Siña Bo Mes y Siña Otro Hende Moralidad Cristian

“Anto abo, cu ta siña un otro, bo no ta siña bo mes?”—ROMANONAN 2:21.

1, 2. Pa ki motibonan bo kier studia Bijbel?

TIN hopi motibo pakico bo ta studia e Palabra di Dios. Probablemente lo bo kier sa e detayenan cu e ta duna di hende, suseso, luga y otro cosnan. Lo bo kier sa kico ta e siñansanan berdadero na contraste cu siñansa falso, manera Trinidad of fierno di candela. (Huan 8:32) Tambe lo bo kier conoce Yehova miho pa bo por imit’e miho y cana dilanti dje na un manera recto.—1 Reinan 15:4, 5.

² Un otro motibo y uno hopi importante pa studia e Palabra di Dios ta pa ekipa bo mes pa siña otro hende: bo famianan stima, bo conocinan y asta esnan cu kisas ainda bo no conoce. Esaki no ta djis un opcion pa cristiannan berdadero. Hesus a bisa su disipelnan: “Bai y haci tur e nacionnan disipel di mi, . . . y siña nan pa cumpli cu tur loke mi a ordena boso.”—Mateo 28:19, 20.

3, 4. Pakico ta un honor pa bo siña otro hende manera Hesus a ordena?

³ E echo cu bo ta studia Bijbel cu e deseo di siña otro hende ta algo di admira y esei por ta un fuente di satisfaccion duradero. Semper e profesion di siña otro hende tawata uno di honor. Encarta  Encyclopedia ta bisa: “Hopi Hudiu adulto a mira maestronan como guia cu ta hiba na salbacion, y nan a manda nan yiunan honra nan maestronan asta mas cu nan mayornan.” Ta un honor masha special pa cristiannan siña nan mes door di studia Bijbel y despues siña otro hende.

⁴ “E profesion cu mas hende ta practica ta esun di siña otronan. Mas o menos 48 miyon homber y mohe rond mundo ta maestro di scol.” (The World Book Encyclopedia) Un meneer of juffrouw di scol ta ser confia cu e mente di hobennan y e por influencia nan pa e resto di nan bida. E efecto ta asta mas duradero ora bo obedece e mandamento di Hesus pa siña otro hende; bo por influencia nan futuro eterno. Apostel Pablo a resalta esaki ora el a urgi Timoteo: “Paga bon tino na bo mes y na bo siñansa; persevera den e cosnan aki; pasobra haciendo esaki lo bo sigura salbacion, tanto pa bo mes como pa esnan cu ta tende bo.” (1 Timoteo 4:16) Si, siñamento ta conecta cu salbacion.

5. Pakico siñansa cristian ta di un calidad superior?

⁵ Ta e Fuente di mas halto, e Soberano di universo, ta autorisa bo y dirigi bo pa bo siña tanto bo mes como otro hende. Esei riba su mes caba ta haci e tipo di siñamento aki hopi mas importante cu cualkier otro den e mundo aki, sea cu ta trata di siñamento di topiconan elemental, di tecnica di trabou of asta riba tereno medico. E siñansa cu e studiante ta haya mester siñ’e imita Cristo Hesus, e Yiu di Dios, personalmente, y pa e na su turno, siña otronan haci mescos.—Huan 15:10.

Pakico Siña Bo Mes?

6, 7. (a) Pakico nos tin cu siña nos mes prome? (b) Den ki sentido e Hudiunan di prome siglo a faya como maestro?

⁶ Pakico Pablo a bisa cu nos tin cu siña nos mes prome? Wel, nos no por siña otro hende na drechi si nos no a siña nos mes prome. Pablo a enfatisa e echo aki den un pasashi cu ta pone bo pensa seriamente. E tawata importante pa e Hudiunan di e tempo ei, pero e ta transmiti un mensahe serio pa cristiannan djawe tambe. Pablo a puntra: “Anto abo, cu ta siña un otro, bo no ta siña bo mes? Abo cu ta predica cu hende no mester horta, bo mes ta horta? Abo cu ta bisa cu hende no mester comete adulterio, bo mes ta comete adulterio? Abo cu ta aborece idolo, bo mes ta roba tempel? Abo cu ta gaba cu bo conoce Lei, bo ta deshonra Dios door di kibra Lei?”—Romanonan 2:21-23.

