Pronto Dios su gobierno celestial lo cuminsa goberna riba humanidad. E ora ey, tur hende riba Tera lo ta feliz, lo ta na paz cu otro y lo disfruta di nan trabou. Dios a scoge Hesucristo pa goberna Tera. Contrario na e gobernantenan cu nos conoce awendia, Hesus si ta interesa den hende y kier haci lo mihor pa nan. Lo e goberna cu amor y lo e ta un rey cu ta bondadoso, misericordioso y husto.—Isaias 11:4.

Ni nacionalidad ni rasa lo no dividi hende pasobra henter humanidad lo ta un pueblo uni. (Revelacion 7:9, 10) Tur hende riba Tera lo stima Dios y stima nan prohimo. Y nan lo traha hunto pa cumpli cu Dios su proposito original di cuida nan hogar, esta, e Tera.—Salmo 115:16.

Ora Dios su Reino ta goberna Tera, e Creador lo percura pa e clima ta den balansa perfecto. (Salmo 24:1, 2) Ora Hesus tabata riba Tera, el a calma un tormenta hopi spantoso. Asina ey el a mustra kico e por haci cu e poder cu Dios a dun’e. (Marco 4:39, 41) Pues, ora nos ta bou di Cristo su gobernacion, nos lo no mester tin miedo di desaster natural. Es mas, Dios su Reino lo restaura e harmonia entre naturaleza y hende.—Oseas 2:18.

Tur hende lo tin salud perfecto. Niun hende lo no bira malo, bira bieu ni muri. (Isaias 35:5, 6) Tur hende lo disfruta di un medioambiente bunita y limpi, mescos cu esun cu e prome pareha tabatin den e hofi di Eden. Den e mundo nobo, mescos cu den e hofi di Eden, Tera lo produci cuminda na abundancia y tur hende lo tin suficiente cuminda. (Genesis 2:9) Tur hende den Paradijs lo “come bariga yen”, mescos cu Dios su nacion di Israel den pasado.—Levitico 26:4, 5.

Bou di Dios su gobierno mundial, tur hende lo ta na paz cu otro y lo trata otro na un manera bondadoso y husto. Lo no tin guera ni mal uzo di poder, y tur hende lo tin loke nan mester pa biba. Bijbel ta priminti: “Cada un di nan lo sinta bou di su palo di wendruif y bou di su palo di figo, y ningun hende lo no spanta nan.”—Mikeas 4:3, 4.

Tur famia lo tin nan propio cas, sin mester di tin miedo cu un dia nan lo perd’e. Ademas, nan lo tin trabou cu lo duna nan goso. Manera Bijbel ta bisa, esnan cu ta biba den Dios su mundo nobo “lo no traha en vano.”—Isaias 65:21-23.

Bijbel ta priminti: “Tera lo ta yen di e conocemento di SEÑOR.” (Isaias 11:9) Hende lo siña for di nan Creador, Jehova, kende su conocemento no tin limite. Nan lo siña tambe tocante tur e cosnan bunita cu el a crea. Nan lo no uza nan conocemento pa traha arma of pa haci otro hende daño. (Isaias 2:4) En bes di esey, nan lo siña pa biba na paz cu otro hende y pa cuida nos planeta.—Salmo 37:11.

Dios kier pa hende biba riba Tera pa semper. Pesey, el a tuma su tempo pa prepara Tera di manera cu tur dia nos por disfruta plenamente di bida. (Salmo 37:29; Isaias 45:18) Pa haci esey posibel, Dios lo “traga morto pa semper.” (Isaias 25:8) Bijbel ta priminti: “Lo no tin morto mas; ni tristeza ni sclamacion ni dolor lo no tin mas.” (Revelacion 21:4) Dios lo duna tur hende e oportunidad pa biba pa semper. Esey ta conta tanto pa esnan cu sobrevivi e fin, como pa esnan cu resucita den e mundo nobo.—Juan 5:28, 29; Echonan 24:15.

 Ya caba tin miyones di hende ta preparando pa biba den Dios su mundo nobo, cu ta ey mes tras di porta. Aunke nan ta imperfecto, nan ta purbando di ta e tipo di persona cu Dios lo kier den e mundo ey. Con nan ta haci esey? Door di siña tocante Jehova Dios y esun cu el a manda, Hesucristo.—Juan 17:3.

Haya sa mas tocante con bo por sobrevivi e fin di mundo y biba den un mundo mihor cu ta asina cerca. Acepta un curso di Bijbel interactivo gratis for di un testigo di Jehova uzando e buki Bo Por Disfruta di Bida pa Semper!