ABEHA of bij por bula baha sin problema for di casi tur angulo. Con bin?

Pensa un rato riba lo siguiente: Pa un bij por bula baha un caminda sin problema, e mester reduci su velocidad te na casi cero net prome cu e baha. Con e por logra esey? Wel, ta logico cu e mester calcula dos cos: speed y distancia. Despues e mester adapta su velocidad teniendo cuenta cu e distancia. Pero esey ta algo hopi dificil pa mayoria di insecto. Dicon? Como cu nan tin dos wowo hopi cerca di otro y nan no por ahusta nan enfoke, nan no por calcula distancia.

Hende tin un vision binocular, pesey nan por calcula distancia. Den caso di un bij ta diferente; un obheto ta parce di bira mas grandi segun cu e ta acerca e obheto. Y mas cerca e yega di e obheto, mas lihe e obheto ta parce di bira grandi. Investigadornan na e Universidad Nacional di Australia a haci un experimento, y nan a ripara cu abeha ta baha su velocidad pa e grandura di un obheto keda relativamente mescos. Pues, pa ora cu un bij yega caminda e kier yega, e ta baha su velocidad te na casi cero y asina e por baha sin problema.

E revista Proceedings of the National Academy of Sciences ta bisa: “Lo por implementa e mesun principio simpel di aterisahe aki ... den e sistema di nabegacion di robot cu ta bula.”

Kico bo ta pensa? E habilidad cu abeha tin pa baha for di cualkier direccion a bin di evolucion of di creacion?