Mustra Bondad Amoroso na Hende den Necesidad

“Cada un mustra cariño [bondad amoroso, NW] . . . na su ruman.”—ZACARIAS 7:9.

1, 2. (a) Pakico nos mester mustra bondad amoroso? (b) Cua ta e preguntanan cu nos lo considera?

YEHOVA DIOS su Palabra ta anima nos pa stima “bondad amoroso.” (Mikeas 6:8, NW, nota na pia di pagina) Tambe e ta duna nos motibo pakico nos mester haci esei. Un motibo ta cu “e hende misericordioso [di bondad amoroso, NW] ta haci bon na su mes alma.” (Proverbionan 11:17) Esei ta hopi cierto! Door di mustra bondad amoroso, of amor leal, nos ta forma relacionnan cordial y duradero cu otro hende y como resultado nos lo tin amigonan fiel. Y esei no ta un recompensa precioso?—Proverbionan 18:24.

² Ademas, e Scritura ta bisa nos: “Esun cu aspira na husticia y lealtad [bondad amoroso, NW] ta haya bida.” (Proverbionan 21:21) Si, Dios ta stima nos ora nos ta aspira of busca pa alcansa bondad amoroso, y esei lo pone nos den fila pa ricibi bendicionnan den futuro, incluso bida eterno. Pero con nos por mustra bondad amoroso? Na ken nos mester demostr’e? Y con bondad amoroso ta distinto for di bondad humano normal of for di bondad en general?

Bondad Humano y Bondad Amoroso

3. Den ki manera bondad amoroso ta distinto for di bondad humano?

³ Bondad humano normal y bondad amoroso  ta diferencia di otro den varios manera. Por ehempel, hende cu ta demostra bondad humano hopi bes ta haci esei sin cu nan tin un cariño of relacion profundo y personal cu e personanan cu nan ta trata cu bondad. Sinembargo, si nos ta mustra bondad amoroso na un persona, cu amor nos lo cultiva un relacion estrecho cu ne. Den Bijbel, hende a mustra bondad amoroso na otro basa riba e relacion cu nan tawatin cu otro. (Genesis 20:13; 2 Samuel 3:8; 16:17) Of e manifestacionnan di bondad amoroso por tawata basa riba relacionnan cu a resulta di echonan anterior di bondad. (Hosue 2:1, 12-14; 1 Samuel 15:6; 2 Samuel 10:1, 2) Pa demostra e diferencia aki, laga nos compara dos ehempel biblico, uno di bondad humano y uno di bondad amoroso cu hende a mustra na otro.

4, 5. Con e dos ehempelnan biblico cita aki ta demostra e diferencia cu tin entre bondad humano y bondad amoroso?

⁴ Un ehempel di bondad humano ta en conexion cu un grupo di hende cu a naufraga, entre nan apostel Pablo. Nan a logra yega tera na e isla di Malta. (Echonan 27:37–28:1) Aunke e habitantenan di Malta no tawatin ningun obligacion cu e biaheronan naufraga ni un relacion existente cu nan, nan a ricibi e stranheronan cu hospitalidad, y a mustra bondad of “cariño excepcional” na nan. (Echonan 28:2, 7) Nan hospitalidad tawata bondadoso, pero e tawata pa casualidad y nan a demostr’e na hende desconoci. Pues, esei tawata bondad humano.

⁵ Na comparacion, considera e hospitalidad cu Rei David a mustra na Mefiboset, yiu homber di su amigo Yonatan. David a bisa Mefiboset: “Lo bo come na mi mesa regularmente.” Splicando dicon el a haci e areglo aki, David a bis’e: “Siguramente lo mi mustra cariño [bondad amoroso, NW] na bo pa causa di bo tata Yonatan.” (2 Samuel 9:6, 7, 13) Pues apropiadamente Bijbel ta referi na e hospitalidad continuo cu David lo a mustra na Mefiboset como un muestra di bondad amoroso—y no como simplemente bondad—pasobra e tawata un prueba di su lealtad na un relacion estableci. (1 Samuel 18:3; 20:15, 42) Awe ta mescos. Sirbidonan di Dios ta mustra bondad humano na hende en general. Sinembargo, nan ta expresa bondad amoroso, of amor leal, continuo na hende cu ken nan tin un relacion aproba den bista di Dios.—Mateo 5:45; Galationan 6:10.

