‘Nos Amor A Bira Mas Profundo’

DIABIERNA, 31 di maart 2000, tawatin un erupcion na e volcan Usu na Hokaido, Hapon, despues cu e tawatin 23 aña inactivo. Miles di habitante a haya nan obliga di hui for di e zona di peliger. Hopi di nan a perde cas y trabou, pero afortunadamente no tawatin morto. Entre e hendenan cu mester a hui tawatin 46 Testigo di Yehova. Pero nan no a ser laga pa nan cuenta.

Cu yudansa di un minister Cristian biahero cu ta sirbi den e area, e mesun dia cu e erupcion a tuma luga a haci areglo pa duna yudansa. No a dura masha cu suministro pa alivio a cuminsa bini for di congregacionnan den bicindario. Bou di supervision di e sucursal di Hapon, mesora a forma un comite di alivio, y donacionnan abundante di Testigonan di Yehova pa e fondo di alivio a bini for di tur parti di Hapon. Pa apoya actividadnan spiritual, a manda sirbidonan di tempo completo di Testigonan di Yehova na e congregacion mas afecta, y bes tras bes e superintendente di sircuito a bishita e area pa duna e rumannan sosten emocional y spiritual.

E Testigonan den e area afecta a sigui tene nan reunionnan Cristian durante e periodo dificultoso ei door di uza casnan priva den un area mas safe. Despues cu e ordo pa evacua e area di e Salon di Reino e ser revoca, e rumannan a bolbe y a topa un edificio para di banda, kibra y destrui. No mucho leu for di e Salon di Reino, e crater cu a caba di forma tawata saca huma diki ainda. E Testigonan a puntra nan mes: ‘Ta sabi pa sigui tene reunion na e sitio aki? Por drecha e Salon di Reino?’

Decision a cai pa construi un Salon di Reino nobo na un luga mas safe den bicindario. E Comite di Construccion Regional a duna e yudansa necesario. Pa construi e edificio aki, nan a haci uzo di e donacionnan cu Testigonan di henter e pais a manda. Nan a busca y haya tereno lihe, y danki na e yudansa di cientos di boluntario, den un periodo di tempo cortico e Salon di Reino nobo tawata cla. Diadomingo, 23 di juli 2000 a tene e prome reunion den e Salon di Reino nobo aki. Tawatin 75 hende presente. Hopi di esnan cu a asisti a yora di alegria. Durante dedicacion di e Salon di Reino na october di e mesun aña ei, un anciano di e congregacion local a bisa: “E erupcion a causa problema y sufrimento. Pero e construccion aki a transforma nos miedo den goso. Nos amor pa Yehova y pa nos rumannan Cristian stima a bira mas profundo!”

[Reconocemento pa Potret na pagina 19]

Erupcion di volcan Usu: AP Photo/Koji Sasahara