Yehova Tin Interes den Hende Comun y Coriente

BO MESTER ta un persona extraordinario of sobresaliente den algo pa Dios tuma nota di bo? Abraham Lincoln, e di 16 presidente di Merca, a yega di bisa: “Señor ta prefera hende comun y coriente. Ta pesei el a traha asina tanto di nan.” Hopi ta haya cu hende comun no tin nada special di ofrece. Kisas e palabranan “comun y coriente” ta duna idea di “pober, inferior.” Tambe nan tin e conotacion di “falta di privilegio of clase special”, of asta di “algo mediocre.” Den ki clase di hende abo ta prefera di ta? Den e clase cu ta arogante, agresivo, orguyoso? Lo bo no prefera di ta den hende amigabel, humilde y sin idea, cu ta mustra interes sinsero y caloroso den otro hende?

Ya cu intimidacion y mofa ta algo normal den e mundo djawe, pa algun hende ta duro pa kere cu Dios ta interesa personalmente den nan. “Ami a bini di un famia caminda casi no tawatin amor. Nan tawata menosprecia mi, tenta mi y hari mi. Pesei, masha tempran den bida mi a sinti cu mi no tin ningun balor”, segun un lector di e revista aki. “Ainda mi tin sintimentonan profundo di mi pasado cu ta desanima mi ora mi haya mi cu dificultad.” Toch, tin motibo pa kere cu Dios tin interes personal den hende comun y coriente.

Dios Su Interes den Hende Comun y Coriente

Rei David a skirbi: “SEÑOR ta grandi, y digno di ser alaba na gran manera; y su grandesa ta inscudriñabel.” (Salmo 145:3) Sinembargo, esaki no ta stroba Yehova di mustra interes den nos na un manera amoroso y compasivo. (1 Pedro 5:7) Por ehempel, e salmista a declara: “SEÑOR ta serca di e hende di curason kibra, y ta salba esnan di spirito abati.”—Salmo 34:18.

Cosnan cu ta hala hende su atencion den e mundo aki, manera bunitesa fisico, prestigio of rikesa no ta loke Dios ta considera importante. E Lei cu Dios a duna Israel a mustra su interes compasivo den hende pober, huerfano, biuda y stranhero. Dios a bisa e Israelitanan cu a haya un trato cruel den Egipto: “No haci malo na un stranhero, ni oprimie . . . No aflihi ningun biuda ni huerfano. Si di un of otro manera bo aflihie, y e sclama na Mi, lo Mi tende su sclamacion sigur.” (Exodo 22:21-24) Ademas, profeta Isaias a expresa su confiansa den e interes cu Dios tin den hende pober: “Bo tawata un fortalesa pa esun sin yudansa, un fortalesa pa e hende pober den su angustia, un refugio contra tempestad, un sombra contra calor; pasobra rosea di hende cruel ta manera tempestad contra un muraya.”—Isaias 25:4.

Atrabes di su ministerio, Hesucristo, kende ta “e representacion exacto” di Dios, a bira un ehempel pa su disipelnan den mustra interes sinsero den hende comun y coriente. (Hebreonan 1:3) Ora Hesus a mira cu e multitudnan “tawata cansa y plama, manera carne sin wardado” el a “sinti compasion pa nan.”—Mateo 9:36.

 Ripara tambe ki tipo di hende Hesus a scohe como su apostelnan. Nan “no tawata homber educa ni siña.” (Echonan 4:13) Despues di e morto di Hesus, su siguidonan a cuminsa invita tur sorto di hende pa scucha e Palabra di Dios. Apostel Pablo a skirbi cu “un incredulo of un hende cu no ta compronde” por a drenta den e congregacion cristian y bira creyente. (1 Corintionan 14:24, 25) En bes di scohe solamente esnan popular segun e normanan di mundo, Dios a selecta hopi hende simpel y gewoon pa su sirbishi. Apostel Pablo a bisa: “Considera boso yamada, rumannan, cu no tawatin hopi hende sabi segun carni, ni hopi hende poderoso, ni hopi hende noble; ma Dios a scohe e cosnan bobo di mundo pa brongosa e sabinan. Y Dios a scohe e cosnan debil di mundo pa brongosa e cosnan cu ta fuerte, y e cosnan baho di mundo y esnan desprecia, Dios a scohe, e cosnan cu no ta nada, p’e haci e cosnan cu ta algo bira nada, pa ningun hende no gaba dilanti di Dios.”—1 Corintionan 1:26-29.

