Un Refugio Contra Biento

TE ARIBA den e seronan Alpino na Europa, ta crece un mata resistente cu nan ta yama rosa Alpino. Hopi bes e mata enano aki ta crece den grupo di matanan chikito pega cu otro, y esaki ta sirbi como un proteccion contra e bientonan fuerte di den sero. Biento duro tin chens di caba cu matanan Alpino door cu e ta baha nan temperatura, seca e aire y tera y saca nan completo cu nan raiz.

Hopi bes rosa Alpino ta logra scapa e destruccion cu biento ta causa door cu e ta crece den buraconan entre baranca. Maske e sitionan aki no tin hopi tera, e buraconan aki ta sirbi como un proteccion contra biento y ta permiti e mata conserva awa. Aunke e rosa Alpino aki ta casi scondi pa bista di hende durante gran parti di aña, durante zomer nan ta decora e seronan cu a sirbi como nan refugio cu flornan cora bibo.

Profeta Isaias a splica cu Dios lo nombra “prinsnan”, y cu cada un lo sirbi como “refugio contra biento.” (Isaias 32:1, 2) Bou di direccion di e Rei Cristo Hesus, e prinsnan spiritual of superintendentenan aki, lo ta manera barancanan stabil, firme den tempo di angustia of afliccion. Nan ta ofrece refugio confiabel ora esnan den necesidad haya nan confronta cu adversidad y ta yuda nan proteha nan reserva di awa spiritual cu ta bini for di e Palabra di Dios.

E bientonan di persecucion, desanimacion of malesa por asota un Cristian, y si e no haya proteccion su fe lo por marchita. Ancianonan Cristian por percura proteccion door di scucha atentamente na e problema di e ruman, dun’e conseho basa riba Bijbel y animacion of yudansa practico. E ancianonan, mescos cu nan Rei nombra, Cristo Hesus, kier yuda esnan cu a ser “plama.” (Mateo 9:36) Tambe nan ta desea di yuda otronan cu a ser maltrata door di bientonan di siñansa falso. (Efesionan 4:14) Tal yudansa na e ora oportuno por resulta di gran importancia.

“Mi a pasa door di un periodo traumatico den mi bida ora cu algun di mi amigonan pega a bandona e berdad y, na mesun tempo, mi tata a haya un derame celebral”, Miriam ta splica. “Den un intento pa vence mi depresion, mi a cuminsa sali cu un amigo di mundo. Djis despues, ora cu mi a cuminsa sinti cu mi no ta bal nada, mi a informa e ancianonan di congregacion cu mi a dicidi di bandona e berdad, pasobra mi tawata sigur cu Yehova no por tawata stima mi.

Na e momento crucial ei, un anciano compasivo a recorda mi di e añanan cu mi a sirbi como pionero regular. El a bisa mi cu semper el a admira mi fieldad, y bondadosamente el a pidi mi pa laga e ancianonan yuda mi recobra mi confiansa den e amor di Yehova. Nan interes amoroso na e momento decisivo ei tawata manera ‘un refugio’ durante e furia di e tormenta spiritual rondo di mi. Denter di un luna mi a kibra mi relacion cu mi amigo, y desde e tempo ei mi a sigui cana den e caminda di e berdad.”

Ancianonan ta sinti un satisfaccion ora nan mira compañeronan Cristian progresa spiritualmente, pa motibo di e proteccion oportuno cu esakinan a ricibi. Y e ‘refugionan’ aki ta duna nos un muestra adelanta di e yudansa spiritual na abundancia cu nos lo disfruta di dje durante e Reinado di Mil aña di Cristo.