Si bo tabata den un situacion dificil, sigur lo bo verwacht cu un bon amigo lo yuda bo. Cu esey na mente, algun hende ta bisa cu Dios no ta un amigo pasobra e no ta haci nada pa yuda hende. Pero en realidad, Dios a haci hopi cos caba pa nos beneficio. Y den futuro, e lo haci algo tambe cu tur problema y sufrimento cu nos ta enfrenta awe. Kico Dios lo haci den futuro?

Dios lo caba cu tur maldad door di elimina esun cu ta caus’e. Bijbel ta identifica esun cu ta causa maldad, e ta bisa: “Henter mundo ta den poder di e Malbado.” (1 Juan 5:19) E “Malbado” ey ta e mesun persona cu Hesus a yama “e gobernante di e mundo aki”, esta, Satanas e Diabel. (Juan 12:31) Satanas su influencia ta e causa di tur e cosnan malo cu ta pasa cu hende riba Tera. Pero kico Dios lo haci den futuro?

Pronto, Jehova Dios lo tuma accion pa medio di su Yiu, Hesucristo, pa “caba cu esun cu tin e medio pa causa morto, esta, Diabel.” (Hebreonan 2:14; 1 Juan 3:8) De echo, Bijbel ta mustra cu Diabel “sa cu a ked’e masha poco tempo” prome cu su destruccion. (Revelacion 12:12) Tambe Dios lo caba cu tur e malbadonan.​—Salmo 37:9; Proverbionan 2:22.

Despues di elimina maldad, nos Creador lo haci loke ta necesario pa cumpli cu su proposito pa hende perfecto biba pa semper den Paradijs. Kico nos por spera den futuro?

Paz y siguridad duradero. “E humildenan lo hereda e Tera, y lo deleita nan mes den paz abundante.”​—Salmo 37:11.

Cuminda saludabel na abundancia pa tur hende. “Lo tin abundancia di maishi den e tera, riba cabes di e seronan.”​—Salmo 72:16.

Cas comodo y trabou satisfactorio. “Nan lo traha cas y biba den nan; tambe nan lo planta cunucunan di wendruif y come nan fruta ... Mi scoginan lo disfruta di e obra di nan mannan pa hopi tempo.”​—Isaias 65:21, 22.

Abo ta desea di biba den e mundo ey? Pronto tur esey lo bira realidad.

Den nos tempo, tur hende ta bira malo y ta muri. Pero pronto esey lo no ta e caso mas. Danki na Hesus su sacrificio, Dios lo zorg pa “tur cu pone fe den dje no bay perdi, ma haya bida eterno.” (Juan 3:16) Kico lo ta e resultado?

Lo no tin maleza mas. “Ningun habitante lo no bisa: ‘Mi ta malo’; e pueblo cu ta biba ayanan lo wordo pordona pa nan inikidad.”​—Isaias 33:24.

Lo no tin morto mas. “E lo traga morto pa semper, y Señor DIOS lo seca awa di wowo for di tur cara.”​—Isaias 25:8.

Hende lo biba pa semper. “E regalo cu Dios ta duna ta bida eterno pa medio di Cristo Hesus, nos Señor.”​—Romanonan 6:23.

Esnan cu a muri lo resucita. “Lo bay tin un resureccion di tanto hende husto como inhusto.” (Echonan 24:15) Nan lo beneficia di e rescate.

Con Dios lo cumpli cu tur e promesanan aki?

Dios lo cumpli cu su proposito pa humanidad y Tera pa medio di un gobierno celestial. Cristo Hesus ta Rey di e gobierno aki. (Salmo 110:1, 2) Esaki ta e gobierno of reino cu Hesus a siña su siguidornan pa pidi p’e den oracion: “Nos Tata cu ta den cielo, ... laga bo Reino bini.”​—Mateo 6:9, 10.

E Reino di Dios lo goberna Tera y caba cu tur dolor y sufrimento. Esta un excelente gobierno humanidad lo tin! Pa e motibo ey, Hesus a haci esfuerso pa predica “e bon noticia di Reino” tempo cu e tabata riba Tera, y el a bisa su discipelnan pa haci mescos.​—Mateo 4:23; 24:14.

Pa motibo di e amor grandi cu Jehova Dios tin pa humanidad, el a priminti di haci tur e cosnan maraviyoso aki pa nan. Esey no ta conmove bo pa siña conoce Dios y hala cerca dje? Si bo scoge pa siña conoce Dios, ki beneficio lo bo saca? E siguiente articulo lo splica esey.