E Cena di Señor Tin Gran Nificacion pa Bo

E CENA di Señor ta importante pa bo? E tin un nificacion duradero? Pa haya sa esei, laga nos mira na prome luga ki nificacion Hesucristo mes a duna na e evenemento special aki.

Riba e anochi di 14 di nisan, aña 33 di nos era, Hesus a reuni cu su 12 apostelnan na Herusalem den un sala parti ariba pa celebra e Pasco Hudiu anual. Despues cu nan a caba di come e cena di Pasco, e traido Hudas a bandona e sala pa bai traiciona Hesus. (Huan 13:21, 26-30) Hesus a introduci “e Cena di Señor” na e 11 apostelnan cu a keda. (1 Corintionan 11:20) Tambe nan sa yama e ocasion aki e Conmemoracion of Memorial, pasobra Hesus a manda su siguidonan: “Haci esaki na mi recuerdo.” Esaki ta e unico evenemento cu Bijbel ta manda cristiannan conmemora.—1 Corintionan 11:24.

Hopi caminda hende a lanta monumento of aparta un dia special pa recorda of conmemora un hende of suseso importante. Den e caso aki Hesus a institui un cena conmemorativo—un cena cu lo a sirbi como un yudansa pa memoria, pa yuda su disipelnan conserva e recuerdo di e susesonan cu nificacion profundo cu a tuma luga riba e dia memorabel ei. Pa e futuro generacionnan, e cena conmemorativo aki lo a laga esnan cu ta celebr’e corda e nificacion profundo di loke Hesus a haci e anochi ei, particularmente e nificacion di e simbolonan cu el a uza. Ki simbolo, of emblema, Hesus a uza y kico nan ta nifica? Laga nos analisa e relato biblico di loke a tuma luga e anochi ei na aña 33 di nos era.

Nificacion Simbolico Sagrado

“El a cohe pan y a duna gradicimento, el a kibr’e, y a duna nan esaki, bisando: ‘Esaki ta [“nifica”, NW] mi curpa cu ta duna pa boso; haci esaki na mi recuerdo.’”—Lucas 22:19.

Ora Hesus a tuma e pan y a bisa, “esaki ta mi curpa” el a indica cu e pan sin zuurdeeg a representa of simbolisa su curpa sin pica, cu el a duna “pa bida di e mundo.” (Huan 6:51) Aunke algun traduccion di Bijbel ta bisa “esaki ta [na Griego, es·tín] mi curpa”, Greek-English Lexicon of the New Testament di Thayer ta bisa cu hopi bes e verbo aki kiermen  “denota, nifica, implica.” E ta transmiti e pensamento di representa of simbolisa algo.—Mateo 26:26.

Mescos a conta pa e copa di biña. Hesus a bisa: “E copa aki, cu a wordo drama pa boso, ta e aliansa nobo den mi sanger.”—Lucas 22:20.

Den e relato di Mateo, Hesus a bisa relaciona cu e copa: “Esaki ta [“nifica”, NW] mi sanger di e aliansa, cu ta wordo drama pa hopi pa pordon di pica.” (Mateo 26:28) Hesus a uza e biña den e copa pa representa, of simbolisa, su sanger. Su sanger drama mester tawata e base pa un “aliansa nobo” pa e disipelnan ungi cu spirito, kendenan lo goberna como rei y sacerdote cu ne den shelo.—Yeremias 31:31-33; Huan 14:2, 3; 2 Corintionan 5:5; Revelacion 1:5, 6; 5:9, 10; 20:4, 6.

E biña den e copa ta sirbi tambe pa recorda hende cu Hesus su sanger drama lo ta e base pa percura “pordon di pica”, habriendo asina e caminda pa esnan cu bebe di dje ser yama pa bida celestial como coheredero hunto cu Cristo. Pues, ta logico cu ta esnan cu tin un yamada celestial so—un cantidad limita di persona—ta tuma di e pan y biña na e Conmemoracion.—Lucas 12:32; Efesionan 1:13, 14; Hebreonan 9:22; 1 Pedro 1:3, 4.

