Iglesia y Estado na Bizancio

E FUNDADO di Cristianismo a mustra bon cla e contraste skerpi cu mester existi entre su siguidonan y e mundo di humanidad aleha for di Dios. Hesus a bisa su siguidonan: “Si boso tawata di mundo, mundo lo a stima loke ta di dje; ma pasobra boso no ta di mundo, ma ami a scohe boso for di den mundo, pesei mundo ta odia boso.” (Juan 15:19) Hesus a bisa Pilato, un representante di e poder politico di su tempo: “Mi reino no ta di e mundo aki.”—Juan 18:36.

Pa por cumpli cu nan responsabilidad di predica “te na e parti mas aleha di mundo”, Cristiannan mester a evita di laga cosnan di mundo desvia nan. (Echonan 1:8) Mescos cu Hesus, e prome Cristiannan no mester a mete  cu politica. (Juan 6:15) Tawata notabel cu Cristiannan fiel no a busca pa ocupa cargonan publico of posicionnan den gobierno. Cu tempo esaki a bin cambia.

“Parti di Mundo”

Algun tempo despues di morto di e ultimo apostel, di nan mes, e lidernan religioso a cuminsa cambia nan punto di bista relaciona cu nan mes y cu mundo. Nan a cuminsa imagina nan un “reino” cu no solamente tawata na mundo sino tambe tawata parti di dje. Nos lo comprende esei miho ora nos mira con religion y politica a mescla den otro den e Imperio Bizantino—e Imperio Romano Oriental, cu su capital na Bizancio (awor Istanbul).

Den un sociedad unda religion tradicionalmente a hunga un papel importante, Iglesia Bizantino, cu su centro na Bizancio, tawatin bastante poder. Historiado di iglesia Panayotis Christou a remarca un biaha: “E bizantinonan a mira nan imperio terenal como un refleho di e Reino di Dios.” Pero no ta tur ora e emperador a comparti e punto di bista ei. Como resultado, tawatin biaha cu e relacion entre Iglesia y Estado a bira turbulento. The Oxford Dictionary of Byzantium ta bisa: “Cada un di e obisponan di Constantinopla [of Bizancio] a comporta nan na un manera diferente. Tawatin bes cu cobardia a pone nan keda subordina na un gobernante poderoso . . . , otro biaha nan a colabora na un manera fructifero cu emperador . . . , y tawatin bes cu nan tawatin e curashi di bai contra e boluntad di e emperador.”

E patriarca di Constantinopla, cabes di e Iglesia Oriental, a bira un figura cu  hopi influencia. Ta e tawata corona e emperador, y pesei el a verwacht pa e emperador ta un fiel defensor di creencianan Ortodox. Tambe e patriarca tawata un homber masha rico, siendo cu e tawata controla e inmenso recursonan di e iglesia. Su poder a sinta den e autoridad cu e tawatin riba e numeroso moniknan y tambe e influencia cu e tawatin riba e laiconan.

Hopi bes e patriarca tawata den un posicion cu e por a pasa riba cabes di e emperador. E por a menas’e cu expulsion—imponiendo su boluntad den nomber di Dios—of recori na otro metodonan cu cua e por a elimina un emperador.

Cu e reduccion gradual di gobernacionnan civil pafo di e capital, hopi bes ta e obisponan a bira e hombernan mas poderoso den nan stadnan, mes poderoso cu e gobernadonan di provincia, kende nan a yuda selecta. Obisponan tawatin hopi interes den casonan di corte y asuntonan seglar ki ora cu iglesia tawata envolvi—y asta ora iglesia no tawata  envolvi. Un factor cu a contribui na esei ta cu tawatin miles y miles di pastor y monik, y tur tawata cai bou di nan obisponan local.

Politica y Simonia

Manera a ser menciona anteriormente, e funcion pastoral a bira estrechamente liga cu politica. Ademas, e gran cantidad di pastor y nan actividadnan religioso a costa sumanan grandi di placa. Mayoria miembro di clero di alto rango a biba den luho. Segun cu e poder y rikesa di iglesia tawata crece, pobresa apostolico y bida di santidad a disparce. Algun pastor y obispo a paga pa nan ser nombra. Simonia, esta, cumpramento di fabor, tawata na ordo di dia te den e rangonan mas halto di e herarkia. Miembronan di clero apoya pa gruponan di presion di e clase rico a lucha pa haya cargonan eclesiastico dilanti e emperador.