Awe, Dios tin e mesun interes sinsero den nos. E boluntad di Dios ta pa “tur hende wordo salba y yega na conocemento di e berdad.” (1 Timoteo 2:4) Si Dios a stima humanidad asina tanto cu El a manda su Yiu na tera pa e muri pa nos, nos no tin motibo pa sinti nos indigno of cu ningun hende no stima nos. (Huan 3:16) Hesucristo a mustra su siguidonan e importancia di trata asta esun di mas insignificante entre su rumannan spiritual como si fuera nan ta trata cu Hesus personalmente. El a bisa: “Tur loke boso a haci pa un di esnan di mas chikito di e rumannan aki di mi, ta pa mi boso a hacie.” (Mateo 25:40) Sin importa con mundo ta mira nos, si nos stima e berdad, nos ta special den bista di Dios.

Ta asina Francisco, * un huerfano di Brazil, a sinti despues cu el a desaroya un relacion personal cu Dios. E ta splica: “E echo cu mi conoce Yehova y su organisacion a yuda mi trata y vence mi sintimentonan di inseguridad y timides. Mi a siña cu Yehova tin un interes personal den cada un di nos.” Pa Francisco, Yehova a bira un berdadero Tata.

Interes den Hobennan

Yehova ta mustra interes den hobennan no solamente como grupo sino tambe como persona individual. Claro, sea cu nos ta hoben of bieu, hamas nos kier pensa mas di nos mes cu loke nos ta. Pero, kisas nos tin talento y cualidadnan cu Dios por uza den futuro. Yehova sa ki rafinamento y entrenamento nos mester pa uza tur nos potencial. Por ehempel, tuma nota di e relato den 1 Samuel capitulo 16. Otro candidatonan potencial pa bira rei di Israel a parce mas cualifica den bista di profeta Samuel. Pesei Yehova a splic’e pa ki motibo el a scohe David, yiu menor di Isai  (Yese), como futuro rei di Israel: “No wak su aparencia ni e haltura di su estatura, pasobra Mi a rechas’e [e ruman mas grandi di David]; pasobra Dios no ta mira manera hende ta mira, pasobra hende ta wak aparencia di pafo, ma SEÑOR ta wak curason.”—1 Samuel 16:7.

Hobennan por tin e confiansa awe cu Yehova ta mustra interes sinsero den nan? Tuma por ehempel Ana, un señora Brasileño jong. Manera ta e caso cu hopi otro hoben, corupcion y inhusticia tawatin e molestia. Un dia su tata a cuminsa bai reunion cristian cu ne y cu su ruman mohenan. Cu tempo el a cuminsa gusta loke e tawata siñando tocante e Palabra di Dios. Ana a cuminsa lesa Bijbel hunto cu e publicacionnan cristian y haci oracion na Yehova Dios. Pocopoco pero sigur, el a desaroya un relacion intimo cu Dios. E ta splica: “Mi tawata gusta core mi bais riba un sero banda di mi cas caminda mi por a mira solo baha den tur su splendor. Mi tawata resa na Yehova y gradicie pa su bondad y generosidad, tratando na expresa cuanto mi a stim’e. Siña conoce Yehova Dios y su proposito a duna mi trankilidad y un sintimento di siguridad.” Abo tambe ta purba saca tempo pa medita riba e manera amoroso cu Yehova ta cuida nos?

Kisas nos background ta stroba nos di por tin un relacion intimo cu Yehova. Tuma por ehempel Lidia. Ora el a confia su tata un asunto cu tawata molesti’e profundamente, e tata no a haci mucho caso di dje y a bis’e: “Co’i kens.” Aunke Lidia ta compronde cu su tata tawata kier pa e lubida e problema, e ta bisa: “Studiamento di Bijbel a duna mi tur loke mi a desea y hopi mas. E personalidad atractivo di Yehova a hacie mi miho amigo. Awor mi tin un Tata amoroso y comprensivo na ken mi por expresa mi sintimentonan y mi temornan di mas intimo. Mi por pasa oranan papiando cu e Persona mas importante den universo, cu e confiansa cu lo E scucha mi.” Textonan di Bijbel manera Filipensenan 4:6 y 7 a yud’e sinti e cuido amoroso di Yehova. E pasashi ei ta bisa: “No precupa pa nada; ma den tur cos, pa medio di oracion y suplica cu gradicimento, laga boso peticionnan ta conoci dilanti di Dios. Y e pas di Dios, cu ta surpasa tur comprondemento, lo warda boso curason y boso mente den Cristo Hesus.”

