Sigui “Carga Hopi Fruta”

“Carga hopi fruta y asina . . . demostra di ta mi disipelnan.”—HUAN 15:8.

1. (a) Ki rekisito pa por ta su disipel Hesus a menciona na su apostelnan? (b) Kico nos mester puntra nos mes?

TAWATA e anochi prome cu Hesus su morto. El a tuma basta tempo pa anima su apostelnan den un combersacion intimo y franco. Lo mester tawata despues di meianochi, pero motiva door di amor pa su amigonan intimo, Hesus a sigui papia. Anto meimei di su combersacion el a recorda nan di un rekisito mas cu nan mester cumpli cu ne pa por keda su disipel. El a bisa: “Den esaki mi Tata ta wordo glorifica, cu boso ta carga hopi fruta y asina ta demostra di ta mi disipelnan.” (Huan 15:8) Nos awe ta cumpli cu e rekisito aki pa por ta su disipel? Kico kiermen “carga hopi fruta”? Pa nos haya sa, laga nos bolbe considera e combersacion di e anochi ei.

2. Ki comparacion tocante fruta Hesus a conta e anochi prome cu su morto?

² E conseho pa carga fruta ta parti di un comparacion cu Hesus a conta su apostelnan. El a bisa: “Ami ta e berdadero mata di wendruif, y mi Tata ta e cunukero. Tur rama den mi cu no ta carga fruta, E ta kita, y tur rama cu ta carga fruta, E ta snui, pa esaki duna mas fruta. Boso ta limpi caba pa motibo di e palabra cu mi a papia cu boso. Keda den mi, y ami den boso. Mescos cu e rama no por carga fruta di su mes, si e no keda den e mata di wendruif, asina boso tampoco, si boso no keda den mi. Ami ta e mata di wendruif, boso ta e ramanan. . . . Den  esaki mi Tata ta wordo glorifica, cu boso ta carga hopi fruta y asina ta demostra di ta mi disipelnan. Mescos cu e Tata a stima mi, ami tambe a stima boso; keda den mi amor. Si boso warda mi mandamentonan, boso lo keda den mi amor.”—Huan 15:1-10.

3. Kico e siguidonan di Hesus tin cu haci pa nan por duna fruta?

³ Den e comparacion aki Yehova ta e Cunukero, Hesus ta e mata di wendruif y e apostelnan cu Hesus tawata papia cu ne ta e ramanan. Tanten cu e apostelnan a haci esfuerso pa “keda den” union cu Hesus, nan lo a carga fruta. Anto Hesus a splica con e apostelnan por a logra mantene e union importante aki: “Si boso warda mi mandamentonan, boso lo keda den mi amor.” Mas despues apostel Huan a skirbi casi e mesun palabranan na otro compañeronan cristian: “Esun cu warda [Cristo] su mandamentonan ta permanece den dje.” * (1 Huan 2:24; 3:24) Pues anto, door di cumpli cu Cristo su mandamentonan su siguidonan ta keda den union cu ne, y e union ei ta haci posibel cu nan por carga of duna fruta. Ta ki tipo di fruta nos tin cu produci?

Oportunidad pa Crese

4. Kico nos por siña for di e echo cu Yehova ta “kita” tur rama cu no ta carga fruta?

⁴ Den e comparacion di e mata di wendruif, Yehova ta “kita” of kap e rama cu no ta carga fruta. Kico esaki ta bisa nos? No solamente e ta bisa nos cu tur disipel mester carga fruta sino tambe cu tur por hacie, sin importa kico ta nan circunstancia of limitacion. Si no tawata asina, Yehova lo no ta demostrando amor ora e “kita” of descualifica un disipel di Cristo debi cu e no a cumpli cu algo cu tawata fuera di su alcanse.—Salmo 103:14; Colosensenan 3:23; 1 Huan 5:3.

5. (a) Con e comparacion di Hesus ta indica cu nos por produci mas fruta? (b) Cua dos tipo di fruta nos lo analisa?

