Bo Conoce e Storia di Safan y Su Famia?

DURANTE bo lesamento di Bijbel bo a yega di lesa tocante Safan y algun miembro di su famia prominente? Ken nan tawata? Kico nan a haci? Ki les nos por siña for di nan?

Bijbel ta cuminsa papia di “Safan, yiu homber di Azalia, yiu homber di Mesulam”, en conexion cu e restauracion di adoracion berdadero cu Yosias [Hosias] a haci rond di aña 642 prome cu nos era. (2 Reinan 22:3) Durante e siguiente 36 añanan, te na destruccion di Herusalem na aña 607 prome cu nos era, nos ta bin haya sa ken ta su cuater yiu hombernan, Ahicam, Elasa, Gemarias y Yaazanias, y tambe su dos nietonan cu ta Mikaias y Gedalias. (Wak e mapa.) Segun Encyclopaedia Judaica, “e famia di Safan tawatin un posicion dominante den gobierno [e reinado di Huda] y a ocupa e funcion di scriba di rei for di tempo di Yosias te na e Exilio.” Un analisis di loke Bijbel ta bisa tocante Safan y su famia lo yuda nos compronde con nan a apoya profeta Yeremias y tambe e adoracion berdadero di Yehova.

Safan Ta Apoya Adoracion Berdadero

Ora Rei Yosias tawatin rond di 25 aña di edad na aña 642 prome cu nos era, Safan tawata sirbi como scriba, esta, secretario y copista, di rei. (Yeremias 36:10) Kico e trabou aki a encera? E enciclopedia menciona anteriormente ta declara cu un scriba y secretario den cas real tawata un consehero hopi yega di rei, cu tawata encarga cu asuntonan financiero, bon intermediario, bon na haltura di leinan internacional y tratadonan comercial. Pues, como secretario di cas real, Safan tawata un di e personanan mas prominente den e reinado.

Dies aña mas prome, e hoben Yosias “a cuminsa busca e Dios di su tata David.” Door cu Safan aparentemente tawata hopi mas grandi cu Yosias, e por a sirbi como un bon consehero spiritual pa e y tambe e por a apoya Yosias su prome campaña pa restaura adoracion berdadero. *—2 Cronicanan 34:1-8.

Ora nan tawata drecha e tempel, nan a haya “e buki di lei”, y Safan “a les’e den presencia di rei.” E contenido a shock Yosias y el a manda un delegacion di hombernan di confiansa serca e profeta mohe Hulda pa consulta Yehova tocante e buki. E rei a mustra su confiansa den Safan y su yiu homber Ahicam door di inclui nan tambe den e delegacion.—2 Reinan 22:8-14; 2 Cronicanan 34:14-22.

Esaki ta e unico caminda cu Bijbel ta menciona kico Safan mes a haci. Den otro versiculonan, Bijbel ta referi na dje solamente como tata of welo. Desendientenan di Safan tawatin contacto estrecho cu profeta Yeremias.

Ahicam y Gedalias

Manera a nos a ripara caba, Safan su yiu homber Ahicam ta e prome cu ta ser menciona relaciona cu e delegacion cu a ser manda serca e profeta mohe Hulda. Un diccionario biblico ta bisa: “Aunke e Bijbel Hebreo no ta  menciona e titulo di Ahicam, ta bisto cu e tawatin un posicion halto.”

Rond di 15 aña despues di e incidente ei, Yeremias su bida tawata den peliger. Ora el a spierta e pueblo cu Yehova tin intencion di destrui Herusalem, “e sacerdotenan, e profetanan y henter e pueblo a gar’e, bisando: ‘Bo mester muri!’” Kico a sosode e ora ei? E relato ta sigui bisa: “Ahicam, yiu homber di Safan, a proteha Yeremias, asina cu nan no a entreg’e den man di pueblo pa mat’e.” (Yeremias 26:1-24) Kico esaki ta mustra? Segun The Anchor Bible Dictionary: “E incidente aki no solamente ta mustra cuanto influencia Ahicam tawatin, sino tambe con e, mescos cu e otro miembronan di e famia di Safan, a trata Yeremias bon.”

