Mira Asuntonan Manera Dios Ta Mira Nan

DIA 14 di september 2002 na New York, Merca, tawatin un dushi weer. Riba e dia ei un multitud internacional di 6.521 persona a reuni na e Centro Educacional di Patterson y dos otro compleho di edificio di Testigonan di Yehova den e region. Nan a bini hunto pa presencia e graduacion di e di 113 klas di e Scol Biblico di Galad di Watchtower. E studiantenan a bini di 14 pais y e ultimo cinco lunanan cu a pasa, nan a prepara pa bai sirbi como misionero na e 19 paisnan na cua nan a ser asigna.

Carey Barber, miembro di Cuerpo Gobernante di Testigonan di Yehova cu tin 97 aña, a sirbi como presidente di e programa. El a hala atencion na e trayectoria di casi 60 aña di e Scol di Galad cu a prepara miles di ruman pa nan drenta e sirbishi di misionero. Ruman Barber a bisa: “No ta exagera pa bisa cu nan entrenamento avansa a duna hopi bon resultado. Literalmente centenares di miles di hende humilde rond mundo a dedica nan bida na Yehova y a acepta adoracion berdadero y cuminsa rindi sirbishi sagrado debi na e yudansa cu nan a ricibi for di misioneronan entrena.”

Prome cu e studiantenan aki a bai Galad, hopi di nan a demostra caba cu nan kier haci mas den sirbishi. Den un esfuerso pa alcansa un poblacion grandi di abla Chines den nan teritorio natal na Canada, un pareha a bai les di e idioma mandarin pa mas cu un aña largo. Un otro pareha a cuminsa studia Albanes riba nan mes y cu tempo nan a muda bai Albania pa yuda e cantidad creciente di hende einan cu ta interesa den Bijbel. Otronan den e klas a bini Galad for di Hungria, Guatemala y Republica Dominicana, paisnan na cua nan a muda bai pa por sirbi caminda tawatin un necesidad grandi pa maestronan di e Palabra di Dios.

Awor, prome cu nan sali pa nan asignacion na Africa, Oost Europa, Centro y Sur America, y Lehano Oriente, tur e graduadonan a haya animacion pa tuma Dios na cuenta den tur loke nan ta haci.

Mira Cosnan for di e Punto di Bista di Dios

Despues di su palabranan di introduccion, Ruman Barber a introduci Maxwell Lloyd, miembro di e Comite di Sucursal di Merca. El a enfatisa e tema “Mira Tur Cos for di e Punto di Bista di Dios.” Ruman Lloyd a hala atencion na e ehempel di David y di e Yiu di Dios, Hesus. (1 Samuel 24:6; 26:11; Lucas 22:42) Despues cu e orado a recorda e studiantenan cu nan studio di Bijbel durante cinco luna a entrena nan pa mira cosnan for di e punto di bista di Dios, el a puntra nan: “Ora boso ta conduci studio di Bijbel cu e hendenan den boso asignacion nobo, boso lo yuda nan rasona riba asuntonan desde e punto di bista di Dios?” Y tocante dunamento di conseho, el a recomenda e studiantenan: “No bisa: ‘Segun mi opinion, ami ta pensa . . .’ En  bes di esei, yuda nan compronde kico Dios ta pensa. Si boso tene cuenta cu e punto aki, boso lo ta realmente un bendicion pa esnan cu boso ta asocia cu ne den boso asignacion.”

E siguiente ruman riba e programa tawata Gerrit Lösch, miembro di Cuerpo Gobernante. Tratando e tema “Mi Ta cu Bo”, el a hala atencion na e hopi ocasionnan cu Yehova a bisa su sirbidonan fiel: “Mi ta cu bo.” (Genesis 26:23, 24; 28:15; Hosue 1:5; Yeremias 1:7, 8) Awe tambe, nos por tin e mesun confiansa den Yehova si nos keda fiel. Ruman Lösch a bisa: “Bo ta precupa cu lo bo no haya hende pa studia Bijbel cu ne? Corda cu Yehova a bisa: ‘Mi ta cu bo.’ Bo ta precupa cu si lo bo tin suficiente den sentido material? Yehova a bisa: ‘Lo mi no bandona bo di ningun manera ni desampara bo di ningun manera.’” (Hebreonan 13:5) Den su conclusion Ruman Lösch a corda e studiantenan cu Hesus tambe a priminti cu lo e ta cu su siguidonan fiel den e trabou di haci disipel.—Mateo 28:20.

E instructor di Galad, Lawrence Bowen, a trata e tema “Lo Bo Haya Siguridad Durante Prueba Severo?” El a bisa cu debi na e cuestionnan cu a lanta den Eden, tur hende cu kier duna Yehova debocion exclusivo ta haya nan cu dificultad y, tin bes, asta pruebanan severo. El a anima e graduadonan pa sigui e ehempel di Hesus, kende a haya berdadero siguridad  door cu el a depende completamente riba Yehova y a acepta e pruebanan severo cu Yehova a permitie pasa aden pa perfecciona su obediencia. (Hebreonan 5:8, 9) Por compara Yehova cu un rafinado di oro, cu ta uza precis e grado di cayente necesario pa kita e impuresanan. Claro cu fe proba door di candela di prueba ta duna hopi mas siguridad cu oro rafina. Dicon? “Pasobra un fe rafina por wanta cualkier presion”, segun Ruman Bowen, “y e ta duna nos forsa pa wanta te na ‘fin.’”—Mateo 24:13.

