Sigui Practica e Cosnan Cu Boso A Siña

“E cosnan cu boso a siña y a ricibi y a tende y a mira den mi, practica e cosnan aki; y e Dios di pas lo ta cu boso.”—FILIPENSENAN 4:9.

1, 2. Por lo general, Bijbel ta eherce influencia riba bida di hende cu ta considera nan mes religioso? Splica.

“RELIGION Ta Ganando Tereno, Pero Moralidad Ta Perdiendo Tereno.” Esaki tawata e titular den e boletin di noticia Emerging Trends cu a resumi e resultadonan di un encuesta teni rond Merca. Aparentemente, na e pais ei tawatin un aumento den e cantidad di hende cu ta bai misa y cu ta bisa cu religion ta ocupa un luga importante den nan bida. Sinembargo, e informe ta bisa: “Apesar di e cifranan impresionante aki, hopi Mericano ta duda fuertemente cu religion tin mucho influencia riba bida di hende y sosiedad en general.”

² No ta den un pais so tin e situacion aki. Rond mundo, hopi hende cu ta bisa cu nan ta acepta Bijbel y cu nan ta religioso no ta laga e Scritura eherce un berdadero influencia den nan bida. (2 Timoteo 3:5) “Ainda nos tin hopi respet pa Bijbel”, cabes di un grupo di investigacion a declara, “pero echt dedica tempo na dje y les’e, studi’e y aplic’e si ta un cos di pasado.”

3. (a) Ki influencia Bijbel tin riba esnan cu bira cristian berdadero? (b) Con e siguidonan di Hesus ta aplica e conseho di Pablo skirbi na Filipensenan 4:9?

 ³ Sinembargo, serca cristiannan berdadero, e situacion ta diferente. E echo cu nan a aplica conseho for di e Palabra di Dios a trece un cambio den nan manera di pensa y conducta. Y mesora otro hende ta mira e personalidad nobo cu nan ta manifesta. (Colosensenan 3:5-10) Pa siguidonan di Hesus, Bijbel no ta un buki cu ta para cohe stof riba reki. Al contrario, apostel Pablo a bisa cristiannan na Filipos: “E cosnan cu boso a siña y a ricibi y a tende y a mira den mi, practica e cosnan aki; y e Dios di pas lo ta cu boso.” (Filipensenan 4:9) Cristiannan no ta djis acepta e berdad di e Palabra di Dios. Nan ta practica tambe loke nan ta siña. Nan ta aplica conseho di Bijbel continuamente den famia, na trabou, den e congregacion y den tur otro area di bida.

4. Pakico no ta facil pa pone e leinan di Dios na practica?

⁴ No ta facil pa pone e lei- y principionan di Dios na practica. Nos ta biba den un mundo cu ta bou di poder di Satanas e Diabel, kende Bijbel ta yama “e dios di e mundo aki.” (2 Corintionan 4:4; 1 Huan 5:19) Pesei, ta esencial pa vigila contra cualkier cos cu por stroba nos di hiba un bida cu ta manifesta integridad na Yehova Dios. Con nos por mantene nos integridad?

Pega na “e Ehempel di Palabranan Sano”

5. Kico e declaracion di Hesus, ‘sigui mi tur dia’ ta encera?

⁵ Practica loke nos a siña ta encera entre otro sostene adoracion berdadero lealmente, apesar di oposicion di parti di incredulonan. Awante ta rekeri esfuerso. Hesus a bisa: “Si un hende kier bin mi tras, lag’e nenga su mes y hisa su [staca] tur dia y sigui mi.” (Lucas 9:23) Hesus no a bisa cu nos mester siguie solamente un siman, un luna of un aña. Mas bien, el a bisa: “Tur dia.” Su palabranan ta indica cu ser disipel di dje no ta nifica dedica djis un par di aña di nos bida na religion. Sostene e adoracion berdadero lealmente ta nifica wanta fielmente den e estilo di bida cu nos a scohe, maske kico sosode. Con nos por haci esei?

6. Kico ta e ehempel of patronchi di palabra sano cu e cristiannan di prome siglo a siña for di Pablo?

⁶ Pablo a haci un apelacion na su colaborado Timoteo: “Retene e ehempel di palabranan sano cu bo a tende for di mi, den e fe y amor, cuanan ta den Cristo Hesus.” (2 Timoteo 1:13) Kico Pablo tawata kiermen? E palabra Griego traduci aki como “ehempel” (“patronchi”, NW) ta referi literalmente na sketch di un artista. Aunke e falta hopi detaye ainda, un sketch asina tin liñanan bon marca cu ta permiti esun cu ta wak e haya un idea general ta kico e ta. Mescos tambe, e patronchi di e berdad cu Pablo a siña Timoteo y otro hende no tawata diseña pa duna contesta spesifico riba tur pregunta cu por presenta. Pero, e coleccion di siñansa aki ta duna suficiente guia—mescos cu un sketch— pa hende di curason honrado por percibi loke Yehova ta exigi di nan. Claro cu pa agrada Dios, nan lo tin cu sigui retene e ehempel di e berdad door di practica loke nan ta siña.

