“Salbacion Ta di Yehova”

ORA tin un crisis nacional of tension internacional, pueblo ta spera pa nan gobierno duna nan proteccion y siguridad. Gobiernonan ta bini cu programanan pa haya respaldo di pueblo. Y mas sintimento di patriotismo e tipo di programanan aki lanta, mas bibo y frecuente e ceremonianan patriotico ta bira.

Ora tin un emergencia nacional, hopi bes e sintimento fuerte di patriotismo ta duna pueblo un sentido di unidad y fortalesa y e por promove un spirito di cooperacion y un sintimento civico entre nan. Sinembargo, “patriotismo ta mes peligroso cu cualkier otro emocion”, segun un articulo den The New York Times Magazine, pasobra “una bes e no ta bou di control mas, e por manifesta su mes den maneranan desagradabel y indeseabel.” Manifestacionnan di patriotismo por para bira actonan cu ta trapa libertad civil y religioso di cierto ciudadanonan den un pais. Specialmente cristiannan berdadero ta haya nan bou di presion pa bai contra nan creencianan. Con nan ta comporta nan ora un ambiente asina ta reina den e mundo rond di nan? Ki principionan di Bijbel ta yuda nan actua cu comprendemento profundo y mantene nan integridad na Dios?

“No Hinca Rudia Adora Nan”

Sa sosode cu e practica di saluda bandera ta bira un expresion popular di sintimento patriotico. Sinembargo, hopi bes bo ta haya representacion di cosnan den shelo, manera streya riba bandera. Nan sa tin tambe representacion di cosnan riba tera. Dios a mustra bon cla kico E ta pensa tocante buigmento pa obhetonan asina ora El a duna su pueblo e prohibicion: “No traha ningun imagen graba pa bo mes, ni nada semehante na loke tin ariba den shelo, ni abou riba tera, ni den e awa bou di tera. No [“hinca rudia”, Beibel na papiamentu koriente] adora nan ni sirbi nan, pasobra Ami, SEÑOR bo Dios, ta un Dios yalurs.”—Exodo 20:4, 5.

Pero si bo saluda of hinca rudia dilanti un bandera di estado, esei realmente ta viola e mandamento pa duna Yehova Dios debocion exclusivo? Mester admiti si cu e Israelitanan di antiguedad tawatin nan “banderanan” of emblemanan cu nan gruponan di tres tribu tawata uza ora nan tawata reuni den desierto. (Numbernan 2:1, 2) Comentando riba e palabranan Hebreo pa e emblemanan ei, e Cyclopedia di McClintock y Strong ta bisa: “Sinembargo, ningun di e palabranan aki no ta expresa e idea cu nos generalmente tin di un bandera.” Ademas, emblemanan di Israel no a ser considera como cosnan sagrado, ni no tawatin ningun ceremonia conecta cu nan uzo. Simplemente nan a sirbi como un señal of indicacion, esta, pa mustra e pueblo unda nan mester a reuni.

E imagennan di kerubin den e tabernakel y den e tempel di Salomon a sirbi primordialmente como un descripcion di e kerubinnan celestial. (Exodo 25:18; 26:1, 31, 33; 1 Reinan 6:23, 28, 29; Hebreonan 9:23, 24) E echo cu hende en general nunca tawatin acceso na e imagennan aki y cu hende no mester a adora  angel, a mustra bon cla cu no mester a adora e imagennan aki.—Colosensenan 2:18; Revelacion 19:10; 22:8, 9.

Tuma por ehempel e estatua di un colebra di brons cu profeta Moises a traha durante e Israelitanan su estadia temporal den desierto. E estatua of imagen ei a sirbi como un simbolo, y e tawatin un nificacion profetico. (Numbernan 21:4-9; Huan 3:14, 15) Nan no a ador’e ni uz’e den nan adoracion. Sinembargo, siglonan despues di e tempo di Moises, e Israelitanan a cuminsa adora e mesun imagen ei di un manera incorecto, y asta a kima sencia na dje. Pesei, Rei Ezekias di Huda a laga kibr’e na werki.—2 Reinan 18:1-4.

