Bo Ta Confia den un Dios Cu Ta Real?

Museo Mericano di Historia Natural a organisa un expedicion pa bai studia un tera den region di Polo Norte cu e explorado Robert E. Peary supuestamente a mira un shete aña prome, na 1906.

FOR di Cabo Colgade den e parti extremo nortwest di Nort America, Peary a mira loke a parce di ta punta di sero blanco di un tera leu. El a yam’e Tera di Crocker, na honor di un di e personanan cu a dun’e respaldo financiero. Tawata un momento masha excitante pa e miembronan di e expedicion di Museo Mericano ora nan a haya un bistaso di un area nan dilanti yen di sero, vaye y punta di sero cubri cu sneu. Pero no a tarda hopi cu nan a realisa cu ta simplemente un ilusion, un espehismo di Polo Norte nan a mira. E efecto visual aki di atmosfer a gaña Peary, y pa ora nan a realisa esei ya nan a gasta tempo, energia y recurso pa explora algo cu no tawata real.

Awe, hopi hende ta duna debocion y tempo na diosnan cu nan ta kere ta real. Den tempo di e apostelnan di Hesus, hende a adora diosnan manera Hermes (na Latin, Mercurio) y Zeus (na Latin, Jupiter). (Echonan 14:11, 12) Awe, hende di religion Sinto, Hindu y di otro religion ta adora miyones di dios. Si, manera Bijbel ta bisa, “tin hopi dios y hopi shon.” (1 Corintionan 8:5, 6) Tur e diosnan aki di berdad por ta existi?

Diosnan “Cu No Por Salba”

Por ehempel, considera e uzo di imagen of simbolo den adoracion. Pa hende cu ta confia den nan of ta resa na nan, e idolonan aparentemente ta salbadonan cu poder sobrehumano y cu por recompensa hende of libra nan for di peliger. Pero di berdad nan por salba? E salmista a bisa den un cantica tocante obhetonan asina: “E idolonan di e nacionnan ta plata y oro, obra di mannan di hende. Nan tin boca, ma nan no ta papia; nan tin  wowo, ma nan no ta mira; nan tin horea, ma nan no ta tende; tampoco no tin rosea den nan boca.” En berdad nan ta dios “cu no por salba.”—Salmo 135:15-17; Isaias 45:20.

Hende cu ta traha idolo por kere cu loke nan traha tin bida y poder. Y esnan cu ta adora idolo ta confia den nan. Profeta Isaias a bisa: “Nan ta his’e [e idolo] pone riba scouder y ta cargˈe; nan ta pon’e na su luga y einan e ta keda para.” Anto el a agrega: “E no ta kita for di su luga. Maske un hende sclama na dje, e no por contesta; e no por libr’e for di su angustia.” (Isaias 46:7) Berdad ta cu un idolo ta keda un obheto sin bida, maske con ferviente e creencia di esnan cu ta confia den dje ta. Tal imagennan graba of estatuanan basha ta “diosnan sin balor.”—Habacuc 2:18, NW.

Tambe ta comun awe pa hende venera of adora artistanan di farandula, personahenan di deporte, sistemanan politico y cierto lidernan religioso, y mira esakinan como nan idolo. Ademas, pa hopi hende ta placa ta nan dios. Den tur e casonan aki, e idolonan ei ta haya un balor cu en realidad nan no tin. Ta imposibel pa e idolonan ei percura tur loke esnan cu ta kere den nan ta spera. Por ehempel, rikesa por parce di ta e solucion pa hopi problema, pero e poder di rikesa ta engañoso. (Marco 4:19) Un investigado a puntra: “Con nos por splica cu algo cu asina tanto hende ta anhela, algo cu nan ta kere ta un sorto di ‘cura lo todo’, una bes nan hay’e, ta produci efectonan cu ta varia for di decepcion te trauma?” Si, coremento tras di rikesa por pone un persona sacrifica cosnan cu di berdad ta balioso, cosnan manera bon salu, dushi bida di famia, amigonan pega of un relacion precioso cu e Creador. E persona ei su dios ta resulta di ta nada mas cu un ‘idolo sin balor’!—Jonas 2:8.

“Ningun Hende No Tawata Contesta”

Ta bobo pa bisa cu algo ta real, mientras cu e no ta. Adoradonan di e dios Baal den tempo di profeta Elias a siña esaki mediante un experencia amargo. Nan a kere firmemente cu Baal tawatin poder pa laga candela baha for di shelo y kima un sacrificio di bestia. De echo, nan “a inboca e nomber di Baal for di mainta te merdia, bisando: ‘O Baal, contesta nos.’” Baal tawatin horea cu por a tende y un boca cu por a papia? E relato ta sigui bisa: “Ma no tawatin ni un bos y ni un hende no a contesta.” Si, “ningun hende no tawata paga atencion.” (1 Reinan 18:26, 29) Baal no tawata real, ni bibo ni activo.

Ta masha esencial pa nos siña conoce y adora un Dios cu si ta real! Pero ken E ta? Y con nos lo beneficia si nos confia den djE?

[Plachinan na pagina 3]

Egingwah, compañero di Peary, ta inspecciona horizonte en busca di tera firme

Robert E. Peary

[Reconocemento]

Egingwah: For di e buki The North Pole: Its Discovery in 1909 Under the Auspices of the Peary Arctic Club, 1910; Robert E. Peary: NOAA

[Plachinan na pagina 4]

Hopi hende ta ser engaña door di loke e mundo aki ta adora como dios