Yudansa pa Cumpli cu Bo Necesidadnan

Yehova ta mustra interes den su sirbidonan individualmente y tambe den su congregacion rond mundo. Nos por mustra nos amor pa nos Tata celestial door di tuma tempo pa papia cu ne. Hamas nos mag mira nos relacion cu ne como algo gewoon. David tawata constantemente conciente di su relacion cu Yehova. El a bisa: “Haci mi conoce bo camindanan, o SEÑOR; siña mi bo bereanan. Guia mi den bo berdad y siña mi, pasobra ta abo ta e Dios di mi salbacion; riba Bo mi ta spera henter dia.”—Salmo 25:4, 5.

Podise e idea di tin un relacion intimo cu Dios ta algo nobo pa bo. Sea cual sea e problema cu bo por tin, semper bo por confia cu e Haltisimo lo por yuda bo, na harmonia cu su boluntad. (1 Huan 5:14, 15) Pesei, siña haci bo oracionnan spesifico, tumando na consideracion bo circunstancia y necesidadnan.

 E oracion cu Rei Salomon a ofrece ora e tempel a ser inaugura ta resalta e importancia di reconoce nos necesidadnan. Salomon a bisa: “Ora tin hamber den e tera, of pestilencia, pispis of beskem, tiracochi bruin of tiracochi berde; ora nan enemigonan rondona nan den e tera di nan stadnan; cualke plaga of cualke malesa cu sea; cualke oracion of suplica cu un hende of cu henter bo pueblo Israel haci, ora cada un conoce su mes afliccion y su mes dolor, . . . e ora ei tende abo for di shelo, . . . y pordona, y duna cada un segun tur su camindanan.” (2 Cronicanan 6:28-30) En berdad, ta abo so ‘conoce bo afliccion y bo dolor.’ Ta masha vital anto pa reconoce bo berdadero necesidadnan y deseonan. Si esei ta e caso, “[Yehova] lo duna bo e deseonan di bo curason.”—Salmo 37:4.

Fortalece Bo Relacion cu Yehova

Yehova ta contento pa laga hende comun y coriente disfruta di un relacion intimo cu ne. Su Palabra ta garantisa nos: “‘Lo Mi ta un tata pa boso, y boso lo ta yiu hombernan y yiu mohenan pa Mi’, e SEÑOR Todopoderoso ta bisa.” (2 Corintionan 6:18) Realmente, Yehova y su Yiu kier pa nos tin exito y gana bida eterno. Ta masha alentador pa sa cu Yehova lo yuda nos cumpli cu nos responsabilidadnan den famia, na trabou y den e congregacion cristian!

No obstante, nos tur ta enfrenta temponan critico. Kebranto di salu, problema di famia, sueldo abou of otro cos por pone nos pena. Kisas nos no sa con pa trata cu un prueba. Esun cu ta culpabel pa e aumento di presion riba nos, sea directamente of indirectamente, ta e malbado Satanas e Diabel, kende ta bringando un guera spiritual contra e pueblo di Dios. Sinembargo, tin un persona cu si ta compronde nos y cu ta yuda nos mantene un bon relacion cu Yehova. Esei no ta ningun otro sino Hesucristo mes den su posicion eleva den shelo. Nos ta lesa: “Nos no tin un sumo sacerdote cu no por compadece di nos debilidadnan, sino un cu a wordo tenta den tur cos mescos cu nos, ma toch sin pica. Pesei, laga nos acerca e trono di gracia cu confiansa, pa nos ricibi misericordia y haya gracia pa yuda den tempo di necesidad.”—Hebreonan 4:15, 16.

E echo cu bo sa cu bo no tin nodo di ta famoso of rico pa disfruta di e fabor di Dios ta trankilisa bo! Asta ora bo ta den un situacion di angustia, sea manera e salmista kende a bisa den oracion: “Mi ta aflihi y den necesidad; sinembargo, Señor ta corda riba mi. Bo ta esun cu ta yuda mi y ta libra mi.” (Salmo 31:9-14; 40:17) Bo por ta sigur cu Yehova ta stima hende humilde y comun. Realmente, ‘nos por tira tur nos precupacion riba dje, pasobra E ta percura pa nos.’—1 Pedro 5:7.

[Nota]

[Plachi na pagina 29]

Hopi siguido di Hesus no tawata hende educa ni siña

[Plachi na pagina 30]

Cristiannan ta busca un fe fuerte

[Plachi na pagina 31]

Nos no tin nodo di ta prominente pa haya e fabor di Dios