7. Con cristiannan por pega na e patronchi di palabranan sano?

⁷ Den e prome siglo, personanan manera Himeneo, Alehandro y Fileto tawata promove ideanan cu no tawata cuadra cu “e ehempel di palabranan sano.” (1 Timoteo 1:18-20; 2 Timoteo 2:16, 17) Con e cristiannan di prome por a evita cu e apostatanan ei ta engaña nan? Door di studia e scritura inspira cuidadosamente y aplic’e den nan bida. Esnan cu a sigui e ehempel di Pablo y otro sirbido fiel por a reconoce y rechasa cualkier cos cu no a cuadra cu e patronchi di e berdad cu nan a siña. (Filipensenan 3:17; Hebreonan 5:14) En bes di tin “un obsesion encuanto preguntanan controversial y pleitamento tocante di palabra”, nan a sigui move padilanti den nan estilo di bida positivo di debocion na Dios. (1 Timoteo 6: 3-6) Nos ta haci mescos ora nos ta sigui aplica e berdadnan cu nos a siña. Ora nos mira con miyones di hende cu ta sirbi Yehova rond mundo ta pega na e patronchi di e berdad di Bijbel cu nan a siña, esei ta fortalece nos.—1 Tesalonicensenan 1:2-5.

Rechasa “Fabula”

8. (a) Con Satanas ta busca manera pa caba cu nos fe awe? (b) Ki spiertamento Pablo a duna na 2 Timoteo 4:3 y 4?

⁸ Satanas ta purba kibra nos integridad door di sembra duda tocante loke nos a ser siña. Awe, mescos cu den e prome siglo, apostatanan y otro hende ta busca manera di caba cu e fe di personanan inocente. (Galationan 2:4; 5:7, 8) Tin bes nan ta uza medionan di comunicacion pa plama informacion troci of asta mentira flagrante tocante e metodonan cu e pueblo di Yehova ta uza y tambe nan motivacionnan. Pablo a spierta cu algun hende lo ser aleha for di e berdad. El a skirbi: “E tempo lo bin cu nan lo no soporta doctrina sano mas; ma al contrario, pa satisface nan mes deseonan, nan lo acumula pa nan mes siñadonan pa bisa nan loke nan horea cu ta kishiki kier tende, y lo bira nan horea for di e berdad, y lo bolbe na fabula.”—2 Timoteo 4:3, 4.

9. Kico Pablo lo tawatin na mente ora el a referi na “fabula”?

⁹ En bes di retene e ehempel di palabra sano, “fabula” a intriga algun hende. Kico e fabulanan aki tawata? Talbes Pablo tawatin na mente leyendanan imaginario, manera esnan cu a aparece den e buki apocrifo di Tobias. * Fabulanan lo a inclui tambe rumornan sensacional basa riba speculacion. Anto, tambe algun hende—“pa satisface nan mes deseonan”—por a ser engaña mentalmente pa esnan cu a respalda un punto di bista permisivo di e normanan di Dios of cu a critica esnan cu a hiba delantera den e congregacion. (3 Huan 9, 10; Hudas 4) Sea cual sea e piedranan di trompica, aparentemente algun hende a prefera fabula en bes di e berdadnan di e Palabra di Dios. No a tarda mucho cu nan a stop di practica e cosnan cu nan a siña, y esaki a perhudica nan mes den sentido spiritual.—2 Pedro 3:15, 16.

10. Kico ta algun fabula di e tempo actual, y con Huan a mustra cu nos tin cu tene masha cuidou?

¹⁰ Nos por evita di haya nos cu fabula awe, si nos ta selectivo y ta wak bon kico nos ta scucha y kico nos ta lesa. Por ehempel, hopi bes medionan di comunicacion ta promove inmoralidad. Hopi hende ta na fabor di agnosticismo y ateismo abierto. Criticonan ta ridiculisa e idea cu Bijbel ta inspira pa Dios. Y e apostatanan moderno ta sigui purba sembra  simiña di duda pa debilita e fe di cristiannan. Relaciona cu e mesun tipo di peliger cu profetanan falso a presenta den e prome siglo, apostel Huan a spierta: “Stimanan, no kere tur spirito, ma pone e spiritonan na prueba pa mira si nan ta bin di Dios, pasobra hopi profeta falso a sali bai den mundo.” (1 Huan 4:1) Pues nos tin cu tene masha cuidou.

