Empatia​—E Yabi pa Bondad y Compasion

TANTEN cu bo por alivia dolo di un otro persona, bida no ta sin sentido”, Helen Keller a skirbi. Keller sigur tawata sa kico ta dolo emocional. Ora e tawatin 19 luna, el a haya un malesa cu a lag’e completamente ciego y sordo. Pero un maestra compasivo a siña Helen lesa y skirbi Braille, y despues papia.

Keller su maestra, Ann Sullivan, tawata sa bon bon kico kiermen lucha cu un incapacidad fisico. E mes tawata casi ciego. Pero cu pasenshi Ann a inventa un manera pa comunica cu Helen door di “spel” e letternan den Helen su man. Motiva door di e empatia di su maestra, Helen a dicidi di dedica su propio bida na yuda hende ciego y sordo. Door cu e mester a haci hopi esfuerso pa vence su incapacidad, e por a sinti pa esnan cu tawata den mesun sircunstancia. E kier a yuda nan.

Probablemente bo a ripara cu den e mundo egoista aki ta facil pa ‘sera bo curason’ y ignora necesidad di otro hende. (1 Huan 3:17) Sinembargo, cristiannan a haya e mandamento pa stima nan prohimo y stima otro intensamente. (Mateo 22:39; 1 Pedro 4:⁠8) Toch, probablemente bo ta conciente di e realidad aki: Maske nos tin tur intencion di mustra amor na otro, hopi bes nos ta pasa por halto di oportunidadnan pa alivia dolo di otro hende. Podise esei ta sosode djis pasobra nos no ta conciente di nan necesidadnan. Empatia ta e yabi cu por habri e porta di nos bondad y compasion.

Kico Ta Empatia?

Empatia ta e habilidad pa comprende y biba cu e situacion, sintimento- y motivacionnan di un otro persona. Un otro definicion tambe ta e habilidad di pone bo mes den sapato di un otro persona. Pues pa mustra empatia, na prome luga, bo tin cu comprende e sircunstancianan di un otro persona y, na di dos luga, biba cu e sintimentonan cu e sircunstancianan ei ta lanta den e persona. Si, empatia ta encera cu nos curason ta sinti e dolo cu un otro persona ta sinti.

Aunke e palabra “empatia” no ta aparece den Bijbel, indirectamente e Scritura ta referi na e cualidad aki. Apostel Pedro a conseha cristiannan pa mustra ‘compasion pa otro, stima otro manera ruman, y sea misericordioso.’ (1 Pedro 3:8) E palabra Griego traduci como “compasion” ta nifica literalmente “sufri cu un otro persona.” Ta e clase di sintimento ei apostel Pablo a recomenda ora el a urgi compañeronan cristian pa “regosiha cu esnan cu ta regosiha, y yora cu esnan cu ta yora.” Pablo a agrega: “Sea di e mesun pensamento pa cu otro.” (Romanonan 12:​15, 16) Y bo no ta di acuerdo cu ta casi imposibel pa bo stima bo prohimo mescos cu bo mes, si bo no pone bo mes den su sapato?

Mayoria hende di mes ta mustra un poco empatia. Ken no ta keda conmovi ora nan mira imagennan penoso di muchanan cu ta muri di hamber of di refugiadonan angustia? Cua mama amoroso por ignora e yoramento di su yiu? Pero no ta tur bes bo por comprende mesora cu un persona ta sufri. Si nos mes nunca no a sufri di problemanan manera depresion, incapacidad fisico cu bo no por mira, y di bulimia of anorexia, ta masha dificil mes pa comprende e sintimentonan di un hende cu si ta sufri di nan! No obstante, e Scritura ta mustra cu nos por y mester cultiva empatia pa esnan cu no ta den mesun sircunstancia cu nos.

Ehempelnan Biblico di Empatia

Yehova ta nos ehempel principal di empatia. Aunke E ta perfecto, E no ta spera perfeccion di nos, “pasobra E sa di kico nos ta traha; E ta corda cu ta stof nos ta.” (Salmo 103:14; Romanonan 5:12) Ademas, door cu E ta conciente di nos limitacionnan, ‘E no ta permiti nos wordo tenta mas cu nos por soporta.’ (1 Corintionan 10:13) Mediante su sirbidonan y su spirito, E ta yuda nos haya solucion.—Yeremias 25:4, 5; Echonan 5:32.

Yehova mes tambe ta sufri ora su pueblo ta sufri. El a bisa e Hudiunan cu a regresa di Babilonia: ‘Esun cu mishi cu boso ta mishi cu mi pret’i wowo.’ (Zacarias 2:8) Door cu e escritor di Bijbel, David, tawata bon conciente di Dios su empatia, el a bis’e: “Pone mi lagrimanan den bo butishi; nan no ta den bo buki?” (Salmo 56:8) Ta un gran consuelo pa sa cu Yehova ta corda—como si fuera nan ta skirbi den un buki—e lagrimanan cu su fiel sirbidonan a drama den nan lucha pa mantene nan integridad!

