sabiduria di Dios tawata su manera di siña. Na un ocasion, algun solda cu a haya ordo pa bai arest’e a regresa man bashi, bisando: “Nunca un hende no a papia manera e homber aki ta papia.” (Huan 7:45, 46) Y nan no a exagera pasobra di tur hende cu a yega di biba, Hesus, kende tawata “di [e region di] ariba”, tawatin e mayor reserva di conocemento y experencia. (Huan 8:23) Definitivamente, no tin ningun otro hende cu por instrui manera Hesus. Laga nos considera djis dos di e tecnicanan cu e Maestro sabi aki a uza.

10, 11. (a) Pakico nos no por keda sin admira Hesus su ilustracionnan? (b) Kico ta un comparacion, y ki ehempel ta mustra pakico e comparacionnan di Hesus ta hopi eficas pa siñansa?

¹⁰ Uzo eficas di ilustracion. “Hesus a papia cu e multitudnan pa medio di parabola [of, ilustracion]”, segun e Scritura. “E no a papia nada cu nan sin uza parabola.” (Mateo 13:34) Nos no por keda sin admira su habilidad incomparabel pa siña berdadnan profundo mediante cosnan di tur dia: cunukero cu ta sembra simiña, hende mohe cu ta prepara pa horna pan, mucha cu ta hunga riba plasa, piscado cu ta hala reda aden, wardado di carne cu ta busca un carne perdi—tur  ta cosnan cu su oyentenan a yega di mira hopi biaha. Ora nos relaciona berdadnan importante cu cosnan di e bida di tur dia, e berdadnan aki ta keda graba mesora y profundamente den nos mente y curason.—Mateo 11:16-19; 13:3-8, 33, 47-50; 18:12-14.

¹¹ Hopi bes Hesus a uza comparacion, of cuenta cortico, for di cua nos por saca berdadnan moral of spiritual. Ya cu un cuenta cortico ta mas facil pa capta y corda cu ideanan abstracto, e comparacionnan a yuda conserva e siñansanan di Hesus. Den hopi comparacion, Hesus a describi su Tata cu palabranan cu ta crea imagennan bibo cu hende no ta lubida facil. Por ehempel, ken lo no por compronde e les cu ta bin dilanti den e comparacion di e yiu perdi—cu ora un persona cu a dual mustra repentimento sinsero, Yehova lo haya duele di dje y acept’e bek tiernamente?—Lucas 15:11-32.

12. (a) Den ki manera Hesus a uza pregunta den su siñansa? (b) Con Hesus a silencia e personanan cu a cuestiona su autoridad?

¹² Uzo habil di pregunta. Hesus a uza pregunta pa laga esnan cu a scuch’e yega na nan propio conclusion, analisa kico ta motiva nan, of tuma cierto decision. (Mateo 12:24-30; 17:24-27; 22:41-46) Ora e lidernan religioso a cuestiona cu si ta Dios a duna Hesus autoridad, el a contesta: “E bautismo di Huan tawata for di shelo of for di hende?” Su pregunta a sorprende nan. Nan a rasona entre nan cu nan: “Si nos bisa: ‘For di shelo’, e lo bisa: ‘Pakico boso no a ker’e anto?’ Ma si nos bisa: ‘For di hende’—nan tawatin miedo di e multitud, pasobra di berdad tur tawatin Huan pa profeta.” Finalmente, nan a contesta: “Nos no sa.” (Marco 11:27-33; Mateo 21:23-27) Cu un simpel pregunta, Hesus a laga nan keda boca habri y a revela con falso nan curason tawata.

13-15. Con e comparacion di e prohimo Samaritano ta refleha e sabiduria di Hesus?

