Confia den Yehova cu Henter Bo Curason

“Esnan cu conoce bo nomber lo pone nan confiansa den Bo.”—SALMO 9:10.

1, 2. Kico ta algun cos cu hende ta confia den dje pa siguridad pero cu ta en vano?

AWE cu tin asina tanto cos ta menasa nos bienestar, ta normal pa nos busca ken of kico por duna nos siguridad. Tin hende ta kere cu si nan tin mas placa esei lo duna nan un futuro sigur, pero en realidad, placa ta un refugio masha insigur. Bijbel ta bisa: “Esun cu confia den su rikesa lo cai.” (Proverbionan 11:28) Otro hende ta steun riba lidernan humano, pero asta e miho lidernan ta comete eror. Y cu tempo, nan tur ta muri. Bijbel ta bisa e palabranan sabi aki: “No confia den prinsnan, den yiu di hende, den kende no tin salbacion.” (Salmo 146:3) E palabranan inspira ei ta spierta nos tambe pa no confia den nos mes esfuerso sin yudansa. Nos tambe ta simplemente “yiu di hende.”

² Profeta Isaias a critica e lidernan nacional di Israel di su tempo pasobra nan a confia den “e refugio di mentira.” (Isaias 28:15-17) Den nan buskeda pa siguridad, nan a sera aliansanan politico cu nacionnan biciña. E aliansanan ei tawata inconfiabel, un mentira. Den un manera similar, hopi lider religioso djawe ta sera amistad cu lidernan politico. E  aliansanan aki tambe lo resulta di ta un “mentira.” (Revelacion 17:16, 17) Nan lo no trece siguridad duradero.

E Bon Ehempel di Hosue y Caleb

3, 4. Con e informe di Hosue cu Caleb tawata distinto for di e dies otro spionnan?

³ Unda anto nos tin cu acudi pa siguridad? Na e mesun fuente cu Hosue y Caleb a acudi den tempo di Moises. Djis despues di Israel su liberacion for di Egipto, e nacion tawata cla pa drenta Canan, e Tera Priminti. Nan a manda 12 homber bai spiona e pais, y despues di 40 dia nan a bolbe pa duna nan informe. Ta dos so, Hosue y Caleb, a bisa cu Israel tin chens di conkista Canan. E otronan a confirma cu e pais tawata hopi atractivo pero nan a bisa: “E pueblo cu ta biba den e tera ta fuerte, y e stadnan ta fortifica y masha grandi mes . . . Nos no por bai contra e pueblo, pasobra nan ta mucho fuerte pa nos.”—Numbernan 13:27, 28, 31.

⁴ E Israelitanan a haci caso di e dies spionnan y a haya asina hopi miedo cu nan a cuminsa murmura contra Moises. Finalmente, Hosue cu Caleb a bisa hopi emociona: “E tera cu nos a pasa den pa spiona ta un tera sumamente bon. Si SEÑOR ta contento cu nos, e ora ei E lo hiba nos na e tera aki y duna nos e—un tera cu tin lechi y miel na abundancia. Solamente, no rebeldia contra SEÑOR, y no tene miedo di e pueblo di e tera.” (Numbernan 14:6-9) Pero toch e Israelitanan a nenga di scucha y como resultado Dios no a permiti nan drenta e Tera Priminti na e tempo ei.

