Tur Cristian Berdadero Ta Evangelisado

“Canta na [Yehova, NW], bendiciona Su nomber; proclama e bon nobo di Su salbacion dia tras dia.”—SALMO 96:2.

1. Ki bon nobo hende mester tende, y con Testigonan di Yehova ta un bon ehempel den plama e noticia aki?

DEN un mundo caminda desaster ta tuma luga tur dia, sin duda ta un consuelo pa sa cu Bijbel ta mustra cu guera, crimen, hamber y opresion pronto lo caba. (Salmo 46:9; 72:3, 7, 8, 12, 16) Esaki ta un bon nobo cu tur hende mester tende, no ta berdad? Testigonan di Yehova ta pensa asina. Nan ta conoci tur caminda como esnan cu ta predica “bon nobo di felicidad.” (Isaias 52:7) En realidad, hopi Testigo a ser persigui door cu nan ta determina pa conta otro hende e bon nobo. Pero nan tin e bienestar di hende na pecho. Y ki un prueba di celo y perseverancia e Testigonan a duna!

2. Cua ta un motibo cu Testigonan di Yehova ta celoso?

² E celo di Testigonan di Yehova awe ta similar na esun di e Cristiannan di prome siglo. Loke e corant Catolico Romano L’Osservatore Romano a bisa di nan ta na su luga: “Despues cu e prome Cristiannan a caba di batisa, mesora nan a sinti cu nan tawatin e deber di plama e Evangelio. Esclabonan tawata duna otro hende e mensahe di Evangelio door di papia cu nan.” Dicon Testigonan di Yehova tin e mesun celo cu e Cristiannan di prome? Na prome luga, pasobra e bon nobo cu nan ta anuncia ta di Yehova Dios mes. Tin un miho motibo pa ta celoso? Nan predicacion ta un reaccion riba e palabranan di e salmista: “Canta na [Yehova, NW], bendiciona Su nomber; proclama e bon nobo di Su salbacion dia tras dia.”—Salmo 96:2.

3. (a) Cua ta e di dos motibo cu Testigonan di Yehova ta celoso? (b) Kico e “salbacion” cu ta bin di Dios ta encera?

³ E salmista ta haci nos corda riba e di dos motibo pakico Testigonan di Yehova ta celoso. Nan ta duna un mensahe di salbacion. Tin hende ta traha riba tereno di salu, social, economico of riba otro tereno pa yuda nan prohimo mehora nan bida, y esei ta algo digno di elogio. Pero loke hende por haci pa un otro hende ta masha poco na comparacion cu e “salbacion” cu ta bini di Dios. Mediante Hesucristo, Yehova lo salba hende manso for di pica, malesa y morto. Esnan cu beneficia di e salbacion aki lo biba pa semper! (Juan 3:16, 36; Revelacion 21:3, 4) Awe, salbacion ta parti di e “echonan maravioso” cu Cristiannan ta papia di dje ora nan reacciona riba e palabranan: “Conta di [Dios] Su gloria meimei di e nacionnan, Su echonan maravioso meimei di tur e pueblonan. Pasobra [Yehova, NW] ta grandi, y digno di ser alaba na gran manera; tambe E mester wordo temi mas cu tur dios.”—Salmo 96:3, 4.

Ehempel di e Maestro

4-6. (a) Cua ta e di tres motibo cu Testigonan di Yehova ta celoso? (b) Con Hesus a demostra celo pa e obra di predica e bon nobo?

⁴ Testigonan di Yehova ta celoso pa un di tres motibo. Nan ta sigui e ehempel di Hesucristo. (1 Pedro 2:21) E homber perfecto ei a acepta di henter su curason e tarea “pa hiba bon nobo na esnan aflihi.” (Isaias 61:1; Lucas 4:17-21) Pues El a bira un evangelisado, un  hende cu ta duna bon noticia na otronan. El a pasa door di henter Galilea cu Hudea pa “proclama e evangelio di reino.” (Mateo 4:23) Y pa motibo cu E tawata sa cu hopi hende lo reacciona riba e bon nobo ei, El a bisa su disipelnan: “Cosecha ta masha grandi, ma trahado ta poco. Pesei, pidi e Señor di cosecha pa manda trahado na Su cosecha.”—Mateo 9:37, 38.

⁵ Na harmonia cu loke Hesus a pidi den su oracion, El a entrena otronan pa bira evangelisado. Cu tempo, El a manda su apostelnan pa bai riba nan mes y a bisa nan: “Segun cu boso ta bai, predica, bisando: ‘E reino di shelo ta cerca.’” Lo tawata mas util si nan a traha programanan pa alivia e problemanan social di e tempo ei? Of nan mester a bai den politica pa bringa e corupcion cu tawata reina den e tempo ei? No. En bes di esei, Hesus a establece e norma pa tur Cristian evangelisado ora el a bisa su siguidonan: “Segun cu boso ta bai, predica.”—Mateo 10:5-7.

