Hobennan Boso Ta Progresa Spiritualmente?

“AUNKE mi tawata bai e reunionnan cristian, mi no tawatin un deseo profundo pa sirbi Yehova”, Hideo ta bisa di e tempo cu e tawata bai scol secundario. “Hopi bes mi a imagina mi mes como un hoben popular entre mi amigonan di scol y cu ta cana broma riba caya cu mucha mohe. Mi no tawatin metanan spesifico ni mi no tawatin gana di haci ningun progreso spiritual.” Mescos cu Hideo, tin hopi hoben cu aparentemente t’ei djis pa t’ei numa, sin ningun deseo di logra un meta cu ta bale la pena of pa haci cualkier progreso.

Si bo ta hoben, probablemente bo ta masha entusiasma ora bo ta haci deporte of ta ocupa bo cu un hobi. Pero, ora ta trata di actividadnan spiritual, kisas bo no ta sinti mescos. Bo ta kere cu bo por sinti bo entusiasma cu metanan spiritual? Wak e palabranan aki di e salmista: “E testimonio di SEÑOR ta fiel, E ta haci hende simpel bira sabi. . . . E mandamentonan di SEÑOR ta puro, nan ta ilumina wowo.” (Salmo 19:7, 8) E Palabra di Dios por dirigi hende “simpel” of sin experencia pa e actua sabi, na moda di papia ‘poniendo su wowo briya.’ [NW] Si, bo por keda fasina y encanta cu cos spiritual tambe. Pero kico bo mester haci pa bo sinti asina? Unda bo tin cu cuminsa?

Ser Motiva pa Sirbi Dios

Na prome luga, bo mester ta motiva pa sirbi Dios. Tuma por ehempel e caso di e hoben Rei Yosias di Huda. Ora a descubri e buki di e Lei di Yehova den e tempel, Yosias a laga nan les’e p’e y a keda profundamente conmovi pa loke el a tende. Door di esei, “Yosias a kita tur e abominacionnan for di tur e paisnan cu tawata pertenece na e yiunan di Israel.” (2 Cronicanan 34:14-21, 33) Lesamento di e Palabra di Dios a motiva Yosias pa haci mas pa e adelanto di adoracion puro.

Abo tambe por desaroya un deseo pa sirbi Yehova si bo lesa Bijbel regularmente y medita riba loke bo ta lesa. Esei ta loke a motiva Hideo. El a bira masha pega cu un pionero di mas edad, esta, un Testigo di Yehova cu ta sirbi tempo completo. E pionero tawata studia Bijbel cu smak y a haci esfuerso pa aplica su siñansanan den su bida. Su ehempel como pionero a anima Hideo masha, y Hideo a cuminsa haci mescos y a desaroya un deseo fuerte pa sirbi Dios y otro hende. Su progreso spiritual a resulta den un bida cu proposito.

 Algo cu por motiva hobennan ta di lesa Bijbel tur dia. Takahiro ta splica: “Ki ora cu mi subi mi cama y realisa cu mi no a lesa mi Bijbel ainda pa e dia ei, mi ta lanta atrobe y hacie. Door di esei, mi a sinti e guia di Yehova. Lesamento di Bijbel tur dia a contribui hopi na mi progreso spiritual. Determina pa participa mas tanto ainda den Yehova su sirbishi, mi a cuminsa traha pionero regular djis despues cu mi a caba scol secundario. Y mi ta gust’e masha tanto.”

Fuera di lesa Bijbel, kico mas por yuda bo fortalece bo motivacion pa alaba Yehova? Tomohiro su mama a siñ’e e berdad di Bijbel. E ta bisa: “Ta te ora mi a studia e buki Bida sí tin un propósito di kaft pa kaft cu mi 19 aña di edad, mi a sinti cu e amor di Yehova y Hesus su sacrificio di rescate a conmove mi profundamente. E aprecio ei pa e amor di Dios a motiva mi pa haci mas den sirbishi di Yehova.” (2 Corintionan 5:14, 15) Un estudio personal diligente di Bijbel a anima hopi hoben mescos cu Tomohiro pa progresa spiritualmente.

Kico bo por haci si despues di tur esei ainda bo no tin un deseo di curason pa sirbi Yehova? Na ken bo por acudi pa haya yudansa? Apostel Pablo a skirbi: “Pasobra ta Dios ta esun cu ta obra den boso, tanto pa kier como pa haci.” (Filipensenan 2:13) Si bo pidi Yehova yuda bo, lo E duna bo su spirito santo libremente, locual lo duna bo poder pa bo no solamente “haci” sino tambe haya e deseo, esta e “kier” pa haci. Esaki ta nifica cu e spirito santo di Dios lo aumenta bo deseo pa haci bo best den Yehova su sirbishi y lo yuda bo crece spiritualmente. Pesei, confia plenamente den e poder di Yehova y fortifica bo curason!

Pone Bo Propio Metanan

Unabes bo ta determina pa sirbi Yehova mas plenamente, bo tin cu pone metanan personal pa bo por progresa spiritualmente. Mana, un hobensita cristian, a bisa: “Ponemento di meta a yuda mi hopi. En bes di bai atras, mi por a bai dilanti cu curashi. Cu mi metanan na mente, mi a haci oracion sinsero na Yehova pa E guia mi, y mi por a progresa sin ser distrai.”