5. Dicon Hosue cu Caleb a duna un informe positivo?

⁵ Dicon Hosue cu Caleb a duna un bon informe, mientras cu e dies spionnan a duna un mal informe? Nan tur 12 a mira e mesun stadnan fuerte y nacionnan estableci. Y e diesnan tawatin rason ora nan a bisa cu Israel no ta suficiente fuerte pa conkista e pais. Hosue cu Caleb tambe tawata sa esei. Sinembargo, e diesnan a mira e situacion for di un punto di bista humano. Di otro banda, Hosue cu Caleb a confia den Yehova. Nan a mira e obranan poderoso cu el a haci na Egipto, na Lama Cora y na pia di Sero Sinai. Figura bo cu añanan despues e simpel informe di e actonan ei tawata suficiente pa motiva Rahab di Yerico pa risca su bida pa yuda e pueblo di Yehova! (Hosue 2:1-24; 6:22-25) Hosue cu Caleb, siendo testigo di e actonan di Yehova, tawatin confiansa absoluto cu Dios lo sigui bringa pa su pueblo. Cuarenta aña despues, a keda proba cu nan confiansa tawata hustifica ora cu un generacion nobo di Israelita, bou di e liderato di Hosue, a marcha drenta Canan y a conkista e pais.

Pakico Nos Mester Confia Yehova sin Reserva

6. Dicon cristiannan djawe ta bou di presion, y den ken nan mester pone nan confiansa?

⁶ Den ‘e tempo trabahoso aki’, nos, mescos cu e Israelitanan, ta confronta enemigonan cu ta mas fuerte cu nos. (2 Timoteo 3:1) Nos ta confronta presionnan moral, spiritual y, den algun caso, asta fisico. Riba nos mes, nos no por resisti e presionnan ei ya cu nan ta origina di un fuente sobrehumano, Satanas e Diabel. (Efesionan 6:12; 1 Huan 5:19) Unda anto nos por haya yudansa? Den oracion na Yehova, un homber fiel di pasado a bisa: “Esnan cu conoce bo nomber lo pone nan confiansa den bo.” (Salmo 9:10) Si di berdad nos conoce Yehova y ta compronde kico su nomber ta nifica, nos lo tin mesun confiansa den dje cu Hosue cu Caleb tawatin.—Huan 17:3.

7, 8. (a) Con creacion ta duna nos motibo pa confia den Yehova? (b) Ki motibonan Bijbel ta duna pa confia den Yehova?

⁷ Dicon nos mester confia den Yehova? Pa un parti Hosue cu Caleb a haci esei pasobra nan a yega di mira evidencia di su poder. Nos tambe tin evidencia. Por ehempel, considera Yehova su obranan di creacion, incluso e universo, cu su miles di miyones di galaxia. E tremendo forsanan di naturalesa cu Yehova ta controla ta demostra cu en berdad E ta e Todopoderoso.  Segun cu nos ta medita riba e maraviyanan di creacion, nos tin cu bai di acuerdo cu Job, kende a bisa di Yehova: “Ken por strob’e? Ken por puntr’e: ‘Ta kico bo ta haci?’” (Job 9:12) En realidad, si Yehova ta na nos banda nos no tin nodi tene miedo di nada den universo.—Romanonan 8:31.

⁸ Considera tambe e Palabra di Yehova, Bijbel. E ta un fuente inagotabel di sabiduria dibino y tin poder pa yuda nos vence mal custumber y adapta nos bida na e boluntad di Yehova. (Hebreonan 4:12) Ta mediante Bijbel nos ta siña conoce Yehova pa nomber y mira kico su nomber ta nifica. (Exodo 3:14, NW) Nos ta realisa cu Yehova por bira loke sea cu E kier—un Tata amoroso, un Hues husto, un Guerero victorioso—p’e cumpli cu su proposito. Y nos ta mira con su palabra semper ta bira realidad. Segun cu nos ta studia e Palabra di Dios nos ta ser conmovi pa bisa manera e salmista: “Mi ta confia den bo palabra.”—Salmo 119:42; Isaias 40:8.

9. Con e areglo di rescate y Hesus su resureccion ta fortalece nos confiansa den Yehova?

⁹ E areglo di rescate ta un otro motibo pa confia den Yehova. (Mateo 20:28) Ta algo masha maraviyoso cu Dios a manda su propio Yiu bin muri como un rescate pa nos! Y e rescate realmente tin hopi poder. E ta cubri pica di tur hende cu repenti y acudi na Yehova cu un curason honrado. (Huan 3:16; Hebreonan 6:10; 1 Huan 4:16, 19) Hesus mester a resusita pa e por a paga e rescate. Y e milager ei, di cua centenares di hende tawata testigo, ta un motibo mas pa confia den Yehova. E ta un garantia cu nos speransa lo cumpli.—Echonan 17:31; Romanonan 5:5; 1 Corintionan 15:3-8.