Mescos cu su Tata celestial, Hesucristo tambe tawata masha compasivo cu hende. Ora el a cura un homber sordo, el a hal’e un banda. El a haci esaki probablemente pa evita cu su curacion milagroso ta lag’e sinti berguensa of shock e. (Marco 7:32-35) Na un otro ocasion Hesus a tuma nota di un biuda cu tawata bai dera su unico yiu homber. Mesora el sinti e dolo cu e señora tawatin, el a acerca e corteho funebre y a resucita e hoben.—Lucas 7:11-16.

Despues cu Hesus a resucita, el a aparece na Saulo riba caminda pa Damasco, y el a laga Saulo sa con e manera cruel cu e tawata persigui su disipelnan a afect’e. El a bisa Saulo: “Ami ta Hesus, kende bo ta persigui.” (Echonan 9:3-5) Hesus a sinti personalmente e dolo cu su disipelnan a pasa aden, mescos cu un mama ta sinti dolo ora su yiu ta malo. Asina tambe nos Sumo Sacerdote celestial, Hesus ‘tin comprendemento pa nos debilidadnan’, of manera e version Rotherham ta bisa, e ta “compadece cu nos debilidadnan.”—Hebreonan 4:15.

Apostel Pablo a siña bira compasivo cu sufrimento y sintimento di otro hende. El a puntra: “Ken ta debil, sin cu ami ta debil? Ken ta cai den pica, sin cu ami ta precupa intensamente?” (2 Corintionan 11:29) Ora un angel a libra Pablo y Silas milagrosamente for di prizon na Filipos, Pablo su prome reaccion tawata pa bisa e wardado di preso cu ningun hende no a hui. Door di su empatia e por a pensa cu probablemente e wardado di preso lo por a bai comete suicidio. Pablo tawata sa cu segun e custumber Romano, un wardado di preso lo a haya un castigo severo si un preso hui. Specialmente si el a haya instruccion pa wak e preso bon. (Echonan 16:24-28) E acto bondadoso aki di Pablo cu a salba bida di e wardado di preso a impresiona e wardado aki masha, y e cu su famia di cas a dal paso pa bira cristian.—Echonan 16:30-34.

Con pa Cultiva Empatia

Bes tras bes e Scritura ta anima nos pa imita nos Tata celestial y su Yiu, Hesucristo. Pues empatia ta un cualidad cu nos mester cultiva. Con nos por haci esaki? Tin tres cos principal cu por yuda nos bira mas atento pa distingui e necesidad y sintimentonan di otro hende: scucha, observa y imagina.

Scucha. Door di scucha bon, nos ta haya sa ki problema otro hende tin. Y mas miho nos scucha, mas grandi e chens ta cu nan ta habri nan curason pa nos y revela nan sintimentonan. Miriam ta splica: “Ami por papia cu un anciano si mi ta sigur cu lo e scucha mi. Mi kier sa si en berdad e ta comprende mi problema. Mi ta haya mas ­confiansa den dje ora e ta haci mi preguntanan pa e comprende mi situacion. Esei ta mustra cu el a scucha cu atencion loke mi a cont’e.”

Observa. No ta tur hende ta bisa bo abiertamente kico nan ta sinti of kico nan ta pasando aden. Sinembargo, un observado atento lo ripara ora un compañero cristian ta parce deprimi, ora un teenager no ta comunica mas of ora un predicado celoso perde su entusiasmo. E habilidad aki pa reconoce un problema den su prome etapanan ta vital pa mayornan. ­Marie ta remarca: “Di un of otro manera, prome cu mi papia cu mi mama, ya caba e sa con mi ta sinti. Pues ta facil pa mi papia francamente cu ne di mi problemanan.”

Uza bo imaginacion. E manera mas eficas pa stimula empatia ta door di puntra bo mes: ‘Si ami tawata den e situacion aki, con lo mi a sinti? Con lo mi a reacciona? Kico lo mi tawatin mester?’ Job su tres consoladonan falso no tawata capas pa pone nan mes den su luga. Pesei nan a acus’e di picanan imaginario cu nan a asumi cu e mester a comete.

Hopi bes ta mas facil pa un hende imperfecto husga fayo di otro cu mustra comprendemento pa cierto ­sintimentonan. Sinembargo, si nos haci esfuerso vigoroso pa imagina nos mes e afliccion cu e persona ta pasa aden, esei lo yuda nos pa compadece en bes di condena. Juan, un anciano cu experencia, a remarca: “Mi por duna miho conseho ora mi ­scucha cu atencion y purba di comprende henter e situacion prome cu mi cuminsa duna ­sugerencia.”