6. Ki caracteristicanan di bondad amoroso cu hende ta mustra na otro ta sobresali den e Palabra di Dios?

⁶ Pa nos por identifica algun caracteristica mas di bondad amoroso, nos lo considera brevemente tres relato biblico cu ta presenta e cualidad aki. For di e relatonan aki nos lo nota cu bondad amoroso cu hende ta mustra na otro ta ser (1) manifesta cu echonan spesifico, (2) desplega boluntariamente y (3) demostra specialmente na hende cu tin un necesidad. Ademas, e relatonan aki ta ilustra con nos por mustra bondad amoroso awe.

Un Tata Ta Mustra Bondad Amoroso

7. Kico e sirbido di Abraham a conta Betuel y Laban, y ki punto di precupacion e sirbido a presenta?

⁷ Genesis 24:28-67 ta conta e resto di e historia di e sirbido di Abraham, menciona den e articulo anterior. Despues di a topa Rebeca, e sirbido a haya invitacion pa bini na cas di su tata, Betuel. (Versiculo 28-32) Einan e sirbido a conta en detaye con el a busca un esposa pa e yiu homber di Abraham. (Versiculo 33-47) El a enfatisa cu e ta considera e exito cu el a logra te cu awor como un señal for di Yehova, “kende a guia mi den e caminda corecto pa tuma yiu mohe di famia di mi shon pa su yiu homber.” (Versiculo 48) E sirbido sin duda a spera cu su relato sincero di loke a tuma luga lo a combence Betuel y su yiu homber Laban cu Yehova tawata apoyando e mision aki. Finalmente, e sirbido di: “Pesei anto, si bo ta bai mustra mi shon misericordia [bondad amoroso, NW] y berdad, bisa mi; y si no, laga mi  sa, pa mi bira na man drechi of na man robes.”—Versiculo 49.

8. Con Betuel a reacciona den e asunto relaciona cu Rebeca?

⁸ Yehova ya a mustra bondad amoroso na Abraham. (Genesis 24:12, 14, 27) Betuel lo tawata dispuesto pa haci mescos door di permiti Rebeca bai cu e sirbido di Abraham? Hende su bondad amoroso lo a complementa Dios su bondad amoroso? Of e biahe largo di e sirbido tawata en vano? Lo mester tawata un gran consuelo pa e sirbido di Abraham tende Laban y Betuel bisa: “E asunto aki ta bin di SEÑOR.” (Versiculo 50) Nan a reconoce e man di Yehova den e asunto y mesora a acepta su decision. Anto Betuel a desplega su bondad amoroso door di agrega: “Ata Rebeca bo dilanti, tum’e y bai cu ne, y lag’e ta esposa di e yiu di bo shon, manera SEÑOR a papia.” (Versiculo 51) Rebeca boluntariamente a bai cu e sirbido di Abraham, y poco despues a bira Isaak su esposa stima.—Versiculo 49, 52-58, 67.

Un Yiu A Mustra Bondad Amoroso

9, 10. (a) Kico Yacob a pidi su yiu homber Yosef haci p’e? (b) Con Yosef a mustra bondad amoroso na su tata?

⁹ Abraham su nieto Yacob tambe a ricibi bondad amoroso. Manera Genesis capitulo 47 ta conta, Yacob tawata biba e tempo ei na Egipto, y ‘e tempo pa e muri a yega.’ (Versiculo 27-29) Yacob tawata precupa pasobra e tawata bai muri pafo di e tera cu Dios a priminti Abraham. (Genesis 15:18; 35:10, 12; 49:29-32) Yacob no tawata kier pa nan der’e den Egipto, pesei el a haci areglo pa hiba su restonan na e tera di Canan. Ken lo tawata den miho posicion pa haci sigur cu lo a cumpli cu su deseo, cu no ta su yiu prominente, Yosef?