Banderanan nacional tin djis un funcion practico? Kico nan ta simbolisa? “Bandera ta e simbolo principal di fe di nacionalismo y e obheto principal di adoracion”, segun e autor J. Paul Williams. The Encyclopedia Americana ta bisa: “Bandera ta mes sagrado cu crus.” Bandera ta e simbolo di estado. Pesei, si bo buig dilanti un bandera of salud’e bo ta participa na un ceremonia religioso cu ta duna adoracion na estado. Un acto asina ta atribui salbacion na estado y no ta na harmonia cu loke Bijbel ta bisa tocante idolatria.

E Scritura ta bisa bon cla cu “Salbacion ta di [Yehova].” (Salmo 3:8) No mester atribui salbacion na institucionnan humano ni na nan simbolonan. Apostel Pablo a spierta su compañeronan cristian: “Mi stimanan, hui for di idolatria.” (1 Corintionan 10:14) E prome cristiannan no a participa den actonan di adoracion di estado. Den su buki Those About to Die (Esnan Cu Ta Serca di Muri), Daniel P. Mannix ta remarca: “Cristiannan a nenga di . . . haci sacrificio na e ‘genio’ (of spirito wardado) di emperado [Romano], un acto cu ta casi mescos cu saluda bandera.” Esei ta e caso awe tambe cu cristiannan berdadero. Door cu nan ta duna Yehova debocion exclusivo, nan no ta saluda bandera di ningun nacion. Asina nan ta pone Dios na prome luga, mientras nan ta mustra respet pa gobierno y su gobernantenan. Si, nan ta reconoce cu nan tin e responsabilidad di ser sumiso na e “autoridadnan cu ta goberna.” (Romanonan 13:1-7) Pero kico ta e punto di bista biblico encuanto canticanan patriotico, manera himno nacional?

Kico Ta un Himno Nacional?

“Un himno nacional ta un expresion di sintimentonan patriotico cu hopi bes ta inclui un peticion na Dios pa su guia y proteccion pa e pueblo y nan gobernantenan”, segun The Encyclopedia Americana. Realmente, un himno nacional ta un cantica of oracion na fabor di un nacion. Generalmente e ta pidi bida largo y prosperidad material pa e nacion. Cristiannan berdadero mester tuma parti den e oracionnan emocional ei?

Profeta Yeremias a biba meimei di hende cu a pretende di ta sirbi Dios. Sinembargo, Yehova a dun’e e mandato: “No haci oracion pa e pueblo aki, no roga ni suplica pa nan, y no bin intercede serca mi, pasobra mi no ta tende bo.” (Yeremias 7:16; 11:14; 14:11) Dicon Dios a duna Yeremias e mandato aki? Pasobra tawatin yen di hortamento, asesinato, actonan di adulterio, huramento falso y idolatria den e pueblo.—Yeremias 7:9.

Hesucristo a pone un ehempel ora el a bisa: “No ta pa mundo mi ta pidi, sino pa esnan cu bo a duna mi.” (Huan 17:9) Scritura ta bisa cu “henter mundo ta bou di control di e malbado” y cu mundo “ta pasa bai.” (1 Huan 2:17; 5:19) Siendo cu esei ta e caso, con cristiannan berdadero por resa concientemente pa prosperidad y bida largo di un mundo asina?

Claro cu no ta tur himno ta contene peticion na Dios. “Himno nacional sentimental por inclui oracion pa e monarca, pa bataya of rebelionnan importante pa e nacion . . . of expresion di sentimentonan patriotico”, segun e Encyclopædia Britannica. Pero hende cu kier agrada Dios realmente por alegra pa motibo di guera y revolucion cu tin na cualkier nacion? Relaciona cu adoradonan berdadero,  Isaias a profetisa: “Nan lo bati nan spadanan traha ploeg cu nan, y nan lo bati nan lansanan traha sker pa snui cu nan.” (Isaias 2:4) Apostel Pablo a skirbi: “Maske nos ta cana den carni, nos no ta bataya segun carni, pasobra e armanan cu nos ta bataya cu ne no ta carnal.”—2 Corintionan 10:3, 4.