Pero kico di tur e siguidonan di Hesus cu no ta den e aliansa of pacto nobo? Esakinan ta e “otro carnenan” di Señor cu ta anhela, no pa goberna cu Cristo den shelo, sino pa disfruta di bida eterno den un paradijs riba tera. (Huan 10:16; Lucas 23:43; Revelacion 21:3, 4) Como “un multitud grandi” di cristiannan fiel cu ta ‘sirbi Dios di dia y anochi’, nan ta contento cu nan por ta observadonan gradicido na e Cena di Señor. Nan palabra- y accionnan ta declara realmente: “Salbacion ta di nos Dios, kende ta sinta riba e trono, y di e Lamchi.”—Revelacion 7:9, 10, 14, 15.

Cu Ki Frecuencia?

“Haci esaki na mi recuerdo.”—Lucas 22:19.

Cu ki frecuencia mester celebra e Conmemoracion pa por keda corda e morto di Cristo? Esei no ta algo cu Hesus a bisa spesificamente. Sinembargo, door cu el a institui e Cena di Señor riba 14 di nisan, e anochi di e Pasco Hudiu, cu e Israelitanan a celebra un bes pa aña, ta bisto cu Hesus tawata kier pa hende celebra e Conmemoracion cu mesun frecuencia. Mientras e Israelitanan tawata celebra un biaha pa aña nan liberacion for di sclabitud na Egipto, cristiannan ta conmemora un biaha pa aña nan liberacion for di sclabitud na pica y morto.—Exodo 12:11, 17; Romanonan 5:20, 21.

E idea di un celebracion anual pa conmemora un suseso importante no ta algo straño. Tuma, por ehempel, ora un pareha ta celebra nan aniversario di boda of ora un nacion ta conmemora un suseso importante den su historia. Por lo general e conmemoracion ta tuma luga un biaha pa aña riba e aniversario di e evenemento ei. Ta interesante pa nota cu pa varios siglo despues di Cristo, nan tawata yama e hendenan cu a bisa di ta cristian, cuartodecimonan, cu ta nifica “e di diescuaternan”, pasobra nan tawata conmemora e morto di Hesus un biaha pa aña, riba 14 di nisan.

 Simpel Pero Profundo

Apostel Pablo a splica cu celebracion di e Cena di Señor lo permiti e disipelnan di Hesus sigui “proclama e morto di Señor.” (1 Corintionan 11:26) Pesei, e conmemoracion aki ta tira lus riba e papel crucial cu Hesus, pa medio di su morto, a hunga den e cumplimento di e proposito di Dios.

Door cu Hesucristo a keda fiel te na morto, el a mustra cu Yehova Dios ta un Creador sabi y amoroso y un Soberano husto. Contrario na e pretencionnan di Satanas y distinto di Adam, Hesus a duna prueba cu ta posibel pa hende keda fiel na Dios, asta bou di presion extremo.—Job 2:4, 5.

Tambe e Cena di Señor ta yuda nos corda cu gratitud riba Hesus su amor di sacrificio propio. Apesar di pruebanan severo, Hesus a keda perfectamente obediente na su Tata. Door di esei e por a ofrece su curpa humano perfecto pa compensa e daño enorme cu e pica di Adam a causa. Manera Hesus mes a splica, el a bini “pa duna su bida como prijs di rescate pa hopi.” (Mateo 20:28) Consecuentemente, tur persona cu pone fe den Hesus por haya nan picanan pordona y ricibi bida eterno na harmonia cu e proposito original di Yehova pa humanidad.—Romanonan 5:6, 8, 12, 18, 19; 6:23; 1 Timoteo 2:5, 6. *

Tur esaki ta resalta tambe e gran misericordia y bondad inmereci cu Yehova a demostra den su areglo pa humanidad por ser salba. Bijbel ta declara: “Pa medio di esaki e amor di Dios a wordo manifesta den nos, cu Dios a manda su Yiu unigenito den mundo pa nos por a biba pa medio di dje. Den esaki amor ta consisti, no cu ta nos a stima Dios, ma cu ta El a stima nos y a manda su Yiu pa ta e propiciacion pa nos picanan.”—1 Huan 4:9, 10.

Si, e Memorial ta algo masha maraviyoso! E ta suficiente simpel y practico pa conmemora rond mundo bou di un gran variedad di circunstancia. Y toch e ta un bon simbolo pa sigui sirbi como un recordatorio significativo pa basta tempo.

Loke E Ta Nifica pa Bo

E morto di nos Señor Hesucristo como sacrificio a causa tanto e como su Tata, Yehova, hopi pena. Como un homber perfecto, Hesus  no a hereda morto manera nos tur si a hereda. (Romanonan 5:12; Hebreonan 7:26) E por a sigui biba pa semper. Ningun hende no por a kita su bida, ni contra su boluntad, si e mes no tawata kier pa esei tuma luga. El a bisa: “Ni un hende no ta [kita mi bida] for di mi, ma di mi mes mi ta entreg’e.”—Huan 10:18.

