Pregunta di Lector

Ta corecto pa bisa cu Yehova su misericordia ta modera su husticia?

Maske nos a yega di uza e expresion aki, ta miho evit’e, ya cu e ta parce di indica cu Yehova su misericordia ta suavisa of frena su husticia. Esei ta como si fuera su misericordia ta superior cu su cualidad mas severo cu ta husticia. Esaki no ta corecto.

E palabra Hebreo pa “husticia” por nifica “huicio” tambe. Husticia ta estrechamente liga cu rectitud. Pero, por lo general, husticia tin di aber cu asuntonan hudicial, mientras cu rectitud generalmente no. Husticia di Yehova por encera duna castigo mereci, pero tambe e por encera duna salbacion na hende cu ta merece esei. (Genesis 18:20-32; Isaias 56:1; Malakias 4:2) Pesei no mester mira e husticia di Yehova como un cualidad severo of cu mester ser suavisa.

E palabra Hebreo pa “misericordia” por duna idea di limita castigo of duna castigo cu moderacion. Tambe e por referi na mustra compasion cu echo, dunando alivio na e persona den necesidad.—Deuteronomio 10:18; Lucas 10:29-37.

Yehova ta un Dios di tanto husticia como misericordia. (Exodo 34:6, 7; Deuteronomio 32:4; Salmo 145:9) Tanto su husticia como su misericordia ta perfecto y nan ta traha na harmonia cu otro. (Salmo 116:5; Oseas 2:19) E dos cualidadnan aki ta balansa of complementa otro perfectamente. Pesei, si nos bisa cu Yehova su misericordia ta modera su husticia, nos lo tin cu bisa tambe cu su husticia ta modera su misericordia.

Isaias a profetisa: “SEÑOR ta anhela di ta misericordioso cu boso, y pesei E lo wordo halsa pa tene compasion cu boso. Pasobra SEÑOR ta un Dios di huicio [“husticia”, Beibel na papiamentu koriente].” (Isaias 30:18) Aki Isaias ta mustra cu ta Yehova su husticia ta motiva actonan di misericordia, y no cu su misericordia ta suavisa of frena su husticia. Yehova ta mustra misericordia pa motibo cu E ta husto y tambe pa motibo cu E ta amoroso.

Pero e escritor di Bijbel, Santiago, no a skirbi cu “misericordia ta triunfa riba huicio”? (Santiago 2:13b) Si, pero den e contexto Santiago no ta papiando di Yehova, sino di Cristiannan cu ta mustra misericordia na, por ehempel, hende aflihi y pober. (Santiago 1:27; 2:1-9) Ora Yehova ta husga hende misericordioso asina, e ta tene cuenta cu nan conducta y misericordiosamente e ta pordona nan a base di e sacrificio di su Yiu. Asina, nan conducta misericordioso ta triunfa riba cualkier huicio desfaborabel cu nan lo a merece.—Proverbionan 14:21; Mateo 5:7; 6:12; 7:2.

Pesei no ta corecto pa bisa cu Yehova su misericordia ta modera su huicio den e sentido cu misericordia mester suavisa su husticia. Yehova tin e dos cualidadnan aki den ekilibrio perfecto. Nan ta balansa otro mescos cu nan ta balansa—y ta ser balansa door di—e otro cualidadnan di Yehova, manera amor y sabiduria.