10. Ki motibonan personal nos tin pa confia den Yehova?

¹⁰ Esakinan ta djis algun motibo pakico nos por y mester tin confiansa absoluto den Yehova. Tin hopi motibo mas, y algun di nan ta personal. Por ehempel, de bes en cuando nos tur ta confronta situacionnan dificil den bida. Segun cu nos ta busca Yehova su guia pa trata cu nan, nos ta mira con practico e guia ei ta. (Santiago 1:5-8) Mas nos depende riba Yehova den nos bida diario y mira e bon resultadonan di haci esaki, mas firme nos confiansa den dje lo ta.

David A Confia den Yehova

11. Apesar di ki circunstancianan David a confia den Yehova?

¹¹ David di antiguo Israel ta un persona cu a confia den Yehova. David a confronta menasa na man di Rei Saul, cu kier a mat’e, y di e ehersito Filisteo, cu tawata purba conkista Israel. Sinembargo, el a sobrevivi y asta a sali victorioso. Dicon? David mes a splica: “SEÑOR ta mi lus y mi salbacion; di ken lo mi tin temor?  SEÑOR ta e fortalesa di mi bida; di ken lo mi tin miedo?” (Salmo 27:1) Nos tambe lo tin exito si nos confia den Yehova mescos David.

12, 13. Con David a mustra cu nos mester confia den Yehova asta ora opositornan ta uza nan lenga como arma contra nos?

¹² Na un ocasion David a resa: “Tende mi bos, o Dios, den mi kehamento; warda mi bida for di temor pa e enemigo. Sconde mi pa e conseho secreto di e hacidonan di maldad, pa e tumulto di esnan cu ta comete inikidad, kendenan a mula nan lenga hacie mes skerpi cu spada. Nan a mik palabra amargo como flecha, pa tira den scondi riba hende inocente.” (Salmo 64:1-4) Nos no sa sigur ta kico a motiva David pa skirbi e palabranan aki. Pero si nos sa cu awe opositornan na mesun manera ta “mula nan lenga”, uzando nan abla como arma di guera. Nan ta “tira” riba cristiannan inocente, uzando palabra papia y skirbi como “flecha” pa duna hende un idea robes di e cristiannan. Si nos ta confia firmemente den Yehova, kico lo ta e resultado?

¹³ David a sigui bisa: “Ma Dios lo tira riba nan cu flecha; diripiente nan lo wordo herida. Asina E lo haci nan trompica riba nan mes lenga. . . . E hende husto lo ta contento den SEÑOR y lo tuma refugio den dje.” (Salmo 64:7-10) Si, aunke enemigonan ta mula nan lenga contra nos, na final di cuenta nan lo “trompica riba nan mes lenga.” Cu tempo Yehova ta laga e asunto resulta den algo positivo, pa asina esnan cu a confia den dje por alegra.

Ezekias Su Confiansa A Resulta di Ta Bale la Pena

14. (a) Apesar di ki situacion peligroso Ezekias a confia den Yehova? (b) Con Ezekias a demostra cu e no a kere e mentiranan di e Asirio?

