Bo Ta Entre Esnan Cu Dios Ta Stima?

“Esun cu tin mi mandamentonan y ta warda nan, esei ta esun cu ta stima mi; y esun cu ta stima mi lo wordo stima door di mi Tata.” —JUAN 14:21.

1, 2. (a) Con Yehova a mustra su amor pa humanidad? (b) Kico Hesus a institui riba e anochi di 14 di nisan di aña 33 Era Comun?

YEHOVA ta stima su creacion humano. De echo, e ta stima mundo di humanidad “asina tanto, cu el a duna su Yiu unigenito, pa ken cu kere den dje no bai perdi, ma tin bida eterno.” (Juan 3:16) Segun cu e tempo ta acerca pa nos observa e Conmemoracion di e morto di Cristo, Cristiannan berdadero lo mester ta mas conciente cu nunca cu Yehova “a stima nos y a manda Su Yiu pa ta e propiciacion pa nos picanan.”—1 Juan 4:10.

² Riba e anochi di 14 di nisan di aña 33 Era Comun, Hesus y su 12 apostelnan a reuni den un sala djariba na Jerusalem pa nan celebra Pasco Hudiu, conmemorando asina e liberacion di e Israelitanan for di Egipto. (Mateo 26:17-20) Ora nan a caba di celebra e ocasion aki, Hesus a laga Hudas Iscariote bai, anto el a institui un cena conmemorativo cu despues a bira e Conmemoracion Cristian di e morto di Cristo. * Hesus a uza pan no-fermenta y biña cora como emblema—esta, como simbolo—di su curpa y su sanger, y a laga e 11 otro apostelnan participa den e cena di grupo aki. Den Mateo, Marco y Lucas, cu sa ser yama e Evangelionan Sinoptico (door cu nan ta presenta e relato for di un punto di bista similar), nos ta haya detaye di loke el a haci durante e ocasion ei. Apostel Pablo tambe a skirbi tocante dje, y a yam’e “e Cena di Señor.”—1 Corintionan 11:20; Mateo 26:26-28; Marco 14:22-25; Lucas 22:19, 20.

3. Den ki sentido importante e relato di apostel Juan tocante Hesus su ultimo oranan cu su disipelnan den e sala djariba ta diferente for di e otro relatonan?

³ Ta interesante cu apostel Juan no a menciona nada tocante e pasamento di pan cu biña. Kisas esaki ta debi na e echo cu pa tempo cu el a skirbi su relato di Evangelio (rond di aña 98 E.C.), e procedura tawata bon estableci caba entre e prome Cristiannan. (1 Corintionan 11:23-26) Sinembargo, bou di inspiracion, ta Juan so a duna nos informacion vital tocante loke Hesus a bisa y haci net prome y net despues cu El a institui e Conmemoracion di Su morto. E detayenan emocionante aki ta cubri no menos cu cinco capitulo di e Evangelio di Juan. Nan no ta laga ningun duda tocante ki tipo di hende Dios ta stima. Laga nos examina Juan capitulo 13 te cu 17.

Siña for di Hesus Su Ehempel di Amor

4. (a) Con Juan a enfatisa e tema mas prominente di Hesus su reunion cu su disipelnan ora el a institui e Conmemoracion? (b) Cua ta un motibo importante cu Yehova tin pa stima Hesus?

⁴ Den e capitulonan caminda Hesus ta duna su siguidonan e ultimo consehonan prome cu e bai, amor ta un tema principal. De echo, e palabra “amor”, den su varios formanan, ta aparece 31 bes den e capitulonan  aki. Ningun otro caminda Hesus su amor profundo pa su Tata y pa su disipelnan ta keda asina bisto. Tur e Evangelionan tocante Hesus su bida ta mustra cu e ta stima Yehova. Pero ta Juan so a skirbi cu Hesus a bisa spesificamente: “Mi ta stima e Tata.” (Juan 14:31) Hesus a bisa tambe cu Yehova ta stim’e, y el a splica pakico. El a bisa: “Mescos cu e Tata a stima mi, ami tambe a stima boso; keda den mi amor. Si boso warda mi mandamentonan, boso lo keda den mi amor; mescos cu mi a warda e mandamentonan di mi Tata, y ta keda den su amor.” (Juan 15:9, 10) Si, Yehova ta stima su Yiu door cu e ta obedece den tur cos. Esaki ta un hopi bon les pa tur siguido di Hesucristo!