¹⁰ E relato ta bisa: “[Yacob] a yama su yiu Yosef y a bis’e: “Pa fabor, si mi a haya gracia den bo bista, . . . trata mi cu misericordia [bondad amoroso, NW] y fieldad. Pa fabor, no dera mi na Egipto, ma ora mi bai sosega cerca mi tatanan, saca mi for di Egipto, y dera mi den nan tereno pa dera morto.’” (Genesis 47:29, 30) Yosef a priminti di cumpli cu e peticion aki, y djis despues Yacob a muri. Yosef hunto cu Yacob su otro yiu hombernan a carga su curpa “hiba tera di Canan, y a der’e den e cueba di e cunucu di Macpela dilanti di Mamre, cual Abraham a cumpra.” (Genesis 50:5-8, 12-14) Asina Yosef a mustra bondad amoroso na su tata.

Bondad Amoroso di un Suegra

11, 12. (a) Con Ruth a mustra bondad amoroso na Noemi? (b) Den ki manera e “ultimo” ocasion cu Ruth a mustra bondad amoroso tawata miho cu “esun prome”?

¹¹ E buki di Ruth ta conta con e biuda Noemi a ricibi bondad amoroso cerca su suegra Moabita Ruth, cu tambe tawata biuda. Ora Noemi a dicidi di regresa Betlehem, Ruth a demostra bondad amoroso y determinacion, bisando: “Unda cu bo bai, lo mi bai, y unda cu bo keda, lo mi keda. Bo pueblo lo ta mi pueblo, y bo Dios, mi Dios.” (Ruth 1:16) Mas despues Ruth a manifesta su bondad amoroso ora el a mustra cu e ta dispuesto pa casa cu Boaz, un homber di edad cu tawata famia pega di Noemi. * (Deuteronomio 25:5, 6; Ruth 3:6-9) Boaz a bisa Ruth: “Bo a mustra cu bo ultimo cariño [bondad amoroso, NW] ta miho cu esun prome, door di no core tras di homber hoben, sea pober of rico.”—Ruth 3:10.

¹² E “prome” ocasion cu Ruth a mustra bondad amoroso tawata ora el a bandona su pueblo y a keda cu Noemi. (Ruth 1:14; 2:11) Asta e echo ei a ser surpasa pa su “ultimo” muestra di bondad amoroso: Ruth tawata dispuesto pa casa cu Boaz. Awor Ruth lo por a duna lus na un heredero pa Noemi, cu ya a pasa e edad di haya yiu. E matrimonio a tuma luga, y despues ora Ruth a duna lus, e mohenan di Betlehem  a grita: “Noemi a haya un yiu homber.” (Ruth 4:14, 17) Di berdad Ruth tawata “un mohe excelente.” Y pesei Yehova a recompens’e cu e maravioso privilegio di bira un antepasado di Hesucristo.—Ruth 2:12; 3:11; 4:18-22; Mateo 1:1, 5, 6.

Demostra cu Echo

13. Con Betuel, Yosef y Ruth a mustra nan bondad amoroso?

¹³ Bo a ripara con Betuel, Yosef y Ruth a expresa nan bondad amoroso? Nan no a haci esei solamente cu palabranan bondadoso, sino tambe cu echonan spesifico. Betuel no a djis bisa: “Ata Rebeca”, sino cu di berdad el a ‘manda Rebeca bai.’ (Genesis 24:51, 59) Yosef no a djis bisa: “Lo mi haci manera bo a bisa.” Sino mas bien e cu su ruman hombernan a haci pa Yacob “manera el a ordena nan.” (Genesis 47:30; 50:12, 13) Ruth no a djis bisa: “Unda cu bo bai, lo mi bai.” Tambe el a bandona su pueblo y a compaña Noemi, di manera cu “nan dos a bai te ora nan a yega Betlehem.” (Ruth 1:16, 19) Na Huda, Ruth a bolbe actua “conforme tur loke su suegra a orden’e.” (Ruth 3:6) Si, Ruth su bondad amoroso, mescos cu di otronan, a ser expresa cu echo.

