“Hala Serca Dios y E Lo Hala Serca Boso”

Antes y Awor Su Bida A Cambia Completamente

E HOBENSITA Matsepang a perde tur placer y sentido den bida! E tawata biba na Lesoto, un pais den curason di Sur Africa. Matsepang a lanta como catolico. Pero en bes di yud’e hala serca Dios, pa añanan largo monhanan a uza placa como tentacion pa nan comete actonan inmoral cu ne.

Door di esei Matsepang a keda masha desapunta cu religion y e no por a kere cu ta existi un Creador amoroso cu di berdad ta interesa den su creacion humano. Pa motibo di e falta di atencion y maltrato cu Matsepang a sufri, el a keda cu herida emocional profundo y a sinti su mes totalmente indigno. El a crece bira masha violento y agresivo, loke a hib’e na criminalidad.

Cu tempo Matsepang a bira parti di un gang cu tawata cana horta hende den trein. Nan a arest’e y sentenci’e na prizon na Sur Africa. Mas despues, nan a deport’e pa su pais natal, Lesoto, caminda el a sigui cu su bida di criminalidad, buracheria, violencia y inmoralidad.

Completamente deprimi y den un estado di desesperacion total, Matsepang a resa pidi Dios yudansa. El a priminti: “Dios, si mi sobrevivi, lo mi haci tur loke ta posibel pa sirbi bo.”

No a tarda mucho cu algun misionero Testigo di Yehova a acerca Matsepang. Nan a ofrece pa studia Bijbel cu ne, y loke el a siña a yud’e realisa cu Dios no ta indeferente ni desinteresa den hende. Mas bien, el a haya sa cu ta Satanas, “e tata di mentira”, ta uza maña y tactica engañoso pa lanta den algun hende e sintimento cu nan ta indigno y pone nan kere cu hamas Yehova lo por stima nan.—Huan 8:44; Efesionan 6:11.

Tawata un gran consuelo pa Matsepang ora el a siña cu nos por tin un respet propio saludabel si nos repenti di nos picanan di pasado, busca Dios su pordon y haci esfuerso pa agrad’e! Nan a yud’e compronde cu “Dios ta mas grandi cu nos curason” y ta mira nos den un manera cu kisas ta hopi diferente for di e manera cu nos ta mira nos mes.—1 Huan 3:19, 20.

Matsepang a yena di emocion ora el a lesa e palabranan di David, un di e escritornan di salmo: “SEÑOR ta serca di e hende di curason kibra, y ta salba esnan di spirito abati.” (Salmo 34:18) E tambe tawatin un “spirito abati”, y el a bin realisa cu Yehova no ta bandona su sirbidonan, ni ora algun di nan ta sinti nan mes desanima of indigno. Un cos cu a anim’e masha ta cu Dios ta cuida tur su carnenan  y ta sostene nan den tempo di dificultad. (Salmo 55:22; 1 Pedro 5:6, 7) Loke a touch su curason specialmente tawata e palabranan: “Hala serca Dios y E lo hala serca boso.”—Santiago 4:8.

E poder di e Palabra di Dios, Bijbel, a bira bisto den bida di Matsepang. El a cuminsa asisti na reunionnan cristian regularmente y a laga su practicanan cu ta bai contra Bijbel para. Kico tawata e resultado? E no ta sinti su mes indigno mas di e amor y aprobacion di Dios. Desde cu el a batisa como Testigo di Yehova, el a dedica miles di ora den e ministerio cristian como un proclamado di e bon nobo di Reino. Apesar di e heridanan di pasado, awor Matsepang ta hiba un bida contento y cu un proposito. Esei ta demostra cuanto poder Bijbel tin pa cambia bida di hende!—Hebreonan 4:12.

[Comentario na pagina 9]

“Dios, si mi sobrevivi, lo mi haci tur loke ta posibel pa sirbi bo”

[Cuadro na pagina 9]

Principionan di Bijbel den Accion

Algun di e principionan di Bijbel cu a consola victimanan di maltrato ta:

“Den e multitud di mi precupacionnan den mi, Bo [Dios su] consuelonan ta alegra mi alma.” (Salmo 94:19) E “consuelonan” di Yehova cu nos por haya den su Palabra ta un fuente di gran alivio. Reflexionando riba nan durante meditacion y oracion ta yuda alivia nos precupacionnan y ta edifica confiansa den Dios como un Amigo comprensivo.

“E [Yehova] ta cura esnan di curason kibra, y ta mara nan heridanan.” (Salmo 147:3) Si nos ta gradicido na Yehova pa su misericordia y su provision pa pordon di pica pa medio di e sacrificio di rescate di Hesus, nos por acerca Dios cu confiansa sin sinti cu nos curason ta sigui condena nos. Esaki por trece un consuelo y pas mental inigualabel.

“Ni un hende no por bin serca mi [Hesucristo], si no ta e Tata cu a manda mi a hal’e; y ami lo lant’e den e ultimo dia.” (Huan 6:44) Pa medio di su spirito santo y mediante e obra di predica e Reino, Yehova personalmente ta hala nos na su Yiu y ta duna nos e speransa di bida eterno.