Bo metanan mester ta realistico y alcansabel. Un meta rasonabel lo por ta pa lesa un capitulo di Bijbel pa dia. Tambe bo por cuminsa un proyecto di investigacion. Pa ilustra esaki cu algo cu ta disponibel na Spaño of Hulandes, lo bo por studia e cualidadnan di Yehova cu ta menciona bou di e subtema “Cualidadnan pa nomber” (of den orden alfabetico) bou di e tema principal “Yehova” den e Index di Publicacionnan Watch Tower. Tin rond di 40 punto cu bo por considera, y sin duda e investigacion aki lo hala bo mas serca Yehova y stimula bo pa haci mas p’e. Otro metanan alcansabel ta entre otro, comenta por lo menos un biaha durante cada reunion cristian den cua e auditorio por participa, siña conoce por lo menos un miembro di e congregacion na cada reunion, y no laga ningun dia pasa sin haci oracion na Yehova y papia cu otro hende tocante dje.

Si bo no a inscribi ainda den e Scol di Ministerio Teocratico, esei lo ta un bon meta pa bo. Bo ta participando den e trabou di predica caba? Si ainda bo no ta sali den sirbishi, pakico no haci esfuerso pa bira un publicado no batisa. Di mes, e siguiente paso lo ta di tuma bo relacion cu Yehova na serio y dedica bo bida na dje. Hopi hoben ta haci esfuerso pa cumpli cu nan dedicacion door di busca pa drenta den e sirbishi di tempo completo.

 Aunke ta bon pa bo tin meta den bida, tene cuidou cu e spirito di competencia. Lo bo haya mas goso den loke bo ta haci ora bo no ta compara bo mes cu otro hende.—Galationan 5:26, NW; 6:4.

Kisas bo ta haya cu bo no tin experencia y cu ta dificil pa pone metanan rasonabel. Wel, sigui e conseho biblico: “Inclina bo horea y tende e palabranan di hende sabi.” (Proverbionan 22:17) Pidi bo mayornan of otro cristiannan maduro yuda bo. Claro cu mayornan y otro personanan mester ta rasonabel, y un fuente di animacion den e asunto aki. Si hobennan sinti nan bou di presion pa purba alcansa un meta cu otro hende a pone pa nan, nan por perde nan goso. Y esei por daña henter e proposito di pone meta. Esei ta loke a sosode cu un mucha mohe. El a conta: “Mi mayornan a pone un meta tras di otro pa mi. Por ehempel, participa den e Scol di Ministerio Teocratico, sali den sirbishi di veld, batisa y bira pionero. Mi a haci bastante esfuerso pa alcansa cada un di nan. Ora mi a alcansa un meta, mi mayornan no a elogia mi. En bes di esei, nan a duna mi mas meta pa traha ariba. Esei a pone cu semper mi a sinti mi forsa pa alcansa meta. Mi a cansa y mi no tawatin ningun satisfaccion.” Dicon esaki a bai robes? Tur e metanan tawata valido, pero nan no a sali di dje mes. Pa bo por logra, abo mester ta motiva pa tuma e iniciativa pa pone meta pa bo mes!

Pensa riba Hesucristo. Ora el a bini na tera, e tawata sa loke su Tata, Yehova, tawata spera di dje. Haci e boluntad di Yehova no tawata djis un meta pa Hesus, sino un tarea spesifico pa cumpli cu ne. Con Hesus a mira su asignacion? El a bisa: “Mi cuminda ta pa haci e boluntad di esun cu a manda mi, y pa cumpli cu su trabou.” (Huan 4:34) Hesus tawatin goso den haci e boluntad di Yehova y cumpli cu loke su Tata a spera di dje. Esei tawata manera cuminda pa Hesus—el a haya placer y satisfaccion den caba e trabou cu e mester a haci. (Hebreonan 10:5-10) Abo tambe por haya goso ora bo ta bon motiva pa haci loke bo mayornan ta anima bo pa haci.

No Cansa di Haci Bon

Unabes bo tin un meta na mente, traha duro pa alcans’e. Galationan 6:9 ta bisa: “No laga nos cansa di haci bon, pasobra na debido tempo nos lo cosecha, si nos no desmaya.” No confia solamente riba bo mes forsa of habilidad. Casi sigur lo bo topa cu obstaculo y tin biaha asta bo por sinti cu bo a fracasa un rato. Pero Bijbel ta garantisa nos: “Den tur bo camindanan reconoc’e [Dios], y E lo dirigi bo bereanan.” (Proverbionan 3:6) Yehova lo sostene bo segun cu bo ta traha duro pa alcansa bo metanan spiritual.

Si, door di desaroya e deseo di sirbi Yehova y door di haci esfuerso pa alcansa metanan spiritual, lo bo por haci ‘bo progreso bisto pa tur hende.’ (1 Timoteo 4:15) E ora ei lo bo por gosa di un bida cu proposito den e sirbishi di Dios.

[Plachi na pagina 9]

Lesa Bijbel y medita riba loke bo a lesa lo motiva bo pa sirbi Yehova

[Plachi na pagina 10]

Hesus a cumpli cu loke su Tata a spera di dje