Loke Nos Por Siña for di e Relato di Hesus Su Nacemento

MIYONES di hende ta keda fasina cu e susesonan relaciona cu nacemento di Hesus. Djis wak tur e pesebrenan cu hende ta pronk y e cantidad di obranan dramatico di Pasco cu ta pasa rond mundo. E susesonan relaciona cu Hesus su nacemento ta fasinante en berdad. Pero no ta pa entretene hende nan a ser skirbi den Bijbel. No. Nan ta forma parti di Bijbel, inspira door di Dios pa siña y corigi nos.—2 Timoteo 3:16.

Si Dios tawata kier pa cristiannan celebra e nacemento di Hesus, Bijbel lo a duna nos e fecha exacto cu el a nace. Nos por haya e fecha ei den Bijbel? Despues di menciona cu Hesus a nace tempo cu wardadonan di bestia tawata pasa anochi pafo cu nan tounan, Albert Barnes, un experto di Bijbel di siglo 19 a conclui: “Esaki ta mustra claramente cu nos Salbador a nace prome cu 25 di december . . . Rond di e tempo ei ta haci friu, principalmente den e region halto y di sero banda di Bethlehem. Dios a sconde e fecha di [Hesus] su nacemento. . . . Y no ta importante pa sa ki dia el a nace tampoco, sino Dios lo a percura pa e fecha ta skirbi.”

Di otro banda, e cuater skirbidonan di Evangelio ta informa nos precis ki dia Hesus a muri. Esei a sosode den lente, riba dia di Pasco Hudiu, un celebracion cu ta cai riba dia 14 di e luna Hudiu cu yama nisan. Ademas, Hesus a manda su siguidonan spesificamente pa nan conmemora e dia ei na memoria di dje. (Lucas 22:19) No tin ningun mandamento similar den Bijbel cu ta bisa cu mester celebra Hesus su dia di nacemento, ni dia di nacemento, of hacimento  di aña, di ningun otro hende tampoco. Lamentablemente, tin bes cu controversia tocante e fecha di Hesus su nacemento ta kita hende su atencion for di algun suseso hopi importante cu a tuma luga den e temporada ei.

Mayornan Scohi Door di Dios

Di tur e miles di famianan cu tawatin na Israel, ki sorto di mayor Dios a scohe pa cria su Yiu? El a bai tras di cosnan manera status y rikesa? No. Mas bien, Yehova a presta atencion na e cualidadnan spiritual di e mayornan. Examina e cantica di alabansa cu Maria a canta despues cu el a haya sa cu lo e tin e privilegio di bira mama di e Mesias. E ta skirbi na Lucas 1:46-55. Entre otro el a bisa: “Mi alma ta engrandece Señor, . . . Pasobra el a mira e estado humilde di su sirbiente.” El a considera su mes ‘di estado humilde’, un sirbiente di Yehova. Pero tin un cos mas importante: e bunita expresionnan di alabansa den e cantica di Maria ta mustra nos cu e tawata un hende spiritual cu a conoce e Scritura bon. Apesar cu e tawata un yiu pecado di Adam, e tawata esun miho cu Dios por a scohe pa bira mama terenal di e Yiu di Dios.

Kico nos por bisa di Maria su casa, cu mester a bira Hesus su tata di criansa? Hose tawata un homber cu experencia como carpinte. Debi cu e tawata dispuesto di traha duro cu su mannan, e por a cria un famia cu a bin consisti di cinco yiu homber y por lo menos dos yiu mohe. (Mateo 13:55, 56) Hose no tawata rico. Ora a yega tempo pa Maria presenta su prome yiu na e tempel di Dios, Hose lo mester tawatin duele cu e no tawatin moda pa ofrece un carne como sacrificio, manera e Lei a bisa. En bes di esei nan mester a haci uzo di un excepcion cu e Lei a haci pa hende pober. E Lei di Dios a bisa lo siguiente tocante un hende mohe cu haya su prome yiu homber: “Si e no por duna un lamchi, e ora ei e mester tuma dos tortelduif of dos pichon, esun como un ofrenda kima y e otro como un ofrenda pa pica; y e sacerdote mester haci expiacion p’e, y e lo keda limpi.”—Levitico 12:8; Lucas 2:22-24.

