Pidi Despensa—E Clave pa Haci Pas

“UN PALABRA di despensa por tin un gran efecto. E ta resolve conflicto sin tin mester di recori na violencia, e ta reestablece relacionnan kibra entre nacionnan, e ta permiti gobiernonan reconoce e sufrimento di nan ciudadanonan, y e ta haci e relacion entre dos persona mas stabil.” Asina Deborah Tannen, autor di buki best-seller y socio-linguista na Universidad di Georgetown, Washington, D.C., a skirbi.

Bijbel ta confirma cu hopi bes un despensa sinsero ta un manera eficas pa drecha un relacion cu a daña. Por ehempel, den Hesus su comparacion di e yiu perdi, ora e yiu a regresa cas y pidi despensa sinseramente, mesora e tata tawata dispuesto pa ricibie bek den cas. (Lucas 15:17-24) Si, hamas un persona mester sintie asina importante cu e no por lubida su orguyo, pidi un despensa y busca pordon. Claro cu pa un hende berdaderamente humilde, no ta asina dificil pa pidi pordon.

E Bon Efecto di un Despensa

Un mohe sabi den e Israel di pasado cu a duna un ehempel di e bon efecto cu un despensa por tin, tawata Abigail. El a pidi despensa pa algo malo cu su casa a haci. Tempo cu David, kende despues a bira Rei di Israel, tawata biba den desierto, hunto cu su hombernan el a proteha e tounan di bestia cu tawata pertenece na Nabal, casa di Abigail. Pero ora e hombernan jong di David a bai pidi Nabal pan cu awa, el a insulta nan y a core cu nan. Esei a pone David rabia y el a manda 400 homber  bai regla cuenta di Nabal y su famia di cas. Ora Abigail a haya sa di e situacion, el a sali pa e bai topa David. Ora Abigail a mira David, el a buig cu su cara te na suela na pia di David. Anto el a bisa: “Laga e culpa ta riba ami so, mi señor. Y pa fabor, laga bo sirbiente papia cu bo, y scucha e palabranan di bo sirbiente.” Anto Abigail a splica e situacion y a regala David cuminda y awa. Riba esei, David a bis’e: “Bai bo cas na pas. Mira, mi a scucha bo y a concede bo peticion.”—1 Samuel 25:2-35.

E actitud humilde di Abigail hunto cu su disculpa pa e comportacion bruto di su casa a spar su famia. David a asta gradicie pasobra el a evita cu David lo a bira culpabel di sanger. Aunke no ta Abigail a trata David y su hombernan malo, el a acepta e culpa pa su famia y a haci pas cu David.

Un otro ehempel di un persona cu tawata sa ki ora e mester a pidi despensa ta apostel Pablo. Un biaha el a hay’e ta defende su mes dilanti e Sanedrin, e corte superior Hudiu. E palabranan franco di Pablo a haci e sumo sacerdote Ananias furioso y pesei el a manda esnan para banda di Pablo pa dal e den su boca. E ora ei Pablo a bis’e: “Dios lo dal bo, abo muraya blancha! Anto abo ta sinta einan pa husga mi segun Lei, y contra Lei bo ta duna ordo pa dal mi?” Ora esnan cu tawata presente a acusa Pablo di ta insultando e sumo sacerdote, mesora e apostel a admiti su eror, bisando: “Mi no tawata sa, rumannan, cu e tawata sumo sacerdote; pasobra ta para skirbi: ‘No papia malo di un gobernante di bo pueblo.’”—Echonan 23:1-5.

Pablo tawatin rason den loke el a bisa, esta, cu esun nombra como hues lo no recori na violencia. Sinembargo, el a pidi despensa pasobra sin cu e tawata sa el a papia cu e sumo sacerdote den un manera cu por a ser considera como falta di respet. * Pablo su despensa a habri caminda pa e Sanedrin scucha loke e kier a bisa. Door cu Pablo tawata na haltura di un controversia cu tawatin entre e miembronan di corte, el a bisa nan cu nan tawata husg’e pasobra e tawata kere den e resureccion. Consecuentemente, a lanta un pleito formal den cua e Farizeonan a tuma parti pa Pablo.—Echonan 23:6-10.

