Ta Apropiado pa Cristiannan Balsama Nan Mortonan?

Ora e fiel patriarca Yacob a sinti cu e tawata cerca di muri, el a expresa su ultimo deseo: “Dera mi cerca mi ­tatanan den e cueba cu ta keda den e cunucu di Efron e Heteo, den e cueba cu ta keda den e cunucu di Macpela, cual ta keda dilanti di Mamre na tera di Canan.”​—Genesis 49:29-31.

PA Yosef por a cumpli cu e deseo di su tata, el a sigui un custumber cu a existi na Egipto e tempo ei. El a duna ordo na “su sirbidonan, e docternan, pa balsama su tata.” Di acuerdo cu e relato na Genesis capitulo 50, e docternan a tuma e 40 dianan acostumbra pa prepara e cadaver. Ta door cu a balsama e curpa di Yacob, e caravana di miembronan di famia y dignatarionan di Egipto por a hiba e restonan di Yacob na Hebron pa su entiero. Un biahe lento di 400 kilometer.​—Genesis 50:​1-14.

Ta posibel cu lo haya e curpa balsama di Yacob un dia? Asta bou di e sircunstancianan di mas faborabel, e chens ta masha chikito. Israel tawata un region di hopi awa, y esei ta pone cu e variedad di artefactonan arkeologico cu hende a descubri einan ta masha limita. (Exodo 3:8) Nan a haya masha hopi metal y piedra di antiguedad, pero mayoria di cosnan fragil manera paña, cuero y curpanan balsama no a wanta e humedad y e rigornan di tempo.

Pero kico precis e proceso di balsama ta encera? Dicon hende tawata hacie? E ta apropiado pa Cristiannan?

Unda e Custumber A Origina?

Balsama kiermen simplemente conserva un cadaver di hende of di bestia. Historiadonan en general ta kere cu e proceso di balsama a cuminsa na Egipto, pero cu Asirio-, Perso- y Skitanan di antiguedad tambe tawata practic’e. Kisas na principio hende su interes den e proceso di balsama a lanta ora nan a descubri curpanan cu a ser dera den santo di desierto y cu a keda conserva door di naturalesa. E manera ei di dera un cadaver a pone cu el a putri menos, ya cu e cadaver no a muha ni haya aire. E teoria di algun historiado ta cu e custumber di balsama a cuminsa ora hende a haya curpanan cu a keda conserva den natron (carbonato di sodio), un tipo di soda cu bo ta haya tur caminda na Egipto.

Ta balsama cadaver simplemente pa stroba e bacterianan di cuminsa traha cu ne y pon’e  putri. Eseinan sa ataca e curpa djis despues cu e muri. Si logra stop e proceso aki, e putrimento lo stop of por lo menos lo e bai masha slow mes. Tres cos ta necesario: conserva e cadaver den un estado natural, evita cu e ta putri y haci e curpa resistente contra atake di insecto.

E antiguo Egipcionan a balsama nan mortonan principalmente pa motibo religioso. Nan deseo di keda den contacto cu e mundo di hende bibo tawata basa riba nan creencia cu tin bida despues di morto. Nan tawata kere cu nan curpa lo ser uza pa eternidad y cu nan lo haya bida atrobe. Aunke tawata un custumber comun pa balsama morto, te awe no a haya ningun relato Egipcio cu ta mustra con nan tawata hacie. E miho registro cu tin ta esun di Herodoto, un historiado Griego di siglo 5 prome cu Era Comun. Sinembargo, informenan ta mustra cu hende no a haya e mesun resultado ora nan a sigui e instruccionnan cu Herodoto a skirbi.

E Ta Apropiado pa Cristiannan?

E hendenan cu a balsama Yacob no tawatin mesun creencia religioso cu ne. Probablemente e proceso di balsama morto cu hende a haci den Egipto a bai compaña cu oracion y rito. Sinembargo, ta dificil pa nos imagina cu Yosef a pidi e docternan pa sigui esakinan ora cu el a entrega nan e curpa di su tata. Tanto Yacob como Yosef tawata homber di fe. (Hebreonan 11:21, 22) Aunke no ta parce cu ta Yehova a manda pa conserva e cadaver di Yacob, e Scritura no ta menciona esaki cu desaprobacion. No a balsama e cadaver di Yacob como un ehempel pa e nacion di Israel ni pa e congregacion Cristian sigui. Eigenlijk, e Palabra di Dios no ta duna instruccion spesifico tocante e topico aki. Despues cu nan a balsama Yosef mes na Egipto, e Scritura no ta menciona e practica ei mas.—Genesis 50:26.

