1, 2. (a) Kico Jehova a profetisa cu lo pasa den nos tempo? (b) E articulo aki lo contesta cua preguntanan? (Wak e prome plachi.)

JEHOVA a bisa cu den nos tempo “dies homber for di tur e nacionnan lo coge bisti di un Hudiu tene, bisando: ‘Laga nos bay cu boso, pasobra nos a tende cu Dios ta cu boso.’” (Zac. 8:23) E “Hudiu” den e profecia aki ta representa e cristiannan cu Dios a ungi cu spirito santo. Nan ta ser yama tambe “e Israel di Dios.” (Gal. 6:16) E “dies homber” ta representa tur cristian cu tin e speransa di biba pa semper riba Tera. Nan sa cu Jehova a bendiciona e grupo di ungi, y pesey pa nan ta un honor di por traha hunto cu e unginan y apoya nan.

² E palabranan di Zacarias ta mustra bon cla cu e sirbidornan di Dios ta un pueblo hopi uni, y Hesus tambe a indica esey. El a referi na su siguidornan como dos grupo, un “tou chikito” y e “otro carne[nan].” Pero el a bisa cu nan lo ta “un tou bou di un wardador.” (Luc. 12:32; Juan 10:16) Esaki ta lanta cuater pregunta: (1) E otro carnenan mester sa precies ken tur e unginan ta pa nan sirbi Dios hunto cu nan? (2) Con e unginan mester mira nan mes? (3) Con bo mester trata un ruman den bo congregacion cu cuminsa tuma di e pan cu e biña na Conmemoracion? (4) Bo mester preocupa cu awor tin  mas hende ta tuma di e pan cu e biña? E articulo aki lo contesta e preguntanan aki.

3. Dicon no ta posibel pa nos sa precies ken lo forma parti di e 144.000?

³ Acaso e otro carnenan mester sa nomber di tur e unginan riba Tera awe? No. Dicon no? Pasobra hasta si un persona tin e yamada celestial, esey ta djis un invitacion y no un confirmacion definitivo cu e lo bay cielo. Satanas tambe sa cu e persona ey mester keda fiel p’e haya su recompensa, pesey e ta uza profeta falso pa purba di gañ’e. (Mat. 24:24) Pues, niun hende no por bisa cu tur siguridad si un ungi lo bay cielo, sino te ora cu Jehova duna e persona ey su aprobacion, of seyo, final. Anto esaki por sosode un poco prome cu e persona muri fielmente of prome cu e “tribulacion grandi” cuminsa. (Rev. 2:10; 7:3, 14) Pesey, no tin sentido pa purba di averigua ta ken entre e sirbidornan di Dios lo forma parti finalmente di e 144.000. ^[1]

4. Si nos no sa precies ken tur e unginan cu tin riba Tera awe ta, con nos por “bay cu” nan?

⁴ Si e otro carnenan no por sa precies ken tur e Israelitanan spiritual cu tin riba Tera awe ta, con nan por “bay cu” nan? E profecia di Zacarias ta bisa cu e “dies homber[nan]” lo “coge bisti di un Hudiu tene, bisando: ‘Laga nos bay cu boso, pasobra nos a tende cu Dios ta cu boso.’” Tuma nota cu e hombernan aki ta uza e palabra “boso” ora nan ta papia cu e Hudiu. Esaki ta nifica cu e ta representa henter e grupo di ungi, no un persona individual. Pues, pa sigui e Hudiu spiritual nos no tin nodi sa precies ken cada un di e unginan ta. Mas bien, nos tin cu identifica ken e grupo ta y dun’e nos apoyo. Na ningun momento Bijbel no ta anima nos pa sigui un persona. E unico Lider cu nos tin ta Hesus.—Mat. 23:10.

5. (a) Riba ki spiertamento e unginan mester pensa bon? (b) Kico e spiertamento aki ta corda nan?

