Altar na un Dios Desconoci

ROND di aña 50 Era Comun, apostel Pablo a bishita Atenas, Grecia. Einan el a mira un altar dedica na un dios desconoci, y mas despues el a menciona e altar aki durante un excelente testimonio cu el a duna di Yehova.

Den e introduccion di su discurso riba e Sero di Mars of Areopago, Pablo a bisa: “Hombernan di Atenas, mi ta mira cu boso ta masha religioso den tur sentido. Pasobra mientras cu mi tawata pasa door di boso stad y tawata observa e obhetonan di boso adoracion, mi a haya tambe un altar cu e inscripcion aki: ‘Na un Dios Desconoci.’ Pesei, loke boso ta adora den ignorancia, esei mi ta proclama na boso.”—Echonan 17:22-31.

Aunke nunca hende no a haya e altar ei na Atenas, tawatin altarnan similar na otro partinan di Grecia. Por ehempel, e geograf Griego di siglo 2, Pausanias, a haci mencion di altarnan di “diosnan cu Nomber Desconoci” na Falero, situa no mucho leu for di Atenas. (Descripcion di Grecia, Attica I, 4) Segun e mesun buki aki, na Olimpia tawatin “un altar di e diosnan Desconoci.”—Eleia I, XIV, 8.

Den su obra Bida di Apolonio di Tiana (VI, III), e escritor Griego Filostrato (cu a biba rond di aña 170 pa 245 Era Comun) a bisa cu na Atenas “hende a edifica altar na honor di asta diosnan desconoci.” Y den e buki Bida di Filosofonan (Buki 1, capitulo 10, seccion 110), Diogenes Laertio (cu a biba rond di aña 200 pa 250 Era Comun) a skirbi cu bo por a mira “altarnan sin nomber” na diferente parti di Atenas.

Romanonan tambe a construi altarnan dedica na diosnan sin nomber. E altar riba e pagina aki ta di siglo 1 of 2 prome cu Era Comun, y el a keda conserva den e museo Antiquarium Palatino na Roma, Italia. E inscripcion na Latin riba dje ta indica cu el a ser consagra na sea “un dios of un diosa.” Hopi bes bo ta haya e frase aki den oracion of expresionnan di dedicacion den tanto inscripcion como literatura.

“E Dios cu a traha mundo y tur cos cu tin den dje” ainda ta desconoci pa hopi hende. Pero manera Pablo a bisa e hendenan di Atenas, e Dios aki—Yehova—“no ta leu di cada un di nos.”—Echonan 17:24, 27.

[Reconocemento pa Potret na pagina 32]

Altar: Soprintendenza Archeologica di Roma