¹⁴ Rei Ezekias tawata un otro persona kende su confiansa den Yehova a keda proba di ta hustifica. Durante e reinado di Ezekias, e poderoso ehersito Asirio a menasa Herusalem. E ehersito ei a derota hopi otro nacion. El a asta conkista tur e stadnan di Huda, cu excepcion di Herusalem, y Senakerib a broma cu lo e conkista e stad ei tambe. Via Rabsakes, el a declara—corectamente—cu ta en vano pa Israel confia den Egipto pa yud’e. Sinembargo, despues di esei Senakerib a bisa: “No laga bo Dios, den kende bo ta confia, gaña bo, bisando: ‘Herusalem lo no wordo entrega den man di rei di Asiria.’” (Isaias 37:10) Pero Ezekias tawata sa cu Yehova no ta gañ’e. Pesei el a resa pidi: “O SEÑOR nos Dios, libra nos for di [e Asirio] su man, pa tur reino di mundo por sa cu abo so, SEÑOR, ta Dios.” (Isaias 37:20) Yehova a scucha e oracion di Ezekias. Den un solo anochi, un angel a mata 185.000 solda Asirio. Herusalem a keda gespar y Senakerib a bandona e teritorio di Huda. Tur hende cu a tende di e suseso aki a haya sa tocante Yehova su grandesa.

15. Kico so por yuda nos prepara pa cualkier situacion dificil cu nos por haya nos aden den e mundo instabil aki?

 ¹⁵ Awe nos ta den un situacion di guera, mescos cu Ezekias. Den nos caso e ta un guera spiritual. Maske nos ta guereronan spiritual, toch nos tin cu desaroya cierto habilidadnan pa sobrevivi. Nos tin cu premira e atakenan y prepara nos mes pa resisti nan. (Efesionan 6:11, 12, 17) Den e mundo instabil aki, situacionnan por cambia diripiente. Disturbionan civil por lanta cabes inesperadamente. Paisnan cu semper a demostra tolerancia religioso por bira intolerante. Solamente si nos prepara nos mes mescos cu Ezekias, door di desaroya un confiansa absoluto den Yehova, nos lo ta cla pa kico cu pasa.

Kico Ta Nifica Confia den Yehova?

16, 17. Con nos ta demostra cu nos ta confia den Yehova?

¹⁶ Confia den Yehova ta mas cu djis bisa esei cu boca. E ta encera nos curason y ta ser demostra door di nos accionnan. Si nos ta confia den Yehova, nos lo confia tambe completamente den su Palabra, Bijbel. Nos lo les’e tur dia, medita riba dje y lag’e guia nos bida. (Salmo 119:105) Confia den Yehova ta encera tambe confia den e poder di spirito santo. Cu yudansa di spirito santo nos por cultiva fruta cu ta agrada Yehova y vence mal custumbernan cu ta duro hancra. (1 Corintionan 6:11; Galationan 5:22-24) Pues, cu e yudansa di spirito santo, hopi hende a logra stop di huma y di uza droga. Otronan a bandona un bida inmoral. Pesei, si nos ta confia den Yehova, nos lo actua cu su forsa, no riba nos mes forsa.—Efesionan 3:14-18.

¹⁷ Ademas, confia den Yehova ta nifica confia esnan cu E ta confia. Por ehempel, Yehova a haci areglo pa “e esclabo fiel y prudente” atende e interesnan di Reino riba tera. (Mateo 24:45-47) Nos no ta purba actua independientemente, ni nos no ta ignora e nombramento ei, pasobra nos ta confia den Yehova su areglo. Mas ainda, ancianonan ta sirbi den e congregacion cristian local y, segun apostel Pablo, ta spirito santo a pone nan ei. (Echonan 20:28) Door di coopera cu e areglo di anciano den congregacion, tambe nos ta demostra cu nos ta confia den Yehova.—Hebreonan 13:17.

