Kere den un Dios Cu Kisas Nos No Conoce

DI CADA tres hende na Alemania dos ta kere den Dios. Sinembargo, ora a pidi mas cu mil di nan pa duna un descripcion di e Dios cu nan ta kere aden, casi tur a duna un contesta diferente. Segun e revista FOCUS: “Pueblo Aleman ta consisti di varios tipo di hende y asina tambe cada un tin nan ideanan tocante Dios.” Aunke riba su mes ta bon cu hende ta kere den Dios, no ta lamentabel pa kere den un Dios sin sa ken realmente E ta?

No ta na Alemania so hende ta insigur tocante e naturalesa of persona di Dios; den otro paisnan Europeo tambe ta existi e insiguridad ei. Un estudio cu nan a haci na Gran Bretania, Hulanda y Austria a revela cu por lo general hende ta di acuerdo cu Dios ta “un poder supremo of un secreto cu hende no por describi.” Vooral pa hobennan, asta pa esnan cu ta kere den Dios, E ta un misterio.

Abo Conoce Dios Personalmente?

Tin un diferencia grandi entre sa ken un persona ta y conoc’e personalmente. Ora bo sa di un persona—manera den caso di un monarca cu bo no por acerca, un super atleta of un streya di cine—esei ta cuestion di djis reconoce cu e persona ei ta existi. Sinembargo, conoce un persona personalmente ta nifica hopi mas. E ta encera conoce e persona su caracter, comportacion, sintimentonan, loke e ta gusta y loke e no ta gusta, y tambe su plannan pa futuro. Si bo conoce un persona personalmente, esei ta habri caminda pa cultiva un relacion intimo cu ne.

Cientos di miles di persona a yega na e conclusion cu solamente un idea vago di Dios—of djis sa cu e ta existi—no ta suficiente. Nan a bai hopi mas aleu door di siña conoce Dios intimamente. Nan a haya cu esei ta bale la pena? Un homber cu yama Paul, kende ta biba den e parti nort di Alemania y cu un tempo tawata djis kere aribariba den Dios, a dicidi di siña conoc’e miho como persona. Paul ta splica: “Pa bo conoce Dios bon ta tuma tempo y esfuerso, pero e recompensa ta bale la pena. Ora bo tin un relacion intimo cu e Creador, bo bida di tur dia ta bira miho.”

Ta bale la pena tuma e tempo y haci e esfuerso necesario pa siña conoce Dios intimamente? Sea asina bon di lesa e siguiente articulo.

[Comentario na pagina 3]

Tin un diferencia grandi entre sa ken un persona ta y conoc’e personalmente