E publicacionnan di Testigonan di Yehova a yuda hopi hende den e aspecto aki. E revistanan Toren di Vigilancia y Spierta! a yega di trata problemanan complica manera depresion y abuso di mucha. E informacionnan oportuno aki ta yuda lectornan comprende miho e sintimento di e hendenan cu ta sufri di e problemanan ei. Asina tambe, e buki Loke hovenan sa puntra—Contesta práctica a yuda hopi mayor comprende problema di nan yiunan.

Empatia Ta Yuda den Actividadnan Cristian

Poco di nos lo por ignora e situacion penoso di un mucha cu ta muriendo di hamber si nos tin cuminda pa dun’e. Si nos tin empatia, nos lo discerni tambe e condicion spiritual di un persona. Bijbel ta conta di Hesus: “Ora cu el a mira e multitudnan, el a sinti compasion pa nan, pasobra nan tawata cansa y plama, manera carne sin wardado.” (Mateo 9:36) Miyones di hende awe ta den e mesun condicion spiritual, y nan tin mester di yudansa.

Mescos cu den tempo di Hesus, kisas nos lo tin cu vence prehuicio of tradicionnan profundamente hancra pa alcansa curason di algun hende. Un predicado compasivo ta haci esfuerso pa haya tereno comun of pa papia riba temanan cu hende tin na mente pa asina haci su mensahe mas atractivo. (Echonan 17:22, 23; 1 Corintionan 9:20-23) Mescos cu tawata e caso cu e wardado di preso na Filipos, actonan di bondad motiva door di empatia tambe por haci hende cu ta scucha nos, mas receptivo pa e mensahe di Reino.

Empatia ta un factor clave cu por yuda nos pasa por halto di fayo di otronan den e congregacion. Si nos haci esfuerso pa comprende e sintimentonan di un ruman cu a ofende nos, sin duda nos lo haya cu ta mas facil pa pordon’e. Podise nos lo a reacciona mescos cu ne si nos tawata den e mesun situacion y nos sircunstancia- y experencianan personal tawata mescos cu ne. Yehova su empatia ta motiv’e pa “corda cu ta stof nos ta.” Pues nos empatia no mester motiva nos pa tene consideracion cu imperfeccion di otronan y pa ‘pordona nan’ libremente?​—⁠Salmo 103:14; Colosencenan 3:13.

Si nos tin cu conseha un persona cu a comete un eror, probablemente nos lo hacie den un manera mucho mas bondadoso si nos por comprende y sinti loke e persona ta sinti. Un anciano cristian compasivo ta recorda su mes: ‘Mi tambe por a comete e eror aki. Mi por tawata den su sapato.’ Pesei Pablo ta recomenda: “Restoura un hende asina den un spirito di mansedumbre; cada un wak su mes, pa boso tambe no wordo tenta.”—Galationan 6:1.

Empatia por impulsa nos tambe pa, si ta na nos alcanse, duna yudansa practico, maske nos compañero cristian kisas ta basila pa pidi esei. Apostel Huan a skirbi: “Ken cu tin e bienesnan di mundo, y ta mira su ruman den necesidad y ta cera su curason p’e, ta con e amor di Dios ta permanece den dje? . . . No laga nos stima cu palabra ni cu lenga, ma cu echo y berdad.”​—⁠1 Huan 3:​17, 18.

Pa nos por stima “cu echo y berdad”, na prome luga nos tin cu distingui kico ta e necesidad spesifico di nos ruman. Nos ta observa e necesidadnan di otro hende atentamente cu e intencion di yuda nan? Esei ta empatia.

Cultiva Compasion pa Otro

Podise di naturalesa, nos no ta un persona cu ta lihe pa mustra empatia, pero nos por cultiva e sintimento di compañero aki. Si nos scucha cu mas atencion, bira mas atento den observa y imagina nos mes den situacion di otro hende cu mas frecuencia, nos empatia lo crece. Resultado di esei lo ta cu nos lo sinti nos impulsa pa mustra mas amor, bondad y compasion pa nos yiunan, otro cristiannan y nos biciñanan.

Nunca permiti egoismo pone bo perde bo empatia. Pablo a skirbi: “No fiha solamente riba boso cada un su mes interes, ma riba esun di e otro tambe.” (Filipencenan 2:​4, Beibel na papiamentu koriente) Nos futuro eterno ta depende di e empatia di Yehova y di su Sumo Sacerdote, Hesucristo. Pues, nos tin e obligacion moral pa cultiva e cualidad aki. Nos empatia lo haci nos miho sirbido di Dios y miho mama y tata. Riba tur cos, empatia lo yuda nos descubri cu “ta mas bendiciona pa duna cu pa ricibi.”—Echonan 20:35.

 [Plachi na pagina 25]

Empatia ta encera observa e necesidadnan di otro hende atentamente cu e intencion di yuda nan

 [Plachi na pagina 26]

Nos lo siña mustra e empatia cu un mama amoroso di naturalesa ta sinti pa cu su yiu?