Yehova Ta Odia Traicion

‘Nos no mester trata nos ruman cu traicion.’—MALAKIAS 2:10.

1. Kico Dios ta rekeri di nos si nos kier ricibi bida eterno?

BO KIER biba pa semper? Si bo ta kere den e speransa biblico ei, casi sigur lo bo contesta: “Claro cu si.” Pero si bo kier pa Dios faborece bo cu bida eterno den su mundo nobo, bo tin cu cumpli cu su rekisitonan. (Eclesiastes 12:13; Huan 17:3) Ta di mas pa spera esei di hende imperfecto? No, pasobra Yehova ta curasha nos cu e siguiente expresion: “Mi tin delicia den lealtad mas cu den sacrificio, y den e conocemento di Dios, mas cu den ofrendanan kima.” (Oseas 6:6) Pesei, maske como hende nos ta faya, toch nos por cumpli cu Dios su rekisitonan.

2. Con hopi Israelita a trata Yehova cu traicion?

² Pero no ta tur hende kier haci Yehova su boluntad. Oseas ta revela na nos cu hopi Israelita mes no tawata kier hacie. Como nacion nan a bai di acuerdo pa drenta den un pacto, un combenio, pa obedece e leinan di Dios. (Exodo 24:1-8) Pero apenas un poco tempo a pasa cu nan a cuminsa “viola e pacto” door di kibra e leinan di e pacto. (Oseas 6:7, NW) Pesei Yehova a bisa cu e Israelitanan ei tawata “trata cu traicion” contra dje. (Oseas 6:7) Y entre e tempo ei y awor, hopi hende a haci mescos. Pero Yehova ta odia traicion, sea ta contra dje mes, of contra esnan cu ta stim’e y sirbie.

3. Kico nos ta bai analisa den e estudio aki?

³ Oseas no tawata e unico profeta cu a hala atencion na e manera cu Dios ta mira traicion. Nos mester desaroya e mesun punto di bista cu Dios tin si nos kier tin speransa di disfruta di un bida felis. Den e articulo anterior nos a cuminsa analisa gran parti di Malakias su mensahe profetico, cuminsando cu e prome capitulo di su buki den Bijbel. Awor, laga nos pasa pa e di dos capitulo di e buki pa nos mira con e ta duna mas atencion na e manera cu Dios ta mira traicion. Maske Malakias tawata papiando di e situacion cu a reina den e pueblo di Dios un par di decada despues cu nan a bolbe for di nan cautiverio na Babilonia, e di dos capitulo ei ta hopi significativo pa nos awe tambe.

Sacerdotenan Reprochabel

4. Kico Yehova a spierta e sacerdotenan?

⁴ Capitulo 2 ta cuminsa cu un reprendemento di Yehova contra e sacerdotenan Hudiu cu a hala for di su caminda husto. Si nan no a tuma su conseho na pecho y corigi nan manera, ta sigur cu nan lo a sufri consecuencia grave. Wak kico e prome dos versiculonan ta bisa: “‘O sacerdotenan, e mandamento aki ta pa boso. Si boso no scucha, y si boso no dicidi den boso curason pa honra mi nomber’, e SEÑOR di ehersitonan ta bisa, ‘e ora ei lo mi manda un maldicion riba boso, y lo mi maldiciona boso bendicionnan.’” Si e sacerdotenan a siña e pueblo Dios su leinan, anto cumpli cu nan, Dios lo a bendiciona nan. Pero awor, debi cu nan a ignora su boluntad, en bes di bendicion, maldicion tawata na caminda. Asta e bendicionnan cu e sacerdotenan a expresa lo a resulta di ta maldicion.

5, 6. (a) Pakico e sacerdotenan tawata mas reprochabel ainda? (b) Con Yehova a expresa su desprecio pa e sacerdotenan?