Hopi bes himnonan nacional ta expresa sintimentonan di orguyo y superioridad nacional. E punto di bista aki no ta cuadra cu loke Bijbel ta bisa. Den su discurso na Areopago, apostel Pablo a bisa: “For di un sanger [Yehova Dios] a traha tur nacion di hende pa biba riba henter mundo.” (Echonan 17:26) Apostel Pedro a declara: “Dios no ta haci distincion di persona, ma den tur nacion e hende cu ta tem’e y cu ta haci husticia ta aceptabel p’e.”—Echonan 10:34, 35.

Door cu hopi cristian a comprende loke Bijbel ta bisa, nan ta tuma e decision personal pa no participa den saludamento di bandera ni den cantamento di canticanan patriotico. Pero con nan ta comporta nan mes ora nan haya nan confronta cara cara cu e cuestionnan aki?

Abstene cu Respet

Den un intento pa fortalece e unidad den su imperio, Rei Nabucodonosor di Babilonia di antiguedad a traha un inmenso imagen di oro riba e sabana di Dura. Despues el a organisa un ceremonia di inauguracion na cua el a invita su satrapanan, prefectonan, gobernadonan, conseheronan y otro oficialnan halto. Ora musica a cuminsa tur hende cu a reuni einan mester a buig y adora e imagen. E tres hobennan Hebreo, Sadrak, Mesak y Abednego, tambe tawata entre esnan presente. Con nan a mustra cu nan no ta participa den e ceremonia religioso aki? Ora e musica a cuminsa y e otro hendenan a cai abou dilanti e imagen, e tres Hebreonan a keda para.—Daniel 3:1-12.

Awendia, hende sa saluda bandera cu brasa habri of cu man na cabes of na nan curason. Tin bes nan mester para den un posicion special. Na algun pais, muchanan na scol tin cu hinca rudia y sunchi e bandera. Cristiannan berdadero ta para keto mientras otronan ta saluda bandera, asina nan ta mustra cu nan ta respeta e ocasion.

 Kico si un ceremonia di bandera ta ser dirigi di tal forma cu si bo djis para so, bo ta mustra cu bo ta participa? Supone cu na un scol nan ta scohe un alumno pa representa henter scol, y e ta saluda e bandera cu ta colga na palo parti pafo mientras cu e otro alumnonan den klas mester para den un posicion atento manera soldanan sa para. Den e caso aki e solo echo cu bo ta lanta para ta mustra cu bo ta di acuerdo pa e alumno para na e palo di bandera sirbi como bo representante personal pa saluda e bandera. Na e momento ei e echo cu bo ta para ta nifica cu bo ta participa den e ceremonia. Si esei ta e caso, esnan cu kier djis mustra respet mester keda sinta y mantene silencio. Pero kico si e klas ta para caba ora un ceremonia asina cuminsa? Den e caso aki, e echo cu bo keda para lo no indica cu bo ta participa.

Supone cu nan no ta pidi bo pa saluda e bandera pero pa djis ten’e, sea ta den un marcha, den klas of otro caminda, pa otronan por salud’e. E ora ei, en bes di ‘hui for di idolatria’ manera e Scritura ta manda, esaki realmente lo nifica cu ta abo ta e centro di e ceremonia. E mesun cos ta conta pa participacion den marchanan patriotico. Concientemente cristiannan berdadero ta nenga di participa den esakinan pasobra si nan hacie, esei ta nifica cu nan ta apoya loke e marcha ta honra.

Por lo general ora un himno nacional ta toca, tur loke un persona tin cu haci pa e mustra cu e ta di acuerdo cu e letranan di e cantica ta door di lanta para. Den e casonan ei, cristiannan ta keda sinta. Sinembargo, si nan tawata para caba ora e himno nacional cuminsa, nan no tin nodi cai sinta specialmente pa esei. Esaki no ta mescos cu si nan a scohe pa lanta para specialmente pa e himno. Di otro banda, si e grupo di persona tin cu lanta para y canta, y un cristian djis lanta para pa mustra respet pero sin cu e ta canta, esaki lo no nifica cu e ta participa na e ceremonia.