Un otro instructor di Galad, Mark Noumair, a puntra: “Lo Bo Ta un Persona Agradabel?” Su tema tawata basa riba e palabranan di 1 Samuel 2:26, cu a describi Samuel como un persona ‘agradabel tanto serca SEÑOR como hende.’ Despues di a considera e ehempel di Samuel, Ruman Noumair, kende a sirbi mas cu dies aña como misionero na Africa, a bisa: “Boso tambe por bira masha agradabel den bista di Dios door di pega lealmente na e trabou cu Dios a duna boso pa haci. El a duna boso un asignacion di misionero precioso.” Despues Ruman Noumair a anima e klas di graduado pa considera nan asignacion como un responsabilidad sagrado cu Dios a duna nan, y adopta Dios su manera di pensa ora nan ta cumpli cu nan asignacion.

E periodo cu e studiantenan a pasa na scol di Galad a duna nan hopi oportunidad den fin di siman pa comparti “e echonan poderoso di Dios” cu Bijbel ta describi cu e hendenan den e area. (Echonan 2:11) En realidad, nan por a papia di e cosnan aki den dies diferente lenga. Wallace Liverance, un otro instructor di Galad, a entrevista un grupo di studiante cu a relata nan experencianan bou dje tema “‘E Echonan Poderoso di Dios’ Ta Stimula Hende na Accion.” El a remarca: “Spirito santo a impulsa e personanan den e camber ariba na Pentecoste pa papia tocante e echonan poderoso di Dios. E mesun spirito ei ta obra awe den tur sirbido fiel di Dios.” El a motiva algun asta pa siña idiomanan nobo pa nan por duna testimonio na mas tanto hende.

Conseho Practico Con pa Mira Cosnan for di e Punto di Bista di Dios

Despues di e discursonan di introduccion, Gary Breaux y William Young, miembronan di e famia di Betel na sucursal di Merca, a entrevista miembronan di varios comite di sucursal di paisnan caminda tin misioneronan ta sirbi, y tambe un pareha cu tin mas cu 41 aña den e sirbishi di misionero. Un di e remarkenan cu nan a haci tawata: “Misioneronan menos exigente ta keda mas tanto. Nan ta concentra nan atencion riba e motibo pakico nan a bini. Nan sa cu nan a bini pa predica e bon nobo y pa yuda hende conoce Yehova.”

David Splane, un otro miembro di Cuerpo Gobernante, a conclui e programa cu un discurso cu tawatin e tema “Boso No Ta Bai Hopi Leu!” Kico e tawata kiermen cu esei, siendo cu e 46 graduadonan lo a ser manda na varios pais rond mundo? El a splica: “Tanten cu bo ta fiel na Yehova, sin importa unda bo ta riba tera, semper lo bo ta den e cas di Dios.” Si, tur cristian fiel, sin importa unda nan ta biba, ta sirbi den un parti di e gran tempel of cas spiritual di Dios. E tempel aki a cuminsa existi rond di e tempo cu Hesus a batisa den e prome siglo. (Hebreonan 9:9) Tawata un berdadero consuelo pa esnan presente tende cu Yehova ta serca tur su sirbidonan fiel rond mundo! Mescos cu Yehova tawata interesa den Hesus ora e tawata riba tera, asina E ta interesa den nos tur y den nos sirbishi na dje, sin importa unda nos ta. Pues, pa loke ta asuntonan di adoracion, nunca nos no ta leu for di otro ni for di Yehova y Hesus.

Despues cu e presidente a repasa tur e saludonan cu a bini di rond mundo, anuncia na cua paisnan e graduadonan lo bai, y lesa e carta cu e studiantenan a skirbi pa gradici pa e entrenamento cu nan a ricibi na Galad, el a finalisa e programa exitosamente. El a anima e misioneronan nobo pa sigui cu nan bon trabou y alegra den e sirbishi di Yehova.—Filipensenan 3:1.

[Cuadro na pagina 23]

ESTADISTICANAN DI KLAS

Cantidad di pais representa: 14

Cantidad di pais na cua a asigna nan: 19

Cantidad di studiante: 46

Edad promedio: 35,0

Promedio di aña den e berdad: 17,2

Promedio di aña den e ministerio di tempo completo: 13,7

[Plachi na pagina 24]

E di 113 Klas di Graduadonan di e Scol Biblico di Galad di Watchtower

[Comentario di e plachi na pagina 24]

Den e lista aki bou, e reinan ta numera di dilanti bai patras, y e nombernan ta bai di robes pa drechi den cada rei.

(1) Ligthart, M.; Hosoi, S.; Berktold, A.; Liem, C.; Aoki, J. (2) Baglyas, J.; Bouqué, S.; Bossi, A.; Alton, J.; Escobar, I.; Escobar, F. (3) Stoica, A.; Stoica, D.; Freimuth, S.; Karlsson, M.; LeBlanc, R. (4) Bianchi, R.; Bianchi, S.; Kaminski, L.; Joseph, L.; Paris, S.; LeBlanc, L. (5) Paris, M.; Skidmore, B.; Horton, J.; Horton, L.; Skidmore, G. (6) Liem, B.; Alton, G.; Quirici, E.; Langlois, M.; Steininger, S.; Aoki, H. (7) Langlois, J.; Steininger, M.; Bossi, F.; Kaminski, J.; Bouqué, J.; Ligthart, E.; Hosoi, K. (8) Baglyas, J.; Quirici, M.; Karlsson, L.; Freimuth, C.; Berktold, W.; Joseph, R.