⁵ Dicon specialmente e sacerdotenan tawata reprochabel? Versiculo 7 ta duna un indicacion bon cla: “E lipnan di un sacerdote mester  preserva conocemento, y hende mester busca instruccion for di su boca; pasobra e ta e mensahero di e SEÑOR di ehersitonan.” Mas di mil aña prome, e leinan cu Dios a duna Israel pa medio di Moises a bisa cu e sacerdotenan tawatin deber di “siña e yiunan di Israel tur e statuutnan cu SEÑOR a bisa nan.” (Levitico 10:11) Lamentablemente, mas despues e escritor di 2 Cronicanan 15:3 a informa cu “pa hopi dia Israel tawata sin e Dios berdadero, y sin un sacerdote pa siña nan y sin Lei.”

⁶ Den tempo di Malakias, den siglo 5 prome cu Era Comun, e sacerdotenan tawata actua mescos. Nan no tawata siña e pueblo e Lei di Dios. Pesei e sacerdotenan a merece pa Dios tene nan responsabel. Wak e palabranan fuerte aki cu Yehova ta dirigi na nan. Malakias 2:3 ta declara: “Lo Mi hunta boso cara cu mest, e mest di boso fiestanan.” Esei si ta un zundra! Nan tawatin cu hiba mest di bestia sacrifica pafo di e campamento anto kim’e. (Levitico 16:27) Pero Yehova ta bisa nan cu en bes di esei, E lo hunta e mest ei den nan cara. Esei ta mustra bon cla cu E tawata despreciando tanto e sacrificionan como esnan cu tawata ofrece nan.

7. Dicon Yehova tawata rabia cu e maestronan di Lei?

⁷ Hopi siglo prome cu tempo di Malakias, Yehova a asigna e Levitanan pa percura pa e tabernakel, y despues pa e tempel y e sirbishi sagrado. Nan tawata maestro den e nacion di Israel. Si nan a cumpli cu nan encargo, esei lo a nifica bida y pas pa nan y pa e nacion. (Numbernan 3:5-8) Pero e Levitanan a perde e temor di Dios cu nan tawatin na cuminsamento. Pesei Yehova a bisa nan: “Boso a desvia for di e caminda; boso a haci hopi hende trompica pa medio di boso siñansa den e lei; boso a corumpi e aliansa di Levi . . . boso no ta sigui mi camindanan.” (Malakias 2:8, 9) Door cu e sacerdotenan a keda sin siña e pueblo e berdad, y door cu nan a pone un mal ehempel, nan a desvia hopi Israelita. Pesei Yehova tawatin bon motibo pa ta rabia cu nan.

Cumpli cu Dios Su Normanan

8. Ta di mas pa spera pa hende cumpli cu Dios su normanan? Splica.

⁸ Laga nos no pensa cu Dios mester a tene consideracion cu e sacerdotenan ei. No pensa cu Dios mester a pordona nan door cu nan tawata hende imperfecto, y cu pesei e no por a spera pa nan cumpli cu su normanan. Echo ta cu hende por cumpli cu Dios su mandamentonan, pasobra Yehova no ta spera nada di nos cu nos no por haci. Probablemente tawatin sacerdote den e tempo ei cu si a cumpli cu Dios su normanan, y nos sa sigur cu mas despues tawatin uno cu tambe a hacie: Hesus, e gran “sumosacerdote.” (Hebreonan 3:1) Por a bisa cu tur frankesa di dje: “Tawatin instruccion berdadero den su boca, y inhusticia no a wordo haya riba su lipnan; el a cana cu mi den pas y rectitud, y el a haci hopi bolbe for di inikidad.”—Malakias 2:6.