14. (a) Con e sirbidonan di Dios di actualidad ta mustra bondad amoroso cu echo? (b) Ki echonan di bondad amoroso bo sa di dje cu cristiannan den bo area ta mustra na otro?

¹⁴ Ta conmovedor pa mira con sirbidonan di Dios djawe ta sigui expresa bondad amoroso cu echo. Por ehempel, pensa riba esnan cu ta duna apoyo emocional continuo na rumannan creyente cu ta enfermo, deprimi of yen di tristesa. (Proverbionan 12:25) Of corda e hopi Testigonan di Yehova cu fielmente ta pasa cu auto busca esnan di edad pa hiba nan Salon di Reino ya nan por asisti na e reunionnan semanal di congregacion. Anna di 82 aña y cu ta sufri di artritis, ta expresa e sintimento di hopi di e rumannan aki ora e ta bisa: “E echo cu nan ta busca mi cu auto hiba tur reunion ta un bendicion di Yehova. Mi ta gradicie di fondo di mi curason cu El a duna mi rumannan asina amoroso.” Abo ta desplega e tipo di echonan ei den bo congregacion? (1 Huan 3:17, 18) Si ta asina, bo por tin sigur cu bo bondad amoroso ta ser aprecia masha.

Demostra Boluntariamente

15. E tres relatonan biblico cu nos a considera a destaca ki otro caracteristica di bondad amoroso?

¹⁵ E relatonan biblico cu nos a considera ta mustra tambe cu hende ta mustra bondad amoroso libremente y boluntariamente, no obliga. Boluntariamente Betuel—y tambe Rebeca—a copera cu e sirbido di Abraham. (Genesis 24:51, 58) Yosef a mustra su bondad amoroso sin cu otro hende mester a mand’e. (Genesis 50:4, 5) Ruth “tawata dicidido pa bai cu [Noemi].” (Ruth 1:18) Ora Noemi a sugeri Ruth pa e bai cerca Boaz, bondad amoroso a motiva e Moabita pa declara: “Tur loke bo bisa, lo mi haci.”—Ruth 3:1-5.

16, 17. Kico ta haci e bondad amoroso di Betuel, Yosef y Ruth specialmente significativo, y kico a motiva nan pa desplega e cualidad aki?

 ¹⁶ E bondad amoroso cu Betuel, Yosef y Ruth a mustra ta specialmente significativo pasobra ni Abraham, ni Yacob ni Noemi no tawata den posicion pa obliga nan haci algo. Al fin y al cabo, Betuel no tawata bou di ningun obligacion legal pa laga su yiu mohe bai. Facilmente lo e por a bisa e sirbido di Abraham: ‘No, mi no kier pa mi yiu mohe trahado bai biba leu.’ (Genesis 24:18-20) Y Yosef tambe tawata liber pa dicidi si lo el a actua conforme e peticion di su tata of no, pasobra Yacob tawata morto y no por a oblig’e cumpli cu su palabra. Noemi mes a bisa cu Ruth ta liber pa keda na Moab. (Ruth 1:8) Tambe Ruth tawata liber pa casa cu un “homber hoben” en bes di casa cu Boaz cu tawata un homber di edad.

¹⁷ Betuel, Yosef y Ruth a mustra bondad amoroso boluntariamente; nan a ser motiva di curason pa haci esei. Nan a sinti un responsabilidad moral pa mustra e cualidad aki na esnan cu ken nan tawatin un relacion, mescos cu Rei David a sintie obliga na manifesta bondad amoroso na Mefiboset.

18. (a) Cu ki actitud ancianonan cristian ta “pastoria e tou”? (b) Con un anciano a expresa su sintimento tocante yuda e rumannan creyente?