⁵ Tambe Hesus su comparacion di e mata di wendruif ta mustra cu te caminda cu nos circunstancia ta permiti, nos tin cu busca chens pa haci progreso den nos actividadnan como disipel. Ripara con Hesus a expresa esei: “Tur rama den mi cu no ta carga fruta, E ta kita, y tur rama cu ta carga fruta, E ta snui, pa esaki duna mas fruta.” (Huan 15:2) Na fin di e comparacion Hesus a urgi su siguidonan pa carga “hopi fruta.” (Versiculo 8) Kico esaki ta bisa nos? Como disipel, nunca nos no mester bira indeferente ni satisfecho cu nos mes. (Revelacion 3:14, 15, 19) Mas bien nos mester busca maneranan pa produci mas fruta. Ki tipo di fruta nos ta purba produci mas abundantemente? Tin dos tipo: (1) “fruta di e spirito” y (2) fruta di Reino.—Galadionan 5:22, 23; Mateo 24:14.

E Fruta di Cualidadnan Cristian

6. Con Hesucristo a enfatisa e balor di e prome fruta di spirito cu ta ser menciona?

⁶ E prome “fruta di e spirito” cu ta ser menciona ta amor. Dios su spirito santo ta produci amor den cristiannan, pasobra nan ta obedece e mandamento cu Hesus a duna djis prome cu el a conta e comparacion di e mata di wendruif cu ta pari fruta. El a bisa su apostelnan: “Un mandamento nobo mi ta duna boso, pa boso stima otro.” (Huan 13:34) De echo, durante henter su combersacion e ultimo anochi ei di su bida como hende, Hesus bes tras bes a recorda su apostelnan cu nan mester mustra amor.—Huan 14:15, 21, 23, 24; 15:12, 13, 17.

7. Con apostel Pedro a mustra cu carga fruta tin di aber cu desplega cualidadnan manera esnan di Cristo?

⁷ Pedro, kende tawata presente e anochi ei, a compronde cu berdadero disipelnan di Cristo mester desplega e amor y otro cualidadnan cu Cristo a desplega. Añanan despues, Pedro a curasha cristiannan pa cultiva cualidadnan manera dominio propio, cariño fraternal y amor.  Anto el a bisa acerca cu door di haci esei nos ta evita di ‘keda inutil y sin fruta.’ (2 Pedro 1:5-8) Sea cual sea nos circunstancia, nos tur por desplega e fruta di spirito. Pesei laga nos haci esfuerso pa mustra amor, bondad, suavidad y otro cualidadnan similar na esnan di Cristo na un grado mas amplio, pasobra “contra cosnan asina no tin lei”, es decir no tin limite. (Galationan 5:23) Si, laga nos carga “mas fruta.”

Carga Fruta di Reino

8. (a) Ki conexion tin entre fruta di e spirito y fruta di Reino? (b) Ki pregunta ta bon pa nos considera?

⁸ Fruta colorido y suculento ta haci un mata mas bunita. Sinembargo, e balor di e frutanan ei ta bai mas leu cu djis haci e mata bunita. Fruta ta importante tambe pa yuda e mata plama via e simiñanan. Di igual manera, e fruta di e spirito ta haci hopi mas cu djis embeyece nos personalidad cristian. Cualidadnan manera amor y fe ta motiva nos tambe pa plama e mensahe di Reino cu ta manera simiña cu nos ta haya den e Palabra di Dios. Ripara con apostel Pablo a enfatisa e conexion importante aki. El a bisa: “Nos tambe ta eherce fe [un parti di e fruta di spirito] y pesei nos ta papia.” (2 Corintionan 4:13, NW) Manera Pablo a sigui splica, ta door di papia nos ta ‘ofrece un sacrificio di alabansa na Dios, esta, e fruta di lipnan’, cu ta e di dos tipo di fruta cu nos tin cu desplega. (Hebreonan 13:15) Bo tin oportunidad den bo bida pa bira mas productivo, si, pa carga “hopi fruta”, como proclamado di e Reino di Dios?