9. Ken den nos tempo ta hiba berdadnan biblico fielmente pa otro hende?

 ⁹ E rumannan ungi di Cristo, esnan cu tin speransa di bai biba den shelo, tambe tin mas di un siglo ta sirbi como “un sacerdocio santo, pa ofrece sacrificionan spiritual cu ta aceptabel pa Dios.” (1 Pedro 2:5) Nan ta hiba delantera den hiba berdadnan biblico pa otro hende. Segun cu bo a siña e berdadnan ei, bo no a mira di experencia propio cu e lei di e berdad a resulta di ta den nan boca? Nan a yuda hopi hende bandona siñansa religioso falso, y como resultado, awor tin miyones di hende rond mundo cu a siña berdadnan di Bijbel y tin e speransa di biba pa semper. Na nan turno, e hendenan aki tin e privilegio di siña e lei di e berdad na miyones di otro hende.—Huan 10:16; Revelacion 7:9.

Motibo pa Tene Cuidou

10. Pakico nos tin motibo pa tene cuidou?

¹⁰ Pero nos tin motibo pa tene cuidou. Nos lo por keda sin capta e lesnan cu nos por saca for di Malakias 2:1-9. Cada un di nos ta paga tino pa no tin inhusticia riba nos lip? Por ehempel, miembronan di nos famia por confia di berdad den loke nos ta bisa? Nos rumannan spiritual den congregacion tambe por confia nos? Por ta facil pa nos desaroya e custumber di paga tino con nos ta bisa un cos, pa pone hende kere un cos pa otro, maske tecnicamente hende no por bisa cu ta gaña nos a gaña. Of kisas nos lo por exagera of sconde cierto detaye den asunto di negoshi. Si nos hacie, Yehova lo no mira nos? Y si nos tin custumber di actua asina, lo E acepta sacrificio di alabansa for di nos lip?

11. Ken specialmente mester paga tino?

¹¹ Malakias 2:7 mester sirbi como un spiertamento pa rumannan cu tin e privilegio di siña e Palabra di Dios den congregacion awe. E ta bisa cu nan lip “mester preserva conocemento, y hende mester busca instruccion” for di nan boca. E maestronan ei tin un responsabilidad pisa, pasobra Santiago 3:1 ta mustra cu nan “lo wordo husga cu mas severidad.” Nan mester siña cu vigor y entusiasmo si, pero loke nan siña mester ta firmemente basa riba e Palabra skirbi di Dios, y instruccionnan cu nos ta ricibi via Yehova su organisacion. Di tal manera nan lo ta “adecuadamente capasita pa siña otronan.” Nan ta ser conseha asin’aki: “Haci bo sumo posibel pa presenta bo mes aproba na Dios, un trahado sin nada di tene berguensa di dje, manehando e palabra di e berdad corectamente.”—2 Timoteo 2:2, 15, NW.

12. Rumannan cu ta instrui mester tene cuidou pa nan no haci kico?

¹² Si nos no tene cuidou, nos lo por ser tenta pa hinca nos idea- y opinionnan personal den loke nos ta siña otronan. Esei por ta peligroso, specialmente pa un hende cu tin e tendencia di confia den su propio conclusionnan, asta si nan ta bai contra loke Yehova su organisacion ta siña. Pero manera Malakias capitulo 2 ta mustra, ancianonan di congregacion tin cu pega na conocemento cu ta bini di Dios, y no na nan propio ideanan, pasobra sino e carnenan lo por trompica. Hesus a bisa: “Ken cu haci un di e chikitonan aki, cu ta kere den mi, trompica, ta miho p’e cu un piedra di molina pisa wordo colga na su garganta, y cu e wordo hoga den profundidad di lama.”—Mateo 18:6.

 Casa cu un Hende Cu No Ta Creyente

13, 14. Cua ta un di e practicanan traicionero cu Malakias ta hala atencion na dje?

