Kico Ta Pasando cu Balornan Religioso?

“Diessinco pareha cu ta plania pa casa ta asisti na un sesion catolico parti anochi pa haya conseho. Di e 30 personanan presente, ta 3 so ta bisa cu nan tin fe.”—La Croix, corant catolico Frances.

TIN un crisis di balornan religioso. Riba portada di e revista Newsweek su edicion internacional di 12 di juli 1999, tawatin e pregunta: “Dios Ta Morto?” E revista a contesta cu pa loke ta west Europa, tur cos ta mustra den e direccion ei. Den e reportahe cu e corant Frances Le Monde a duna riba e sinodo di Iglesia Catolico cu a tuma luga na october di e mesun aña ei, el a remarca: “Ta bira cada bes mas dificil pa Iglesia transmiti su mensahe den un cultura cu a bira ‘alergico’ p’e. . . . Na Italia, catolicismo no ta un bloke uni mas. . . . Na Alemania, e disputa tocante centronan cu ta ofrece conseho y planificacion di aborto ta pone papa y democracia habri mas y mas for di otro. E regimen democratico no ta dispuesto mas pa acepta declaracionnan dictatorial. Y ya caba algun observado ta bisa cu [Hulanda su] posicion escandaloso riba balornan moral y eutanasia ta debi na un degeneracion rapido di normanan cristian.”

Otro caminda e situacion no ta mucho mas miho. Na 1999 e arsobispo di Canterbury, George Carey, a lansa e advertencia cu “aki un generacion mas Iglesia di Inglatera lo pasa pa historia.” Den un articulo titula “Fin di Europa Cristian”, e corant Frances Le Figaro a bisa: “Bo por mira e mesun patronchi tur caminda. . . . Na un manera sistematico hende ta lanta duda riba puntonan di bista etico y di doctrina.”

Menos Participacion di Religion

Na Europa, masha poco hende ta bai misa. Menos cu 10 porshento di catolico Frances ta bai misa tur diadomingo, mientras cu apenas 3 pa 4 porshento di catoliconan di Paris ta bai misa regularmente. Na Reino Uni,  Alemania y e paisnan di Scandinavia e asistencia ta mescos of asta mas abou ainda.

Autoridadnan religioso ta hopi precupa pasobra masha poco hende ta interesa pa bira pasto. Den menos cu un siglo, e cantidad di pasto na Francia a baha drasticamente; for di 14 pasto pa cada 10.000 habitante pa menos cu 1 pa cada 10.000 awe. Rond Europa e edad promedio di pasto ta aumentando, y asta den paisnan manera Irlanda y Belgica tin scarsedad. Na mesun tempo, e cantidad di mucha cu ta haya les di catisashi ta menguando. Door di esei ta existi duda serio cu Iglesia Catolico lo ta capas pa garantisa sanger nobo den su seno.

Ta parce cu hende a perde confiansa den religion. Apenas 6 porshento di Francesnan ta kere cu “ta den un religion so bo por haya e berdad”, compara cu 15 porshento na 1981 y 50 porshento na 1952. Tambe ta reina un falta di interes den religion. E cantidad di hende cu ta bisa cu nan no ta afilia na ningun religion a subi for di 26 porshento na 1980 pa 42 porshento na 2000.—Les valeurs des Français—Évolutions de 1980 à 2000 (Balornan Frances—Desaroyonan di 1980 pa 2000).

Cambio Drastico den Balornan Moral

E crisis den norma- y balornan ta bisto tambe den e asunto di balornan moral. Manera a ser menciona anteriormente, hopi baido di misa ta nenga di acepta e decretonan moral di nan iglesia. Nan no ta di acuerdo cu e idea cu lidernan religioso tin derecho di establece normanan di conducta. E mesun multitudnan cu ta aplaudi papa su posicion riba derechonan humano ta nenga di siguie ora su palabranan ta toca nan bida personal. Por ehempel, casi ningun hende—ni parehanan catolico—no ta worry cu su punto di bista riba contraceptivo.

E actitud aki ta afecta tanto hende religioso como no religioso di tur nivel social. Hende ta tolera practicanan cu e Scritura Santo ta condena claramente. Binti aña pasa, 45 porshento di ciudadano Frances tawata condena homosexualidad. Awe, 80 porshento ta haya cu e ta aceptabel. Otro cos: Aunke e gran mayoria ta na fabor di fieldad den matrimonio, 36 porshento so ta bisa cu hamas un affaire pafo di matrimonio ta hustificabel.—Romanonan 1:26, 27; 1 Corintionan 6:9, 10; Hebreonan 13:4.

Un Confusion Religioso

Den e mundo Occidental ta reina e idea cu cada ken tin derecho di kere den loke e ta haya ta bon, creando asina su propio religion. Ta acepta cierto doctrina, mientras cu ta pone otro un banda. Algun hende ta yama nan mes cristian mientras nan ta kere den reencarnacion, y otronan ta cla pa sigui varios coriente religioso pareu sin ningun problema. (Eclesiastes 9:5, 10; Ezekiel 18:4, 20; Mateo 7:21; Efesionan 4:5, 6) E buki Les valeurs des Français a mustra bon cla cu awe hopi creyente ta desviando for di e curso cu iglesia a establece.

Sinembargo, e tendencia aki cu mas y mas hende ta creando nan propio religion tin su peliger cu ne. Jean Delumeau, historiado religioso y miembro di e Institut de France, ta kere firmemente cu ta imposibel pa un persona forma su mes religion los for di cualkier sistema estableci. “Fe no por sobrebibi si e no tin raiz firme den un religion spesifico.” E manera cu un hende ta practica su religion mester ta basa riba balornan spiritual sano. Unda nos por haya e combinacion ei den e sosiedad aki cu a cambia asina drasticamente?

E paginanan di Bijbel ta recorda nos cu ta Dios ta esun cu ta establece normanan aceptabel di conducta y moralidad, aunke E ta laga na hende pa dicidi si nan ta sigui nan of laga. Miyones di hende rond mundo ta reconoce cu e buki hopi respeta aki ta di balor practico awe y cu e ta ‘un lampi pa nan pia y un lus pa nan caminda.’ (Salmo 119:105) Con nan a yega na e conclusion ei? Nos lo trata esaki den e siguiente articulo.