¹³ Na algun ocasion Hesus a combina e dos tecnicanan ya menciona door di plantia den su ilustracionnan cierto preguntanan cu a pone su oyentenan pensa seriamente. Ora  un abogado Hudiu a puntra Hesus kico e tawatin cu haci pa haya bida eterno, Hesus a refirie na e Lei di Moises, cu ta manda pa stima Dios y prohimo. Door cu e homber kier a demostra cu e ta husto, el a puntra: “Ken ta mi prohimo?” Hesus a contest’e cu un cuenta cortico. Un dia tawatin un homber Hudiu ta biaha su so riba caminda. Ladron a atrac’e y lag’e mitar morto. Dos Hudiu a pasa banda di dje, prome un sacerdote y despues un Levita. Tur dos a haci manera nan no a mir’e. Pero despues a presenta un Samaritano. Yen di duele, el a mara e heridanan di e victima y tawatin e bondad di hib’e na un posada sigur caminda e por a recupera. Na final di e cuenta Hesus a puntra e experto di lei: “Cua di e tresnan aki bo ta kere tawata prohimo di e homber cu a cai den man di ladron?” E homber a haya su mes obliga pa contesta: “Esun cu a mustra misericordia na dje.”—Lucas 10:25-37.

¹⁴ Con e comparacion ta refleha e sabiduria di Hesus? Den tempo di Hesus, Hudiunan a aplica e palabra “prohimo” solamente na esnan cu tawata warda nan tradicionnan—nunca na e Samaritanonan. (Huan 4:9) Si Hesus a conta con un victima Samaritano a haya yudansa di un Hudiu, esei lo a vence e prehuicio? Tawata sabi di parti di Hesus anto pa den e cuenta laga un Samaritano atende un Hudiu tiernamente. Ripara tambe e pregunta cu Hesus a haci na final di e cuenta. El a cambia e enfoke di e palabra “prohimo.” Mientras cu e abogado basicamente a puntra ‘ken mester ta e obheto di su amor pa prohimo’, Hesus a puntr’e: “Cua di e tresnan aki bo ta kere tawata prohimo di e homber?” Pues Hesus a enfoca, no riba esun cu a ricibi e gesto di bondad, esta e victima, sino riba esun cu a mustra e acto di bondad, esta e Samaritano. Un berdadero prohimo ta tuma iniciativa pa mustra amor na otro hende sin importa nan antecedencia etnico. Na moda di papia, Hesus no por a haya un miho manera pa splica su punto.

¹⁵ Ta algo straño anto cu e hendenan a keda asombra di Hesus “su siñansa” y a sinti nan atrai na dje? (Mateo  7:28, 29) Na un ocasion, “un multitud grandi” a keda serca dje pa tres dia, asta sin nada di come!—Marco 8:1, 2.

16. Den ki manera Hesus a duna “prueba practico” cu ta e sabiduria di Dios a gui’e?

¹⁶ Un di tres area den cua Hesus a refleha e sabiduria di Yehova tawata su manera di biba. Sabiduria ta algo practico; e ta duna resultado. “Ken entre boso ta sabi?” Santiago a puntra. Anto el a contesta su mes pregunta, bisando: “Laga su conducta corecto duna prueba practico di esei.” (Santiago 3:13, The New English Bible) E manera cu Hesus a comporta su mes a duna “prueba practico” cu ta e sabiduria di Dios a gui’e. Laga nos mira con el a manifesta bon huicio, tanto den su bida como den su relacion cu otro hende.

17. Ki indicacion tin cu Hesus a hiba un bida perfectamente balansa?

¹⁷ Bo a ripara cu hende cu no tin bon huicio gusta bai den extremo? Si, pa un hende ta balansa, e mester di sabiduria. Como cu Hesus a refleha e sabiduria di Dios, e tawata perfectamente balansa. Riba tur cos, el a pone cosnan spiritual na prome luga den su bida. E tawata intensamente ocupa cu e trabou di declara e bon nobo. E di: “Ta pa e motibo ei mi a bini.” (Marco 1:38) Di mes, cos material no tawata hopi importante p’e; ta parce cu e no tawatin mucho cos tampoco. (Mateo 8:20) Esei no ta nifica si cu el a hiba un bida di austeridad, priva di tur goso den bida. Mescos cu su Tata, “e Dios felis”, Hesus tawata un persona alegre, y el a contribui na e goso di otro hende. (1 Timoteo 1:11, NW; 6:15) Dia el a asisti na un fiesta di casamento—un celebracion den cua musica, canto y alegria no a haci falta—e no a bai pa daña ambiente. Ora biña a caba, el a haci awa bira biña excelente, un bebida cu ta “haci curason di hende contento.” (Salmo 104:15; Huan 2:1-11) Hesus a acepta hopi invitacion pa comemento, y hopi bes el a probecha di e ocasionnan ei pa siña hende.—Lucas 10:38-42; 14:1-6.