Soborno tambe tawata un medio pa influencia lidernan religioso di rango halto. Ora e Emperatris Zoe (rond di 978-1050 E.C.) a laga mata su esposo Romano III y kier a casa cu su amante y futuro Emperador Miguel IV, pura pura el a manda yama e Patriarca Alehio pa bini na e palacio. Ei e patriarca a haya sa di e morto di Romano y e sirbishi cu lo e mester a efectua pa e ceremonia di casamento. E echo cu iglesia tawata celebrando Bierna santo e anochi ei a hinca Alehio den un situacion asta mas dificil. Apesar di esei, toch el a acepta e regalonan generoso di e emperatris y a cumpli cu su peticion.

Subordina na e Emperador

A yega di sosode durante e historia di e Imperio Bizantino cu e emperador tawata haci uzo di e derecho cu de facto e tawatin pa haci e nombramento, ora mester a scohe e patriarca di Constantinopla. Durante e periodonan ei, ningun hende por a bira patriarca contra e boluntad di e emperador ni keda den e puesto ei pa hopi tempo.

Emperador Andronico II (1260-1332) a haya ta bon di cambia patriarca nuebe biaha. Den mayoria di e casonan ei, e obhetivo tawata pa pone e candidato mas complaciente posibel riba e trono di patriarca. Segun e buki The Byzantines, un patriarca a asta priminti e emperador por escrito “di haci tur loke e exigi, maske con ilegal e cos ta, y di no haci nada cu e [emperador] no ta gusta.” Dos bes emperadornan a purba impone nan boluntad riba iglesia door di consagra un prins di e famia real como patriarca. Emperador Romano I a nombra su yiu Teofilacto, un mucha di apenas 16 aña, na e puesto di patriarca.

Si un patriarca no a cai na agrado di un emperador, esaki lo por a obliga e patriarca di renuncia of ordena un sinodo pa bah’e. E buki Byzantium ta remarca: “Den transcurso di e historia di Bizantino, autoridad halto y asta e influencia directo di e Emperador [a bin] ta hunga un papel mas y mas dominante den e scohemento di obispo.”

Tambe e emperador tawata presidi na consilionan eclesiastico, anto cu e patriarca banda di dje. E tawata guia e debatenan, formula articulonan di fe, y discuti cu tanto obispo como disidente (herehe). Pa disidentenan e tawatin e ultimo palabra: morto na staca. Tambe e emperador tawata confirma y implementa e doctrinanan adopta den e consilionan. El a acusa esnan cu a opon’e di a comete un crimen contra  un autoridad y tambe di a bira enemigo di e iglesia y di Dios. Un patriarca di siglo seis a bisa cu “den Iglesia no mag haci nada cu ta bai contra e boluntad y mandatonan di e Emperador.” E obisponan cu tawatin coneccion cu e palacio tawata hombernan suave, complaciente, facil pa influencia cu muestranan discreto di fabor of negociacion sabi. Pa regla, nan no sa protesta mes.

Por ehempel, ora Patriarca Ignacio (rond di 799-878 E.C.) a nenga di duna comunion na e Minister Principal Bardas, e minister a venga. Bardas a incrimina Ignacio den un supuesto complot y acto di traicion. E patriarca a ser aresta y deporta. Na su luga, e minister a percura pa nan a scohe Focio, un laico cu den seis dia a subi e trapi di herarkia eclesiastico pa finalmente alcansa e rango di patriarca. Focio tawatin e cualificacion pa e puesto ei? Nan a describie como un homber “sumamente ambicioso, cu un arogancia extraordinario y cu habilidadnan politico incomparabel.”

Doctrina na Servicio di Politica

Debatenan riba loke ta ortodox y herehia (baimento contra doctrina di religion) hopi bes a sirbi como capa pa oposicion politico. Y ta factornan politico a influencia hopi emperador, y no un deseo pa introduci doctrina nobo. Por lo general, e emperador a reserva e derecho pa emiti doctrina y pa exigi iglesia pa cumpli cu su boluntad.