⁷ Door di uza pregunta retorico, Pablo a cita dos malecho cu e Dies Mandamento ta menciona  spesificamente: No horta y no comete adulterio. (Exodo 20:14, 15) Algun Hudiu den e tempo di Pablo tawata orguyoso cu nan tawatin e Lei di Dios. Nan a ser ‘instrui oralmente for di e Lei, y nan tawata sigur cu nan tawata manera un guia pa hende ciego, lus pa esnan cu tawata den scuridad, siñado di mucha chikito.’ (Romanonan 2:17-20) Sinembargo, algun tawata hipocrita pasobra den scondi nan tawata comete ladronicia of adulterio. Esei a deshonra tanto e Lei como su Autor den shelo. Bo por mira cu nan sigur no tawata den e posicion pa siña otro hende; realmente, nan no tawata siña ni nan mes.

8. Den ki sentido algun Hudiu den tempo di Pablo lo por tawata ‘robando tempel’?

⁸ Pablo a papia di robo di tempel. Tawatin Hudiu cu literalmente a horta den tempel? Kico Pablo tawata kiermen? Pa ta franco, en bista di e poco informacion cu tin di e pasashi aki, nos no ta sigur con algun Hudiu a “roba tempel.” Mas prome e registrado di e stad di Efeso a declara cu e compañeronan di Pablo no tawata ladron di tempel, loke ta indica cu por lo menos algun hende a pensa cu e Hudiunan tawata blanco di e acusacion ei. (Echonan 19:29-37) Acaso nan tawata cumpra y bende articulonan precioso cu a bini for di tempelnan pagano cu conkistadonan of fanaticonan religioso a plunder? Of, nan tawata uza esakinan pa nan mes? Segun e Lei di Dios, mester a destrui e oro y plata di imagennan; y no tuma nan pa uzo personal. (Deuteronomio 7:25) * Pues kisas Pablo tawata referiendo na e Hudiunan cu a falta cu e mandamento di Dios y cu a uza of probecha di articulonan cu a origina for di tempelnan pagano.

9. Ki practicanan incorecto relaciona cu e tempel den Herusalem lo por tawata ekivalente na horta e tempel?

⁹ Di otro banda, Yosefo a conta di un scandal na Roma causa pa cuater Hudiu. Nan lider tawata un maestro di Lei. E cuaternan ei a combence un señora Romano, un Hudiu proselito, pa e duna nan oro y otro cosnan balioso como contribucion pa e tempel den Herusalem. Unabes nan a haya esakinan for di e señora, nan a uza e cosnan aki pa nan mes, loke ta ekivalente na horta for di e tempel. * Otronan den un sentido tawata hortando e tempel di Dios door di ofrece sacrificio mancaron y door di promove hacimento di negoshi riba terenonan di e tempel, combertiendo e tempel den un “cueba di ladron.”—Mateo 21:12, 13; Malakias 1:12-14; 3:8, 9.

Siña Hende Moralidad Cristian

10. Kico ta e esencia di loke Pablo a skirbi na Romanonan 2:21-23 cu nos no mester perde for di bista?

¹⁰ Aunke nos no sa sigur ta na ki practica relaciona cu hortamento, adulterio y ladronicia den tempel Pablo tawata referi na dje den prome siglo, laga nos no perde e esencia di su comentarionan. El a puntra: “Anto abo, cu ta siña un otro, bo no ta siña bo mes?” Remarcablemente e ehempelnan cu Pablo a trece dilanti tawatin di aber cu moralidad. Aki e apostel no a enfoca riba doctrina of historia di Bijbel. Loke Pablo a referi na dje ora el a papia di siña bo mes y siña otro hende tawatin di aber cu normanan moral di Bijbel of moralidad cristian.