Rond di 20 aña despues, ora cu e Babilonionan a destrui Herusalem na 607 prome cu nos era, y a hiba mayoria di hende den exilio, nan a nombra Safan su nieto Gedalias, yiu di Ahicam, como gobernante riba e Hudiunan cu a resta. E tambe a percura pa Yeremias mescos cu e otro miembronan di famia di Safan? E registro biblico ta bisa: “E ora ei Yeremias a bai Mizpa, serca Gedalias, yiu homber di Ahicam, y a keda serca dje.” Despues di un par di luna, nan a mata Gedalias, y e resto di Hudiunan a hiba Yeremias hunto cu nan ora nan a muda bai Egipto.—Yeremias 40:5-7; 41:1, 2; 43:4-7.

Gemarias y Mikaias

Safan su yiu homber Gemarias y su nieto Mikaias a hunga un papel importante den e susesonan cu Yeremias capitulo 36 ta describi. Tawata rond di aña 624 prome cu nos era, e di cinco aña di gobernacion di Rei Yoakim. Baruk, secretario di Yeremias, a lesa na bos halto e palabranan di Yeremias for di e buki den e cas di Yehova, “den sala di Gemarias, yiu homber di Safan.” Pesei, “Mikaias, yiu homber di Gemarias, yiu homber di Safan, a tende tur e palabranan di SEÑOR for di e buki.”—Yeremias 36:9-11.

Mikaias a notifica su tata y tur e otro oficialnan di e rol, y nan tur kier a tende loke e rol aki a bisa. Con nan a reacciona? “Awor a sosode cu ora nan a tende tur e palabranan, un a bira wak otro tur spanta, y a bisa Baruk: ‘Siguramente nos lo reporta tur e palabranan aki na rei.’” Sinembargo, prome cu nan a bai papia cu rei, nan a conseha Baruk: “Abo y Yeremias, bai sconde, y no laga ningun hende sa unda boso ta.”—Yeremias 36:12-19.

Manera nan a anticipa, e rei a rechasa e mensahe di e rol y a kim’e completamente. Aunke algun di e oficialnan, incluso Safan su  yiu homber Gemarias, “a roga rei pa no kima e rol, e no kier a scucha nan.” (Yeremias 36:21-25) E buki Jeremiah—An Archaeological Companion ta conclui: “Gemarias tawata un bon ayudante di Yeremias den e palacio di Rei Yoakim.”

Elasa y Yaazanias

Na aña 617 prome cu nos era, Babilonia a tuma mando di e reinado di Huda. Miles di Hudiu, “tur e capitannan y tur e hombernan poderoso y balente . . . y tur artesano y smid”, a ser hiba den exilio, incluso profeta Ezekiel. Matanias, kende su nomber e Babilonionan a cambia pa Zedekias, a bira e Rei subordina nobo. (2 Reinan 24:12-17) Despues Zedekias a manda un delegacion Babilonia, y Elasa, yiu di Safan, tambe tawata den dje. Yeremias a confia Elasa cu un carta cu a contene un mensahe importante cu Yehova a manda pa e Hudiunan den exilio.—Yeremias 29:1-3.

Pues Bijbel ta mustra cu Safan, tres di su yiu hombernan, y dos di su nietonan a uza nan posicion di autoridad pa apoya adoracion berdadero y tambe Yeremias, e profeta fiel. Kico di Safan su di cuater yiu homber, Yaazanias? Distinto for di e otro miembronan di e famia di Safan, aparentemente e si a participa den adoracion di dios falso. Den e di seis aña di Ezekiel su exilio den Babilonia, of rond di aña 612 prome cu nos era, e profeta a haya un vision den cua el a mira 70 homber ta ofrece ciencia na idolo den e tempel na Herusalem. Yaazanias tawata entre nan, y ta su nomber so a ser menciona. Kisas esaki ta indica cu e tawata un miembro prominente den e grupo aki. (Ezekiel 8:1, 9-12) Yaazanias su ehempel ta demostra cu e echo cu un persona a lanta den un famia deboto no ta un garantia cu e ta bira un fiel adorado di Yehova. Cada ken ta responsabel pa su propio accionnan.—2 Corintionan 5:10.

