Siña un Les for di Nicodemo

“SI UN persona kier sigui mi, lag’e nenga su mes y tuma su staca di tormento dia tras dia y sigui mi continuamente.” (Lucas 9:23, NW) Piscadonan humilde y un cobrado di belasting desprecia a acepta e invitacion aki sin pensa dos bes. Nan a laga tur cos atras pa nan sigui Hesus.—Mateo 4:18-22; Lucas 5:27, 28.

Awe, ainda e yamada di Hesus ta zonando, y hopi hende a reacciona na dje. Pero algun hende cu gusta studia Bijbel cu Testigonan di Yehova ta duda pa ‘nenga nan mes y tuma nan staca di tormento.’ Nan no ta cla pa acepta e responsabilidad y privilegio di ta disipel di Hesus.

Pakico tin hende ta duda pa acepta e invitacion di Hesus y dedica nan mes na Yehova Dios? Ta berdad cu si un hende no a lanta for di chikito cu e idea Hudiu-Cristian di un solo Dios, lo  por tuma tempo pa e logra comprende completamente cu ta existi un Creador todopoderoso y personal. Pero asta despues cu algun di nan keda combenci cu Dios ta real, nan ta bula pipa pa sigui e pasonan di Hesus. Kisas nan tin miedo di loke nan famia lo pensa di nan si nan bira Testigo di Yehova. Otronan ta perde for di bista e urgencia di e tempo cu nos ta biba aden, y nan ta cuminsa core tras di fama y rikesa. (Mateo 24:36-42; 1 Timoteo 6:9, 10) Loke sea ta e caso, hende cu ta keda pospone nan decision pa bira siguido di Hesus por siña un les for di e relato di Nicodemo, un gobernante Hudiu rico den tempo di Hesus.

Bendiciona cu Oportunidadnan Maravioso

Apenas seis luna despues cu Hesus a cuminsa cu su ministerio riba tera, Nicodemo a reconoce cu Hesus ‘a bin di Dios como un maestro.’ Impresiona cu e milagernan cu Hesus a caba di haci na Jerusalem durante Pasco Hudiu di aña 30 Era Comun, Nicodemo a bai cerca Hesus, probechando ora ta scur, pa e confesa su fe den Hesus y siña mas tocante e maestro aki. E ora ei Hesus a bisa Nicodemo un berdad profundo; cu hende mester “nace di nobo” pa nan por drenta e Reino di Dios. Ta na e mesun ocasion aki Hesus a bisa e palabranan: “Dios a stima mundo asina tanto, cu el a duna su Yiu unigenito, pa ken cu kere den dje no bai perdi, ma tin bida eterno.”—Juan 3:1-16.

Un chens maravioso a habri pa Nicodemo! Lo e por a bira un compañero intimo di  Hesus. Lo e por tawata testigo personal di varios aspecto di e bida di Hesus riba tera. Como un gobernante Hudiu y un maestro den Israel, Nicodemo tawatin un bon conocemento di e Palabra di Dios. Ademas e tawatin hopi perspicacia, pasobra el a identifica Hesus como un maestro manda door di Dios. Nicodemo tawatin interes den cos spiritual, y e tawatin un grado di humildad poco comun. Lo mester tawata masha dificil pa un miembro di e corte di mas halto di e Hudiunan reconoce cu un humilde yiu di carpinte tawata un homber manda door di Dios! Tur e cualidadnan ei ta hopi importante pa un hende por bira disipel di Hesus.

Ta parce cu Nicodemo su interes den e homber di Nazaret aki no a fria. Dos aña y mei despues, na e Fiesta di Cabaña, Nicodemo a asisti na un reunion di Sanedrin. E tempo ei ainda Nicodemo tawata “un di nan.” E sacerdotenan principal y e Farizeonan a manda algun oficial bai aresta Hesus. E oficialnan a bolbe y a relata: “Nunca un hende no a papia manera e homber aki ta papia.” E Farizeonan a cuminsa rebaha nan, bisando: “Boso tambe a wordo gaña? Ni un di e gobernantenan of e Farizeonan no a kere den dje, no ta asina? Ma e multitud aki, cu no conoce e Lei, ta maldiciona.” Nicodemo no por a keda keto mas. El a tuma palabra: “Acaso nos lei ta husga hende sin tend’e prome y sin sa kico e ta haci?” E otro Farizeonan a atac’e cu critica: “Abo tambe ta di Galilea? Busca y mira cu for di Galilea no ta lanta ningun profeta.”—Juan 7:1, 10, 32, 45-52.