11. Pakico bo mester duna atencion na moralidad cristian ora cu bo ta studia e Palabra di Dios?

¹¹ Pa nos aplica e les di Romanonan 2:21-23 nos tin cu siña e normanan di moralidad cristian for di e Palabra di Dios, actua na harmonia cu loke nos siña, anto instrui otro hende pa haci mescos. Pesei, segun cu bo ta studia Bijbel, trata na saca afo cua ta e normanan di Yehova cu ta sirbi como base pa principionan di moralidad cristian. Medita riba e conseho y e lesnan cu bo ta haya den Bijbel. Anto aplica loke bo siña cu curashi. Y pa bo haci esei en berdad bo mester tin curashi combina cu determinacion. Ta facil  pa hende imperfecto hustifica pakico un situacion ta permitie of asta ta exigi pa e pasa por halto di moralidad cristian den un caso particular. Talbes e Hudiunan cu Pablo a menciona tawata bon den e forma sutil ei di rasona cu e meta di hustifica nan mes of engaña otro hende. Pero e palabranan di Pablo ta mustra cu nos no mester minimisa e normanan di moralidad cristian ni ignora nan manera nos haya ta bon.

12. Ki efecto bon conducta of mal conducta tin riba Yehova Dios su nomber, y pakico ta bon pa tene e echo ei na mente?

¹² E apostel a resalta un motibo principal pakico bo tin cu siña y despues aplica e normanan moral cu bo ta haya den Bijbel. E mal conducta di e Hudiunan a duna Yehova un mal nomber: “Abo cu ta gaba cu bo conoce Lei, bo ta deshonra Dios door di kibra Lei? Pasobra ‘e nomber di Dios ta wordo blasfema meimei di e paganonan pa boso motibo.’” (Romanonan 2:23, 24) Awe tambe, si nos pasa por halto di moralidad cristian, nos ta deshonra nan Fuente. Di otro banda, si nos pega firmemente na e normanan di Dios, esei lo honr’e. (Isaias 52:5; Ezekiel 36:20) E echo cu bo ta conciente di esaki por fortalece bo determinacion ora bo haya bo confronta cu tentacion- of situacionnan caminda por parce mas facil of mas cumbiniente pa pasa por halto di moralidad cristian. Ademas, e palabranan di Pablo ta siña nos algo mas. Fuera di ta personalmente conciente cu bo conducta ta sea honra of deshonra Dios, ora bo ta siña otro hende, yuda nan mira cu e manera cu nan ta aplica e normanan moral cu nan ta siña lo honra of deshonra Yehova. Mantene moralidad cristian no ta djis pa bo haya mas goso den bida y pa proteha bo salu. E ta honra tambe Esun cu a establece y promove tal normanan di moralidad.—Salmo 74:10; Santiago 3:17.

13. (a) Con Bijbel ta yuda nos cu asuntonan di moralidad? (b) Kico ta e esencia di e conseho na 1 Tesalonicencenan 4:3-7?

¹³ Moralidad ta afecta otro hende tambe. Bo por mira esei for di ehempelnan den e Palabra di Dios cu ta ilustra e balor di aplica e normanan moral di Dios y e consecuencianan di no haci caso di dje. (Genesis 39:1-9, 21; Hosue 7:1-25) Tambe bo por haya conseho masha directo riba asuntonan di moralidad manera: “Esaki ta e boluntad di Dios: boso santificacion, esta, pa boso abstene boso di inmoralidad sexual, pa cada un di boso sa con pa tene su mes curpa den santificacion y honor, no cu pasion di deseonan carnal, manera e paganonan cu no conoce Dios; y cu ningun hende no transgresa ni defrauda su ruman den nada, . . . pasobra Dios no a yama nos pa ta impuro, ma pa hiba un bida santo.” —1 Tesalonicencenan 4:3-7.