⁵ Tur cu ta tuma di e pan cu e biña na Conmemoracion mester pensa bon riba e spiertamento cu nos ta haya na 1 Corintionan 11:27 te cu 29. (Les’e.) Ki punto apostel Pablo kier a enfatisa den e texto aki? Wel, cu ora un cristian ungi ta tuma di e pan cu e biña sin cu e tin un bon relacion cu Dios, e ta actua “na un manera indigno”, es decir, sin respet pa Dios. (Heb. 6:4-6; 10:26-29) E spiertamento aki ta yuda e unginan corda cu nan no a ricibi nan recompensa celestial ainda. Nan tin cu sigui haci “esfuerso pa alcansa e meta di ricibi e premio di Dios su yamada celestial pa medio di Cristo Hesus.”—Flp. 3:13-16.

6. Con cristiannan ungi mester mira nan mes?

⁶ Na Efesionan 4:1 te cu 3, Pablo a bisa cristiannan ungi: “Ami, prizonero den Señor, ta haci un apelacion na boso pa cana na un manera digno di e yamada cu boso a ricibi.” Con nan por haci esey? Pablo a sigui bisa: “Cu tur humildad y suavidad, cu pasenshi, soportando otro den amor, haciendo esfuerso sincero pa mantene e union di spirito den e vinculo di paz.” Jehova su spirito santo no ta promove orguyo, sino humildad. (Col. 3:12) Pues, cristiannan ungi ta modesto y ta reconoce cu nan no necesariamente tin mas spirito santo cu rumannan cu tin e speransa di biba riba Tera. Nan no ta  pretende cu nan ta compronde Bijbel mihor cu otro rumannan of cu nan ta haya cierto revelacion di Dios. Tampoco nan no ta haci comosifuera nan ta mihor cu otro hende. Nunca nan lo bisa un otro ruman cu e tambe ta ungi y cu e mester cuminsa tuma di e pan cu e biña. Al contrario, nan ta reconoce humildemente cu ta Jehova ta e unico cu por invita hende pa bay cielo.

7, 8. Kico cristiannan ungi no ta spera di otro hende, y dicon no?

⁷ Aunke cristiannan ungi ta considera nan yamada celestial un gran privilegio, nan no ta spera un trato special for di otro ruman. (Efe. 1:18, 19; lesa Filipensenan 2:2, 3.) Ora Jehova a ungi nan cu su spirito, e no a anuncia esey publicamente; ta nan so a haya e testimonio ey. Pesey, nan no ta keda sorprendi si algun hende no ta kere cu nan a ser ungi cu spirito santo. Nan sa cu Bijbel ta hasta bisa nos pa no sea mucho lihe pa kere un hende cu ta bisa cu Dios a dun’e un responsabilidad special. (Rev. 2:2) Ademas, como cu nan no kier ta e centro di atencion, nan lo no introduci nan mes como ungi ora nan ta cera conoci cu un hende. Por lo general, nan no ta ni menciona esey ya cu ta trata aki di un asunto priva. Y sigur nan lo no cana broma cu e recompensa maraviyoso cu ta warda nan den cielo.—1 Cor. 1:28, 29; lesa 1 Corintionan 4:6-8.

⁸ Un otro punto ta cu cristiannan ungi no ta pensa cu nan mester pasa tempo cu otro ungi so, comosifuera nan ta miembro di un club exclusivo. Nan no ta purba di drenta den contacto cu otro ungi pa papia di nan experencianan of pa forma grupo priva pa studia Bijbel. (Gal. 1:15-17) Tipo di cosnan asina lo causa division den congregacion y ta obra contra di e spirito santo, cu juist ta yuda promove paz y union den e pueblo di Dios.—Lesa Romanonan 16:17, 18.

9. Cu kico nos mester tene cuidou ora nos ta trata rumannan cu ta tuma di e pan cu e biña? (Wak e cuadro  Amor “No Ta Comport’e Indecentemente.”)

