“Tene Curashi, Mi A Vence Mundo”

E DIA di Hesus su morto—dia 14 di nisan riba kalender Hudiu—a cuminsa ora solo a baha riba diahuebs, 31 di maart di aña 33 di nos era. E anochi ei, Hesus y su apostelnan a bini hunto den un sala parti ariba di un cas na Herusalem pa celebra e Pasco Hudiu. Preparando pa “laga e mundo aki y bai serca e Tata”, Hesus a mustra cu el a stima su apostelnan te na fin. (Huan 13:1) Con? Door di siña nan algun les sublime, y asina prepara nan pa loke tawata bai sosode.

Mas laat anochi, Hesus a bisa su disipelnan: “Tene curashi, mi a vence mundo.” (Huan 16:33) Kico e tawata kiermen cu tal declaracion entrepito? Loke e kier a bisa ta entre otro: ‘E maldad den mundo no a haci mi amarga ni e no a pone mi tuma vengansa. Mi no a laga mundo primi mi den su forma. Boso tambe por haci mescos.’ Loke Hesus a siña su apostelnan fiel den e oranan final di su bida riba tera lo a yuda nan tambe vence mundo.

Ken lo por nenga cu maldad ta reina tur caminda den e mundo djawe? Con nos ta reacciona ora nos haya nos confronta cu inhusticia y actonan di violencia sin sentido? Nan ta amarga nos bida of reta nos pa tuma vengansa? Ki influencia e degeneracion moral cu ta reina tin riba nos? Y ora nos agrega nos imperfeccion humano y tendencianan pecaminoso na tur esaki, nos ta haya nos cu dos lucha: uno contra e mundo malbado y uno contra nos mes mal inclinacionnan. Nos realmente por spera di sali victorioso sin yudansa di Dios? Con nos por ricibi su yudansa? Ki cualidadnan nos mester cultiva pa yuda nos domina nos inclinacionnan carnal? Pa haya e contestanan, laga nos analisa kico Hesus a siña su disipelnan stima riba e ultimo dia di su bida riba tera.

Vence Orguyo cu Humildad

Tuma por ehempel e problema di orguyo of arogancia. Bijbel ta bisa relaciona cu esei: “Orguyo ta bin prome cu destruccion, y un spirito arogante prome cu caida.” (Proverbionan 16:18) Tambe e Scritura ta conseha nos: “Si un hende pensa cu e ta algo, siendo cu e no ta nada, e ta gaña su mes.” (Galationan 6:3) Si, orguyo ta destructivo y engañoso. Ta sabi di nos parti pa odia ‘orguyo y arogancia.’—Proverbionan 8:13.

E apostelnan di Hesus tawatin problema cu orguyo y arogancia? Por lo menos na un ocasion, nan a discuti cu otro tocante ken tawata mas importante. (Marco 9:33-37) Na un otro ocasion, Santiago cu Huan a pidi pa nan haya un posicion prominente den e Reino. (Marco 10:35-45) Hesus kier a yuda su disipelnan elimina e tendencia aki. Pesei durante e cena di Pasco, el a lanta, mara un serbete na su heup y laba pia di su disipelnan. E no a laga duda ta kico tawata e les cu e kier a siña nan. Hesus a  bisa: “Si ami anto, e Señor y Maestro, a laba boso pia, boso tambe mester laba pia di otro.” (Huan 13:14) Mester remplasa orguyo cu net lo contrario: humildad.

Pero no ta facil pa vence orguyo. Mas laat riba e anochi ei, despues cu Hesus a manda Hudas Iscariot bai, (kende tawata cla pa traicion’e) a surgi un discusion fuerte entre e 11 apostelnan. Riba kico nan a pleita? Riba cua di nan aparentemente tawata esun di mas grandi! En bes di scual nan, un biaha mas cu pasenshi Hesus a enfatisa e importancia di sirbi otro. El a bisa: “E reinan di e paganonan ta goberna nan; y esnan cu tin autoridad riba nan ta wordo yama ‘Shonnan bondadoso.’ Ma entre boso no mester t’asina; al contrario, laga esun di mas grandi meimei di boso ta manera esun di mas hoben, y esun cu ta goberna manera esun cu ta sirbi.” Recordando nan riba su ehempel, el a agrega: “Ami ta meimei di boso manera esun cu ta sirbi.”—Lucas 22:24-27.

