Alehandro VI—Un Papa Cu Roma No Ta Lubida

“FOR di un punto di bista catolico, no tin suficiente palabra pa condena Alehandro VI.” (Geschichte der Päpste seit dem Ausgang des Mittelalters [Historia di Papanan na Final di Edad Medio]) “No tin nada pa hustifica su bida priva . . . Nos tin cu admiti cu e pontificado aki no a trece honor pa Iglesia. E contemporaneonan di famia Borgia tawata custumbra di mira actonan bergonsoso. Pero loke nan a mira e famia aki haci ta crimennan sumamente horibel. Cuater siglo despues ainda e consecuencianan di loke nan a haci no a disparce por completo.”—L’Église et la Renaissance (1449-1517)(Iglesia y Renaissance).

Dicon obranan historico respeta cu ta papia di Iglesia Catolico Romano ta duna comentarionan asina severo tocante un papa y su famia? Kico nan a haci cu nan ta merece di wordo critica di e manera ei? Un exposicion cu tawatin na Roma (october 2002–februari 2003), titula I Borgia—l’arte del potere (Famia Borgia—E Arte di Poder), a duna hende un oportunidad pa reflexiona riba e poder exclusivo cu papanan ta afirma di tin, particularmente e manera cu e poder aki a wordo uza door di Rodrigo Borgia, esta, Alehandro VI (papa di aña 1492 pa 1503).

Con El A Bini na Poder

Rodrigo Borgia a nace na 1431 y a bin di un famia prominente na Játiva, den e reino di Aragon, cu awor ta keda na Spaña. Su omo Alfonso de Borgia, obispo di Valencia, a supervisa e educacion di su subrino y a percura pa ora Rodrigo tawata teenager ainda, e ricibi puestonan sacerdotal cu a trece beneficio financiero. Rodrigo cu 18 aña, bou di proteccion di Alfonso cu e tempo ei ya tawata cardinal, a bai biba na Italia y a studia ei pa abogado. Ora Alfonso a bira Papa Calixto III, el a nombra Rodrigo y un otro subrino cu yama Pere Lluís Borgia, como cardinal. Pere Lluís Borgia a bira gobernado di varios stad. Poco despues Rodrigo a ser nombra vicecansiyer di iglesia, un posicion cu el a mantene bou di reinado di varios papa. E posicion aki a yud’e haya varios puesto sacerdotal compaña cu hopi propiedad, y tambe acumula un enorme rikesa, eherce inmenso poder y biba na grandi manera un prins.

Rodrigo tawata inteligente, un orado elocuente, un patrocinado di arte y tawata sa kico pa haci pa e logra su metanan. Sinembargo, e tawatin varios relacion inmoral, anto a haya cuater yiu cu e amante cu e tawatin henter su  bida, y mas yiu cu otro hende mohe. Apesar cu Papa Pio II a scual e pa su inclinacion di participa den dibirticion “sumamente inmoral” y “placer desenfrena”, Rodrigo no a cambia.

Despues di morto di Papa Inocencio VIII na 1492, e cardinalnan di iglesia a reuni pa eligi un susesor. Ta bon conoci cu Rodrigo Borgia a uza ofertanan di rikesa material y puesto sacerdotal y tambe sarcasmo abierto pa cumpra suficiente voto for di e otro cardinalnan pa e sali como Papa Alehandro VI for di e reunion priva ei. Con el a paga e cardinalnan pa nan voto? Door di duna nan posicionnan eclesiastico, palacio, kasteel, stad, combento y obispado cu entradanan inmenso. Bo por compronde dicon un historiado di iglesia a yama e reinado di Alehandro VI “dianan bergonsoso y escandaloso pa Iglesia Romano.”

E No Tawata Miho cu e Prinsnan

Mediante e autoridad spiritual cu e tawatin como cabes di iglesia, Alehandro VI a yuda resolve e discusion cu tawatin entre Spaña y Portugal tocante e teritorionan nobo cu nan a descubri na America. Su poder politico a hacie cabes di e estadonan di iglesia cu teritorionan na Italia central, y el a goberna su reino casi mescos cu otro soberanonan di e periodo di Renaissance. Alehandro VI su reinado, mescos cu reinado di papanan cu tawatin prome cu ne y despues di dje, tawata caracterisa pa soborno, nepotismo (faboritismo na famia) y varios sospecho di asesinato.

Podernan rival tawata lucha pa teritorionan Italiano durante e tempo turbulento ei, y e papa no a sinta wak cu man crusa. Su tacticanan y combenionan politico—cu el a sera y kibra—tawata diseña pa e logra haya mas tanto poder posibel, pa su yiunan bai dilanti den nan carera y pa eleva famia Borgia riba tur otro famia. Su yiu Juan, a casa cu prima di e rei di Castilla y a bira duke di Gandía, Spaña. Jofré, un otro yiu, a casa cu nieta di e rei di Napoli.

