Con Importante Limpiesa Ta?

CADA ken por tin su mes idea di kico ta limpiesa. Por ehempel, ora un mama bisa su yiu chikito pa e laba su man y su cara, e yiu por pensa cu si e laga e awa di cranchi basha riba su dedenan y e muha su lip, esei mes ta suficiente. Su mama si sa cu no ta asina. E ta bai cu e mucha bek den baño y ta frega su man y su cara cu habon, maske e yiu grita protesta!

Claro cu no ta tur caminda na mundo e normanan di limpiesa ta mescos. Cada ken ta lanta cu su propio concepto tocante kico ta limpiesa. Antes, den hopi pais, scolnan limpi y na ordo tawata yuda e alumnonan desaroya bon custumber di limpiesa. Awendia tin tereno di scol cu tin asina tanto sushi y potoshi, cu nan parce luga di tira sushi mas bien cu luga pa hunga of haci ehercicio. Kico di e localnan mes? Darren, e ‘concierge’ di un scol secundario na Australia, a remarca: “Awor tin sushi den local di duna les mes tambe.” Tin alumno ta sinti cu ora bo bisa nan “piki e cos ei” of “limpi’e”, ta straf bo ta straf nan. E problema ta cu en berdad tin docente ta uza limpiesa como straf.

Di otro banda, tin bes cu mayornan mes no ta pone un bon ehempel, ni den bida diario ni den mundo di negoshi. Por ehempel, hende ta laga hopi luga publico y di negoshi tur sushi y descuida. Algun sector industrial ta susha medio ambiente. Pero no ta industria ni empresa ta causa sushedad; ta e hendenan cu tin nan tras. Maske probablemente ta golosidad ta e causa principal di e problema mundial di sushedad y tur su consecuencianan, mal custumber di limpiesa di hende tambe ta parti di e problema. Un exdirector general di e Mancomunidad Australiano a apoya e conclusion aki door di bisa: “Na fin di cuenta, tur cuestion di salu publico tin di aber cu e homber, e mohe y e mucha individual.”

Toch tin hende ta haya cu limpiesa ta un asunto personal cu otro hende no mester mete cu ne. Di berdad ta asina?

Casi bo no por exagera ora bo ta papia riba e importancia di limpiesa den loke ta toca nos cuminda. Esaki ta asina, sea cu bo cumpra e cuminda den tienda, com’e den restaurant, of come na cas di un amigo. Nos ta spera un nivel halto di limpiesa di parti di esnan cu sea ta traha cu e cuminda cu nos ta come, of ta sirbie. Si nan of  nos mes tin man sushi, esei por causa hopi enfermedad. Kico nos por bisa di hospital, e luga cu mas nos lo spera pa ta limpi? The New England Journal of Medicine a informa cu e echo cu tin docter y verpleegster cu no ta laba man, por yuda splica dicon pashentnan di hospital ta haya infeccionnan cu ta costa dies mil miyon dollar anual pa cura. Nos tin derecho di spera pa ningun hende no pone nos salu na peliger cu su mal custumbernan di limpiesa.

Otro asunto masha serio ta ora hende contamina nos suministro di awa, sea cu nan hacie accidentalmente of pa malo. Y con safe ta pa cana pia abou riba santo cant’i lama, si bo ta mira hangua benta abou cu drogadicto y otronan a bai laga? Un pregunta kisas asta mas importante ainda pa nos personalmente ta: Nos ta tene nos propio cas limpi?

Suellen Hoy, den su buki Chasing Dirt (Core cu Sushi), ta puntra: “Nos ta mesun limpi cu antes?” Su contesta ta: “Probablemente no.” E ta menciona cambio den balornan di sociedad como e motibo principal. Door cu hende ta pasa cada bes menos tempo na cas, nan ta djis paga un hende numa pa e limpia cas pa nan. Debi na esei, tene nan ambiente di biba limpi no ta un prioridad mas pa hende. Un cierto homber a bisa: “Ami no ta tene mi luga di baña limpi—mi ta tene mi curpa limpi. Asina, si mi cas ta sushi, por lo menos ami mes si ta limpi.”

Pero limpiesa ta encera hopi mas cu djis nos aparencia. E ta un principio general pa un bida salu. Tambe e ta un manera di pensa y un actitud cu tin di aber cu nos moralidad y nos forma di adora. Laga nos mira dicon ta asina.