E apostelnan a capta e punto? Ta parce cu si. Hopi aña despues apostel Pedro a skirbi: “Boso tur sea di acuerdo cu otro, teniendo compasion cu otro, stimando manera ruman, y sea misericordioso y humilde den spirito.” (1 Pedro 3:8) Ta masha vital pa nos tambe vence orguyo cu humildad! Hamas nos mester laga sed pa poder, fama of posicion domina nos bida. “Dios ta resisti e orguyosonan, ma ta duna gracia na e humildenan”, segun Bijbel. (Santiago 4:6) Mescos tambe, un proverbio sabi di pasado ta bisa: “E recompensa di humildad y e temor di SEÑOR ta rikesa, honor y bida.”—Proverbionan 22:4.

Con Nos Por Vence Odio?

Un otro caracteristica comun den e mundo aki ta odio. Y ta parce cu ta tur caminda tin odio, causa pa sea miedo, ignorancia, prehuicio, opresion, inhusticia, nacionalismo, orguyo di tribu of rasismo. (2 Timoteo 3:1-4) Odio a reina den tempo di Hesus tambe. E sosiedad Hudiu tawatin un odio contra cobrado di belasting. Ademas, Hudiu no tawatin lei cu Samaritano, y tambe nan tawatin desprecio pa hende di e nacionnan cu no tawata Hudiu. (Huan 4:9) Sinembargo, e sistema di adoracion cu Hesus a institui cu tempo mester a acepta hende di tur nacion. (Echonan 10:34, 35; Galationan 3:28) Pesei den su gran amor el a duna su disipelnan algo nobo.

Hesus a declara: “Un mandamento nobo mi ta duna boso, pa boso stima otro, y mescos cu ami a stima boso, pa boso tambe stima otro.” Nan mester a siña desplega e amor aki, pasobra el a sigui bisa: “Na esaki tur hende lo sa cu boso ta mi disipel, si boso tin amor un pa otro.” (Huan 13:34, 35) E mandamento tawata nobo pa e echo cu el a bai mas aleu cu “stima bo prohimo manera bo mes.” (Levitico 19:18) Den ki sentido? Hesus a clarifica e asunto, bisando: “Esaki ta mi mandamento, cu boso stima otro mescos cu ami a stima boso. Ni un hende no tin amor mas grandi cu esaki, cu un hende ta duna su bida pa su amigonan.” (Huan 15:12, 13) Nan mester tawata dispuesto pa sacrifica nan bida pa otro disipel y pa otro hende.

Con hende imperfecto por elimina odio malicioso for di nan bida? Door di remplasa esaki cu un amor di sacrificio propio. Miyones di hende sinsero di tur antecedente etnico, cultural, religioso y politico ta haciendo hustamente esei. Awor nan ta integrando den un  comunidad uni liber di odio, esta, e hermandad mundial di Testigonan di Yehova. Nan ta tuma na pecho e palabranan inspira di apostel Huan: “Ken cu odia su ruman ta un matado; y boso sa cu ningun matado no tin bida eterno ta permanece den dje.” (1 Huan 3:15) Cristiannan berdadero no solamente ta nenga di carga arma den guera sino tambe ta traha duro pa mustra amor pa otro.

Kico anto mester ta nos actitud mental pa cu esnan cu no ta nos compañeronan di adoracion y cu kisas ta mustra odio contra nos? Ora Hesus tawata colga na staca, el a haci oracion na fabor di esnan cu tawata ehecutand’e, bisando: “Tata, pordona nan, pasobra nan no sa kico nan ta haci.” (Lucas 23:34) Ora hombernan yen di odio a piedra disipel Esteban mata, su ultimo palabranan tawata: “Señor, no tuma e pica aki di nan na cuenta!” (Echonan 7:60) Hesus y Esteban tawata kier lo miho asta pa esnan cu tawata odia nan. No tawatin rencor den nan curason. “Laga nos haci bon na tur hende”, Bijbel ta manda nos.—Galationan 6:10.

‘Un Ayudante pa Semper’

Despues cu Hesus a pasa un rato largo cu su 11 apostelnan fiel, el a informa nan cu djis lo e no ta cu nan mas den curpa fisico. (Huan 14:28; 16:28) Pero el a sigura nan: “Lo mi pidi e Tata, y E lo duna boso un otro consolador (“ayudante”, NW), pa e keda serca boso pa semper.” (Huan 14:16) E ayudante priminti aki ta Dios su spirito santo. Lo el a siña nan cosnan profundo di e Scritura y yuda nan corda loke Hesus a siña nan durante su ministerio riba tera.—Huan 14:26.

Con spirito santo por yuda nos awe? Wel, Bijbel ta e Palabra inspira di Dios. E hombernan cu Dios a uza pa pronuncia profecia y skirbi Bijbel tawata “inspira door di spirito santo.” (2 Pedro 1:20, 21; 2 Timoteo 3:16) Ora nos ta studia e Scritura y aplica loke nos ta siña, nos ta haya conocemento, sabiduria, comprondemento, perspicasia, discernimento y capasidad di pensa. Nos lo no ta miho prepara e ora ei pa enfrenta e presionnan di e mundo malbado aki?