Kico nos por siña for di e dos ehempelnan di Bijbel aki? Den ambos caso, un despensa sinsero a tene e liñanan di comunicacion habri. Pues ora nos pidi despensa nos por logra haci bon cu otro. Si, door di admiti cu nos a faya y pidi despensa pa e daño cu nos a causa, nos ta habri oportunidad pa por sigui papia na un manera sano cu otro.

‘Pero Mi No A Haci Nada Malo’

Ora nos haya sa cu nos a ofende un persona cu loke nos a bisa of haci, kisas nos ta haya cu e persona ta irasonabel of mucho crepchi.  Sinembargo, Hesucristo a conseha su disipelnan: “Pesei, si bo presenta bo ofrenda na altar, y ayanan bo corda cu bo ruman tin algo contra bo, laga bo ofrenda ayanan dilanti di altar, y bai; reconsilia cu bo ruman prome, y despues bin presenta bo ofrenda.”—Mateo 5:23, 24.

Por ehempel, un ruman por haya cu ta abo a peca contra dje. Den un situacion asina, Hesus ta bisa cu bo tin cu bai y “reconsilia cu bo ruman”, sea cu bo ta haya cu ta abo a haci malo na bo ruman of no. Segun e texto Griego, e palabra cu Hesus a uza aki ta ‘nifica cu ambos partido ta reconoce cu nan a haci malo na otro.’ (Vine’s Expository Dictionary of Old and New Testament Words) En berdad, ora dos hende tin un desacuerdo cu otro, kisas tur dos tin un tiki falta, siendo cu tur dos ta imperfecto y tin tendencia di faya. Por lo general, tur dos lo tin cu admiti nan falta.

E cuestion no ta asina tanto ken tin rason y ken no, sino ken lo tuma e iniciativa pa haci bon cu otro. Ora apostel Pablo a ripara cu e cristiannan na Corinto tawata hibando otro sirbidonan di Dios corte pa pleitonan personal manera desacuerdonan financiero, el a corigi nan: “Pakico boso no ta prefera di sufri inhusticia? Pakico boso no ta prefera di wordo perhudica?” (1 Corintionan 6:7) Aunke Pablo a bisa esaki pa desconseha cristiannan di bai bringa nan desacuerdonan personal den corte di mundo, e principio ta masha cla: Pas entre compañeronan di adoracion ta mas importante cu proba ken tin rason of laga. Si nos tene e principio aki na mente ta mas facil pa nos pidi despensa pa un fayo cu un persona ta pensa cu nos a comete contra dje.

Mester Ta Sinsero

Pero algun hende ta pidi despensa sin tin mester. Por ehempel, na Hapon bo por tende e palabra sumimasen, un expresion tipico cu ta ser uza pa pidi despensa, miles di biaha. Un persona por asta uz’e pa yama danki, mientras e ta sinti su mes incomodo pasobra e no por paga bek un fabor ricibi. Door cu por uz’e den asina tanto manera, algun hende ta haya cu e palabra ta ser uza demasiado y ta puntra nan mes si esnan cu ta bis’e ta realmente sinsero. Den otro culturanan tambe hende tin nan forma di pidi despensa sin tin mester.

Sea cual sea e idioma, ta importante pa bo ta sinsero ora bo ta pidi despensa. Hende mester por sinti for di e palabranan cu bo ta uza y bo tono di bos cu di berdad e cos ta duel bo. Hesucristo a siña su disipelnan den e Sermon Riba Sero: “Laga bo ‘si’ ta ‘si’, of bo ‘no’ ta ‘no’; y tur loke ta mas cu esei ta for di e malbado.” (Mateo 5:37) Ora bo ta pidi despensa, wak pa bo ‘meen’ loke bo ta bisa! Djis pa ilustra: Un homber tawata para den rei pa check in na aeropuerto. Su maleta a dal den e señora para su dilanti y el a pidie despensa. Un par di minuut despues, ora e rei a move, su maleta a bolbe mishi cu e señora. Atrobe e homber a pidi despensa na un manera cortes. Pero ora mescos a sosode atrobe pa di tres bes, esun cu tawata compaña e señora a bisa e homber cu si e realmente tawata meen loke el a bisa, e mester percura pa su maleta no dal e señora mas. Si, un despensa sinsero mester ta compaña pa e determinacion pa no ripiti e eror.