Ora e papa tawatin mester di un aliado pa fortalece su relacion cu Francia, el a kibra un promesa di duna su yiu mohe Lucrezia di 13 aña den matrimonio na un noble di Aragon y na luga di esei a dun’e na un famia di e duke di Milan. Ora cu politicamente e matrimonio ei no a cumbinie mas, el a busca un pretexto pa anul’e, y el a casa Lucrezia cu un miembro di un dinastia rival, Alfonso di Aragon. Mientrastanto, Lucrezia su ruman homber ambicioso y cruel, Cesare Borgia, a sera un pacto cu Louis XII di Francia, y e matrimonio resien di su ruman mohe cu Alfonso di Aragon a hinca nan den un situacion precario. Kico tawata e solucion? Un fuente ta bisa cu Alfonso, e esposo desafortuna di Lucrezia, “a keda herida door di cuater homber cu a purba mat’e riba trapi di e Basilica di San Pedro. Y ora e tawata recuperando, un di Cesare su sirbidonan a strangul’e.” Debi cu e papa tawata desea aliadonan strategico nobo, el a haci areglo pa Lucrezia, cu e ora ei tawatin 21 aña, casa cu yiu di un duke poderoso di Ferrara.

Cesare su carera a wordo describi como “un relato di comportacion sin escrupulo, cora cora di sanger.” Maske Cesare su tata a nombr’e como cardinal ora e tawatin 17 aña, e tawata mas adecua pa guera cu pa asuntonan di iglesia, ya cu e tawata astuto, ambicioso y corupto manera su so. Despues cu el a entrega su puesto eclesiastico, el a casa cu un princes Frances, y di e manera ei el a bira duke di  Valentinois. Anto cu sosten di ehersito Frances, el a cuminsa un campaña di sitiamento y asesinato pa trece parti nort di Italia bou di su control.

Pa haci sigur cu Cesare lo tin e sosten militar di Francia pa e logra su metanan, papa a bai di acuerdo pa Louis XII di Francia haya un diborcio cu tawata cumbiniente pero escandaloso y cu lo a permitie casa cu Anne di Bretagne y asina a agrega Anne su teritorio di dukesa na su reino. Segun un buki di referencia, e papa en efecto “a sacrifica e prestigio di Iglesia y principionan stricto pa e haya bentahanan politico pa miembronan di su famia.”

Critica Contra e Comportacion Desenfrena di Papa

E comportacion desenfrena di famia Borgia a pone cu nan a haya enemigo y a wordo critica. Basicamente e papa a ignora esnan cu a critic’e, pero un hende cu e no por a ignora tawata Girolamo Savonarola. E tawata un monnik Dominicano, un predicado celoso, y un lider politico di Florencia. El a condena tanto e bicionan di e famia di papa como e accionnan y e politica di e papa mes, haciendo un yamada pa kita su puesto for di dje y pa trece reforma eclesiastico. Savonarola a bisa cu un bos fuerte: “Lidernan di iglesia, . . . anochi boso ta bai serca boso amantenan y mainta na boso sacramentonan.” Despues el a bisa: “[E lidernan ei] tin cara di prostituta, nan reputacion ta haci daño na Iglesia. Mi ta bisa boso, nan no ta kere den e fe cristian.”

Den un intento pa silencia Savonarola, papa a ofrec’e e posicion di cardinal, pero el a rechasa esei. Sea cu ta Savonarola su politica antipapa of ta su predicamento a causa su caida, finalmente nan a excomunic’e, arest’e, tortur’e pa e confesa, anto caba nan a horc’e y kim’e.

Preguntanan Serio

E susesonan historico aki ta lanta preguntanan importante. Con por splica e clase di intriganan ei y comportacion di un papa? Con historiadonan ta splica nan? Nan tin diferente argumento.

Hopi hende ta kere cu mester mira Alehandro VI den e contexto di e tempo cu e tawata biba. Su actividadnan politico y eclesiastico supuestamente tawata wordo determina door di su deseo pa salvaguardia pas, mantene ekilibrio entre estadonan rival, fortalece lasonan di amistad entre aliadonan cu lo defende e reinado di papa y mantene monarcanan di cristiandad uni contra e menasa Turco.