¹⁸ Bondad amoroso te ainda ta un caracteristica di e pueblo di Dios, incluso di e hombernan cu ta pastoria e tou di Dios. (Salmo 110:3; 1 Tesalonicencenan 5:12) E ancianonan ei—of superintendente—ta sinti un responsabilidad pa cumpli cu e encargo confia na nan debi na nan nombramento. (Echonan 20:28) Asina mes, nan ta haci e trabou di pastoria y otro echonan di bondad amoroso na fabor di e congregacion, “no forsa, ma boluntariamente.” (1 Pedro 5:2) E ancianonan ta pastoria e tou pasobra nan tin e responsabilidad y tambe e deseo di haci esei. Nan ta expresa bondad amoroso na e carnenan di Cristo pasobra nan mester y tambe kier hacie. (Huan 21:15-17) Un anciano cristian a bisa: “Di berdad mi gusta bishita e rumannan na cas of bel nan djis pa mustra cu mi ta corda riba nan. Mi ta haya hopi goso y satisfaccion ora mi ta yuda e rumannan!” Tur anciano amoroso ta completamente di acuerdo.

Mustra Bondad Amoroso na Hende den Necesidad

19. Ki echo tocante bondad amoroso e relatonan biblico considera den e articulo aki a enfatisa?

¹⁹ E relatonan biblico cu nos a considera tambe ta enfatisa e echo cu mester mustra bondad amoroso na esnan cu tin un necesidad cu nan mes no por satisface. Pa Abraham por a sigui cu su liña di desendencia, e tawatin mester di Betuel su coperacion. Pa hiba su restonan Canan, Yacob tawatin mester di Yosef su yudansa. Y pa produci un heredero, Noemi tawatin mester di Ruth su yudansa. Ni Abraham, ni Yacob, ni Noemi no por a satisface e necesidadnan ei sin yudansa. Awe ta mescos. Nos mester mustra bondad amoroso specialmente na esnan den necesidad. (Proverbionan 19:17) Nos mester imita e patriarca Job, kende a duna atencion na “e pober cu tawata sclama pa yudansa, y e huerfano cu no tawatin ningun hende pa yud’e”, y na e hende cu tawata cerca di muri. Tambe Job a “haci curason di e biuda canta di alegria” y a bira “wowo pa e ciego y pia pa e lam.”—Job 29:12-15.

20, 21. Ken tin mester di nos expresionnan di bondad amoroso, y kico cada un di nos mester ta dicidido pa haci?

 ²⁰ En realidad, tin ‘hende cu ta sclama pa yudansa’ den tur congregacion cristian. Esaki por ta debi na factornan manera soledad, desanimacion, sintimento di no ta bal nada, hende cu a decepciona nan, malesa serio of morto di un ser keri. Sin importa kico ta e causa, tur e rumannan stima ei tin necesidad cu nos por satisface—y mester satisface—cu nos echonan boluntario y continuo di bondad amoroso.—1 Tesalonicencenan 5:14.

²¹ Pues anto, laga nos sigui imita Yehova Dios, kende ta “abunda den misericordia [bondad amoroso, NW].” (Exodo 34:6; Efesionan 5:1) Nos por haci esei boluntariamente cu echonan spesifico, specialmente na fabor di esnan den necesidad. Y sigur nos lo honra Yehova y experencia gran goso segun cu nos ‘cada un ta mustra bondad amoroso na nos ruman.’—Zacarias 7:9.

[Nota]

Con Lo Bo Contesta?

• Con bondad amoroso ta distinto for di bondad humano?

• Den ki maneranan Betuel, Yosef y Ruth a mustra bondad amoroso?

• Cu ki actitud nos mester desplega bondad amoroso?

• Ken tin mester di nos expresionnan di bondad amoroso?

[Preguntanan di Estudio]

[Plachi na pagina 18]

Con Betuel a mustra bondad amoroso?

[Plachi na pagina 21]

Ruth su amor leal tawata un bendicion pa Noemi

[Plachi na pagina 23]

Hende ta mustra bondad amoroso na otro boluntariamente, cu echonan spesifico y na esnan den necesidad