14. Kico bo por puntra bo mes tocante e conseho na 1 Tesalonicencenan 4:3-7?

¹⁴ Casi tur hende por mira for di e pasashi aki cu inmoralidad sexual ta bai contra e lei di moralidad cristian. Pero bo por bai hopi mas a fondo. Algun texto ta ofrece bo hopi cos pa studia y medita ariba, locual ta duna bo un comprendemento mas profundo. Por ehempel, bo por medita riba loke Pablo tawata kiermen ora el a bisa cu un persona cu ta practica fornicacion por yega ‘te na e punto di transgresa y defrauda su ruman’ of manera e Traduccion di Mundo Nobo ta bisa, “perhudica y trapa e derechonan di su ruman den e asunto aki.” Ta di ki derechonan e ta papia aki, y con un miho comprendemento di esaki lo duna bo mas motibo pa keda moralmente limpi? Con e resultadonan di un investigacion asina ta ekipa bo mas ainda pa bo por siña otro hende y yuda nan honra Dios?

Studia pa Por Siña Otro Hende

15. Ki hermentnan lo bo por uza pa siña bo mes mediante un studio personal?

¹⁵ Testigonan di Yehova tin hermentnan cu nan ta uza pa haci investigacion riba pregunta y cuestion cu ta surgi ora nan ta studia pa siña nan mes of otro persona. Un di e hermentnan ei cu ta disponibel den hopi idioma ta e Index di Publicacionnan Watch Tower. Si bo por yega na uno, bo por uz’e pa localisa informacion den e publicacionnan basa riba Bijbel di Testigonan di  Yehova. Bo por busca via topico of via un lista di textonan di Bijbel. Un otro herment cu Testigonan di Yehova tin den hopi idioma principal ta e asina yama Watchtower Library. E programa di computer aki riba CD-ROM ta contene un coleccion grandi di publicacion den forma electronico. Su programa ta permiti bo busca informacion riba topico y analisis di texto biblico. Si bo por yega na un di e hermentnan aki of tur dos, uza nan regularmente ora bo ta studia e Palabra di Dios of ora bo ta siña otro hende.

16, 17. (a) Unda bo por haya splicacion riba e derechonan menciona na 1 Tesalonicencenan 4:6? (b) Den ki forma fornicacion por trapa otro hende su derechonan?

¹⁶ Laga nos tuma e ehempel cita anteriormente: 1 Tesalonicencenan 4:3-7. A lanta e pregunta tocante derecho. Ken su derechonan? Y con hende ta trapa derecho di otro? Cu e hermentnan di studio cu nos a menciona, probablemente bo por haya basta articulo di publicacionnan cu ta splica e versiculonan aki, incluso un splicacion di e derechonan cu Pablo a menciona. Bo por lesa e splicacionnan ei den Perspicasia pa Comprende e Scritura na Spaño, Volumen 1, pagina 963 [na Ingles, Volumen 1, pagina 863-4]; Berdadero paz y siguridad—Con bo por hayé?, pagina 145; E Toren di Vigilancia (na Spaño) di 15 di november 1989, pagina 31.

¹⁷ Durante bo studio lo bo mira cu e publicacionnan ei ta mustra con cierto e palabranan di Pablo ta. Un fornicado ta peca contra Dios y ta expone su mes na enfermedad. (1 Corintionan 6:18, 19; Hebreonan 13:4) Un homber cu ta practica fornicacion ta trapa varios derecho di e mohe contra ken e ta peca. E ta strob’e di tin un posicion moral limpi y un bon consenshi. Si e mohe ta soltero, e ta trapa su derecho di drenta den un matrimonio como birgen y e derecho di su futuro casa di haya un mohe birgen. E ta ofende e mohe su mayornan y tambe su esposo si e ta casa. E homber inmoral ta trapa e derecho di su mes famia di tin un bon reputacion moral. Si e ta miembro di un congregacion cristian, e ta trece reproche riba esaki y dun’e mal fama.—1 Corintionan 5:1.