Por ehempel, Emperador Heraclio (575-641 E.C.) a lucha duro pa sana e division relaciona cu e naturalesa di Cristo cu a menasa di desintegra su imperio debilita. Pa purba resolve e asunto, el a introduci un doctrina nobo cu yama monotelitismo. * Anto, pa garantisa cu e provincianan sur lo keda leal na su imperio, Heraclio a scohe un patriarca nobo di Alehandria, Ciro di Fasis, kende a respalda e doctrina cu e emperador a boga p’e. E emperador a haci Ciro no solamente patriarca sino tambe prefecto di Egipto, dunand’e autoridad riba gobernantenan local. Cu e presion di un tiki persecucion, Ciro a logra gana e bendicion di mayoria hende di Iglesia Egipcio.

Un Cosecha Amargo

Con e desaroyonan y sucesonan aki por refleha e palabra y spirito di Hesus su oracion caminda el a bisa cu su siguidonan lo “no ta di mundo”?—Juan 17:14-16.

E supuesto lidernan Cristian den e tempo Bizantino y mas despues a paga caro pa nan envolvimento den asuntonan politico y militar di mundo. Kico e analisis breve aki di historia ta bisa bo? E lidernan di Iglesia Bizantino a gana e aprobacion di Dios y di Hesucristo?—Santiago 4:4.

E lidernan religioso ambicioso ei hunto cu nan amantenan politico sigur no a contribui na e causa di berdadero Cristianismo. E union bergonsoso aki di religion y politica a duna e religion puro cu Hesus a instrui un mal nomber. Laga nos saca un les for di historia y ‘no bira parti di mundo.’

[Nota]

[Cuadro/Plachi na pagina 10]

““MANERA UN DIOS CU TA CRUSA SHELO MAHESTUOSAMENTE”

E sucesonan rondo di Patriarca Miguel Cerulario (rond di 1000-1059) ta tipifica e papel cu e cabesante di iglesia por a hunga den asuntonan di estado, y e ambicionnan cu esei a encera. Despues cu Cerulario a alcansa e posicion di patriarca, e kier a logra mas. El a ser describi como un homber arogante, presuntuoso y inflexibel, y “su comportacion ta manera di un dios cu ta crusa shelo mahestuosamente.”

Motiva pa e deseo di promove su mes, Cerulario a proboca e kiebra cu papa di Roma na 1054, y a obliga e emperador pa acepta e division. Encanta cu e victoria aki, Cerulario a haci areglo pa pone Miguel VI riba e trono y a yud’e consolida su poder. Un aña despues, Cerulario a forsa e emperador ei pa baha, y a instala Isaac Comneno (rond di 1005-1061) riba e trono.

E conflicto entre patriarca y imperio a escala. Cerulario—sigur di sosten publico—a menasa, exigi y recori na violencia. Un historiado contemporaneo a remarca: “El a pronostica e caida di e Emperador den idioma comun y vulgar, bisando: ‘Idiot, ta mi mes a pone bo caminda bo ta; pero lo mi caba bo.’” Sinembargo, Isaac Comneno a laga arest’e, encarsel’e y deport’e pa Imbros.

Ehempelnan asina ta mustra cuanto problema e patriarca di Constantinopla por a causa y cuanto curashi e por tawatin pa resisti e emperador. Hopi bes e emperador tawatin cu trata cu hende asina, esta, politiconan habil y capas pa desafia tanto e emperador como e ehersito.

[Mapa/Plachi na pagina 9]

(Pa texto den formato completo, wak publicacion)

Maximo Alcanse di e Imperio Bizantino

Ravena

Roma

MACEDONIA

Constantinopla

Lama Preto

Nicea

Efeso

Antiokia

Jerusalem

Alehandria

Lama Mediteraneo

[Reconocemento]

Mapa: Mountain High Maps® Copyright © 1997 Digital Wisdom, Inc.

[Plachinan na pagina 10, 11]

Comneno

Romano III (banda robes)

Miguel IV

Emperatris Zoe

Romano I (banda robes)

[Reconocemento]

Comneno, Romano III, y Miguel IV: Pa cortesia di Classical Numismatic Group, Inc.; Emperatris Zoe: Hagia Sofia; Romano I: Potret pa cortesia di Harlan J. Berk, Ltd.

[Plachi na pagina 12]

Focio

[Plachi na pagina 12]

Heraclio cu su yiu

[Reconocemento]

Heraclio cu su yiu: Potret pa cortesia di Harlan J. Berk, Ltd.; tur diseño, pagina 8-12: For di e buki L’Art Byzantin III Ravenne Et Pompose