¹³ Di versiculo 10 padilanti, Malakias capitulo 2 ta hala atencion na traicion na un manera mas directo ainda. Malakias ta concentra riba dos proceder cu tin di aber cu otro, y bes tras bes e ta describi nan uzando e palabra “traicion.” Di prome, wak con Malakias ta introduci su conseho cu e siguiente preguntanan: “Nos tur no tin un tata? No ta un Dios a crea nos? Pakico cada un di nos ta trata su ruman cu traicion y ta profana e aliansa di nos tatanan?” Despues versiculo 11 ta bisa cu e manera traicionero cu Israel ta actua ta un profanacion di e santidad di Yehova. Ta kico nan tawata haci cu ta asina serio? E versiculo ei ta menta un di e practicanan robes ei: Nan a “casa cu yiu mohe di un dios straño.”

¹⁴ Cu otro palabra, maske e Israelitanan tawata forma parti di un nacion dedica na Yehova, algun di nan a casa cu hende cu no tawata ador’e. E contexto ta yuda nos mira dicon e cos aki tawata asina serio. Versiculo 10 ta bisa cu nan tur tawatin e mesun tata. Aki e no ta papia di Yacob (cu despues a ser yama Israel) ni di Abraham, y ni sikiera di Adam. Malakias 1:6 ta mustra cu ta Yehova tawata e “un tata” ei. E nacion di Israel tawatin un relacion cu ne door di e pacto cu El a cera cu nan antepasadonan. Un di e leinan di e pacto ei a bisa: “No emparenta cu nan; no duna bo yiu mohe na nan yiu homber, ni tuma nan yiu mohe pa bo yiu homber.”—Deuteronomio 7:3.

15. (a) Con algun hende lo por purba hustifica e echo cu nan ta casa cu un persona cu no ta creyente? (b) Con Yehova ta expresa su mes tocante casamento?

¹⁵ Algun hende djawe lo por rasona asin’aki: ‘E hende cu mi gusta ta hopi agradabel. Cu tempo, casi sigur e lo bin acepta adoracion berdadero.’ E tipo di rasonamento ei ta confirma e spiertamento inspira aki: “E curason ta mas engañoso cu tur cos y ta totalmente corupto.” (Yeremias 17:9) Na Malakias 2:12 Dios ta expresa kico E ta pensa tocante casamento cu hende cu no ta creyente: ‘Pa loke ta e homber cu ta haci esaki, SEÑOR lo cort’e kita afo.’ Pesei Bijbel ta insisti pa cristiannan casa solamente “den Señor.” (1 Corintionan 7:39) Bou di e areglo cristian un creyente no ta ser ‘corta kita afo’ si e casa cu un hende cu no ta creyente. Sinembargo, si e persona cu e casa cu ne no bira creyente, kico lo pasa cu ne ora djis aki Dios trece un fin na e mundo aki?—Salmo 37:37, 38.

Maltrato di Casa

16, 17. Con algun Israelita a actua cu traicion?

¹⁶ Despues Malakias ta sigui papia riba un otro forma di traicion: maltrato di casa, principalmente door di diborcia sin base. Versiculo 14 di capitulo 2 ta bisa: “SEÑOR tawata testigo entre abo y e esposa di bo hubentud, contra kende bo a trata cu traicion, maske cu e ta bo compañera y bo esposa pa medio di aliansa.” Door cu esposonan Hudiu a actua na un manera traidor cu nan casa, nan a pone Yehova su altar ‘tapa cu lagrima.’ (Malakias 2:13) E hombernan ei tawata diborcia sin base legitimo, y tawata bai laga nan casa di hubentud, probablemente pa casa cu un hende mohe mas hoben of cu un pagano. Anto e sacerdotenan corupto tawata permiti esei sosode tambe! Pero Malakias 2:16 ta declara: “‘Mi ta odia diborcio’, SEÑOR, e Dios di Israel, ta bisa.” Despues Hesus a mustra cu inmoralidad ta e unico base pa  diborcio cu ta haci e partner inocente liber pa bolbe casa.—Mateo 19:9.

