Bijbel ta bisa: “Tur don cu ta bon y tur regalo perfecto ta bin di ariba; pues, nan ta baha for di e Tata di e luznan celestial.” (Santiago 1:17) Claro, e texto ey ta referi na e generosidad di nos Tata celestial, Jehova Dios. Pero di tur e regalonan cu Dios a duna hende, tin un regalo cu ta esun di mas mihor cu tur. Kico e ta? E famoso palabranan di Hesus na Juan 3:16 ta bisa nos: “Dios a stima mundo asina tanto cu el a duna su Yiu unigenito, pa tur cu pone fe den dje no bay perdi, ma haya bida eterno.”

Dios a duna nos su Yiu unigenito, y esey ta e mihor regalo cu nos por haya como cu e regalo ey ta libra nos for di pica, biehes y morto. (Salmo 51:5; Juan 8:34) Ni maske cuanto esfuerso nos haci, no tin nada cu nos por haci pa libra nos mes di e cosnan ey. Pero como cu Dios ta stima nos, el a duna nos loke nos mester pa nos por ser libra. Ora Jehova Dios a duna nos su Yiu unigenito, Hesucristo, como e rescate, El a duna hende cu ta obedec’e e speransa pa biba pa semper. Pero kico e rescate ta? Dicon e ta necesario? Y con nos por beneficia di dje?

Un rescate ta un prijs cu ta ser paga pa cumpra algo bek of pa libra un hende. Bijbel ta splica cu Dios a crea nos prome mayornan, Adam cu Eva, perfecto, y nan tabatin e speransa di biba pa semper den un paradijs riba Tera hunto cu e descendientenan cu nan lo a haya. (Genesis 1:26-28) Lamentablemente, nan a perde tur esey ora nan a desobedece Dios y a bira pecador. Kico tabata e resultado? Bijbel ta contesta: “Pa medio di un hende pica a drenta mundo, y morto pa medio di pica, y asina morto a pasa pa tur hende pasobra nan tur a peca.” (Romanonan 5:12) Pues, en bes di e hende ey, esta, Adam, duna su descendientenan un bida perfecto, el a pasa pica pa nan y como consecuencia nan tur ta muri.

Ta asina cu den caso di un rescate, e prijs cu mester ser paga mester tin mesun balor cu loke a bay perdi. Ora Adam a dicidi di desobedece Dios, el a peca y e bida perfecto di Adam a bay perdi. Segun Bijbel, esey ta loke a pone su descendientenan bira esclavo di pica y morto. Pa nan por ser libra di esey, un otro hende perfecto, esta, Hesus, mester a duna su bida como sacrificio pa libra nan. (Romanonan 5:19; Efesionan 1:7) Ta solamente pasobra Dios a demostra amor y a paga e rescate, hende por tin e speransa di gosa di loke Adam cu Eva a perde, esta, bida pa semper den Paradijs riba Tera.—Revelacion 21:3-5.

En bista di loke e rescate lo logra, no tin duda cu e regalo cu Dios a duna nos, cu ta haci bida eterno posibel, ta e mihor regalo cu nos por haya. Pa nos por compronde dicon e ta e “regalo perfecto”, ban wak den ki manera excepcional e ta cuadra cu e factornan, menciona den e articulo anterior, cu por yuda nos duna un bon regalo.

E regalo ta satisface nos deseo. Como hende, di naturaleza nos tin un deseo fuerte pa biba pa semper. (Eclesiastes 3:11) Aunke riba nos mes nos no por satisface e deseo ey, e rescate si ta haci posibel pa nos biba pa semper. Bijbel ta bisa: “E salario cu pica ta paga ta morto, ma e regalo cu Dios ta duna ta bida eterno pa medio di Cristo Hesus, nos Señor.”—Romanonan 6:23.

E regalo ta satisface nos necesidad. Ningun hende no por a paga e rescate. Bijbel ta splica: “E redencion di su alma ta costoso; e lo no por paga p’e nunca.” (Salmo 49:8) Pesey, nos tabatin mester di yudansa desesperadamente pa Dios  libra nos for di e gara di pica y morto. “Pa medio di e liberacion cu ta basa riba e rescate cu Cristo Hesus a paga”, Dios a duna nos loke nos tabatin mester.—Romanonan 3:23, 24.

Dios a duna nos e regalo na e momento apropia. Bijbel ta bisa nos: “Cristo a muri pa nos mientras cu nos tabata pecador ainda.” (Romanonan 5:8) E echo cu Dios a paga e rescate pa nos ora “cu nos tabata pecador ainda” ta mustra cuanto Dios ta stima nos aunke cu nos ta imperfecto. Y aunke nos mester sufri e consecuencianan di pica, e rescate ta duna nos un bunita speransa pa futuro.

Dios a duna nos e regalo cu un motibo noble y generoso. Kico a motiva Dios pa ofrece su yiu como un rescate? Bijbel ta bisa nos: “Pa medio di esaki Dios a revela e amor cu e tin pa nos: Dios a manda su Yiu unigenito na mundo pa nos por haya bida pa medio di dje. E amor ey ta nifica esaki: no ta nos a stima Dios, sino ta e a stima nos.”—1 Juan 4:9, 10.

Con abo por demostra cu bo ta aprecia e mihor regalo cu ta existi? Corda cu segun Hesus su palabranan na Juan 3:16, ta solamente hende cu “pone fe den dje” lo ser salba. Segun Bijbel, fe ta “e confianza firme cu hende tin cu loke nan ta spera ariba lo keda realisa.” (Hebreonan 11:1) Pa nos por tin e confianza firme aki, nos mester tin conocemento exacto. Pa e motibo aki, nos ta anima bo pa tuma tempo y siña tocante Jehova Dios, kende a duna e “regalo perfecto”, y pa siña kico bo mester haci pa bo por gosa di bida eterno cu e sacrificio di rescate di Hesus a haci posibel pa bo.

Bo por siña mas tocante e topico aki ora bo analisa informacion basa riba Bijbel cu ta disponibel online riba www.dan124.com. Testigonan di Jehova gustosamente lo yuda bo cu esey. Nos ta sigur cu segun cu bo ta siña tocante e beneficionan di e regalo aki, lo bo sinti bo motiva pa bisa: “Mi ta gradici Dios cu lo e haci esaki pa medio di Hesucristo, nos Señor!”—Romanonan 7:25.