⁶ Despues, Hesus a manda un otro grupo di disipel pa anuncia: “E reino di Dios a yega cerca.” Ora nan a bolbe bek pa informa Hesus loke nan a logra durante nan gira di evangelisa, Hesus a keda sumamente contento. El a resa: “Mi ta alaba Bo, o Tata, Señor di shelo y tera, cu Bo a sconde e cosnan aki pa sabinan y inteligentenan y a revela nan na mucha chikito.” (Lucas 10:1, 8, 9, 21) Hesus su disipelnan cu prome tawata piscado, cunukero, etcetera, tawata manera mucha chikito compara cu e lidernan religioso bon educa di e nacion. Pero e disipelnan a ser entrena pa anuncia e miho noticia cu a existi.

7. Despues cu Hesus a subi na shelo, na ken su siguidonan a predica e bon nobo prome?

⁷ Despues cu Hesus a subi na shelo, su siguidonan a sigui plama e bon nobo di salbacion. (Echonan 2:21, 38-40) Na ken nan a predica prome? Nan a bai na e nacionnan cu no a conoce Dios? No, nan prome teritorio tawata Israel, un pueblo cu tawata conoce Yehova pa mas cu 1.500 aña caba. Nan tawatin derecho di predica den un pais caminda hende tawata adora Yehova caba? Si. Hesus a bisa nan: “Boso lo ta Mi testigonan na Jerusalem y na henter Hudea y Samaria, y te na e parti mas aleha di mundo.” (Echonan 1:8) Israel  tawatin cu tende di e bon nobo mescos cu tur otro nacion.

8. Di ki manera Testigonan di Yehova awe ta imita e siguidonan di Hesus di prome siglo?

⁸ Di un manera similar Testigonan di Yehova awe ta predica rond mundo. Nan ta copera cu e angel cu Juan a mira. E angel aki “tawatin un evangelio eterno pa predica na esnan cu ta biba riba tera, y na tur nacion y tribu y lenga y pueblo.” (Revelacion 14:6) Na aña 2001, nan tawata activo den 235 pais y teritorio, inclusivo algun pais cu ta ser considera pais Cristian. Testigonan di Yehova ta haci malo di predica den luganan caminda Cristiandad ya tin su iglesianan estableci? Tin hende ta bisa cu si, y asta ta pensa cu e forma di evangelisa ei ta “hortamento di carne.” Pero Testigonan di Yehova ta corda loke Hesus a sinti pa e Hudiunan humilde di su dia. Maske nan tawatin un sacerdocio caba, Hesus no a duda pa conta nan e bon nobo. El “a sinti compasion pa nan, pasobra nan tawata cansa y plama, manera carne sin wardado.” (Mateo 9:36) Ora Testigonan di Yehova haya hende humilde cu no conoce Yehova y su Reino, nan lo mester keda sin duna e personanan aki e bon nobo pasobra algun religion ta para riba cu ta nan tin autoridad riba e hendenan ei? Siguiendo e ehempel di Hesus su apostelnan, nos ta contesta cu no. Sin excepcion, mester predica e bon nobo “na tur nacion.”—Marco 13:10.

Tur Cristian di Prome A Evangelisa

9. Den prome siglo, ken den e congregacion Cristian a haci e obra di predica?

⁹ Ken a haci e obra di predica den prome siglo? Echo ta mustra cu tur Cristian tawata evangelisado. Autor W. S. Williams ta remarca: “Tin evidencia general cu tur Cristian den e iglesia di prome . . . tawata predica e evangelio.” Relaciona cu loke a sosode riba Pentecoste di aña 33 Era Comun, Bijbel ta bisa: “Nan tur [homber y mohe] a wordo yena cu spiritu santo y a cuminsa papia den otro lenganan, manera e spiritu tawata duna nan pa papia.” Entre e evangelisadonan tawatin homber y mohe, hende di edad y mucha, esclabo y liber. (Echonan 1:14; 2:1, 4, 17, 18; Joël 2:28, 29; Galationan 3:28) Ora persecucion a obliga un gran cantidad di Cristian hui for di Jerusalem, “esnan anto cu a wordo plama a bai tur caminda, predicando e palabra.” (Echonan 8:4) Tur “esnan anto cu a wordo plama” a evangelisa, no djis un par di hende cu nan a scohe.