Un seis luna despues, riba dia di Pasco Hudiu di aña 33 Era Comun, Nicodemo a mira nan baha e curpa di Hesus for di e staca di tormento. Hunto cu un otro miembro di Sanedrin, Hose di Arimatea, el a prepara e curpa di Hesus pa entiero. Pa e proposito ei Nicodemo a trece “un mescla di mirra y aloe” cu ta pisa como 100 liber Romano; mas o menos 32 kilo. Esaki a representa un gasto hopi halto. Ademas, e mester tawatin curashi pa identifica su mes cu “e gañado ei”, manera  e otro Farizeonan tawata yama Hesus. Nan dos a prepara e curpa di Hesus lihe, y a pon’e den un graf conmemorativo nobo cu tawatin ei cerca. Pero ni e ora ei ainda Nicodemo no a identifica su mes como disipel di Hesus!—Juan 19:38-42; Mateo 27:63; Marco 15:43.

Pakico E No A Actua

Juan su relato no ta splica dicon Nicodemo a bula pipa pa “tuma su staca di tormento” y sigui Hesus. Sinembargo, e ta duna algun indicacion cu lo por splica con bini e Farizeo aki tawata indeciso.

Di prome, Juan a mustra cu e gobernante Hudiu “a bin cerca Hesus den anochi.” (Juan 3:2) Un erudito di Bijbel ta bisa cu kisas “Nicodemo a bini den anochi pa evita e multitudnan cu lo a interumpi su entrevista cu Hesus, y no pa miedo.” Pero Juan a papia di Nicodemo como esun cu “na principio a bin cerca [Hesus] den anochi” den e mesun contexto cu el a referi na Hose di Arimatea como “un disipel di Hesus, ma na secreto pa miedo di e Hudiunan.” (Juan 19:38, 39) Pues, casi sigur Nicodemo a bishita Hesus probechando cu tawata scur “pa miedo di e Hudiunan”, mescos cu otro hende di su tempo no tawata kier tin nada di aber cu Hesus, pa miedo.—Juan 7:13.

Abo ta tarda pa tuma e decision di bira disipel di Hesus pa miedo di loke bo famia y conocinan lo bisa? Un proverbio ta bisa cu “temor pa hende ta pone un trampa.” Con bo por enfrenta e miedo ei? E proverbio ta sigui bisa: “Ma esun cu confia den SEÑOR lo ta halsa.” (Proverbionan 29:25) Pa bo haya confiansa den Yehova, bo mester mira pa bo mes cu Dios ta sostene bo ora bo ta den tempo dificil. Resa na Yehova y pidie duna bo curashi pa tuma asta decisionnan di menos importancia relaciona cu bo adoracion. Pocopoco bo fe y confiansa den Yehova lo crece te ora bo por tuma decisionnan importante na harmonia cu Dios su boluntad.

Kisas Nicodemo su posicion den comunidad y su prestigio como miembro di e clase na mando tambe a strob’e di dal e paso importante di nenga su mes. E tempo ei, ainda su puesto como miembro di Sanedrin lo mester a nifica hopi p’e. Abo ta duda pa tuma accion y bira siguido di Cristo door cu lo bo por perde un puesto di prestigio den comunidad, of pasobra kisas lo bo tin cu sacrifica cierto oportunidadnan pa bai dilanti? Ningun di e cosnan aki ta comparabel cu e honor di por sirbi e Haltisimo di universo, cu ta dispuesto di cumpli cu loke bo pidie na harmonia cu su boluntad.—Salmo 10:17; 83:18; 145:18.

Otro posibel motibo pakico Nicodemo a tarda pa tuma un decision por tawatin di aber cu su rikesa. Ya cu e tawata un Farizeo, kisas e otro Farizeonan “stimador di placa” a influenci’e. (Lucas 16:14) E echo cu e por a afford un rol caro di mirra y aloe ta mustra cu e tawatin moda. Tin hende awe cu ta keda pospone nan decision pa tuma e responsabilidadnan di un Cristian, door cu nan ta mucho precupa cu nan propiedadnan material. Pero Hesus a spierta su siguidonan: “No precupa boso mes pa boso bida, kico boso lo come of kico boso lo bebe; tampoco pa boso curpa, kico boso lo bisti. . . . Boso Tata celestial sa cu boso tin mester di tur e cosnan aki. Ma busca prome e reino di Dios y Su husticia, y tur e cosnan aki lo wordo añadi na boso.”—Mateo 6:25-33.

