IMAGINA bo cu bo ta un cristian cu a biba den e prome siglo. Bo congregacion a caba di ricibi un carta for di apostel Pablo. Segun cu nan ta les’e, bo ta ripara cu Pablo hopi biaha ta cita for di “e scrituranan santo”, esta, e Scritura Hebreo. (2 Timoteo 3:15) Kisas bo ta bisa bo mes: Lo mi tin gana di haya sa for di cua texto el a cita esey. Pero esey lo no tabata facil. Dicon no?

Wak con e manuscrito di “e scrituranan santo” den tempo di Pablo tabata. Akibou bo por wak un parti di e buki di Isaias for di e Rolnan di Lama Morto. Kico bo ta mira? Djis un columna di texto y no tin signo di puntuacion. Y tampoco no tin number di capitulo y versiculo manera nos ta uza awe.

E escritornan di Bijbel no a dividi nan mensahe den capitulo of versiculo. Nan a skirbi henter e mensahe cu Dios a duna nan pa e lectornan por a haya e mensahe completo y no djis algun fraccion di dje. No ta esey bo tambe kier ora bo haya un carta importante for di un persona cu bo ta stima? Bo ta lesa henter e carta y no djis algun pida so.

Sinembargo, e echo cu no tabatin capitulo of versiculo a causa problema. E unico manera cu Pablo por a identifica locual el a cita tabata door di uza expresionnan manera “ta para skirbi” of “manera Isaias a bisa.” (Romanonan 3:10; 9:29) Y lo tabata dificil pa haya loke el a cita a menos cu bo tabata bon conoci cu henter “e scrituranan santo.”

Ademas, e “scrituranan santo” no tabata consisti di un solo mensahe di Dios. Na final di prome siglo, nan a consisti di un coleccion di 66 buki. Pesey mayoria di hende cu ta lesa Bijbel ta contento cu tin capitulo y versiculo cu por yuda nan haya informacionnan specifico, manera hopi di e citanan den Pablo su cartanan.

Pero, kisas bo ta puntra bo mes: Ken a pone e capitulo- y versiculonan den Bijbel?

Probablemente ta e clero Ingles Stephen Langton, kende a bira Arsobispo di Canterbury, ta esun cu a pone e division di capitulo den Bijbel. El a haci esey na cuminsamento di siglo 13 di nos era, ora e tabata un docente na e Universidad di Paris, Francia.

Prome cu Langton, tabatin expertonan riba tereno di Bijbel cu a purba di dividi Bijbel na diferente manera den seccionnan chikito of capitulonan, principalmente pa yuda nan haya e textonan di Bijbel mas lihe. Bo por imagina bo cu lo tabata hopi mas facil pa nan haya un texto si nan mester a busc’e den un capitulo so en bes di henter un buki, manera por ehempel e buki di Isaias cu tin 66 capitulo.

Sinembargo, tur esey a causa un problema. E expertonan riba tereno di Bijbel a bin cu varios sistema pa dividi Bijbel den capitulo, pero e sistemanan aki tabata hopi diferente for di otro. Por ehempel, un di e sistemanan a parti e Evangelio di Marco den 50 capitulo en bes di e 16 capitulonan cu nos tin awe. Tabatin studiantenan di diferente parti di Tera  na Paris den tempo di Langton y nan tur a bin cu nan mes Bijbel. Sinembargo, no tabata facil pa e docente- y studiantenan splica otro na cua parti di e manuscrito nan tabata referi na dje. Dicon no? Pasobra e division di e capitulonan den nan manuscrito no tabata cuadra cu otro.

Pues, Langton a crea un manera nobo pa parti e capitulonan. The Book—A History of the Bible a bisa cu e lector- y escribanan a gusta su sistema y esaki a plama lihe den Europa. Ta e sistema ey nos ta haya den mayoria di Bijbel awe.

Un 300 aña despues, meymey di siglo 16, un experto riba tereno di Bijbel y drukker Frances bon conoci cu yama Robert Estienne a crea un sistema mas facil ainda. Su meta tabata pa yuda mas hende studia Bijbel. El a realisa cu tabata importante pa tin un solo sistema pa parti e capitulo- y versiculonan.

No ta Estienne a bin cu e idea pa parti e textonan di Bijbel den versiculo. Otro hendenan ya a haci esey. Por ehempel, siglonan prome, escritornan Hudiu a parti henter e Scritura Hebreo, of e Testament Bieu, den versiculo pero no den capitulo. Pero mescos cu tabata e caso cu e division di capitulonan, no tabatin un solo sistema.

Estienne a parti e Scritura Griego Cristian, of e Testament Nobo, den versiculonan y a combina esaki hunto cu loke tabatin caba den e Scritura Hebreo. Na aña 1553, el a publica e prome Bijbel completo (un edicion na Frances) cu basicamente e mesun division di capitulo y versiculo cu mayoria di Bijbel ta uza awe. Algun hende a critica e sistema aki pasobra segun nan e versiculonan a parti e mensahe di Bijbel den pidanan chikito y a lag’e parce un serie di declaracion separa. Pero a pesar di esey, mayoria di imprenta a cuminsa uza e sistema aki.

E idea di capitulo y versiculo por parce algo simpel. Pero danki na e sistema aki ta comosifuera cu cada versiculo tin su mes adres den Bijbel. Ta berdad cu capitulo y versiculo no ta inspira pa Dios, y tin biaha a dividi e textonan di Bijbel na luganan straño. Mescos cu nos ta marca un expresion of un frase cu nos kier corda den un documento of buki, asina tambe e sistema di capitulo y versiculo ta hacie mas facil pa haya un texto y pa marca of comparti cu otro hende e versiculonan cu tin un nificacion special pa nos.

Aunke e division di capitulo y versiculo ta facil pa uza, semper nos mester corda e importancia di compronde e mensahe completo cu Dios a duna. Crea e custumber di lesa e contexto en bes di djis algun versiculo. Esaki lo yuda bo bira mas y mas conoci cu “e scrituranan santo cu por haci bo sabi pa salbacion.”—2 Timoteo 3:15.