9. Carga fruta ta nifica mescos cu haci disipel? Splica.

⁹ Pa contesta e pregunta ei bon, nos tin cu compronde prome di kico fruta di Reino ta consisti. Lo ta corecto pa conclui cu carga fruta ta nifica haci disipel? (Mateo 28:19) E fruta cu nos ta carga lo ta referi principalmente na e personanan cu nos ta yuda pa bira adoradonan batisa di Yehova? No. Si esei tawata e caso anto e situacion lo ta un gran desanimacion pa tur e Testigonan stima cu tin hopi aña ta proclama e mensahe di Reino fielmente den teritorionan caminda tin menos reaccion positivo. Figura bo, si e fruta di Reino cu nos ta carga ta representa solamente disipel nobo, e Testigonan ei cu ta traha duro lo ta manera e ramanan bashi den Hesus su comparacion! Claro cu esei no ta e caso. Kico anto ta e principal fruta di Reino di nos sirbishi?

Productivo Door di Plama e Simiña di Reino

10. Con Hesus su comparacion di e sembrado y diferente tipo di tera ta mustra kico e fruta di Reino ta y kico e no ta?

¹⁰ Hesus su comparacion di e sembrado y e diferente tiponan di tera ta indica kico ta e contesta, un contesta alentador pa esnan cu ta predica den teritorionan menos productivo. Hesus a bisa cu e simiña ta e mensahe di Reino  cu ta ser haya den e Palabra di Dios y cu e tera ta representa hende su curason simbolico. Algun simiña “a cai den bon tera, y a crece, y a produci un cosecha.” (Lucas 8:8) Ki clase di cosecha? Wel despues cu un palo di trigo crece y madura, e ta produci simiña nobo como fruta, y no yiu di palo di trigo. Asina tambe un cristian ta produci simiña di Reino como fruta y no necesariamente disipelnan nobo.

11. Con nos por describi e fruta di Reino?

¹¹ Pesei e fruta den e caso aki no ta disipel nobo ni bon cualidad cristian. Como cu e simiña cu ta ser sembra ta e palabra di e Reino, e fruta mester ta referi na un aumento di e simiña ei. Carga fruta den e caso aki ta referi na papia tocante e Reino. (Mateo 24:14) Ta posibel pa nos produci e fruta ei di Reino—es decir proclama e bon nobo di Reino—sea cual sea nos circunstancia? Si, por! Den e mesun comparacion Hesus ta splica dicon.

Duna Lo Miho pa e Gloria di Dios

12. Ta posibel pa tur cristian produci fruta di Reino? Splica.

¹² Hesus a bisa: “Ma esun cu simiña a wordo sembra riba dje den bon tera . . . ta produci, algun shen bes, otro sesenta y otro trinta bes mas tanto.” (Mateo 13:23) Grano sembra den un cunucu ta produci segun circunstancia. Asina tambe loke nos por haci den proclama e bon nobo ta varia segun nos circunstancia, y Hesus a mustra cu e ta conciente di esei. Algun cristian tin mas oportunidad; otronan kisas tin  miho salu y mas energia. Pues loke ta na nos alcanse por ta mas of por ta menos cu loke otronan ta haci, pero tanten cu esei ta lo miho cu nos por, Yehova ta keda contento. (Galationan 6:4) Asta si biehes of malesa ta limita nos participacion den e predicacion, nos Tata misericordioso, Yehova, sin duda ta considera nos como un di esnan cu ta sigui “carga hopi fruta.” Dicon? Pasobra nos ta dun’e ‘tur loke nos tin’, un sirbishi cu ta di henter nos alma. *—Marco 12:43, 44; Lucas 10:27.

13. (a) Cua ta e motibo principal pa nos sigui carga fruta? (b) Kico lo yuda nos sigui carga fruta den teritorionan caminda tin menos reaccion positivo? (Wak e cuadro na pagina 21.)

¹³ Ora nos ta tene na mente pakico nos ta haci esei, nos lo ser motiva pa sigui “bai y duna fruta” te na e grado cu nos circunstancianan ta permiti. (Huan 15:16) Hesus a menciona e motibo principal: “Den esaki mi Tata ta wordo glorifica, cu boso ta carga hopi fruta.” (Huan 15:8) Si, nos actividad di predica ta santifica e nomber di Yehova dilanti di henter humanidad. (Salmo 109:30) Un fiel Testigo di 70 y pico aña cu yama Honor a bisa: “Asta den teritorionan caminda tin menos reaccion positivo, ta un privilegio pa representa e Haltisimo.” Ora a puntra Claudio, cu for di 1974 ta un Testigo celoso, pakico e ta sigui predica maske masha poco hende ta reacciona positivo den su teritorio, el a cita Huan 4:34, caminda nos ta lesa e siguiente palabranan di Hesus: “Mi cuminda ta pa haci e boluntad di esun cu a manda mi, y pa cumpli cu su trabou.” Claudio a agrega: “Mescos cu Hesus, mi kier caba cu e trabou di proclama e Reino cu mi a cuminsa cu ne.” (Huan 17:4) Testigonan di Yehova rond mundo ta opina mescos.—Wak e cuadro na pagina 21, “Con pa ‘Duna Fruta cu Perseverancia.’”