5. Con Hesus a demostra su amor pa su disipelnan?

⁵ For di comienso di Juan su relato tocante Hesus su ultimo reunion cu su apostelnan, e amor profundo cu e tin pa su siguidonan ta ser enfatisa. Juan ta conta: “Awor prome cu e Fiesta di Pasco, Hesus, sabiendo cu su ora a yega cu e mester a laga e mundo aki y bai cerca e Tata, a mustra esnan di dje cu tawata den mundo cu el a stima nan te na fin.” (Juan 13:1) Riba e anochi memorabel ei el a duna nan un les inolvidabel di sirbi otro cu amor. El a laba nan pia. Esaki ta algo cu nan tur lo mester tawata dispuesto di haci pa Hesus of pa un di nan rumannan, pero nan a keda sin hacie. Hesus a haci e trabou humilde aki, y despues el a bisa su disipelnan: “Si ami anto, e Señor y Maestro, a laba boso pia, boso tambe mester laba pia di otro. Pasobra mi a duna boso un ehempel, pa boso tambe haci manera ami a haci cu boso.” (Juan 13:14, 15) Cristiannan berdadero mester ta dispuesto y contento di sirbi nan rumannan.—Mateo 20:26, 27; Juan 13:17.

Warda e Mandamento Nobo

6, 7. (a) Ki detaye importante Juan ta duna nos tocante institucion di e Conmemoracion? (b) Ki mandamento nobo Hesus a duna su disipelnan, y den ki sentido e tawata nobo?

⁶ Juan su relato tocante loke a tuma luga den e sala djariba durante e anochi di 14 di nisan ta e unico relato cu ta menciona spesificamente cu Hudas Iscariote a sali bai. (Juan 13:21-30) Ora nos compara e relatonan di Evangelio, nos ta comprende cu ta te despues cu e traido aki a bai, Hesus a institui e Conmemoracion di Su morto. Despues el a papia basta rato cu su fiel apostelnan y a duna nan algun ultimo conseho y instruccion prome cu e bai. Segun cu nos ta prepara nos mes pa asisti na e Conmemoracion, nos mester ta masha interesa den loke Hesus a bisa na e ocasion ei, y mas ainda door cu, sin duda, nos kier ta entre esnan cu Dios ta stima.

⁷ E prome instruccion cu Hesus a duna su disipelnan despues cu el a institui e Conmemoracion di su morto tawata algo nobo. El a declara: “Un mandamento nobo mi ta duna boso, pa boso stima otro, y mescos cu ami a stima boso, pa boso tambe stima otro. Na esaki tur hende lo sa cu boso ta mi disipel, si boso tin amor un pa otro.” (Juan 13:34, 35) Den ki sentido e mandamento aki tawata nobo? Un poco mas laat durante e anochi, Hesus a aclara e asunto door di bisa: “Esaki ta mi mandamento, cu boso stima otro mescos cu ami a stima boso. Ni un hende no tin amor mas grandi cu esaki, cu un hende ta duna su bida pa su amigonan.” (Juan 15:12, 13) E Lei di Moises a manda e Israelitanan ‘stima nan prohimo manera nan mes.’ (Levitico 19:18) Pero Hesus su mandamento a bai mas leu. Cristiannan mester a stima otro manera Cristo a stima nan, y ser dispuesto di sacrifica nan bida mes pa nan rumannan.