18. Den Hesus su trato cu su disipelnan, con el a manifesta un capasidad perfecto di husga?

 ¹⁸ Den Hesus su trato cu otro hende, el a demostra cu e tawatin un capasidad perfecto di husga. Door di su comprondemento a fondo di naturalesa humano, e por a haci un bon evaluacion di su disipelnan. Aunke e tawata bon conciente cu nan no tawata perfecto, el a tuma nota di nan bon cualidadnan. El a mira potencial den e hombernan aki cu Yehova a atrae. (Huan 6:44) Apesar di nan fayonan, Hesus tawata dispuesto pa confia den nan. Y el a demostra esei ora el a delega un responsabilidad di peso na su disipelnan. El a duna nan e tarea di predica e bon nobo, y e tawatin confiansa cu nan lo ta capas pa cumpli cu e encargo aki. (Mateo 28:19, 20) E buki di Echonan ta duna testimonio cu nan a cumpli fielmente cu e trabou cu el a manda nan haci. (Echonan 2:41, 42; 4:33; 5:27-32) Ta bisto anto cu tawata sabi di parti di Hesus pa confia nan.

19. Con Hesus a demostra cu e tawata un homber “manso y humilde”?

¹⁹ Manera nos a mira den Capitulo 20, Bijbel ta relaciona humildad y suavidad cu sabiduria. Sin duda, Yehova ta pone e miho ehempel den esaki. Pero kico di Hesus? Ta masha alentador pa mira e humildad cu Hesus a demostra den su trato cu su disipelnan. Como hende perfecto, e tawata  superior na nan. Toch e no a menosprecia su disipelnan. Nunca el a purba duna nan e sintimento cu nan ta inferior of incompetente. Al contrario, el a tene cuenta cu nan limitacionnan y a mustra pasenshi cu nan fayonan. (Marco 14:34-38; Huan 16:12) No ta algo remarcabel cu asta mucha a sinti nan comodo serca Hesus? Siguramente nan a sinti nan atrai na dje pasobra nan a ripara cu e tawata un homber “manso y humilde.”—Mateo 11:29; Marco 10:13-16.

20. Con Hesus a demostra cu e ta rasonabel den e trato cu el a duna un mohe no Hudiu cu tawatin un yiu mohe posei pa demoño?

²⁰ Hesus a refleha e humildad di Dios den un otro forma importante tambe. E tawata rasonabel, of flexibel, ora misericordia a hustifica esei. Corda por ehempel e ocasion ora un mohe no Hudiu a rog’e pa e cura su yiu mohe cu tawata teriblemente posei pa demoño. Na prome instante Hesus a duna di conoce na tres diferente manera cu lo e no yuda e mohe: di prome, door di no contest’e mes; di dos, door di bis’e directamente cu Dios no a mand’e serca hende di e nacionnan, sino serca e Hudiunan; y di tres, door di conta un comparacion cu a ilustra cu tacto e mesun punto ei. Sinembargo, e mohe a persisti, dunando evidencia di un fe extraordinario. En bista di e circunstancia excepcional aki, con Hesus a reacciona? El a haci net loke el a caba di indica cu lo e no haci: el a cura e yiu di e mohe. (Mateo 15:21-28) Esta un humildad remarcabel! Y corda, humildad ta e base di berdadero sabiduria.

21. Pakico nos mester haci esfuerso pa imita e personalidad, abla y accionnan di Hesus?

²¹ Nos por ta hopi gradicido cu e Evangelionan ta revela na nos e palabranan y accionnan di e homber mas sabi cu a yega di biba. Laga nos corda cu Hesus tawata un refleho perfecto di su Tata. Door di imita e personalidad, abla y manera di haci cosnan di Hesus, nos lo cultiva e sabiduria di ariba. Den e siguiente capitulo nos lo mira con nos por aplica e sabiduria di Dios den nos bida.