Predica y Siña Hende

14. (a) Cua dos proposito e trabou di Huan Bautista y di Hesus tawatin? (b) Con lo bo describi e actividad cristian djawe?

¹⁴ E prome proclamado di Reino cu e Evangelionan ta menciona ta Huan Bautista. (Mateo 3:1, 2; Lucas 3:18) Su proposito principal tawata pa “duna testimonio” y el a haci esei cu fe profundo y cu e speransa cu tur tipo di hende lo kere. (Huan 1:6, 7) Y en berdad algun hende cu Huan a predica na dje a bira disipel di Cristo. (Huan 1:35-37) Pues, Huan tawata un predicado y tambe un hacido di disipel. Hesus tambe a predica y siña otro hende. (Mateo 4:23; 11:1) Pesei no ta nada straño cu el a manda su siguidonan pa predica e mensahe di Reino y tambe yuda e personanan cu acepta e mensahe pa bira su disipel. (Mateo 28:19, 20) Di manera cu nos trabou awe ta un combinacion di predica y siña hende.

15. Den ki manera e reaccion riba e trabou di predica cu a ser efectua den prome siglo ta casi mescos cu esun efectua den nos tempo?

¹⁵ Di e personanan den prome siglo cu a tende Pablo predica y siña otronan, “algun tawata wordo combenci door di loke a wordo bisa, ma otronan no kier a kere.” (Echonan 28:24) Awe e reaccion ta casi mescos. Lamentablemente, gran parti di e simiñanan di Reino ta cai den mal tera. Pero cu tur esei, algun simiña ta cai den bon tera, ta saca raiz y crece manera Hesus a profetisa. De echo, mundialmente un promedio di mas cu 5.000 persona pa siman ta bira berdadero disipel di Cristo tur aña! E disipelnan  nobo aki ta ‘combenci di loke a wordo bisa’, aunke mayoria hende si no. Kico a yuda habri nan curason pa e mensahe di Reino? Hopi biaha ta e interes cu e Testigonan ta mustra den nan ta haci e diferencia; ta como si fuera nan ta muha e simiñanan resien planta. (1 Corintionan 3:6) Considera dos ehempel so di e tantisimonan cu tin.

Interes Personal Ta Haci un Diferencia

16, 17. Dicon ta importante pa nos mustra interes personal den e personanan cu nos ta topa den sirbishi?

¹⁶ Karolien, un Testigo hoben na Belgica, a bishita un señora di edad cu no a mustra interes den e mensahe di Reino. Como cu e señora su man tawata den verband, Karolien y su compañera a ofrece pa yuda cu algo, pero e señora a nenga. Dos dia despues e mesun dos Testigonan ei a bai bek na cas di e señora y a puntr’e con a sigui cu ne. Karolien a bisa: “Esaki a haci e diferencia. El a keda asombra cu di berdad nos tawata interesa den su persona. El a invita nos drenta paden, y nos a cuminsa un studio di Bijbel cu ne.”

¹⁷ Sandi, un Testigo cu ta biba na Merca, tambe ta mustra interes personal den esnan cu e ta predica na dje. E ta busca anuncionan di nacemento den un corant local y despues ta pasa cu e publicacion Mi buki di relato bíblico * serca e mayornan cu a caba di haya yiu. Como cu por lo general ta e mama ta na cas y e ta orguyoso pa mustra su baby, hopi bes Sandi ta haya chens di combersa. E ta splica: “Mi ta papia cu e mayornan tocante e importancia di crea un banchi cu e yiu resien naci door di lesa p’e. Despues mi ta papia di e tarea dificil pa lanta yiu den e mundo djawe.” Poco tempo pasa, debi na un di e bishitanan ei, un mama y seis yiu a cuminsa sirbi Yehova. Si nos tuma iniciativa y mustra interes personal, nos tambe lo por tin resultadonan gososo asina den nos sirbishi.