Den grafnan na Palestina, nan a haya cadavernan humano den un estado di descomposicion. Esaki ta indica cu e Hebreonan no tawatin custumber di balsama morto, a lo menos, no pa conserv’e pa un temporada largo. Lazaro por ehempel, no tawata balsama. Maske e tawata lora den paña, observadonan tawata precupa ora mester a kita e piedra cu tawata cera su graf. Door cu Lazaro a muri cuater dia prome, su ruman mohe a pensa cu sigur mal holo lo a sali ora habri e graf.​—⁠Huan 11:​38-44.

Nan a balsama Hesus? E relatonan di Evangelio no ta indica esei. E tempo ei, Hudiunan tawatin e custumber di prepara cadaver cu specerij y azeta perfuma prome cu nan der’e. Por ehempel, pa trata e curpa di Hesus, Nicodemo a trece un gran cantidad di specerij cu ta ser uza pa e proposito ei. (Huan 19:​38-42) Dicon asina hopi specerij? Amor y respet sinsero pa Hesus kisas a impuls’e pa mustra e generosidad ei. Nos no mester conclui cu nan a uza hopi specerij pa conserva e curpa.

Un Cristian mester ta contra e custumber di balsama morto? Desde un punto di bista realistico, e unico cos cu e proceso di balsama ta haci ta pospone loke ta inevitabel. Nos a bini di stof, y ora nos muri nos ta bolbe na stof. (Genesis 3:19) Pero cuanto tempo despues cu e persona muri lo der’e? Si tin miembronan di famia cu ta bini djaleu y nan kier mira e defunto, sin duda lo mester balsama e cadaver te na cierto grado.

 Pesei anto, for di e punto di bista di Bijbel no ta necesario pa precupa si localmente autoridadnan ta manda pa balsama e cadaver of si miembronan di famia kier pa esei tuma luga. E mortonan “no sa nada.” (Eclesiastes 9:5) Si nan ta den Dios su memoria, lo E lanta nan den su mundo nobo cu El a priminti.—Job 14:13-15; Echonan 24:15; 2 Pedro 3:13.

[Cuadro/Plachi na pagina 31]

BALSAMA MORTO—ANTES Y AWOR

Den Egipto di antiguedad, e manera cu nan a balsama un cadaver a depende di e posicion cu e famia tawatin den sociedad. Probablemente, un famia rico lo a scohe e siguiente procedura:

Cu un instrumento di metal nan ta saca e sesonan via di nanishi. Despues di esei ta trata e craneo cu cierto substancianan apropiado. E siguiente paso ta encera saca tur e organonan interno cu excepcion di e curason y e niernan. Pa yega na e stoma mester a corta e curpa, pero nan a considera esaki un pica. Pa soluciona e cuestion controversial aki, docternan Egipcio cu tawata balsama morto a asigna un persona cu nan a yama “cortado”, pa e habri e cadaver. Asina cu el a caba e tawata hui bai pasobra tawatin castigo di maldicion y piedramento pa e supuesto crimen aki.

Despues di saca tur cos for di den e bariga, nan ta lab’e bon. E historiado Herodoto a skirbi: “Nan ta yena e bashi cu mirra puro machica y casia [un tipo di cane], y tur sorto di otro specerij cu excepcion di olivano, y ta cos’e cera.”

Siguientemente, nan ta seca e cadaver door di hinc’e den natron pa 70 dia. Despues di esei nan tawata laba e cadaver y lor’e habilmente den paña di linen. Anto nan ta cubri e linen cu un hars of un tipo di substancia pegahoso cu a sirbi como lijm, y tawata pone e momia den un caha di palo bunita decora, cu tawatin forma di hende.

Awe por balsama un cadaver den un par di ora. Generalmente nan ta haci esaki door di basha un cierto cantidad di likido pa balsama den e bena y adernan y tambe den e bariga y pecho cu nan a haci bashi. Atrabes di añanan nan a desaroya y uza varios likido. Sinembargo, e likido cu mas nan ta uza, pa motibo di gasto y siguridad, ta formaldehido.

[Plachi]

E caha di morto di oro di Rei Tutankhamon