 “Mantene un Bon Consenshi”

Despues cu e salmista a mustra con inutil ta pa rindi adoracion na obheto cu hende mes a traha, e ta bisa: “Esnan cu ta traha nan lo bira mescos cu nan, tur esnan cu ta confia den nan.” (Salmo 115:4-8) Ta obvio anto cu cualkier empleo cu tin di aber cu trahamento di obhetonan di adoracion, incluso banderanan nacional, ta inaceptabel pa adoradonan di Yehova. (1 Huan 5:21) Un cristian por hay’e cu otro situacionnan na trabou ora e mustra nan respetuosamente cu e no ta adora bandera ni loke e ta representa, sino Yehova so.

Por ehempel, un doño di trabou lo por pidi e trahado pa subi y baha un bandera cu ta colga na un edificio. Cu e cristian ta haci esei of no, ta depende di con e ta mira e sircunstancianan. Si e hisamento y bahamento di bandera ta parti di un ceremonia special, cu hende para den un posicion atento of ta saluda e bandera, e acto aki lo ta igual cu participa den e ceremonia.

Di otro banda, si e hisamento y bahamento di bandera no ta bai compaña cu ceremonia, e actonan aki lo ta mescos cu cumpli cu tareanan manera prepara e edificio pa uza, habri y sera porta y bentana. Den e casonan ei, e bandera ta djis un emblema di estado, y subi y bah’e ta un di e tareanan rutinario cu un cristian ta dicidi personalmente tocante dje, a base di loke su consenshi biblicamente entrena ta indica. (Galationan 6:5) E consenshi di un persona lo por motiv’e pa pidi su supervisor pa laga un otro trahado subi y baha e bandera. Un otro cristian lo por sinti cu su consenshi ta permitie anda cu e bandera basta cu no tin ceremonia relaciona cu ne. Sea cual sea e decision, adoradonan berdadero mester “mantene un bon consenshi” dilanti Dios.—1 Pedro 3:16.

Biblicamente no tin ningun motibo pa no traha of bai den edificionan publico, manera oficinanan di gobierno y scolnan caminda tin bandera nacional colga. Bo por haya bandera tambe riba stampia, plachi di number di auto y otro cosnan cu gobierno ta produci. Si un persona uza e productonan aki, esei no ta hacie automaticamente un participante den actonan religioso. Loke ta importante aki no ta e presencia di e bandera of un replica di dje, sino con un persona ta trata cu ne.

Hopi bes nan ta show bandera den bentana, riba porta, auto, lessenaar of otro obheto. Tambe por cumpra paña cu emblema di bandera imprimi riba dje. Na algun pais lei no ta permiti pa bisti paña asina. Asta si lei ta permitie, si un persona bisti nan, kico esei lo indica di su posicion pa cu mundo? Relaciona cu su siguidonan, Hesucristo a bisa: “Nan no ta di mundo, mescos cu ami no ta di mundo.” (Huan 17:16) Tambe nos no mester pasa por halto di e efecto cu un acto asina lo por tin riba compañeronan creyente. E por molestia consenshi di algun hende? Lo e por suak nan determinacion pa para firme den fe? Pablo a conseha cristiannan: “Aproba e cosnan cu ta excelente, pa ta sinsero y sin [“pone otronan trompica”, NW].” (Filipensenan 1:10)

“Cariñoso cu Tur Hende”

Segun cu e condicionnan di mundo ta bayendo atras den e “temponan trabahoso” aki, ta parce cu e sintimentonan di patriotismo ta bira mas intenso. (2 Timoteo 3:1) No laga ningun hende cu ta stima Dios lubida cu salbacion ta di Yehova so. E ta merece debocion exclusivo. Ora cu a pidi e disipelnan di Hesus pa haci algo cu no tawata na harmonia cu e boluntad di Yehova, nan a bisa: “Nos mester obedece Dios mas cu hende.”—Echonan 5:29.

Apostel Pablo a skirbi: “Y e sirbido di Señor no mester ta pleitado, ma cariñoso cu tur hende.” (2 Timoteo 2:24) Pues, cristiannan ta haci esfuerso pa ta pacifico, respetuoso y cariñoso, mientras nan ta depende riba nan consenshi entrena biblicamente pa tuma decisionnan personal relaciona cu saludamento di bandera y cantamento di himno nacional.

[Plachi na pagina 23]

Dicidido pero cu tur respet, tres Hebreo a scohe pa agrada Dios

[Plachi na pagina 24]

Con un cristian mester actua durante un ceremonia patriotico?