E Tawatin Hopi di Perde

Ta interesante cu e relato tocante Nicodemo, cu ta aparece den e Evangelio di Juan so, no ta bisa si finalmente el a bira siguido di Hesus of no. Segun un cierto tradicion, Nicodemo a scohe pa e banda di Hesus,  el a batisa, e Hudiunan a cuminsa persiguie, nan a kit’e for di su puesto, y finalmente nan a deport’e for di Jerusalem. Sea cu ta asina of no, un cos ta sigur: E tawatin hopi di perde door di tarda pa tuma un decision tempo cu Hesus tawata riba tera.

Si Nicodemo a cuminsa sigui Hesus for di tempo cu el a topa Señor pa di prome bes, lo e por a bira un disipel intimo di Hesus. Ademas di e echo cu e tawata conciente di su necesidad spiritual, Nicodemo su conocemento, perspicacia y humildad lo por a yud’e bira un disipel sobresaliente. Si, lo e por a scucha e discursonan impresionante di e Gran Maestro. Lo e por a siña lesnan vital for di e comparacionnan di Hesus. Lo e por a mira e milagernan asombroso cu Hesus a haci, y tende su palabranan di estimulo na momento cu el a despedi di su apostelnan. Pero el a perde tur esei.

Nicodemo a perde hopi door cu el a tarda pa tuma decision, entre otro e invitacion caloroso aki di Hesus: “Bin cerca mi tur cu ta cansa y carga, y lo mi duna boso sosiego. Tuma mi yugo riba boso, y siña di mi, pasobra mi ta manso y humilde di curason; y boso lo haya sosiego pa boso alma. Pasobra mi yugo ta suave y mi carga ta lihe.” (Mateo 11:28-30) Nicodemo a perde e chens di haya e sosiego of refrescamento aki literalmente for di Hesus mes!

Kico di Abo?

For di 1914, Hesucristo ta presente den shelo como Rei di e Reino celestial di Dios. Den su profecia tocante loke lo tuma luga durante su presencia, el a bisa: “E evangelio aki di e reino lo wordo predica den henter mundo como un testimonio na tur nacion, y e ora ei e fin lo yega.” (Mateo 24:14) Prome cu e fin yega, e predicacion mundial ei mester ser haci. Hesucristo ta contento di laga hende imperfecto participa. Abo tambe por tuma parti den e obra aki.

Nicodemo a reconoce cu Hesus a bini di Dios. (Juan 3:2) Door di studia Bijbel, kisas abo tambe a yega na un conclusion asina. Por ta bo a haci cambio den bo moda di biba pa e cuadra cu normanan di Bijbel. Kisas asta bo ta asisti na reunionnan di Testigonan di Yehova pa bo haya mas conocemento di Bijbel. Bo esfuersonan ta elogiabel. Sinembargo, Nicodemo tawatin cu bai mas aya cu djis reconoce cu ta Dios a manda Hesus. E tawatin cu “nenga su mes y tuma su staca di tormento dia tras dia y sigui [Hesus] continuamente.”—Lucas 9:23, NW.

Tuma na pecho loke apostel Pablo ta bisa nos. El a skirbi: “Trahando hunto cu ne nos tambe ta roga boso pa no ricibi e gracia di Dios en vano—pasobra e ta bisa: ‘Den e tempo aceptabel mi a scucha bo, y riba e dia di salbacion mi a yuda bo;’ mira, awor ta ‘e tempo aceptabel’, mira, awor ta ‘e dia di salbacion.’”—2 Corintionan 6:1, 2.

Awor t’e momento pa cultiva e fe cu lo motiva bo pa tuma accion. Cu esei como meta, medita riba e cosnan cu bo ta studia den Bijbel. Resa na Yehova y pidie yuda bo demostra tal fe. Segun cu bo mira con E ta saca su man pa yuda bo, bo aprecio y amor pa E lo motiva bo pa desea di ‘nenga bo mes y tuma bo staca di tormento dia tras dia y sigui Hesucristo continuamente.’ Lo bo tuma accion mesora?

[Plachi na pagina 9]

Na cuminsamento Nicodemo a sali na defensa di Hesus cu curashi

[Plachi na pagina 9]

Apesar di oposicion, Nicodemo a yuda prepara e curpa di Hesus pa su entiero

[Plachi na pagina 10]

Studio personal y oracion por fortalece bo pa tuma accion

[Plachi na pagina 10]

Lo bo acepta e privilegio di traha bou di e liderato di Hesucristo?