Loke Nos Por Siña for di Parha

“MIRA e parhanan di shelo cu no ta sembra ni cosecha, ni ta warda den mangasina, y toch boso Tata celestial ta alimenta nan. Boso no tin mucho mas balor cu nan?” (Mateo 6:26) Hesucristo a bisa e palabranan aki den un famoso sermon cu el a duna riba un sero serca di Lama di Galilea. No ta su siguidonan so tawata su auditorio. Un multitud grandi di hende cu lo por a bira su disipel tambe tawata presente. Nan a bin for di tur parti di e pais. Hopi di nan tawata hende pober cu a trece personanan enfermo pa Hesus cura.—Mateo 4:23–5:2; Lucas 6:17-20.

Ora Hesus a caba di cura tur e hendenan enfermo, el a duna atencion na necesidadnan spiritual mas importante. Entre e lesnan cu el a siña hende tin esun menciona ariba.

Parha di shelo ta existi pa hopi tempo caba. Algun parha ta come insecto, otronan ta come fruta y simiña. Si Dios a percura asina un abundancia di provision pa parha, anto sigur E tin e capasidad pa yuda su sirbidonan humano haya nan pan di cada dia. E por haci esaki door di yuda nan haya trabou pa nan gana placa pa por cumpra cuminda. Of e por yuda nan haya un bon cosecha ora nan ta planta pa nan mes come. Anto ora cos ta preta, Dios por conmove curason di biciña- y amigonan generoso pa comparti loke nan tin di come cu esnan cu ta den necesidad.

Tin mas cos cu nos por siña door di observa parhanan cu sumo atencion. Dios a crea parha cu un instinto maraviyoso pa traha neishi caminda nan por cria nan yiunan. Laga nos considera dos diferente sorto di neishi. Na man robes tin un potret di un neishi di un tipo di souchi Africano (rotszwaluw). E ta traha su neishi den baranca of na muraya di un cas. Loke ta fungi como dak di un neishi asina ta un pida baranca cu ta sali afo of, manera bo por mira riba e potret aki, e rand di dak di e edificio. E neishi ta traha di pipita chikito di lodo poni pega pega cu otro den forma di un copi. Tanto e parha macho como e embra ta traha duro pa busca pipita di lodo, y por dura henter un luna pa nan caba di traha nan neishi. Despues nan ta fura e paden cu yerba y pluma. Nan tur dos ta yuda alimenta e yiunan. Loke bo ta mira akibou ta e neishi di un parha macho cu nan ta yama hilado enmascara (maskerwever). E parha Africano trahado aki ta vlecht su neishi di sprichi di yerba of pida pida fini di otro vegetacion. E por caba un neishi den un dia y por vlecht mas cu 30 den un solo temporada!

Kico ta e les cu nos ta saca? Si Dios a duna parha tanto e habilidadnan ei como material na abundancia pa nan traha neishi, siguramente E por yuda su sirbidonan humano pa haya un luga di biba. Sinembargo, Hesus a mustra cu un otro cos ta necesario si nos kier pa Yehova Dios yuda nos haya e cosnan material basico cu nos mester. Hesus a priminti: “Ma busca prome e reino di Dios y su husticia, y tur e cosnan aki lo wordo añadi na boso.” (Mateo 6:33) Kisas bo ta puntra bo mes: ‘Kico busca e Reino di Dios prome ta encera?’ Testigonan di Yehova, kendenan ta distribui e revista aki, gustosamente lo contesta e pregunta ei.