Scohe Bida Eterno

NUNCA prome hende no tawatin asina tanto oportunidad di scohe. Tuma por ehempel, e pañanan cu nos ta bisti, e cuminda cu nos ta come, y caminda nos ta traha y biba. Hopi bes esakinan ta cosnan cu nos mes ta scohe. Na hopi parti di mundo ta normal tambe pa un persona mes scohe su casa. Sinembargo, Bijbel ta duna nos oportunidad pa scohe algo cu ta surpasa tur otro cos cu nos por scohe. Y ta tur hende tin e oportunidad aki.

Bijbel ta bisa: “Esun cu para firme den husticia lo obtene bida, y esun cu sigui maldad lo causa su mes morto.” (Proverbionan 11:19) Y Hesucristo a declara: “Esaki ta bida eterno, cu nan por conoce bo, e unico Dios berdadero, y Hesucristo, kende bo a manda.”—Huan 17:3.

Si, nos Creador ta duna nos e oportunidad pa scohe un estilo di bida cu por hiba na bida eterno! Kico nos tin cu haci pa haya bida eterno?

Segun Bijbel, “den e caminda di husticia tin bida.” (Proverbionan 12:28) Nos por ta entre e hustonan cu ta cana riba e caminda cu ta hiba na bida eterno. Con asina? Door di haci sigur cu nos bida ta na harmonia cu Dios su boluntad y su mandamentonan. (Mateo 7:13, 14) Pesei, laga nos tur scohe bon y ricibi e don di gracia, of e regalo, di bida eterno cu Dios ta duna.—Romanonan 6:23.