Bijbel ta bisa cu Hose tawata “un homber husto.” (Mateo 1:19) Por ehempel, e no a tene relacion cu su casa birgen te despues cu Hesus a nace. Esei a yuda evita cualkier malcomprendemento cu lo por a surgi tocante ken ta Hesus su berdadero Tata. Lo no tawata facil pa un pareha resien casa keda sin tene relacion sexual bibando bou dje mesun dak. Asina nan a mustra cu nan tur dos a balora e echo cu Dios a scohe nan pa lanta Su Yiu.—Mateo 1:24, 25.

Hose tambe tawata un hende spiritual, mescos cu Maria. E tawata stop cu trabou tur aña pa hiba su famia di Nazaret pa Herusalem, un biahe di tres dia, pa nan ta presente na e celebracion anual di Pasco Hudiu. (Lucas 2:41) Ademas, Hose lo mester a entrena Hesus na mucha den e custumber semanal di participa den adoracion na e sinagoga local, caminda nan tawata lesa y splica e Palabra di Dios. (Lucas 2:51; 4:16) Pues, no tawatin duda cu Dios a scohe e mama humano y e tata di criansa corecto pa su Yiu.

Un Gran Bendicion pa Wardadonan Humilde

Apesar cu tawata dificil pa su casa, cu tawata na estado nuebe luna, Hose a biaha bai e stad di su antepasadonan pa participa den un censo, manera Cesar a manda. Ora e pareha a yega  Bethlehem, nan no por a haya un luga pa keda den e stad yen di hende. Pues, sircunstancia a obliga nan di keda den un stal. Ei Hesus a nace, y nan a pon’e drumi den un baki di cuminda pa bestia. Pa fortalece nan fe, Yehova a duna e mayornan humilde aki un confirmacion cu e nacemento aki en berdad tawata boluntad di Dios. Ken el a manda pa fortalece nan? Un delegacion di homber prominente for di Bethlehem? No. En bes di esei Yehova Dios a revela e asunto na un par di wardado di bestia, hende trahado, cu tawata pasa anochi pafo cuidando nan tounan.

E angel di Dios a aparece na nan y a bisa nan pa bai Bethlehem, caminda nan lo a haya e Mesias resien naci “drumi den un pesebre.” E hombernan humilde aki a spanta of scandalisa di tende cu e Mesias resien naci tawata den un stal? Di ningun manera! Sin tarda, nan a laga nan tounan y a bai Bethlehem. Ora nan a haya Hesus, nan a conta Hose cu Maria kico e angel di Dios a bisa. Sin duda, esaki a fortalece e pareha su fe di cu tur cos tawata canando manera Dios a propone. Pa loke ta e wardadonan di bestia, nan “a bai bek, glorificando y alabando Dios pa tur loke nan a tende y mira.” (Lucas 2:8-20) Si, Yehova a scohe bon di revela e asunto na wardadonan cu tawatin temor di dje.

Tur esaki ta siña nos ki sorto di hende nos mester ta pa nos por tin Yehova su fabor. Nos no tin nodo di busca posicion den comunidad ni rikesa. Mas bien, mescos cu Hose, Maria y e wardadonan di bestia, nos tin cu obedece Dios y demostra nos amor p’e door di duna interesnan spiritual mas importancia cu cos material. Si, nos por siña algun les excelente door di medita riba e historia di e susesonan cu a tuma luga rond di e tempo cu Hesus a nace.

[Plachi na pagina 7]

Kico e echo cu Maria a ofrece dos tortelduif ta mustra?

[Plachi na pagina 7]

Dios a scohe pa revela e nacemento di Hesus na un par di wardado humilde