Kerido Publicadornan di Reino,

PURBA di imagina cu bo tabata un di e miembronan di e famia di Betel di Brooklyn cu tabata na e desayuno di dia 2 di october 1914. Bo ta sinta na bo luga di custumber, wardando riba Ruman C. T. Russell. Diripiente e porta di comedor ta habri y Ruman Russell ta cana drenta. Manera ta su custumber, e ta pausa un momento y ta cuminda e famia di Betel masha contento, bisando: “Bon dia rumannan.” Pero en bes di bay sinta di biaha na cabes di mesa, e ta cuminsa bati man y ta haci un anuncio emocionante: “E Tempo di e Paganonan a termina; e dianan di nan reynan a pasa.” Casi bo no por domina bo emocionnan. Bo a anticipa e dia aki pa hopi tempo. Ora bo scucha e noticia excitante aki, bo ta bati man basta largo hunto cu henter e famia di Betel.

 Mientrastanto, hopi decada a pasa desde cu Ruman Russell a haci e anuncio excitante ey. Kico e Reino a logra for di e tempo ey te cu awor? Basta cos! Pa medio di e Reino, Jehova ta refina y entrena su pueblo gradualmente; un pueblo cu na 1914 tabata consisti di apenas algun mil hende y cu awe ta consisti di casi ocho miyon hende. Pensa riba tur e maneranan cu abo mes a beneficia di e entrenamento ey.

Awe, hopi biaha nos ta tende nos rumannan bisa: “E garoshi di Jehova ta bayendo full speed” y esey ta berdad. Pero, segun cu bo ta lesa e buki aki, lo bo ripara cu, en realidad, for di 1914 e garoshi celestial—cu ta representa e parti invisibel di e organisacion di Jehova—ta moviendo cu gran velocidad. Pa e publicadornan di Reino por a logra predica e bon noticia rond mundo, nan a uza un variedad di metodo hopi innovativo, entre otro, corant, canamento cu pancarta, presentacionnan audiovisual, carchi di testimonio, tocadisco, radio y hasta Internet.

Como cu Jehova ta sigui bendiciona e trabou, nos por publica nos literatura biblico awor na mas cu 670 idioma y por ofrece nos literatura gratis na tur hende. Boluntarionan cu tin un spirito di sacrificio propio ta yuda cu construccion di Salon di Reino, Salon di Asamblea y sucursal, tanto den paisnan prospero como den paisnan di menos recurso. Anto ora un calamidad sosode, di biaha rumannan amoroso ta bay yuda e rumannan den areanan afecta, demostrando asina cu di berdad nan t’ey “pa tempo di adversidad.”—Prov. 17:17.

Tin biaha pastoornan y otro opositornan ta “hasi inhustisia legal.” Pero loke ta fortalece nos fe ta cu nos ta mira con, bes tras bes, nan plannan ta fracasa y ta resulta den “adelanto di e bon noticia.”—Sal. 94:20, BPK; Flp. 1:12.

Pa nos, ta un honor di por traha hunto cu boso, pasobra nos tur ta sirbidor di nos Rey Hesus. (Mat. 24:45) Nos kier pa boso sa cu nos stima boso tur masha hopi. Nos ta haci oracion pa Jehova laga e buki aki yuda boso haya mas aprecio cu nunca pa boso herencia spiritual.

Nos ta desea boso tur cos bon.

Boso rumannan,

Cuerpo Gobernante di Testigonan di Jehova