Echonan Historico di Safan y Su Famia

Durante e tempo cu Safan y su famia a hunga un papel den e susesonan cu a tuma luga den Herusalem, uzo di seyo a bira masha comun den Huda. Nan a uza seyo pa seya of firma documento, y nan tawata traha e seyonan aki di piedra precioso, metal, ivor of glas. Por lo general nan tawata laga graba riba nan e nomber di e doño, su fam, y de bes en cuando, su titulo.

Hende a haya miles di grabacion di seyo na Hebreo riba klei. Profesor Nahman  Avigad, experto di epigrafia Hebreo, e estudio di inscripcionnan antiguo, a bisa: “Inscripcionnan di seyo ta e unico fuente di epigrafia Hebreo cu ta menciona personahenan conoci di Bijbel.” Nan a haya inscripcion di seyo di Safan of di miembronan di su famia? Si, nomber di Safan y di su yiu homber Gemarias ta aparece riba e seyo cu tin na pagina 19 y 21.

Expertonan ta bisa tambe cu posiblemente tin grabacionnan di seyo cu ta referi na cuater otro miembro di e famia. Nan ta Azalia, tata di Safan, Ahicam yiu homber di Safan, Gemarias yiu homber di Safan y Gedalias, na kende aparentemente un seyo a referi como esun cu tin posicion di autoridad “riba e Cas.” Nan ta pensa cu e di cuater seyo a pertenece na Gedalias, nieto di Safan, aunke su tata, Ahicam, no ta ser menciona. Su titulo riba e inscripcion di e seyo ta indica cu e tawata un di e oficialnan mas halto di estado.

Kico Nos Por Siña for di Tur Esaki?

Safan y su famia si a pone un bon ehempel! Nan a uza nan posicion prominente pa apoya tanto e adoracion berdadero como fiel Yeremias. Nos tambe por uza nos recursonan y nos influencia pa apoya Yehova su organisacion y nos compañeronan di adoracion.

Nos ta enrikece y aumenta nos fe, ora nos no ta djis lesa Bijbel regularmente ma tambe examin’e profundamente y sera conoci cu Yehova su testigonan di antes manera Safan y e miembronan di su famia. Pasobra e personanan aki tambe ta forma parti di e “nubia asina grandi di testigonan” kende nan ehempelnan nos por imita.—Hebreonan 12:1.

[Nota]

[Cuadro na pagina 22]

Hulda—Un Profeta Mohe Prominente

Despues cu Rei Yosias a tende e lesamento di “e buki di lei” cu nan a haya den tempel, el a manda Safan y cuater otro oficial di rango halto pa “consulta cu SEÑOR” tocante e buki. (2 Reinan 22:8-20) Unda e delegacion por a haya contesta? E tempo ei tur e profeta- y escritornan di Bijbel, incluso Yeremias y kisas Nahum y Sofonias, tawata biba na Huda. Sinembargo, e delegacion a bai serca Hulda e profeta mohe.

Segun e buki Jerusalem—An Archaeological Biography: “E cos remarcabel di e episodio aki ta cu no tawatin ningun comentario riba e aspecto masculino y femenino di e historia aki. Ningun persona no a ni puntra nan mes si tawata corecto pa un comite cu a consisti di hende homber so bai cu e Rol di e Lei serca un hende mohe pa haya sa kico e ta nifica. Ora cu Hulda a bisa cu e tawata e palabra di Señor, ningun hende no a duda cu e tawatin autoridad pa determina e asunto. Hopi bes expertonan cu ta determina e papel di hende mohe den Israel di antes ta pasa por halto di e episodio aki.” Ta claro cu el a ricibi e mensahe for di Yehova.

[Diagram/Plachi na pagina 21]

(Pa texto den su formato completo, wak publicacion)

Genealogia di Safan

Mesulam

↓

Azalia

↓

Safan

↓ ↓ ↓ ↓

Ahicam Elasa Gemarias Yaazanias

↓ ↓

Gedalias Mikaias

[Plachi na pagina 20]

Gemarias y otro hende a roga Yoakim pa no kima e rol di Yeremias

[Plachi na pagina 22]

Aunke Yaazanias tawata miembro di e famia di Safan, den vision Ezekiel a mir’e ta adora dios falso

[Reconocento di plachi na pagina 19]

Cortesia di Israel Antiquities Authority

[Reconocento di plachi na pagina 21]

Gemarias y otro hende a roga Yoakim pa no kima e rol di Yeremias