⁹ Si bo conoce un ruman cu ta tuma di e pan cu e biña, con bo mester trat’e? Hesus a bisa su discipelnan: “Boso tur ta ruman.” Tambe el a bisa nan: “Ken cu halsa su mes, lo keda humilia, y ken cu humilia su mes, lo keda halsa.” (Mat. 23:8-12) Pesey, lo no ta bon pa pone niun hende riba un pedestal, ni maske e ta un di e rumannan di Cristo. Por ehempel, Bijbel ta conseha nos pa imita e fe di e ancianonan cu ta dirigi nos, pero nunca e ta manda nos halsa niun hende como nos lider. (Heb. 13:7) Ta berdad cu Bijbel ta bisa cu algun ruman ta “digno di dobel honor.” Pero nan merece e honor ey, no pasobra nan ta ungi, sino pasobra nan ta “dirigi na un manera excelente” y “ta traha duro pa cumpli cu nan tarea di papia y duna siñansa tocante e palabra di Dios.” (1 Tim. 5:17) Pues, si nos ta duna demasiado atencion y elogio na e rumannan cu tin e speransa di bay cielo, nos lo por laga nan sinti incomodo. Ademas, si nos ta duna nan un trato special, ta bira dificil pa nan keda humilde. (Rom. 12:3) Niun di nos lo kier pone un di e rumannan di Cristo trompica, toch?—Luc. 17:2.

10. Con bo por mustra e debido respet pa cristiannan ungi?

¹⁰ Con nos por demostra e debido respet pa cristiannan cu Jehova a scoge pa bay cielo? Un manera ta di no puntra nan con nan por sa cu nan ta ungi. Esey ta algo personal cu no ta nos asunto. (1 Tes.  4:11; 2 Tes. 3:11) Nos no mester asumi tampoco cu e mayornan, casa of otro miembro di famia di un cristian ungi tambe tin e yamada celestial. E speransa celestial no ta algo cu un persona ta hereda di su famia. (1 Tes. 2:12) Tambe nos lo evita di puntra e casa di un ungi con e ta sintie sabiendo cu su casa lo no ta hunto cu ne den Paradijs. En bes di haci pregunta asina cu por causa dolor, nos tur por tin e pleno confianza cu Jehova lo habri su man y “satisface e deseo di tur ser bibo.”—Sal. 145:16.

11. Con nos ta proteha nos mes si nos ta evita di halsa hende?

¹¹ Si nos ta trata cristiannan ungi mescos cu tur otro ruman, esey lo ta un proteccion pa nos. Dicon? Wel, corda cu Bijbel ta bisa cu “rumannan falso” lo por sluip drenta e congregacion. Nan por hasta pretende di ta ungi. (Gal. 2:4, 5; 1 Juan 2:19) Tambe por sosode cu algun cristian ungi ta bandona e berdad. (Mat. 25:10-12; 2 Ped. 2:20, 21) Ora nos ta evita e trampa di halsa hende, esey lo proteha nos pasobra nos lo no bandona e organisacion di Jehova pa nan motibo. Nos fe lo no haya un sla duro tampoco si un ruman bon conoci of cu tin hopi aña den e berdad stop di sirbi Dios.—Judas 16.

12, 13. Dicon nos no mester preocupa cu awor tin mas hende ta tuma di e pan cu e biña na Conmemoracion?

¹² Pa hopi aña, e cantidad di ruman cu a tuma di e pan cu e biña na Conmemoracion di e morto di Cristo tabata baha. Pero ultimo añanan ta net contrario: e cantidad ta sigui aumenta. Acaso esaki mester preocupa nos? No. Laga nos wak dicon.

