PA HOBEN
9: Identidad
LOKE ESAKI TA NIFICA
Loke ta identifica bo no ta solamente bo nomber y bo apariencia pero tambe bo normanan moral, bo creencia y bo personalidad. Cu otro palabra, abo ta tur loke bo ta tanto di paden como di pafo.
DICON ESEY TA IMPORTANTE?
Ora bo sa ken bo ta, bo ta defende loke bo ta kere aden en bes di laga hobennan di bo edad presiona bo.
“Hopi hende ta mescos cu mannequin cu bo ta wak den showcase. Nan mes no ta kies loke nan ta bisti; otro hende ta kies pa nan.”—Adrian.
“Mi a siña con pa defende loke ta corecto aunke cu esey no ta facil. Mi ta haya sa ken mi berdadero amigonan ta na nan manera di actua y con ami ta actua ora mi ta cu nan.”—Courtney.
PRINCIPIO DI BIJBEL: “Stop di laga e mundo aki forma boso, ma transforma boso mes door di renoba boso mente.”—Romanonan 12:2.
LOKE BO POR HACI
Pa bo haya sa ken bo ta awor y e sorto di persona cu bo kier bira, wak kico ta bo puntonan fuerte, bo puntonan debil y loke bo ta kere aden. E siguiente preguntanan por yuda bo examina bo mes.
Puntonan fuerte: Ki talento y habilidad mi tin? Kico ta mi puntonan fuerte? (Por ehempel: Mi ta puntual? Mi tin dominio propio? Mi ta un bon trahador? Mi ta generoso?) Kico mi ta bon aden?
UN SUGERENCIA: Acaso ta dificil pa pensa kico bo ta bon aden? Puntra un mayor of un bon amigo ki puntonan fuerte bo tin y dicon nan ta pensa esey.
PRINCIPIO DI BIJBEL: “Laga cada un di boso analisa su mes accionnan, anto e ora ey lo e tin motibo pa ta masha contento cu su mes, sin compara su mes cu otro hende.”—Galationan 6:4.
Puntonan debil: Ki aspecto di mi personalidad mi mester traha mas duro riba dje? Ki ora mi ta ser tenta mas lihe pa haci algo malo? Den ki aspectonan mi por siña controla mi mes mas mihor?
PRINCIPIO DI BIJBEL: “Si nos ta declara: ‘Nos no tin pica’, nos ta gaña nos mes.”—1 Juan 1:8.
Loke bo ta kere aden: Ki normanan moral mi ta sigui, y dicon? Mi ta kere den Dios? Kico a convence mi cu Dios ta existi? Kico mi ta considera inhusto, y dicon? Kico mi ta kere cu lo bay pasa den futuro?
PRINCIPIO DI BIJBEL: “Discrecion [of capacidad di pensa] lo warda bo; comprondemento lo cuida bo.”—Proverbionan 2:11.
You May Also Like
CONTESTA PA 10 PREGUNTA CU HOBENNAN SA HACI
Ken Mi Ta Realmente?
Si bo sa kico ta bo norma- y balornan, bo puntonan fuerte y bo puntonan debil y tambe bo metanan den bida, lo bo por tuma bon decision ora bo ta bou di presion.