18. (a) Dicon e rekisito pa “carga hopi fruta” ta na nos tur su alcanse? (b) Cua tres rekisito pa por ta disipel, menciona den e Evangelio di Huan, bo ta dicidido pa cumpli cu ne?

¹⁸ Ta ki un gran animacion pa sa cu e rekisito di “carga hopi fruta” ta na nos alcanse! Sea cu nos ta hoben of bieu, sea cu nos tin bon salu of no, sea cu nos ta predica den teritorionan caminda tin hopi reaccion positivo of no, nos tur por carga hopi fruta. Con? Door di desplega e fruta di spirito na un mayor grado y door di plama e mensahe di e Reino di Dios lo miho cu nos por. Na mesun tempo, nos ta haci esfuerso pa ‘keda den e palabra di Hesus’ y pa nos mustra “amor un pa otro.” Si, door di cumpli cu e tres rekisitonan importante aki pa por ta disipel (menciona den e Evangelio di Huan), nos ta duna prueba cu nos “ta berdaderamente disipelnan” di Cristo.—Huan 8:31; 13:35.

[Nota]

Pregunta di Repaso

• Ki tipo di fruta nos tin cu produci mas abundantemente?

• Dicon e meta di “carga hopi fruta” ta na nos alcanse?

• Cua tres rekisito importante pa por ta disipel di Hesus, menciona den e Evangelio di Huan, nos a considera?

[Preguntanan di Estudio]

[Cuadro/Plachi na pagina 21]

CON PA “DUNA FRUTA CU PERSEVERANCIA”

KICO ta yuda bo sigui predica e mensahe di Reino fielmente den teritorionan caminda tin menos reaccion positivo? At’aki algun contesta practico riba e pregunta ei.

“E echo cu nos sa cu nos tin e pleno apoyo di Hesus ta motiva nos pa keda optimista y persevera, sea cual sea e reaccion den teritorio.”—Harry di 72 aña; batisa na 1946.

“E texto di 2 Corintionan 2:17 (NW) semper ta anima mi. E ta bisa cu nos ta participa den sirbishi ‘den bista di Dios, den compania cu Cristo.’ Ora mi ta den sirbishi, mi ta gosa di e compania di mi miho amigonan.”—Claudio di 43 aña; batisa na 1974.

“Francamente bisa, e trabou di predica ta un lucha pa mi. Sinembargo, e palabranan di Salmo 18:29 a cumpli den mi caso, caminda e ta bisa: ‘Cu mi Dios mi por bula over di un muraya.’”—Gerard di 79 aña; batisa na 1955.

“Si mi por lesa maske ta un texto den sirbishi, esei ta duna mi e satisfaccion cu a lo menos un persona su curason a ser samina door di Bijbel.”—Eleanor di 26 aña; batisa na 1989.

“Mi ta sigui purba diferente introduccion. Tin asina hopi cu lo mi no por caba di uza nan tur den e añanan di bida cu a keda mi.”—Paul di 79 aña; batisa na 1940.

“Mi no ta laga e reaccionnan negativo ofende mi. Mi ta purba pa mi manera di presenta ta amigabel door di combersa cu hende y scucha nan punto di bista.”—Daniel di 75 aña; batisa na 1946.

“Mi a yega di topa hende resien batisa cu a bisa mi cu mi trabou di predica a hunga un rol den e echo cu nan a bira Testigo. Sin cu mi tawata sa, un otro hende despues a studia Bijbel cu nan y a yuda nan haci progreso. Ta un goso pa mi cu nos sirbishi ta trabou di un team.”—Joan di 66 aña; batisa na 1954.

Kico ta yuda abo “duna fruta cu perseverancia”?—Lucas 8:15.

[Plachi na pagina 20]

Door di desplega e fruta di spirito y door di proclama e mensahe di Reino, nos ta carga hopi fruta

[Plachi na pagina 23]

Kico Hesus tawata kiermen ora el a bisa su apostelnan: “Carga hopi fruta”?