8. (a) Kico amor di sacrificio propio ta encera? (b) Con Testigonan di Yehova ta mustra amor di sacrificio propio awe?

 ⁸ E temporada di Conmemoracion ta un bon tempo pa nos examina nos mes individualmente y como congregacion, pa mira si di berdad nos tin e caracteristica aki cu ta identifica Cristiannan berdadero, esta, amor manera esun di Cristo. Por tin bes cu tal amor di sacrificio propio lo pone un Cristian risca su bida pa e no traiciona su rumannan. Esei ta loke a yega di sosode tambe. Pero mayoria bes, loke e ta encera ta cu nos ta dispuesto di sacrifica nos interesnan personal pa yuda y sirbi nos rumannan y otronan. Apostel Pablo a pone un excelente ehempel den esaki. (2 Corintionan 12:15; Filipencenan 2:17) Testigonan di Yehova ta conoci rond mundo pa e spirito di sacrificio propio cu nan ta mustra, yudando nan rumannan y otronan, y dedicando nan mes na comunica e berdad di Bijbel na nan prohimo. *—Galationan 6:10.

Relacionnan Cu Nos Mester Valora

9. Pa nos mantene nos relacion precioso cu Dios y cu su Yiu, kico nos ta keda contento di haci?

⁹ Nada por ta mas precioso pa nos cu ser stima door di Yehova y su Yiu Cristo Hesus. Pero pa nos tin e amor aki y sintie, nos tin cu haci algo. Riba su ultimo anochi cu su disipelnan, Hesus a bisa: “Esun cu tin mi mandamentonan y ta warda nan, esei ta esun cu ta stima mi; y esun cu ta stima mi lo wordo stima door di mi Tata, y ami lo stim’e y lo manifesta mi mes na dje.” (Juan 14:21) Ya cu nos ta valora nos relacion cu Dios y cu su Yiu, nos ta obedece nan mandamentonan cu goso. Entre otro, nos lo obedece e mandamento nobo di mustra amor di sacrificio propio. Tambe nos lo obedece e ordo cu Cristo a duna despues cu el a resusita, pa “predica pa e pueblo y pa duna testimonio”, y traha pa ‘haci disipel’ di tur esnan cu acepta e bon nobo.—Echonan 10:42; Mateo 28:19, 20.

10. Cu ken e unginan y e “otro carnenan” por tin un relacion precioso?

¹⁰ Mas laat durante e anochi, contestando un pregunta di e apostel fiel Hudas (Tadeo), Hesus a bisa: “Si un hende ta stima mi, e lo warda mi palabra; y mi Tata lo stim’e, y nos lo bin cerca dje y biba cerca dje.” (Juan 14:22, 23) For di prome cu nan bai shelo, Cristiannan ungi, yama pa bai reina cu Cristo den shelo, tin un relacion specialmente pega cu Yehova y su Yiu. (Juan 15:15; 16:27; 17:22; Hebreonan 3:1; 1 Juan 3:2, 24) Pero nan compañeronan, e “otro carnenan” cu tin speransa di biba pa semper riba tera, tambe tin un relacion precioso cu e solo “wardado” Hesucristo y cu nan Dios Yehova, basta nan mustra obediencia.—Juan 10:16; Salmo 15:1-5; 25:14.

“Boso No Ta di Mundo”

11. Ki spiertamento serio Hesus a duna su disipelnan?

¹¹ Durante e ultimo reunion aki cu su disipelnan  fiel prome cu su morto, Hesus a duna nan un spiertamento serio: Si un hende tin e amor di Dios, mundo lo odi’e. El a declara: “Si mundo odia boso, sa anto cu el a odia ami prome cu boso. Si boso tawata di mundo, mundo lo a stima loke ta di dje; ma pasobra boso no ta di mundo, ma ami a scohe boso for di den mundo, pesei mundo ta odia boso. Corda riba e palabra cu mi a bisa boso: ‘Un esclabo no ta mas cu su shon.’ Si nan a persigui mi, boso tambe nan lo persigui; si nan a warda mi palabra, nan lo warda di boso tambe.”—Juan 15:18-20.

