Fortalece Bo Mannan

BIJBEL ta menciona man masha hopi biaha. E texto na Hebreo ta uza dichonan cu tin di aber cu man den varios manera. Por ehempel, man limpi ta simbolisa inocencia. (2 Samuel 22:21; Salmo 24:3, 4) Habri man ta nifica mustra generosidad na otro hende. (Deuteronomio 15:11; Salmo 145:16) Y ora un persona risca su bida, nan ta bisa cu el a pone su alma den su man. (1 Samuel 19:5; NW) Ora bo laga bo mannan cai ta nifica cu bo ta desanima. (2 Cronicanan 15:7; NW) Y fortalece un persona su mannan ta nifica cu bo ta curash’e y dun’e forsa pa tuma accion.—1 Samuel 23:16; NW.

Awe ta masha urgente pa nos fortifica nos mes, of fortalece nos mannan manera e texto na Hebreo ta bisa. Nos ta bibando den “temponan trabahoso.” (2 Timoteo 3:1) Ora nos desanima, como hende nos tin e tendencia di entrega, esta, di laga nos mannan cai. Ta masha normal pa mira teenagernan stop di bai scol, esposonan bandona nan famia y mamanan bandona nan yiunan. Como cristian, nos tin cu fortalece nos mes pa nos por wanta e pruebanan cu nos ta confronta den nos sirbishi na Dios. (Mateo 24:13) Ora nos persevera nos ta haci Yehova su curason contento.—Proverbionan 27:11.

Con pa Fortalece Nos Mannan

E Hudiunan den tempo di Esdras mester a fortalece nan mannan pa nan por a completa e reconstruccion di e tempel di Yehova na Herusalem. Con nan a haci esei? E relato ta bisa: “Cu goso nan a celebra e fiesta di pan sin zuurdeeg shete dia largo, pasobra SEÑOR a haci nan regociha y a cambia curason di rei di Asiria pa cu nan, pa curasha nan [fortalece nan mannan, segun e texto Hebreo] den e trabou riba e cas di Dios, e Dios di Israel.” (Esdras 6:22) Ta bisto cu Yehova a uza su forsa activo pa incita “rei di Asiria” pa permiti Dios su pueblo bolbe, y El a motiva e pueblo mentalmente pa nan por a caba cu e trabou cu nan a cuminsa.

Despues, ora cu mester a drecha e murayanan di Herusalem, Nehemias a fortalece man di su rumannan pa nan cumpli cu e tarea. Nos ta lesa: “Y mi a conta nan con e man di mi Dios tawata bon riba mi, y tambe tocante di e palabranan di rei cu el a papia cu mi. E ora ei nan a bisa: ‘Laga nos lanta y traha.’ Asina nan a pone man na e bon trabou.” Cu nan mannan fortaleci, Nehemias y su compañeronan Hudiu por a reconstrui e murayanan di Herusalem den solamente 52 dia!—Nehemias 2:18; 6:9, 15.

Asina tambe Yehova ta fortalece nos pa nos por predica e evangelio di Reino. (Mateo 24:14) E ta haci esei door di ‘provee nos cu tur cos bon cu nos tin mester pa cumpli cu su boluntad.’ (Hebreonan 13:21, BPK) El a duna nos e miho instrumentonan cu tin. Nos tin Bijbel, y literatura basa riba Bijbel—manera buki, revista,  foyeto, tratado, video- y audiocassette—pa nos uza pa alcansa hende rond mundo. De echo, nos publicacionnan ta disponibel na mas cu 380 idioma. Ademas, mediante reunionnan di congregacion, asamblea y congreso, Yehova ta educa y entrena nos pa uza e ekipo excelente aki pa cumpli cu nos sirbishi.

Aunke Yehova ta fortalece nos den varios manera, E ta spera tambe cu nos mes ta haci esfuerso. Corda loke profeta Eliseo a bisa Rei Joas (of Jehoas), kende a bin pidi Eliseo yudansa pa e bringa contra e invasornan Sirio. Eliseo a bisa e rei pa e cohe algun flecha y dal riba suela cu nan. E relato di Bijbel ta bisa: “El a dal tres biaha y a stop. E ora ei e homber di Dios a rabia cu ne y a bisa: ‘Bo mester a bati cinco of seis biaha, e ora ei lo bo a dal Siria te ora cu bo a destru’e. Ma awor lo bo dal Siria tres biaha so.’” (2 Reinan 13:18, 19) Door cu Joas no a haci esfuerso celoso, e tawatin exito limita den su lucha contra e Sirionan.

E mesun principio ta conta pa nos si nos kier cumpli cu e tarea cu Yehova a duna nos. En bes di precupa tocante e obstaculonan cu tin den nos caminda of tocante con dificil nos tarea ta, nos mester cumpli cu ne cu celo y di henter curason. Nos mester fortalece nos mannan y depende riba Yehova pa yudansa.—Isaias 35:3, 4.

Yehova Lo Fortalece Nos

Yehova lo no keda sin yuda nos y fortalece nos pa haci su boluntad. Claro cu Yehova lo no bai haci milager ni haci tur cos pa nos. E ta spera cu nos ta haci nos parti, entre otro, lesa Bijbel tur dia, prepara pa nos reunionnan y asisti na nan regularmente, participa den sirbishi di veld mas tanto posibel y haci oracion na dje constantemente. Si nos ta cumpli cu nos parti fielmente y diligentemente tanten cu nos tin e oportunidad, Yehova lo duna nos forsa pa haci loke E ta spera di nos.—Filipensenan 4:13, NW.

Pensa riba e caso di un cristian cu a perde su esposa y su mama den e mesun aña. E tawata den su dolor ainda ora cu su suegra a bandona su yiu homber y e caminda di bida cristian. “Mi a siña cu no ta den nos man pa scohe ki prueba nos kier haya, ni ki ora ni cuanto bes”, e ruman homber aki a bisa. Unda e ta haya forsa pa sigui padilanti? “Oracion y studio personal tawata e salbabida cu a tene mi cabes riba awa. Y e apoyo di mi rumannan spiritual a consola mi hopi. Mas cu tur cos, mi a realisa cu ta masha importante pa nos desaroya un bon relacion personal cu Yehova prome cu situacionnan dificil presenta.”

Sea cual sea bo experencia den bida, keda determina pa pone pleno confiansa den Yehova y haci bon uzo di tur e areglonan cu e ta haci pa fortalece bo. E ora ei lo bo por duna Yehova un sirbishi di e miho calidad y asina duna alabansa y honor na su nomber precioso.—Hebreonan 13:15.

[Plachi na pagina 31]

Door cu Joas no a haci esfuerso celoso, e tawatin exito limita den su lucha contra e Sirionan