11. Den ki manera nos por samina nos mes y mira si nos ta den e fe?

¹¹ En conexion cu esaki, Pablo a skirbi: “Samina boso mes pa wak si boso ta den e fe.” (2 Corintionan 13:5) E apostel a haci un yamada pa nos samina nos mes pa determina si nos ta pegando na henter e coleccion di creencianan cristian. Si nos horeanan ta gusta scucha esnan cu ta critica, nos tin cu examina nos mes hunto cu oracion. (Salmo 139:23, 24) Nos ta inclina na critica of busca fayo den Yehova su sirbidonan? Si ta asina, pakico? E accionnan of palabranan di un persona a ofende nos? Si ta asina, nos ta manteniendo cosnan den nan perspectiva corecto? Cualkier tribulacion cu nos ta enfrenta den e sistema di cosnan aki ta temporal. (2 Corintionan 4:17) Asta si nos haya nos cu prueba den e congregacion, pakico nos mester stop di sirbi Dios? Si tin algo ta molestia nos, no ta mucho mas miho pa haci tur nos posibel pa resolve e asunto anto laga cosnan den man di Yehova?—Salmo 4:4; Proverbionan 3:5, 6; Efesionan 4:26.

12. Ki bon ehempel e Bereanonan a pone pa nos?

¹² En bes di ta critico, laga nos mantene un punto di bista spiritual saludabel di e informacion cu nos ta ricibi mediante studio personal y reunionnan di congregacion. (1 Corintionan 2:14, 15) Y en bes di duda den e Palabra di Dios, ta hopi mas sabi pa nos tin e actitud di e Bereanonan di prome siglo cu a investiga e Scritura cuidadosamente! (Echonan 17:10, 11) Laga nos cumpli cu loke nos a siña door di rechasa fabula y pega na e berdad.

13. Con nos por ta plamando fabula sin cu nos sa?

¹³ Tin un otro tipo di fabula cu nos tin cu tene masha cuidou cu ne. Tin masha hopi cuenta sensacional ta circula, hopi bes via E-mail. Ta sabi pa paga tino cu cuentanan asina, specialmente ora nos no conoce e fuente original di e informacion. Asta ora e experencia of storia a bini di un ruman cu tin bon reputacion, podise e mes ta di otro hende el a haya e detayenan. Pesei ta importante pa tene cuidou cu ripiti of manda cuentanan pa otro hende sin a verifica esakinan prome. Nos sigur lo no kier ripiti mitonan engañoso of “fabulanan profano y di mohe bieu.” (1 Timoteo 4:7) Siendo cu nos tin un obligacion tambe pa papia e berdad cu otro, ta sabi di nos parti pa evita tur loke por pone nos papia falsedad cu otro hende sin cu nos sa.—Efesionan 4:25.

 Esnan Cu Ta Practica e Berdad Ta Beneficia

14. Ki beneficionan nos ta haya ora nos ta practica e cosnan cu nos a siña for di e Palabra di Dios?

¹⁴ Ora nos ta practica loke nos ta siña mediante un studio personal di Bijbel y di reunionnan cristian nos ta haya hopi beneficio. Por ehempel, nos lo por ripara cu nos relacion cu esnan cu ta liga cu nos den fe ta mehora. (Galationan 6:10) Ora nos ta aplica principionan biblico nos mes ta haya un miho genio. (Salmo 19:8) Ademas, door di practica loke nos ta siña, nos ta “dorna e doctrina di Dios” y e chens ta grandi cu nos ta atrae otro hende na e adoracion berdadero.—Tito 2:6-10.

15. (a) Con un hoben a tuma un curashi pa duna testimonio na scol? (b) Kico bo a siña for di e experencia aki?

¹⁵ Entre e Testigonan di Yehova tin hopi hoben cu ta practica loke nan a siña mediante studio personal di Bijbel y publicacionnan cristian y tambe door di ta presente regularmente na reunionnan di congregacion. Nan conducta excelente ta un gran testimonio pa maestronan y nan coleganan na scol. (1 Pedro 2:12) Tuma por ehempel e caso di Leslie, un hobensita di 13 aña di edad na Merca. E ta admiti cu normalmente tawata hopi dificil pa e papia cu e muchanan di su scol tocante su fe, pero un dia cosnan a cambia. “E klas tawata papia tocante con hende ta purba bende bo un cos. Un mucha mohe a hisa dede y menciona Testigo di Yehova como ehempel.” Como un Testigo, con Leslie a reacciona? “Mi a defende mi fe”, e ta bisa, “cu mi tin sigur a sorprende tur hende, ya cu por lo general na scol mi ta keto.” Kico tawata e resultado di Leslie su curashi? “Mi por a laga un foyeto y un tratado cu e studiante, ya cu e tawatin mas pregunta”, Leslie ta bisa. Ora hobennan cu ta practica loke nan a siña ta tuma un curashi pa duna testimonio na scol, nan ta haci Yehova contento!—Proverbionan 27:11; Hebreonan 6:10.