18. Con un studio di Bijbel tocante moralidad cristian ta beneficia bo?

¹⁸ E splicacion tocante derecho no ta yuda bo haya un splicacion mas profundo di e versiculo ei? E tipo di studio ei sigur ta di gran balor. Ora bo ta studia asina, bo ta siña bo mes. Bo ta comprende e berdad mas a fondo y e mensahe di Dios ta causa un gran impresion riba bo. Bo ta fortalece bo determinacion pa keda moralmente limpi como un cristian maske ki tentacion presenta. Y pensa riba cuanto mas eficas bo por ta como maestro! Por ehempel, ora bo ta siña otro hende e berdad di Bijbel, bo por yuda nan comprende 1 Tesalonicencenan 4:3-7 miho, y laga nan capta y mira e balor di moralidad cristian na un manera mas penetrante. Di e manera ei bo studio por yuda tanto abo como hopi otro hende honra Dios. Y aki ta djis un ehempel nos a menciona for di e carta di Pablo na e Tesalonicencenan. Tin hopi otro aspecto di moralidad cristian, y tambe hopi otro ehempel y conseho di Bijbel cu bo por studia, aplica y siña otronan.

19. Pakico ta esencial pa bo keda moralmente limpi?

¹⁹ No tin duda, ta sabi pa pega na e normanan di moralidad cristian. Santiago 3:17 ta bisa cu “e sabiduria di ariba”, esta for di Yehova Dios mes, ta ‘primeramente puro.’ Esei ta nifica claramente sigui e normanan moral di Dios. De echo, Yehova ta exigi pa tur esnan cu ta represent’e  den e obra di siña Bijbel na otro hende, ta bon ehempel den “puresa.” (1 Timoteo 4:12) E patronchi di bida di e disipelnan di prome siglo manera Pablo y Timoteo ta confirma esei; nan a abstene di inmoralidad, pasobra Pablo a skirbi: “No laga inmoralidad of cualkier sorto di impuresa of golosidad ni wordo menta mes meimei di boso, manera ta pas pa santonan, ni sushedad, ni papiamento di co’i loco, ni chansanan bulgar.”—Efesionan 5:3, 4.

20, 21. Pakico bo ta di acuerdo cu loke apostel Huan a skirbi na 1 Huan 5:3?

²⁰ Aunke e normanan moral presenta den e Palabra di Dios ta cla y spesifico, nan no ta un carga pisa. Esaki tawata bisto pa Huan, e apostel cu a keda te na ultimo. Basa riba loke el a observa atrabes di hopi aña di bida, e tawata sa cu moralidad cristian no ta algo perhudicial. Al contrario, el a proba di ta bon, beneficioso, un bendicion. Huan a enfatisa esaki ora el a skirbi: “Esaki ta e amor di Dios, cu nos ta warda su mandamentonan; y su mandamentonan no ta pisa.”—1 Huan 5:3.

²¹ Sinembargo, ripara cu Huan no a presenta e idea di obedece Dios door di keda moralmente limpi como e miho manera di biba djis pasobra esei ta libra nos di problema, di e mal consecuencia di nos desobediencia. E ta pone cosnan den e perspectiva corecto door di reconoce cu esaki na prome luga ta un expresion di nos amor pa Yehova Dios, un oportunidad precioso pa manifesta nos amor p’e. Berdaderamente, ora nos ta siña nos mes of otro hende pa stima Dios, esei ta nifica cu nos ta acepta y aplica su normanan halto. Si, e ta nifica siña nos mes y otro hende e moralidad cristian.

[Nota]

Bo Ta Corda?

• Pakico nos tin cu studia pa siña nos mes prome cu nos siña otro hende?

• Ki efecto nos conducta por tin riba e nomber di Yehova?

• Ken su derechonan un fornicado ta trapa?

• Kico ta bo determinacion relaciona cu moralidad cristian?

[Preguntanan di Estudio]

[Plachi na pagina 22]

“Su mandamentonan no ta pisa”