Spirito santo ta un ayudante den un manera mas. Spirito santo di Dios ta un forsa poderoso y beneficioso cu ta yuda hende cu ta bou di su influencia manifesta cualidadnan di Dios. Bijbel ta bisa cu “fruta di e spirito ta amor, goso, pas, pasenshi, cariño, bondad, fieldad, mansedumbre, dominio propio.” No ta net e cualidadnan aki nos tin mester pa vence inclinacionnan carnal relaciona cu inmoralidad, bringamento, yalursheid, rabiamento y cosnan asina?—Galationan 5:19-23.

Door di depende riba e spirito di Dios, tambe nos por ricibi “poder mas aya di loke ta normal” pa trata cu cualkier problema of angustia. (2 Corintionan 4:7, NW) Aunke spirito santo kisas no ta kita prueba ni tentacion, sigur e por yuda nos wanta nan. (1 Corintionan 10:13) Apostel Pablo a skirbi: “Pa tur cos mi tin e forsa den birtud di esun cu ta duna mi poder.” (Filipensenan 4:13, NW) Dios ta duna e poder ei pa medio di su spirito santo. Nos por ta hopi gradicido pa e spirito santo! Ken cu ta ‘stima Hesus y warda su mandamentonan’ lo por conta cu spirito santo.—Huan 14:15.

“Keda den Mi Amor”

Riba su ultimo anochi como ser humano, tambe Hesus a bisa su apostelnan: “Esun cu tin mi mandamentonan y ta warda nan, esei ta esun cu ta stima mi; y esun cu ta stima mi lo wordo stima door di mi Tata.” (Huan 14:21) “Keda den mi amor”, Hesus a stimula nan. (Huan 15:9) Con kedamento den e amor di e Tata y di e Yiu ta yuda nos den nos lucha contra nos mes inclinacionnan pecaminoso y contra e mundo malbado?

Wel, nos realmente por combati mal tendencia si nos no tin un motivacion fuerte pa haci esei? No tin nada cu por stimula nos mas tanto cu e deseo di tin un bon relacion cu Yehova Dios y cu su Yiu. Ernesto, * un yoncuman  cu tawatin un lucha fuerte contra e estilo di bida inmoral cu el a hiba for di tempo cu e tawata teenager, ta splica: “Mi kier a agrada Dios, y mi a siña for di Bijbel cu E no ta gusta e manera cu mi tawata biba. Pesei mi kier a cambia mi bida pa cumpli cu e normanan di Dios. Tur dia mi tawatin cu lucha contra pensamento sushi y negativo cu ainda tawata drenta mi mente. Pero mi tawata determina pa gana e bataya aki, y constantemente mi tawata pidi Dios su yudansa. Despues di dos aña mi a vence e obstaculonan di mas grandi, aunke ainda mi ta masha stricto cu mi mes.”

Pa loke ta e bataya contra mundo, pensa riba e oracion final cu Hesus a ofrece prome cu el a bandona e sala djariba den Herusalem. El a haci oracion na su Tata na fabor di su disipelnan: “Mi no ta pidi bo pa saca nan for di mundo, ma pa bo warda nan di e malbado. Nan no ta di mundo, mescos cu ami no ta di mundo.” (Huan 17:15, 16) Ki un consuelo! Yehova ta cuida esnan cu E ta stima y ta fortalece nan tanten cu nan ta keda separa for di mundo.

“Kere den Dje”

Si nos ta warda e mandamentonan di Hesus, en berdad nos por sali victorioso den nos lucha contra e mundo malbado y contra nos tendencianan pecaminoso. Sinembargo, pa importante cu e victorianan ei ta, nan no por elimina ni mundo ni pica hereda. Pero nos no tin nodi desespera.

Bijbel ta declara: “Mundo ta pasa bai y su deseonan tambe, ma esun cu haci e boluntad di Dios ta permanece pa semper.” (1 Huan 2:17) Hesus a duna su bida pa rescata “ken cu kere den dje” for di pica y morto. (Huan 3:16) Pesei anto, segun cu nos ta aumenta nos conocemento di e boluntad di Dios y di su propositonan, laga nos tuma na pecho e spiertamento di Hesus: “Kere den Dios, kere tambe den mi.”—Huan 14:1.

[Nota]

[Plachi na pagina 6, 7]

Hesus a stimula su apostelnan pa ‘keda den su amor’

[Plachi na pagina 7]

Pronto hende lo no sufri mas di pica ni di su efectonan