12. (a) Pakico Hesus a spierta su disipelnan cu mundo lo odia nan? (b) Kico lo ta bon pa nos tur pensa ariba segun cu e Conmemoracion ta yega cerca?

¹² Hesus a duna e spiertamento aki, pa e 11 apostelnan aki y tur Cristian berdadero cu bini despues di nan no descurasha y entrega door cu mundo ta odia nan. El a bisa acerca: “E cosnan aki mi a papia cu boso, pa boso no trompica. Nan lo saca boso for di snoa, ma e ora ta bin cu ken cu mata boso lo kere cu e ta ofrece sirbishi na Dios. Y e cosnan aki nan lo haci, pasobra nan no a conoce e Tata, ni ami.” (Juan 16:1-3) Un diccionario di Bijbel ta splica cu un forma di e verbo traduci aki como “trompica” ta nifica “pone un hende cuminsa desconfia y bandona un persona cu lo e mester confia y obedece; haci un hende renuncia su fe.” Segun cu e tempo pa observa e Conmemoracion ta acerca, ta bon pa nos tur reflexiona riba bida di hende fiel di pasado y di presente, anto imita nan ehempel di firmesa bou di prueba. No laga oposicion ni persecucion pone bo bandona Yehova y Hesus. Keda determina di confia den nan y obedece nan.

13. Kico Hesus a resa pidi su Tata pa su siguidonan?

¹³ Den Hesus su oracion final, prome cu el a bai for di e sala djariba na Jerusalem, el a bisa su Tata: “Mi a duna nan bo palabra; y mundo a odia nan, pasobra nan no ta di mundo, mescos cu ami no ta di mundo. Mi no ta pidi bo pa saca nan for di mundo, ma pa bo warda nan di e malbado. Nan no ta di mundo, mescos cu ami no ta di mundo.” (Juan 17:14-16) Nos por tin sigur cu Yehova ta vigila esnan cu E ta stima, pa E duna nan forsa pa keda separa for di mundo.—Isaias 40:29-31.

Keda den Amor di e Tata y di e Yiu

14, 15. (a) Como kico Hesus a papia di su mes? Na contraste, ken tawata manera un ‘mata di wendruif degenera’? (b) Ken ta “e ramanan” di e “berdadero mata di wendruif”?

¹⁴ Durante e combersacion intimo cu Hesus tawatin cu su disipelnan fiel riba e anochi di 14 di nisan, el a papia di su mes como “e berdadero mata di wendruif” cu ta na contraste cu e ‘mata di wendruif degenera’, esta, Israel infiel. El a bisa: “Ami ta e berdadero mata di wendruif, y mi Tata ta e cunukero.” (Juan 15:1) Varios siglo prome, profeta Jeremias a registra e palabranan aki di Yehova na su pueblo rebelde: “Mi a planta bo manera un mata di wendruif scohi . . . Con anto bo por a cambia bo mes mi dilanti y bira spruitnan degenera di un  mata di wendruif shimaron?” (Jeremias 2:21) Y profeta Oseas a skirbi: “Israel ta un mata di wendruif cu ta degenerando. E ta keda produci fruta pa su mes. . . . Nan curason a bira hipocrita.”—Oseas 10:1, 2, NW.

¹⁵ Na luga di produci fruta di adoracion berdadero, Israel a cai den apostasia y a produci fruta pa su mes. Tres dia prome cu Hesus a reuni pa ultimo bes cu su disipelnan fiel, el a bisa e lidernan religioso Hudiu hipocrita: “Mi ta bisa boso, e reino di Dios lo wordo kita for di boso, y duna na un nacion cu si ta hacie produci fruta.” (Mateo 21:43) E nacion nobo ei ta “e Israel di Dios” cu ta consisti di 144.000 Cristian ungi, y ta ser describi como “e ramanan” di e “berdadero mata di wendruif”, Cristo Hesus.—Galationan 6:16; Juan 15:5; Revelacion 14:1, 3.