Sinembargo, di buena gana Hesus a ofrece su bida humano perfecto como un sacrificio di manera cu “pa medio di morto e por a destrui esun cu tawatin poder riba morto, esta, Diabel, y por a libra esnan cu pa miedo di morto tawata someti na sclabitud henter nan bida.” (Hebreonan 2:14, 15) Cristo su amor di sacrificio propio ta bisto tambe na e morto cu el a somete su mes. E tawata plenamente conciente di e manera cu lo el a sufri y muri.—Mateo 17:22; 20:17-19.

Tambe e Conmemoracion ta haci nos conciente di cu no tin un manera mas grandi cu nos Tata celestial Yehova a yega di expresa su amor pa hende. Pa Yehova, kende “ta yen di compasion y ta misericordioso”, tawata masha penoso pa tende y mira e “gran sclamacion y lagrima” di Hesus den e hofi di Getsemani, e maltrato sadista, e manera cruel cu a clab’e na staca y e morto lento y agonisante na cua nan a somet’e. (Santiago 5:11; Hebreonan 5:7; Huan 3:16; 1 Huan 4:7, 8) Te awe, hopi siglo despues, e idea so cu Hesus a muri den e forma ei ta pone hopi hende pena.

Anto corda cu Yehova Dios y Hesucristo a paga e prijs halto ei pa nos cu ta pecado! (Romanonan 3:23) Tur dia, nos ta enfrenta e realidad doloroso cu nos ta pecado y imperfecto. Sinembargo, a base di nos fe den Hesus su sacrificio di rescate, nos por pidi Dios pordon. (1 Huan 2:1, 2) Esaki ta haci posibel cu nos por tin frankesa di expresion cu Dios y un consenshi limpi. (Hebreonan 4:14-16; 9:13, 14) Y miho ainda, nos por tin e speransa di biba den un paradijs riba tera pa tur eternidad. (Huan 17:3; Revelacion 21:3, 4) Tur esaki y hopi otro bendicion ta pa motibo di Hesus su mayor acto di sacrificio propio.

Mustra Aprecio pa e Cena di Señor

Sin duda e Cena di Señor ta un manifestacion maraviyoso di “e gracia sobreabundante di Dios.” Y e areglo di Yehova Dios di e sacrificio di rescate—cu a bira posibel pa medio di Hesus su amor di sacrificio propio—en berdad ta su “don inexplicabel.” (2 Corintionan 9:14, 15) E manifestacionnan aki di Dios su bondad mediante Hesucristo no ta lanta den bo un sentido profundo y duradero di gratitud y aprecio?

Nos tin sigur cu esei ta e caso. Pesei nos ta invita bo cordialmente pa reuni cu Testigonan di Yehova pa conmemora e morto di Hesus. E aña aki e Conmemoracion lo tuma luga riba diaranson 16 di april, despues cu solo baha. Testigonan di Yehova den bo bicindario lo ta contento pa laga bo sa e luga y ora exacto di e evenemento tan importante aki.

[Nota]

[Cuadro/Plachi na pagina 6]

“ESAKI TA MI CURPA” OF “ESAKI TA NIFICA MI CURPA” CUA DI NAN?

Ora Hesus a bisa, “Ami ta e porta” y, “Ami ta e berdadero mata di wendruif”, ningun hende no a pensa cu e tawata un porta literal of un mata literal. (Huan 10:7; 15:1) Mescos tambe, ora Beibel Santu ta cita Hesus bisando: “E copa aki . . . ta e aliansa nobo”, nos no ta conclui cu e copa mes tawata literalmente e aliansa of pacto nobo. Asina tambe, ora el a bisa cu e pan “ta” su curpa, ta obvio cu e pan a nifica of simbolisa su curpa. Pesei mes, e traduccion di Charles B. Williams ta bisa: “Esaki ta representa mi curpa.”—Lucas 22:19, 20.

[Plachi na pagina 5]

E pan sin zuurdeeg y e biña ta simbolonan apropia di Hesus su curpa sin pica y su sanger drama

[Plachi na pagina 7]

E Conmemoracion ta pa recorda nos riba e amor grandi cu Yehova Dios y Hesucristo a demostra