¹³ “Jehova conoce esnan cu ta pertenece na dje.” (2 Tim. 2:19) E rumannan cu ta haci conteo di ken ta tuma di e pan cu e biña na Conmemoracion no por sa ken realmente ta ungi. E cantidad ta inclui rumannan cu ta kere cu nan ta ungi, pero cu no ta. Por ehempel, tin ruman cu a cuminsa tuma di e pan cu e biña pero cu despues a stop di haci esey. Otronan kisas ta sufri di un problema mental of emocional cu ta pone nan kere cu nan lo reina hunto cu Cristo den  cielo. Pesey e cantidad di ruman cu ta tuma di e pan cu e biña no ta un indicacion exacto di e cantidad di ungi cu tin ainda riba Tera.

14. Kico Bijbel ta bisa tocante e cantidad di ungi cu lo tin riba Tera ora e tribulacion grandi cuminsa?

¹⁴ Lo tin rumannan ungi na tur parti di e Tera ora Hesus bin pa hiba nan cielo. Bijbel ta papia di e tempo ey cu Hesus lo “manda su angelnan cu un zonido duro di trompet, y nan lo reuni su scoginan for di e cuater skinanan di mundo, for di e punta di mas leu di cielo te na e otro punta di mas leu.” (Mat. 24:31) Tambe Bijbel ta mustra cu durante e ultimo dianan lo tin solamente un resto di e unginan riba Tera. (Rev. 12:17) Pero e no ta bisa cuanto lo tin ora e tribulacion grandi cuminsa.

15, 16. Kico nos mester corda relaciona cu e 144.000 cu Jehova a scoge?

¹⁵ Ta Jehova ta dicidi na ki momento den historia e ta scoge e unginan. (Rom. 8:28-30) Jehova a cuminsa scoge e unginan despues di e morto y resureccion di Hesus. Parce cu den e prome siglo tur cristian berdadero tabata ungi. For di e prome siglo te na cuminsamento di e ultimo dianan, e gran mayoria di hende cu tabata bisa cu nan ta siguidor di Cristo tabata en realidad cristiannan falso; Hesus a compara nan cu “mal yerba.” Pero asina mes, Jehova a ungi algun persona fiel durante e tempo ey, y nan a resulta di ta e “trigo” cu Hesus a describi. (Mat. 13:24-30) Den e ultimo dianan, Jehova a sigui scoge hende cu lo forma parti di e 144.000. ^[2] Si e dicidi di warda pa scoge algun hende te un poco prome cu e fin bin, ken nos ta pa cuestion’e? (Isa. 45:9; Dan. 4:35; lesa Romanonan 9:11, 16.) ^[3] Nos mester tene cuidou pa nos no reacciona manera e trahadornan malcontento den e ilustracion di Hesus, kendenan a reclama e echo cu nan doño a paga nan mes tanto cu e trahadornan cu a traha un ora so.—Lesa Mateo 20:8-15.

¹⁶ No ta tur cristian cu tin e speransa di biba den cielo ta parti di “e esclavo fiel y prudente.” (Mat. 24:45-47) Den e prome siglo, Jehova y Hesus a uza un cantidad chikito di cristian pa alimenta, of siña, su pueblo. Por ehempel, ta un par di ungi so el a uza pa skirbi e Scritura Griego Cristian. Awe ta mescos. Ta djis un par di cristian ungi tin e responsabilidad di duna e pueblo di Dios “cuminda na e debido tempo.”

17. Kico bo a siña for di e articulo aki?

¹⁷ Kico nos a siña for di e articulo aki? Jehova a dicidi di duna dos diferente recompensa: bida den cielo na e Hudiunan spiritual y bida eterno riba Tera na e dies hombernan simbolico. Pero e ta exigi mescos di tanto esnan cu tin e yamada celestial como di esnan cu tin e speransa di biba riba Tera. Tur dos grupo mester obedece e mesun leynan y keda fiel. Tur dos grupo mester keda humilde. Tur dos grupo mester ta uni. Tur dos grupo mester promove paz den e congregacion. Pues, segun cu nos ta yega mas cerca di e fin, laga nos tur sigui sirbi Jehova como un solo tou bou di Cristo.