16. Con e Scol di Ministerio Teocratico a beneficia un Testigo hoben?

¹⁶ Un otro ehempel ta esun di Elizabeth. Cu su shete aña di edad y durante tur su añanan na scol basico, e hobensita aki tawata invita su meneer- y juffrouwnan di scol na Salon di Reino ki ora cu e tawatin un asignacion den e Scol di Ministerio Teocratico. Si un di nan no por a bini, Elizabeth tawata keda despues di scol y presenta e discurso pa e meneer of juffrouw. Den su ultimo aña di scol secundario, Elizabeth a skirbi un raport di dies pagina riba e beneficionan di e Scol di Ministerio Teocratico y a haci un presentacion dilanti un panel di cuater meneer cu juffrouw. Tambe nan a invit’e pa duna un parti manera e sa duna den e Scol di Ministerio Teocratico, pa cua el a scohe e tema: “Pakico Dios Ta Permiti Maldad?” Elizabeth a beneficia di e programa di educacion cu Testigonan di Yehova ta sigui den e Scol di Ministerio Teocratico. E ta apenas un di e hopi hobennan cristian cu ta trece alabansa na Yehova door di practica e cosnan cu nan ta siña for di su Palabra.

17, 18. (a) Ki conseho Bijbel ta duna relaciona cu honrades? (b) Ki bon efecto e conducta honrado di un Testigo di Yehova tawatin riba un homber?

¹⁷ Bijbel ta spierta cristiannan pa comporta  nan mes honradamente den tur cos. (Hebreonan 13:18) Falta di honrades por daña nos relacion cu otro hende, y piyo ainda, cu Yehova mes. (Proverbionan 12:22) Nos conducta confiabel ta duna evidencia cu nos ta practicando e cosnan cu nos a siña, y esei ta pone hopi hende haya mucho mas respet pa Testigonan di Yehova.

¹⁸ Tuma por ehempel e experencia di un militar cu yama Phillip. El a perde un check firma sin montante yena y no a realisa esaki sino te ora un hende a mand’e bek p’e via post. Ta un Testigo di Yehova a haya e check, y el a debolb’e na su doño cu un nota cu ta bisa cu ta su creencianan religioso a motiv’e pa e haci esei. Phillip a keda babuca. “Nan por a horta 16.000 florin for di mi!” el a bisa. Na un otro ocasion nan a horta su sombre den misa y esei a lag’e keda desapunta. Aparentemente, ta un conoci di dje a cohe su sombre, mientras cu ta un hende straño a debolbe un check cu tawata bal miles di florin! En berdad, cristiannan honesto ta trece honor pa Yehova Dios!

Sigui Practica Loke Boso A Siña

19, 20. Ki beneficio nos ta haya ora nos ta actua na harmonia cu e cosnan biblico cu nos ta siña?

¹⁹ Esnan cu ta practica loke nan a siña for di e Palabra di Dios ta cosecha masha hopi beneficio. Disipel Santiago a skirbi: “Esun cu fiha su bista riba e lei perfecto, e lei di libertad, y ta permanece den dje, sin bira un tendedo lubidado, sino un cumplido berdadero, e hende aki lo ta bendiciona den loke e ta haci.” (Santiago 1:25) Efectivamente, si nos actua na harmonia cu e cosnan biblico cu nos siña, nos lo tin berdadero felicidad y nos lo ta mas capas pa enfrenta e presionnan di bida. Mas cu tur cos, nos lo tin e bendicion di Yehova y e posibilidad di biba pa semper!—Proverbionan 10:22; 1 Timoteo 6:6.

²⁰ Laga nos haci tur nos posibel anto pa sigui dedica nos mes na studia e Palabra di Dios. Reuni regularmente cu adoradonan di Yehova y presta atencion na e informacion cu ta ser presenta na reunionnan cristian. Aplica loke bo siña, sigui practic’e y “e Dios di pas lo ta cu boso.”—Filipensenan 4:9.

[Nota]

Bo Ta Corda?

• Kico ta “e ehempel di palabranan sano”, y con nos por reten’e?

• Ki “fabula” nos tin cu rechasa?

• Ki beneficionan tin pa esnan cu ta practica e cosnan cu nan ta siña for di e Palabra di Dios?

[Preguntanan di Estudio]

[Plachi na pagina 17]

Con e prome cristiannan por a evita cu e apostatanan a desvia nan?

[Plachi na pagina 18]

Medionan di comunicacion, Internet y apostatanan moderno por sembra simiña di duda den nos

[Plachi na pagina 19]

No ta sabi pa circula informenan sin verifica nan prome

[Plachi na pagina 20]

Na trabou, na scol y otro caminda Testigonan di Yehova ta aplica loke nan ta lesa den e Palabra di Dios