10. Cua tawata e dos metanan cu e predicacion di e bon nobo a logra prome cu destruccion di e sistema Hudiu?

¹⁰ Esaki tawata e caso atrabes di tur e prome añanan ei. Hesus a profetisa: “E evangelio aki di e reino lo wordo predica den henter mundo como un testimonio na tur nacion, y e ora ei e fin lo yega.” (Mateo 24:14) Den prome siglo, e palabranan ei a cumpli ora e Cristiannan a predica e bon nobo tur caminda prome cu e ehersito Romano a destrui e sistema religioso y politico di e Hudiunan. (Colosencenan 1:23) Tambe, tur Hesus su siguidonan a  obedece su mandamento: “Bai y haci tur e nacionnan disipel di Mi, y batisa nan den nomber di e Tata y di e Yiu y di e spirito santo, y siña nan pa cumpli cu tur loke Mi a ordena boso.” (Mateo 28:19, 20) E Cristiannan di prome no a trata na combence hende manso pa kere den Hesus y despues laga nan pa nan cuenta, manera algun predicado moderno ta haci. En bes di esei, nan a siña nan pa bira disipel di Hesus, a organisa nan den congregacionnan, y a entrena nan pa nan na nan turno por a predica e bon nobo y haci disipel. (Echonan 14:21-23) Awe Testigonan di Yehova ta sigui e ehempel ei.

11. Ken awe ta anuncia e miho bon nobo na humanidad?

¹¹ Varios Testigo di Yehova a bira misionero den exterior, siguiendo e ehempel di Pablo, Barnabas y otronan cu a biba den prome siglo. Nan trabou tawata realmente beneficioso ya cu nan no a mete den politica ni den otro cosnan cu lo a distrae nan for di e encargo di predica e bon nobo. Nan a djis obedece e mandato di Hesus: “Segun cu boso ta bai, predica.” Pero mayoria Testigo di Yehova no ta misionero den estranheria. Hopi di nan ta traha pa gana nan pan, y otronan ta bai scol ainda. Algun di nan tin yiu pa cria. Ma tur Testigo ta papia cu otro hende di e bon nobo cu nan a siña. Grandi y chikito, homber y mohe, cu goso ta haci loke Bijbel ta anima nan pa haci: “Predica e palabra; sea prepara na tempo y for di tempo.” (2 Timoteo 4:2) Mescos cu esnan di prome siglo cu a haci e trabou aki, Testigonan ta sigui “siña hende y predica Hesus como e Cristo” sin stop. (Echonan 5:42) Nan ta anuncia e miho bon nobo na humanidad.

Comberti Hende of Evangelisa?

12. Kico ta proselitismo, y con hende ta considera esaki?

¹² Den e idioma Griego tin e palabra pro·sely·tos, cu ta nifica un “hende comberti.” For di e palabra Griego aki a bini e palabra “proselitismo”, cu basicamente ta nifica e “proseso di comberti hende.” Awendia, tin hende ta bisa cu no ta bon pa comberti hende. Un documento cu Conseho Mundial di Iglesia a publica asta ta papia di “e pica di comberti hende.” Dicon? E revista Catholic World Report ta declara: “Pa motibo di e kehonan constante cu ta bini for di Iglesia Ortodox, e palabra ‘proselitismo’ a bin carga e idea di obliga hende cambia.”

13. Cua ta algun ehempel di proselitismo perhudicial?

¹³ Pero comberti hende ta algo malo? Si, esei por ta e caso. Hesus a bisa cu e forma cu escriba y Farizeo a comberti hende a perhudica esnan cu nan a comberti. (Mateo 23:15) En berdad no ta bon pa “obliga hende cambia.” Segun historiado Josefo, por ehempel ora e Macabeo Juan Hircano a domina e pueblo Idumeo, el “a permiti nan keda den nan pais basta cu nan a circunsida nan mes y tawata dispuesto pa tene nan na lei Hudiu.” Si e Idumeonan kier a biba bou di e gobierno Hudiu, nan lo tawatin cu haci loke e religion Hudiu a manda. Historiadonan ta conta cu den siglo 8 Era Comun, Karel e Grandi a conkista e Sagonnan pagano di nort Europa y a forsa nan  comberti di un manera cruel. * Pero e Sagonnan of e Idumeonan a comberti di un manera sinsero? Por ehempel, con fiel e rei Idumeo Herodes (kende a purba mata e criatura Hesus) tawata na e Lei di Moises inspira pa Dios?—Mateo 2:1-18.

14. Con algun misionero di Cristiandad ta presiona hende pa comberti?

¹⁴ Awendia, hende ta ser obliga pa comberti? Den un sentido, tin hende ta ser obliga. Segun un informe, algun misionero di Cristiandad ta ofrece beca pa bai studia den exterior na studiantenan cu lo por bin comberti. Of nan ta pone un refugiado cu ta morto di hamber sinta scucha un discurso pa e haya cuminda. Segun un declaracion cu nan a saca durante un congreso di Obisponan Ortodox na aña 1992, “sa comberti hende tambe door di tenta nan cu cos material y door di varios forma di violencia.”