Sigui e Ehempel di Pablo

18. Con cristiannan awe ta sigui e ehempel di Pablo, pero den kico nan no ta pone nan confiansa?

¹⁸ Apostel Pablo a confronta hopi presion den su sirbishi, mescos cu nos. Den su tempo hende a duna autoridadnan un mal impresion di cristianismo, y tawatin bes cu Pablo a purba corigi e impresionnan robes ei of establece e obra di predica legalmente. (Echonan 28:19-22; Filipensenan 1:7, NW) Awe cristiannan ta sigui su ehempel. Unda cu ta posibel, nos ta yuda educa hende tocante nos obra, uzando tur medio cu tin disponibel. Y nos ta haci esfuerso pa defende e bon nobo y establec’e legalmente. Sinembargo, nos no ta pone henter nos confiansa den tal esfuerso, ya cu nos no ta considera cu nos exito of fracaso ta depende di si nos gana casonan den corte of haya publicidad positivo. Mas bien nos ta confia den Yehova. Nos ta corda e animacion cu El a duna Israel di antiguo: “Boso unico forsa ta sinta den keda calmo y confia den mi.”—Isaias 30:15, BPK.

19. Ora nos rumannan tawata ser persigui, con a keda demostra cu nan confiansa den Yehova tawata hustifica?

¹⁹ Tawatin biaha durante nos historia moderno cu nos obra a ser prohibi of restringi na Oost y West Europa, den partinan di Asia y Africa, y den paisnan di Sur y Norte America. Esaki kiermen cu nos confiansa den Yehova no tawata hustifica? No. Aunke tawatin biaha cu Yehova a permiti persecucion severo pa un motibo cu El a considera valido, amorosamente El a fortalece esnan cu tawata sufri di e persecucionnan ei. Hopi cristian bou di persecucion a establece un bunita reputacion di fe y confiansa den Dios.

20. Aunke kisas nos ta beneficia di libertadnan legal, den ki aspectonan nunca nos lo compromete?

 ²⁰ Di otro banda, den mayoria pais nos tin reconocemento legal, y tin biaha nos ta haya publicidad positivo den medionan di comunicacion. Nos ta aprecia esaki y ta reconoce cu esaki tambe ta contribui na Yehova su proposito. Cu su bendicion, nos ta uza e libertad mas grandi cu nos tin, no pa mehora nos estilo di bida personal, sino pa sirbie abiertamente y plenamente. Sinembargo, nunca nos lo compromete nos neutralidad, ni mengua nos actividad di predica ni debilita den un of otro manera nos sirbishi na Yehova djis pa nos ta bon mira den bista di autoridadnan. Nos ta ciudadano di e Reino Mesianico y ta para firme na e banda di Yehova su soberania. Nos speransa no ta den e sistema di cosnan aki, sino den e mundo nobo caminda e Reino Mesianico lo ta e unico gobierno cu ta goberna mundo. Ningun bom ni misil ni atake nuclear por sagudi e gobierno ei of tumb’e for di shelo. E ta un gobierno invencibel y lo cumpli cu loke ta Yehova su proposito.—Daniel 2:44; Hebreonan 12:28; Revelacion 6:2.

21. Ki rumbo nos ta dicidido pa sigui?

²¹ Pablo a bisa: “Nos no ta di esnan cu ta hala atras pa destruccion, sino di esnan cu tin fe pa preservacion di e alma.” (Hebreonan 10:39) Pesei laga nos tur sirbi Yehova fielmente te na fin. Nos tin tur motibo pa pone nos pleno confiansa den Yehova awor y pa semper.—Salmo 37:3; 125:1.

Kico Bo A Siña?

• Dicon Hosue cu Caleb a bini bek cu un informe positivo?

• Cua ta algun motibo pakico nos mester tin confiansa absoluto den Yehova?

• Kico ta nifica confia den Yehova?

• Cu confiansa den Yehova, nos ta dicidido pa tuma ki posicion?

[Preguntanan di Estudio]

[Plachi na pagina 15]

Dicon Hosue cu Caleb a duna un informe positivo?

[Plachi na pagina 16]

Creacion ta duna nos motibo fuerte pa confia den Yehova

[Reconocemento]

Tur tres potret: Cortesia di Anglo-Australian Observatory, saca door di David Malin

[Plachi na pagina 18]

Confia den Yehova ta nifica confia esnan cu E ta confia