PA HOBEN
10: Confiabel
LOKE ESAKI TA NIFICA
Un hende confiabel ta gana confianza di su mayornan, amigonan y doño di trabou. Nan ta sigui regla, ta cumpli cu nan promesanan y semper ta bisa berdad.
DICON ESEY TA IMPORTANTE?
Den casi tur caso, e cantidad di libertad cu bo ta haya ta depende di e confianza cu bo a gana a traves di tempo.
“E mihor manera pa gana e confianza di bo mayornan ta ora bo ta demostra cu bo ta un persona maduro y responsabel, no solamente ora bo ta cu nan sino tambe ora cu nan no t’ey.”—Sarahi.
PRINCIPIO DI BIJBEL: “Sigui pone boso mes na prueba pa demostra ki tipo di hende boso ta.”—2 Corintionan 13:5.
LOKE BO POR HACI
Si bo kier gana mas confianza di otro hende of si bo kier pa nan confia bo atrobe, e siguiente consehonan por yuda bo.
Sea honesto. Hende lo stop di confia bo di biaha si bo ta un persona cu ta gaña. Di otro banda, si bo ta un persona honesto y habri, specialmente ora bo haci fout, bo por gana confianza di otro hende.
“Ta facil pa ta honesto ora cos ta bayendo bon. Pero ora bo ta honesto den cosnan cu por duna un mal impresion di bo, hende lo confia bo mas.”—Caiman.
PRINCIPIO DI BIJBEL: “Nos kier comporta nos mes na un manera honesto den tur cos.”—Hebreonan 13:18.
Sea responsabel. Segun un encuesta na Merca, 78 porciento di e profesionalnan di recurso humano ta mustra cu un di e tres cosnan di mas importante cu un compania ta verwacht di un trahador ta pa e ta responsabel. Si bo bira responsabel, esey lo yuda bo ora bo ta un adulto.
“Mi mayornan ta ripara cu mi ta responsabel ora mi ta haci mi trabounan di cas sin cu nan mester keda corda mi. Mas responsabel mi ta, mas nan ta confia mi.”—Sarah.
PRINCIPIO DI BIJBEL: “Mi tin sigur cu lo bo haci esey ... Mi sa cu lo bo haci hasta mas di loke mi ta bisa.”—Filemon 21.
Mustra pasenshi. Dicon? Pasobra ta facil pa ripara ora hobennan ta crece y bira fuerte. Pero ta tuma tempo pa un hende ripara cu nan ta birando maduro y responsabel.
“Ta tuma tempo y esfuerso pa gana e confianza di bo mayornan y di otro hende. Bo no por spera cu hende lo confia bo djis pasobra cu bo tabata responsabel un biaha.”—Brandon.
PRINCIPIO DI BIJBEL: “Bisti ... pasenshi.”—Colosensenan 3:12.