Pero kico di su conducta? Un experto a bisa: “Tur epoca di Iglesia a mira mal cristiannan y sacerdotenan indigno. Pa ningun hende no keda pasma pa motibo di esaki, Cristo mes a predeci esaki; asta el a compara su Iglesia cu un cunucu den cua bon yerba y mal yerba ta crece, of cu un reda den cua tin bon pisca y mal pisca, mescos cu el a asta tolera un Hudas entre su apostelnan.” *

E mesun experto a sigui bisa: “Mescos cu un hoya cu tin defecto no ta baha balor di un stenchi cu tin den dje, asina e picanan cu un sacerdote comete, basicamente no por afecta . . . e doctrina cu e ta siña. . . . Oro ta keda oro, sea cu ta man puro of impuro ta suministr’e.” Un historiado catolico ta argumenta cu e norma cu  catolico sinsero mester a sigui den e caso di Alehandro VI ta e conseho cu Hesus a duna su disipelnan tocante e escriba- y Farizeonan: ‘Haci loke nan ta bisa, ma no segun loke nan ta haci.’ (Mateo 23:2, 3) Pero honestamente, e rasonamento ei ta combence bo?

Esaki Ta Cristianismo Berdadero?

Hesus a laga un guia simpel atras pa test e calidad di hende cu ta bisa cu nan ta cristian: “Na nan fruta boso lo conoce nan. Hende sa kita wendruif for di mata di sumpiña anto, of figo for di bringamosa? Asina tur bon palo ta duna bon fruta; ma e palo malo ta duna mal fruta. Un bon palo no por duna mal fruta, ni un palo malo no por duna bon fruta. Asina anto, na nan fruta boso lo conoce nan.”—Mateo 7:16-18, 20.

En general, con lidernan religioso a cumpli cu e normanan rekeri atrabes di siglonan, y con nan ta cumpliendo awor cu e patronchi di cristianismo berdadero cu Hesus a establece y cu su berdadero sirbidonan ta imita? Laga nos considera djis dos area: metemento den politica y estilo di bida.

Hesus no tawata un prins mundano. El a hiba un bida asina simpel cu, manera el a admiti, e no tawatin ni sikiera un “luga pa pone su cabes.” Su Reino no tawata parti “di mundo”, y su disipelnan tampoco no mester tawata parti “di mundo, mescos cu [e no tawata] di mundo.” Kiermen cu Hesus a nenga di mete den asuntonan politico di su dia.—Mateo 8:20; Huan 6:15; 17:16; 18:36.

Sinembargo, no ta berdad cu pa siglonan organisacionnan religioso a crea e custumber di asocia cu lidernan politico pa nan haya poder y bentahanan material, maske esaki a resulta den sufrimento di e pueblo comun? No ta berdad tambe cu hopi di nan cleronan ta biba den luho, maske cu un gran cantidad di hende cu supuestamente nan mester sirbi, kisas ta biba den pobresa extremo?

Hesus su mita ruman Santiago a bisa: “Adulteronan, boso no sa cu amistad cu mundo ta enemistad pa cu Dios? Pesei, ken cu kier ta amigo di mundo ta haci su mes enemigo di Dios.” (Santiago 4:4) Dicon e ta bisa “enemigo di Dios”? Prome Huan 5:19 ta splica: “Henter mundo ta bou di control di e malbado.”

Un historiado di Borgia su tempo a skirbi tocante e moral di Alehandro VI: “Su manera di biba tawata desenfrena. E no tawatin ni berguensa ni sinseridad, ni fe ni religion. E tawata domina pa golosidad insasiabel, ambicionnan inmodera, crueldad barbaro y un pasion masha fuerte pa e adelanto di e tantisimo yiunan cu e tawatin.” Naturalmente, Borgia no tawata e unico miembro di e herarkia eclesiastico cu a actua di e forma ei.

Kico e Scritura ta bisa di tal comportacion? “Boso no sa cu e inhustonan lo no hereda e reino di Dios?” apostel Pablo a puntra. “No laga nan gaña boso; ni fornicado, ni . . . adultero, ni . . . esnan golos pa placa . . . lo no hereda e reino di Dios.”—1 Corintionan 6:9, 10.

Un di e obhetivonan di e exhibicion cu resientemente a tuma luga na Roma tocante famia Borgia tawata “pa compronde e personahenan grandi aki den e contexto di e tempo cu nan a biba . . . , pa compronde pero siguramente no pa absolve ni pa condena.” En realidad, nan a laga bishitantenan saca nan propio conclusionnan. Pues ki conclusion abo a saca?

[Nota]

[Plachi na pagina 26]

Rodrigo Borgia, Papa Alehandro VI

[Plachi na pagina 27]

E tata di Lucrezia Borgia a uz’e pa e logra haya mas tanto poder posibel

[Plachi na pagina 28]

Cesare Borgia tawata ambicioso y corupto

[Plachi na pagina 29]

Door cu Girolamo Savonarola no kier a keda keto, nan a horc’e y kim’e