¹⁷ Reflexiona riba e palabranan di Malakias y mira con nan ta apela na bo curason y bo sintimentonan basico di bondad. E ta papia di “bo compañera y bo esposa pa medio di aliansa.” Cada un di e hombernan ei a casa cu un mohe cu tawata un Israelita, un compañera di adoracion, scohi pa bira un esposa stima, un compañera pa bida largo. Aunke casi sigur e casamento a tuma luga tempo cu e homber y e mohe tawata hoben ainda, e pacto cu nan a cera cu otro, e contrat matrimonial, no a bira invalido door cu hopi tempo a pasa, ni door cu nan a bira bieu.

18. Con loke Malakias a conseha tocante traicion ta valido awe?

¹⁸ E conseho tocante e asuntonan ei tin mes tanto valides awe. Ta tristo cu algun cristian ta ignora e guia di Dios tocante casa solamente den Señor. Y ta lamentabel tambe cu algun di nan no ta sigui haci esfuerso pa nan matrimonio keda fuerte. En bes di esei nan ta bini cu excuse y ta actua na un manera cu Dios ta odia. Nan ta diborcia sin base biblico pa casa cu otro hende. Nan a “cansa” Yehova cu e manera cu nan ta actua. Den tempo di Malakias, esnan cu a ignora e conseho di Dios tawatin asta e tribilidad di pensa cu ta Yehova su punto di bista no tawatin base. Den un sentido nan tawata bisa: “Unda e Dios di husticia ta?” Esta troci nan forma di pensa ta! Laga nos no cai den e trampa ei nunca.—Malakias 2:17.

19. Con esposo- y esposanan cristian por ricibi e spirito di Dios?

¹⁹ Den un nota positivo, Malakias ta mustra cu no ta tur e esposonan tawata trata nan casa cu traicion. Nan tawatin ‘un restante di e  spirito di Dios den nan.’ (Versiculo 15) Ta bon cu awe e organisacion di Dios ta yen di homber asina cu ta ‘duna honor na nan casa.’ (1 Pedro 3:7) Nan no ta abusa di nan casa den sentido fisico ni cu palabra, nan no ta insisti di haci practicanan sexual degradante, ni nan no ta deshonra nan casa door di flirt cu otro hende mohe of door di wak pornografia. Ademas, Yehova su organisacion ta bendiciona cu un gran cantidad di esposa cristian fiel cu ta leal na Dios y na su leinan. Tur e homber- y mohenan ei sa kico Dios ta odia, y nan ta pensa y actua di acuerdo cu loke nan sa. Sigui ta manera nan, ‘obedeciendo Dios como gobernante’ y sigui ricibi e bendicion di su spirito santo.—Echonan 5:29, NW.

20. Ki momento ta yegando cerca pa henter humanidad?

²⁰ Pronto Yehova ta bai trece huicio riba henter e mundo aki. Cada hende lo tin cu duna cuenta na dje pa su creencianan y su echonan. “Cada un di nos lo duna cuenta di su mes na Dios.” (Romanonan 14:12) Pues, un pregunta intrigante cu ta lanta ta: Ken lo sobrevivi e dia di Yehova? E di tres y ultimo articulo di e serie aki lo trata e tema ei.

Bo Por Splica?

• Pakico basicamente Yehova a reprende e sacerdotenan di Israel?

• Dicon e normanan di Dios no ta mucho eleva pa hende por cumpli cu ne?

• Pakico nos mester tene cuidou ora nos ta instrui hende awe?

• Cua dos practicanan specialmente Yehova ta condena?

[Preguntanan di Estudio]

[Plachi na pagina 15]

Den tempo di Malakias, e sacerdotenan a ser reprende door cu nan no a sigui Yehova su camindanan

[Plachi na pagina 16]

Nos mester tene cuidou pa loke nos siña hende ta Yehova su camindanan, no nos propio ideanan

[Plachi na pagina 18]

Yehova a condena e Israelitanan cu a diborcia di nan casa pa cualke cos chikito anto casa cu hende mohe pagano

[Plachi na pagina 18]

Cristiannan djawe ta honra nan pacto matrimonial