16. Kico Hesus a urgi e 11 apostelnan fiel pa nan haci, y kico nos por bisa tocante e resto fiel den e tempo di fin aki?

¹⁶ Hesus a bisa e 11 apostelnan cu tawata cu ne den e sala djariba: “Tur rama den mi cu no ta carga fruta e ta kita, y cada un cu ta carga fruta e ta haci limpi, pa e por carga mas fruta. Permanece den union cu mi, y ami den union cu boso. Mescos cu e rama no por carga fruta di su mes a menos cu e permanece den e mata, mescos boso no por tampoco, a menos cu boso keda den union cu mi.” (Juan 15:2, 4, NW) E historia moderno di Yehova su pueblo ta mustra cu e resto fiel di Cristian ungi a keda den union cu nan Cabes, Cristo Hesus. (Efesionan 5:23) Nan a permiti Dios purifica nan y snui nan. (Malakias 3:2, 3) For di aña 1919, nan a produci fruta di Reino na abundancia; prome nan a produci otro Cristiannan ungi, y for di 1935 nan a produci un “multitud grandi” di compañeronan cu ta bira cada bes mas grandi.—Revelacion 7:9; Isaias 60:4, 8-11.

17, 18. (a) Ki palabranan di Hesus ta yuda e unginan y e otro carnenan keda den Yehova su amor? (b) Con nos lo beneficia di asisti na e Conmemoracion?

¹⁷ E siguiente palabranan di Hesus ta relevante pa tur Cristian ungi y nan compañeronan: “Den esaki mi Tata ta wordo glorifica, cu boso ta carga hopi fruta y asina ta demostra di ta mi disipelnan. Mescos cu e Tata a stima mi, ami tambe a stima boso; keda den mi amor. Si boso warda mi mandamentonan, boso lo keda den mi amor; mescos cu mi a warda e mandamentonan di mi Tata, y ta keda den su amor.”—Juan 15:8-10.

¹⁸ Nos tur kier keda den Dios su amor, y pesei nos ta purba ser Cristiannan fructifero. Nos por logra esei door di probecha cada chens cu nos haya pa predica e “evangelio”, esta, e bon nobo di e reino. (Mateo 24:14) Ademas nos ta haci tur nos posibel pa manifesta e “fruta di e spirito” den nos bida personal. (Galationan 5:22, 23) Door di asisti na e Conmemoracion di e morto di Cristo, nos lo fortalece nos determinacion pa haci esaki, pasobra e lo haci nos corda e gran amor cu Dios y Cristo tin pa nos.—2 Corintionan 5:14, 15.

19. Di ki otro yudansa nos lo papia den e siguiente articulo?

¹⁹ Despues di institui e Conmemoracion, Hesus a priminti cu su Tata lo a manda un “ayudante, e spirito santo” pa su siguidonan fiel. (Juan 14:26, NW) Den e siguiente articulo nos lo examina con e spirito aki ta yuda e unginan y e otro carnenan keda den Yehova su amor.

[Nota]

Preguntanan di Repaso

• Ki les practico di sirbishi cu amor Hesus a duna su disipelnan?

• E temporada di Conmemoracion ta un tempo apropiado pa nos examina nos mes den ki sentido?

• Pakico nos no mester trompica door cu Hesus a adverti nos cu mundo lo odia y persigui nos?

• Ken ta “e berdadero mata di wendruif”? Ken ta su “ramanan”, y kico ta ser spera di nan?

[Preguntanan di Estudio]

[Plachi na pagina 15]

Hesus a duna su apostelnan un les inolvidabel di sirbi otro cu amor

[Plachinan na pagina 16, 17]

Cristo su disipelnan ta obedece su mandamento pa mustra amor di sacrificio propio