Bon comunicacion ta ora tanto abo como bo yiunan ta expresa boso pensamento- y sintimentonan na otro.

Comunicacion por bira un reto specialmente den caso di yiunan teenager. Kisas no mucho tempo pasa “tabata comosifuera bo por a participa den bida di bo yiunan tras di escenario”, segun e buki Breaking the Code. “Awor e mihor asiento cu bo por spera di haya ta den publico, y probablemente no ta ni e mihor asiento tampoco.” Y aunke apariencia ta gaña, ta net na e momentonan ey nan mester papia cu bo.

Sea dispuesto pa comunica cu bo yiu ora e kier papia. Haci esey hasta si bo tin cu papia cu ne te marduga.

“Kisas bo ta haya gana di bisa: ‘Net awor bo kier papia? Nos tabatin henter dia, toch?’ Pero lo ta sabi pa keha si eigenlijk nos kier pa nos yiunan papia cu nos? Acaso esey no ta locual cu tur mayor ta desea pa nan yiunan haci?”—Lisa.

“Mi no gusta perde soño, pero algun di e mihor combersacionnan cu mi tabatin cu mi yiunan teenager tabata despues di meyanochi.”—Herbert.

PRINCIPIO DI BIJBEL: “Laga cada hende sigui busca, no su mes beneficio, sino esun di e otro persona.”—1 Corintionan 10:24.

No laga nada kita bo atencion. Un tata ta reconoce: “Tin biaha, ora mi yiunan ta papiando, mi ta catch mi mes pensando riba otro cos. Y mi no por gaña nan; nan ta ripara.”

Si television of cualkier aparato electronico sa kita bo atencion, paga nan of pone nan un banda. Concentra riba loke bo yiu ta bisando y lag’e sinti cu e tin tur bo atencion, hasta si abo mes ta pensa cu ta algo cu no ta dje importante ey.

“Nos yiunan mester ta convenci cu nan sintimentonan ta importante pa nos. Sino, nan lo no bisa nos loke nan ta pensa y hasta nan lo busca yudansa cerca otro hende.”—Maranda.

“Ni maske con robes bo yiu ta, no haci un escandalo.”—Anthony.

PRINCIPIO DI BIJBEL: “Presta atencion na e manera cu boso ta scucha.”—Lucas 8:18.

Probecha di momentonan cu boso ta relaha. Tin biaha, yiunan ta mas inclina pa papia cu nan mayornan ora cu nan no ta sinta cara cara cu nan.

“Nos ta probecha ora nos ta core den auto. E echo cu nos tabata sinta banda di otro y no cara cara cu otro a hiba na bon combersacion.”—Nicole.

Un otro oportunidad pa papia cu otro den un ambiente relaha ta ora e famia ta come hunto.

“Ora cu nos famia ta come hunto, cada un di nos ta conta tanto e cos di mas malo como e cos di mas mihor cu a pasa e dia ey. E custumber aki ta uni nos y ta siña nos cu nos no tin mester di enfrenta nos problemanan nos so.”—Robin.

PRINCIPIO DI BIJBEL: “Tur hende mester ta cla pa scucha [y] slow pa papia.”—Santiago 1:19.