Si nos ta sinsero, ora nos pidi despensa nos mester admiti tambe cualkier cos malo cu nos por a haci. Nos mester pidi pordon y haci tur nos esfuerso pa drecha e daño. En buelta, esun cu a ser ofendi mester ta dispuesto mesora pa pordona esun cu a haci malo pero cu a repenti. (Mateo 18:21, 22; Marco 11:25; Efesionan 4:32; Colosensenan 3:13) Siendo cu ambos partido ta imperfecto, no ta semper facil pa haci pas. No obstante, si nos kier haci bon cu otro, ta importante pa nos cuminsa na pidi despensa.

Ora No Ta Sabi pa Pidi Despensa

Aunke un disculpa tin un bon efecto y ta contribui na pas, un persona sabi ta evita di uza expresionnan asina ora no ta apropiado  pa haci esei. Supone por ehempel cu e cuestion tin di aber cu nos integridad na Dios. Tempo cu Hesucristo tawata riba tera, “el a humiya su mes y a bira obediente te na morto, si, morto na un staca di tormento.” (Filipensenan 2:8, NW) Sinembargo, e no a pidi despensa pa su creencianan pa por a alivia su sufrimento. Y Hesus no a pidi despensa ora e sumo sacerdote a bis’e na mal manera: “Mi ta ordena bo bou di huramento pa den nomber di e Dios bibo bo bisa nos si ta abo ta e Cristo, e Yiu di Dios.” En bes di haya miedo y pidi pordon, Hesus a contest’e cu curashi: “Bo mes a bisa esei; sinembargo, mi ta bisa boso, for di awor boso lo mira e Yiu di hende sinta na man drechi di e Todopoderoso, y biniendo riba e nubianan di shelo.” (Mateo 26:63, 64) Hesus no a pensa mes riba e idea di haci pas cu e sumo sacerdote a costo di su integridad na su Tata, Yehova Dios.

Cristiannan ta mustra honor y respet na hende cu tin autoridad. Pero nan no tin nodi pidi despensa pasobra nan ta obedece Dios ni pasobra nan ta stima nan rumannan.—Mateo 28:19, 20; Romanonan 13:5-7.

Niun Obstaculo pa Haci Bon cu Otro

Nos ta comete fayo awe pasobra nos a hereda imperfeccion y pica for di nos antepasado Adam. (Romanonan 5:12; 1 Huan 1:10) E condicion pecaminoso di Adam tawata e resultado di su rebelion contra e Creador. Pero originalmente, Adam y Eva tawata perfecto y sin pica, y Dios a priminti di haci hende perfecto atrobe. Lo E elimina pica y tur su efectonan.—1 Corintionan 15:56, 57.

Djis pensa kico esei lo nifica! Den su conseho tocante uzo di lenga, Hesus su mita ruman Santiago a bisa: “Si un hende no ta trompica den loke e ta bisa, e ta un hende perfecto, capas pa frena henter e curpa tambe.” (Santiago 3:2) Un hende perfecto por controla su lenga pa e no tin nodi pidi despensa cu el a haci mal uzo di dje. E ta ‘capas pa frena henter su curpa.’ Esta maravioso lo ta ora nos bira perfecto! E tempo ei lo no tin nada mas cu por stroba hende di ta na pas cu otro. Pero mientrastanto, un tremendo yudansa pa haci bon cu otro ta ora nos ta pidi un despensa sinsero y na su luga pa un fayo cu nos a comete.

[Nota]

[Plachi na pagina 5]

Kico nos por siña for di e ehempel di Pablo?

[Plachi na pagina 7]

Ora tur hende ta perfecto, lo no tin nada cu por stroba hende di ta na pas cu otro