15. Testigonan di Yehova ta comberti hende den e sentido moderno di e palabra? Splica.

¹⁵ Ta robes pa forsa hende cambia nan religion. Testigonan di Yehova sigur no ta haci esei. * Kier men, nan no ta comberti hende den e sentido moderno di e palabra. En bes di esei, mescos cu e Cristiannan di prome siglo, nan ta predica e bon nobo na tur hende. Tur hende cu boluntariamente ta reacciona positivo, ta ser invita pa gana mas conocemento door di un studio di Bijbel. E personanan interesa ei ta siña pone fe den Dios y den su propositonan. Un fe basa firmemente riba conocemento exacto di Bijbel. Como resultado, pa nan haya salbacion nan ta inboca e nomber di Dios, cu ta Yehova. (Romanonan 10:13, 14, 17) Ta keda na cada ken si e ta acepta e bon nobo. Ningun hende ta obliga nan. Pasobra si forsa nan comberti, esei lo no bal nada. Pa Dios acepta nos adoracion, e mester sali di curason.—Deuteronomio 6:4, 5; 10:12.

Evangelisacion den Tempo Moderno

16. Den tempo moderno cuanto e trabou di evangelisa di e Testigonan di Yehova a aumenta?

¹⁶ Durande tempo moderno, Testigonan di Yehova a predica e bon nobo di e Reino como un cumplimento mayor di Mateo 24:14. E revista Toren di Vigilancia * cu nan ta uza den nan trabou di evangelisa, ta bon conoci. Na aña 1879, ora a publica e prome edicion di E Toren di Vigilancia na Ingles, e revista tawatin un circulacion di 6.000 ehemplar. Na aña 2001, despues di mas cu 122 aña, e circulacion a alcansa 23.042.000 ehemplar den 141 idioma. Hunto cu e aumento ei tawatin un crecemento den e actividad di evangelisa di Testigonan di Yehova. Compara e algun mil ora cu nan a pasa pa aña den e trabou di evangelisa den siglo 19 cu e 1.169.082.225 oranan cu nan  a dedica na e trabou di predica na aña 2001. Considera e averahe di 4.921.702 studio di Bijbel gratis cu nan a dirigi cada luna. Esta un cantidad enorme di trabou excelente nan a realisa! Y ta 6.117.666 publicador activo di Reino a haci e trabou aki.

17. (a) Ki tipo di dios falso hende ta adora awe? (b) Sin importa nan idioma, nacionalidad of posicion social, kico tur hende tin cu haya sa?

¹⁷ E salmista a bisa: “Tur e diosnan di e pueblonan ta idolo [no bal nada, NW], ma ta SEÑOR a traha e shelonan.” (Salmo 96:5) Den e mundo djawe completamente aleha di Dios, hende ta adora cosnan manera nacionalismo, emblemanan nacional, hende famoso, cos material y asta rikesa. (Mateo 6:24; Efesionan 5:5; Colosencenan 3:5) Mohandas K. Gandhi a yega di bisa: “Mi opinion firme ta cu . . . Europa ta Cristian djis pa nomber. Loke nan ta adora ta Mammon [rikesa].” Echo ta cu tur caminda hende mester haya sa e bon nobo. Tur hende, sin importa nan idioma, nacionalidad of posicion social, tin cu conoce Yehova y haya sa kico ta su proposito. Nos ta desea pa tur hende reacciona riba e palabranan di e salmista: “Atribui na Yehova gloria y fortalesa. Atribui na Yehova e gloria cu ta pertenece na su nomber”! (Salmo 96:7, 8; NW) Testigonan di Yehova ta yuda otro hende siña tocante Yehova pa nan por atribui e debido gloria na djE. Esnan cu ta reacciona di un manera faborabel ta beneficia masha hopi mes. Ki beneficio nan ta gosa di dje? Esei nos lo trata den e siguiente articulo.

[Nota]

Bo Por Splica?

• Dicon Testigonan di Yehova ta evangelisado celoso?

• Pakico Testigonan di Yehova ta predica asta caminda Cristiandad tin iglesianan estableci?

• Dicon Testigonan di Yehova no ta comberti hende den e sentido moderno di e palabra?

• Cuanto e trabou di evangelisa di e Testigonan di Yehova a aumenta den tempo moderno?

[Preguntanan di Estudio]

[Plachi na pagina 9]

Hesus tawata un evangelisado celoso i a entrena otronan pa haci e mesun trabou

[Plachi na pagina 10]

Tur hende den e congregacion di prome siglo tawata evangelisa

[lachi na pagina 11]

Ta robes pa forsa hende cambia nan religion